Bain te Tia Kamaiu ni Kamaiu
N tain te kabuebue teuana ngke I ikawairake i Arkansas, a kaoai kaain rarikiu bwa N na iriia ibukin te kaemba ae uabong, n akawa, ao ni uaua n te karaanga ae bubura irarikin Sardis, Mississippi. Ti kabanei tabebong ni kakukureira ni waaki ni kakukurei n aekaia nako i tinaniku.
N ara kabane ni bong ao ti karekea ara kabanea ni uaua imwain ae ti okira mweengara. Ngke ti tabe ni karekare n te booro ngai ma raoraou, e kibarake te booro riaon atuu ao n tiku tabeua te mwaneka raroana mairou. E waekoa te ang ni ukuuka nako te booro mairou riaon te ran. I moana kakioakina, ma e teimatoa te ang ni ukukianako n te aro are e na aki kona n reke irou. N te tai ae uarereke I a roko n taian mwaake are a kaota tian te tabo n uaua ae ora. E a tia ni ubaranako te booro n riaon te mwaake ni kaineta oin rabwatan raoi te karaanga.
Ngke I a roko n te mwaake, I aki karaua ni iangoa ae N na uaua n riaoia. E aki rangi n raroa te booro i moau, ao I kakoaua bwa I kona ni raweia. Ma iaon bwaai ni kabane, I a bon tia ni kabanea au reirei iaon te kamaiu ao I bwaina ana kaniwanga te reirei iaon au kawaerake ni uaua. I namakina te mweeraoi inanon te ran ma n nanomatoa raoi bwa e bon tau korakorau ni kaoka te booro.
E ngae n anne, e teimatoa te ang, ni kararoa te booro mairou. N tabetai I a rangi ni kaan nako iai n te aro are I a kona n riinga n tii tabonibaiu, ma I a tii noria ni betinako riki. N tokina, te ang ae oro e a ukia nako riki n te aro are e a riaon ae I kona n raweia.
I aki ataia bwa ai raroara ae I a tia n mwananga iai ni karokoa ae I a toki bwa I motirawa. E tara n ae e rangi n roo ao ni mwaitoro riki te ran nakon are n te tabo ni uaua are e ora. Ngke I a tanrikaaki n tara te aba, I a ataia ae I a kaan nako nuukan te karaanga ae bubura. I a iangoia bwa N na mwanuokina te booro n takakaro n te bike ao ni uaua n oki nakon te aba. I a rangi ni kua ao n rootaki n te kainnano, ma I aki raraoma. I bon kairake ao I namakinna bwa N na bon nakoraoi.
Ma ngke I kataia n okira te aba, te ang ae e a tia ni buoka te booro n takakaro n te bike e a mwakuri ni kaitaraai. E tara n ae e aki kakaawaki bwa aekara aron korakorau are I uaua iai, ma e uarereke mwiin au kekeiaki. A moanna ni bue ao ni maraki rangau ao anganibaiu. I toki ao I a uaua ni kamea ao ni beibeti, ni kataia ni karekea korakorau.
Ngkanne I a ongo karongoan te bwai ae I kinaa—tangin te booti. I rangi ni kukurei ao e oki nanou ngke I a nora te mwaane n ana booti ae uarereke n tei irarikiu bwa e na kaokai nakon te aba. Akea angin baiu ma waeu. I aki kona naba ni waerakea te booti i bon irou, ai ngaia are I a katoka anganibaiu teuana iaon rarikin te booti ao n tautaua ao te mwaane are e aki kinaaki e karaurau ni katikai n oki nakon te tabo ni uaua. I kuriia teuana mai buakon mwaaken te tia, ni kaaki te booti ao I anga au karabwarabwa, ao I a uaua nakon te aba.
Tebwi ma nimaua te ririki imwiina ao I a manga reke naba n te kangaanga. Inanon te tai ae maan ao I a tia ni maiuakina maiu ae katobibiaki n taian bure ake I a tia n rinei. Ni karaoan babaire ni maiu ae boboto iaon ana iango te aonaaba ibukin bwaai aika kakaawaki ao ni ukoukori bwaai aika uarereke ke akea bonganaia a tia ni katukai ma te namakin bwa maiu e a mena inanon te kangaanga ae korakora ibukin au babaire ake I a tia ni karaoi. E bane korakorau, ao e aki koro nanon au kantaninga. Bwaai ake I a tia ni moana waakia a tiku n akea au kona ni karaoi, ao te roo e tara n ae e na kabwautai.
Ma te bwarannano I tang nakon Tamau are i Karawa. N ai aron te mwaane n te booti, e roko te Uea ni kamaiuai ngke I rangi ni kainnanoia. Rinanon ana burabeti te Atua ni boong aika kaitira, E kairai nakon Ana Boki Moomon. E kairai bwa N na toua kawain te rairannano ao e kaitiakai man au bure inanon te ran ni bwabetito. Imwiina E katukai n te tabo ni maiu ae riaon te bure ae rawawata are I a tia ni maiuakinna mai imwaaina, ike I a tia ni kataia bwa N na tiku iai man te tai arei.