Nakomai nakon Kristo
Taeka aika “nakomai nakon Kristo” bon te kakao. Boni ngaia te kabanea ni kakaawaki ni kakao ae ko kona n anga nakon te aomata temanna. Bon te kabanea ni kakaawaki ni kakao ae a kona ni butimwaia aomata nako. Man moan Kaokan te euangkerio ni boong aikai, bon anne te kaetieti are anga Iesu Kristo nakoia Ana taan tei. Te kaetieti nakoia bwa a na kauring, a na kabwarabwara, a na kaungaia, ao n reiakinia, ao ni kaoia ni kabane bwa a na nakomai nakon Kristo.”1
Kaain te Ekaretia ni kabane, ngke a butimwaea te berita ae tabu n te bwabetito, a riki bwa taan iriiria are a tia ni berita bwa a na tei ni kakoaua ibukin Iesu Kristo n taai nako n taabo nako are e mena iai teuanne ke neienne.2 Te kaantaninga ibukin ara kakoaua bwa ti na kaoia aomata bwa a na nako Nakoina.
Ngaira ni kabane ti riai ni kabanei nanora n reiakina aron kanakoraoan kanakoan te kakao anne. Ti ataia man ara atatai bwa tabeman a na aki kaeka. Ti tabeman ae a kaeka ngke E anga te kakao Te Tia Kamaiu n ana tai ni mwakuri ngke E maiu n rabwata. Ma moan te korakora kimwareireina irouia ake a kina bwanaana. Ao e korakora kimwareireira ngkana a Nakoina naake ti a tia ni kaoia.
Ataia Bwa Boni Ngaia te Kawai
E boni materaoi iangoan taai inanon oin maiura ngke a tia ni kaeka aomata. Ao ngai, I a tia n noora te banna ngke a butimwaea te kakao anne aomata. Ni katoai taai aikai e a tia te Tamnei ae Raoiroi ni kaoti koaua aika teniua nakoia. Namakinan aio e aki ira aron ae N na karinani, ma a bane n roko nako nanoia naake a nakon Kristo ni koaua.
Te moan, a na bon namakinna bwa ti te kawai ae a kona ni karekea iai te kukurei are a rangi n tangiria n te maiu aio ao n te aonaaba ae na roko bon ti rinanon Iesu Kristo. E na reke kakoauaan taeka aikai man Ana Booki Moomon: “Taraia bwa I taekinna nakoimi, bwa a koaua bwaai aikai, n aron ae maiu te Uea ae te Atua, bon akea te ara riki teuana are e a tia n taekinaki iaan karawa ma ti Iesu Kristo, are I a tia n taekinna, are a na kona ni kamaiuaki iai aomata.”3
Te kakoaua ibukin anne e aki beebete namakinana n te aonaaba ae a mwaiti iai bwana aika taekinna bwa akea te Atua, bwa akea te bure, ao bwa te kukurei e kuneaki ni kakukurein te maiu. Ma bwanara a kona ni korakora riki ngkana ti kona ni karekea te bwai n tituaraoi ibukin kaotan kakoauana bwa Iesu bon te Kristo ao te Tia Kamaiua te aonaaba. Te kakoaua e na korakora n roko man oin bwaai ake ko rinanona ma Ana Mwakuri ni Kamaiu Iesu Kristo are e mwakuri i nanon maium. Ngkana ko iangoia n angiin te tai bwa e kanga ni bita arom Ana Mwakuri ni Kamaiu ao ngkana ko anga am karabwarabwa n taai nako, ko na kunea bwa am kakoaua Ibukina e rikirake mwaakana n ringi nanoia tabeman. Ngkana naake ko kaoia man oin am kakoaua a namakina te kakoaua anne, a na bon kona ni butimwaia bwa aia Uea ao aia Tia Kamaiu. Ao butimwaeana anne, ngkana e roko, e na kakukureia nanoia ao nanom.
Te Berita ae Tabu ao te Ongeaba
Te kauoua, naake I kinaia are a tia n nako Nakoina a karaoa aia berita aika tabu bwa a na ongeaba Irouna ao n iriiria. E kona ni moanaki man kawakinan berita aika beebete, n aron warekan Ana Boki Moomon ke kaean te bootaki n toa. E na riai n reke man aia onimaki bwa Iesu bon te Kristo ao te Tia Kamaiu. Ngkana a kawakina aia berita n aia onimaki anne, a na namakina te bwai teuana. A na aki kona ni kabwarabwara te namakin anne n taian taeka, ma a namakina ae raoiroi riki. Te ongeaba, ni bwaai aika uarereke naba, a uota te kakabwaia anne mairoun te Atua. Ao inanon taina a na moanna n namakina te nano ni kan raira nanoia ao iriana tangiran karaoan te berita ae tabu n te bwabetito, ni katoka aran te Tia Kamaiu iaoia, ao a na kaitiakaki man aia bure.
A mwaiti bukin karaoan te rinerine ae kakaawaki anne irouia aomata. N te moan tai temanna te mwaane ae ti reireinna e aki noora riaina bwa e na bwabetitoaki. Irarikin anne, e a tia ni kataia ni karaoa ae raoiroi inanon maiuna. Akea te bure ae kakaiaki ae e a tia ni karaoia. E a tia ni bwabetitoaki ngke te tei n te aro teuana. Ma imwiina a roko bwaai aika uoua n ana iango. Teuana bwa e bon bwabetitoaki te Tia Kamaiu ibukina bwa E kan ongeaba, ao akea Ana bure. Ao are teuana bwa e tangiria ni karaoa ana berita nakon te Tia Kamaiu rinanon te kariaiakaki n te nakoanibonga ae koaua, n aiaron te Tia Kamaiu ngke e nakon Ioane bwa E na bwabetitoaki.
