Ana Onimaki Emilio
E a tia ni kaotia nakoiu te riikan—ana bitiobi—bwa tera nanon “kamaiuaki n te onimaki.”
Tabeua namwakaina n nako, Emilio, te riikan temanna man ara uoote, e a karina n rangi n aoraki. A aki kona taian taokita ni kunea bwa tera aorakina. A uaia ngaia ma tinana n nako nanoia bwa e rangi ni waekoa ni mamaara ma ni kakaiaki naba. E uotia tinana nakon te onaoraki tabeua te tai ma e bon aki kona ni karekei taian kaeka.
Tinan Emilio e a uotia nakon te autinibootaki ibukin te kakabwaia n te nakoanibonga. Temanna kaain te kooram n unimwaane ao ngai, ana bitiobi, ti a tia ni karekea ara tai ni kakabwaia, ao e matu raoi n te moan tai n te tairiki.
E ngae n anne, tabeua te bong imwina I ataia bwa Emilio e a manga moanna ni bwaka n aoraki ao ni uotaki riki nakon te onaoraki. Ngai ma temanna te tari ti a waekoa n nakon te onaoraki, ike ti a kona n rin nakon ana ruu n nakoina. N iangoia bwa Emilio e na bwarannano ngkai e a bwaka riki n aoraki, I bon rangi ni kakorakoraaki n te bwai are e riki imwina.
Ti a taekina aron Iesu Kristo, ao I a kamataata bwa te Tia Kamaiu iai mwaakana n tokanikai iaon bwaai nako, ni kaineti ma Ana kantaninga. Ana kaeka Emilio e bon ringa nanou: “Bitiobi, bon aio te kakatai riki teuana. Iai au onimaki bwa e na waekoa n toki ibukina bwa iai au onimaki iroun Iesu Kristo.” Ti katokai baira iaon atuna ao n anganna riki te kakabwaia.
Imwin te tairiki anne e a karekea te marurung Emilio ae moan te kakubanako. E a bon kona ni karaoi ana mwakuri nako ni katoa bong ao nakon te ekaretia n akea te kangaanga.
E a tia Emilio ni karaoa te onimaki ae kainnanoaki ibukin te Tia Kamaiu ni karaoa te aekaki ni kakai are E a tia ni karaoia ngke E mena iaon te aba. I bon irou, Emilio bon te banna ni katooto ibukia naake e taekinia te Uea bwa tabeman aomata a tia n anganaki te onimaki bwa a na kamaiuaki (tara D&C 46:19).
E bon tamaroa karekean te tai ni kamwakuran te nakoanibonga inanon maiura ao n ataia bwa iai Tamara are i Karawa, ae tangirira, ao bwa n rinanon onimakinan Natina te mwaane, ti kona ni karekei taian kakai inanon boong aika kaitira.