Temanna te ataeinimwaane ae ti reireinna e rineia bwa e na bwabetitoaki imwiin uruakin nanona n te nanokawaki ae namakinna ibukin ana bure. Ngke e aerake man te ran ni bwabetito, e rabwatai, ao a bwaro ranin matana, ao e taetae nakon taningau, “I a itiaki. I a itiaki.”
Aia rinerine ni karaoa te berita ae tabu n te bwabetito e bwebwerake man te onimaki ae kabuta. A ataia bwa ngkana a kawakin aia berita ae tabu n ongeaba nakon Ana tua te Tia Kamaiu, E na bon kawakina Ana berita ma ngaia ni kairia nakon te maiu are akea tokina. A bon tauraoi n nako Nakoina bwa aonga ni kona ni bitaki ao ni kairaki Irouna ao, n te taina, a na riki n ai Arona.
Keiakinna n Riki n Aiarona
E kairiira nakon te kateniua ni bwai are I a tia n nooria inanoni maiuia naake a bon nako Nakoina ni koaua. A kekeiaki n riki n Aiarona. A moanna ni kataia ni karaoa are E na karaoia nakoia tabeman. Ngkoe ao ngai ti a tia n noora anne irouia aomata aika kakaonimaki imwiin aia bwabetito ao reken te Tamnei ae Raoiroi. N te taina, I nako ma toau ni mitinare ni kawara te utu are ti a tia n reireinia ao ni bwabetitoia tabeua te wiiki n nako. Kaaro a kairira ni kaota aia ruu ae mena iaan aia auti. Bon ana ru ni matu temanna mai buakoia natia aine aika uoman. Ma ngkai e a mwaing nako rarikin tarina. Te ru ni matu are e kitanna e kanoaki ni bwaai ni kabane are e na kainnanoi te utu ibukin kangaanga aika karina.
Akea te bwai ae ti reireinia ibukin te katauraoi ibukin kangaanga. Ti titirakinia bwa e aera a karaoa te bwai ae kangaanga n te tai ae waekoa, a kaeka bwa a warekia n ana maekatiin te Ekaretia bwa te Uea e tangiria utu bwa a na tatauraoi n tararuaiia ma tabeman. A taku, “Tiaki ngaia anne ae a kakaraoia Aomata Aika Itiaki ni Boong Aika Kaitira?”
A reita aia onimaki ae beebete aio nakon bwaai ni kabane are a namakinna bwa e tangiria te Tia Kamaiu bwa a na karaoia. Ao nanoia ni kan iriiria e teimatoa. Ao a bitaki iai. A bon akoi n taai nako, ni kataia ni buokia tabeman. Ma te konabwai ni kaota te tangira ae kororaoi e rikirake. Ao ai bon anne te banna irouia ni kabane naake I a tia ni kinaia aika reiti nako n nako Nakoina i nanoni maiuia.
N tabetai ti taekina kateimatoaia kaain te Ekaretia bwa tukaia bwa a na aki nako. Ti kona ao ti riai n riki bwa rao nakoia naake a tia ni karaoa aia rinerine bwa a na nako Nakoina. A kona ni bwara n nano ngkana a roko katakia, n aron kataki aika aki toki n roroko. E ngae n anne ma ti riai n uringnga bwa te rao ae te kabanea n tamaroa ao ae koaua ae a kona ni karekea bon te Tia Kamaiu ao Tamana, are bon Tamaia naba. Tamara are i Karawa ao te Tia Kamaiu a na kanakoa te Tamnei ae Raoiroi bwa e na karaua nanoia ao ni kamatoa aia onimaki ngkana a ongeaba ma te nanorinano. Te katooto, ngkana ko kakawari n reirei ke ko reirei n te mweenga ma kaain te Ekaretia ae boou, ngkana ko angan teuanne ke neienne ana tai n tataro ke n anga reirei ke ni karaoa te tai are e na kawaraki iai, ko kona n angan teuanne ke neienne kakorakoraana riki nakon ae ko ti kaota am tangira. E na karuoa mwaakan karawa. Ao anne te bwai ae na tabekia rake rinanon kataaki ao kamanoaia man te kainikatonga ngkana a moanna n roko kakabwaia nakoia, n aron ae ataaki bwa a na bon roko kakabwaia.
Bitakin Nanoia
Iai te bwai ae tamaroa ae na riki. Ngkana ko anga nanom bwa ko na kaoia aomata bwa a na nakon Kristo, e na bitaki nanom. Ko na bon tabe ni karaoa Ana mwakuri Ibukina. Ko na kunea bwa e kawakina Ana berita n riki n ti teuana ma ngkoe n am mwakuri. Ko na bon kina. Ao inanon taina ao ko na riki n Aiarona ao “ni kakororaoaki irouna.”4 Man buokaia tabeman bwa a na nako Nakoina, ko na kunea bwa ko a tia naba n nako Nakoina. Ngkana ko kan kaania, n namakina Ana rau, ko na kona ni karaoia raoi ngkana ko beku Ibukina.
Boni Ngaia are e taekina ae:
“Bane mai Nakoiu ngkami akana kam kua ao kam rawawata, ao N na motiki rawami.
“Amoa amou i aomi, ao reirei i Rou; bwa I nimamannei ao I nanorinano; ao e na reke iroum iai motikan rawaia tamneimi.
“Bwa e aoraoi amou, ao e bebete uotau.”5
I kakoaua bwa E na kawakina ana berita nakoia naake ti kaoia Ibukina. Ao E kawakina te berita anne nakoia naake a beku Ibukina ni karaoa te kakao.