Ti Kakoaua
Aikai tabeua kaeka aika kimototo nakon titiraki tabeua are aki toki n titirakinaki iai kaain Ana Ekaretia Iesu Kristo Ibukia Aomata Aika Itiaki.
Tera ae a kakoaua Aomata Aika Itiaki ibukin Iesu Kristo? E bon kautaki man te mate? E na manga oki nakon te aonaaba ma te mimitong? E kainnanoaki Ana akoi ibukin kamaiuan te aomata?
Aikai tabeua aia titiraki aomata ake a taekini ngkana aia moan tai n roko n te Ekaretia ke ni kaitibo ma kaain te Ekaretia. Ngkana a na kaekai titiraki, kaain te Ekaretia a riai moa n tauraoi ni kakauongo nakon Ana kairiiri te Tamnei ae Raoiroi. Ma kaeka aika kimototo aika kaotaki ikai a kona ni kaoti bwaai aika a na iangoaki ngkana ti kataia ni katauraoa ara kaeka.
Ko kakoaua Iesu Kristo are taekinaki n rongorongon ngkoa are e maeka ao n anga reirei n te Aba ae Tabu, n aron are koreaki n te Baibara?
Eng. Ti kakoaua bwa e bungiaki Iesu iroun Maria, are kabwarabwara n te Aba ae Tabu n Ana tai ni mwakuri inanon teniua te ririki, E mate i aon te kaibangaki, ao e kautaki mai buakoia maate, n aron are a kaman taekinna burabeti inanon taian tienture imwaain rokona (ibukin te katooto, tara Karikani Bai 49:10; Taekan Rabakau 2:6–7; 22:16–18; 118:22; Itaia 7:14; Mika 5:2). Ti kakoaua bwa e kammarakaki ao e mate ibukin aia bure aomata ni kabane, bwa e aonga n reke te rairannano ao kabwaraan buure (tara Itaia 53:4–6). Ti kakoaua bwa E tokanikai i aon te mate ao bwa rinanon Mwaakana, mwaane ao aine ni kabane a kona ni maunga uti ma rabwataia (tara I-Rom 6:5; 8:11). Ti kakoaua bwa rinanon te ongeaba nakon tuua n Ana euangkerio, ao natin te Atua aika mwaane ao aine ake a roko nakon te aonaaba a kona ni karekea te kamaiuaki ao n oki ni maeka ma Tamara ao Natina n Abanueaia i karawa (tara 1 Betero 3:18; Taekan te Onimaki 1:3).
Ko kakoaua bwa e bon kautaki man te mate te Uea?
Eng. N aron aia kakoaua Ana Abotoro n te Baibara, Iesu Kristo e bon nooraki rabwatana are manga kautaki irouia taan kakoaua aika tebubua mwaitiia (tara Ruka 24:39; Ioane 20:20; 1 I-Korinto 15:3–8). N rabwatana ae e a tia ni manga kautaki, E mwakuri ibuakoia Ana “tiibu ake tabeman” aika nga ma nga (Ioane 10:16) i America, E kaoti nakoia ikoakin baina ao waena ao rarikina ao e anga reirei ibuakoia inanon boong aika bati (tara 3 Nibwaai 11–28).
Ni ikotaki ma Tamana are i Karawa, E kaoti n te 1820 nakon Iotebwa Timiti te tei. Te Uea e kaira te burabeti ae kairake aio bwa e na manga kaoka Ana Ekaretia ao Ana euangkerio ibukina bwa e a tia ni bitaki ni karinaki iai reirein aon te aba imwiin mateia Abotoro ake ngkoa. Iotebwa Timiti ao temanna raona a anga te kakoaua aei ibukin Iesu Kristo n te 1832, bwa E maiu. A taekinna bwa a nora te Tia Kamaiu i angatain te Atua, ao a ongo te bwana are kaotia bwa boni Ngaia Ana Riki Temanna te Tama (tara D&C 76:22–23).
Ko kakoaua bwa E na manga oki nako aon te aba ma te mimitong?
Eng. N aron te kakoaua ni booki aika tabu: “Bwa Iesu aei, are uotaki rake mai iroumi nako karawa, E na manga nako mai n ai arona ngkai kam noria, bwa e a nako karawa” (Mwakuri 1:11). “Ma I ata au tia kamaiu bwa E maiu, ao E na tei rake rimwi i aon te aba ” (Iobi 19:25). E na roko n te nang mai karawa bwa E na tautaeka i aon te aba i aoia ana aomata (tara D&C 76:63).
Ni ikotaki ma anne, ti kakoaua bwa ibukin Mangautina, ngaira naba ti na manga karekei rabwatara: “Ao rimwi ngkana e a tia ni kamaunaki kunu ae rabwatau aei, Ao N na bon nora naba te Atua ni irikou” (Iobi 19:26). “Bwa aroia aomata, ngkai ti bane ni mate iroun Atam, ao ai aroia naba bwa a na bane ni kamaiuaki irouni Kristo” (1 I-Korinto 15:22). “Maten Kristo e na kabwara ana kabaebae te mate n rabwata, bwa ni kabane aomata a na kateirakeaki man te mate n rabwata. Te tamnei ao te rabwata a na manga ikotaki riki n aroia ae kororaoi” (Aramwa 11:42–43).
Ko kakoaua bwa e Kainnanoaki Ana akoi ibukin kamaiuakira?
E boni koaua anne. N akean Ana akoi Iesu Kristo, akea temanna ae na kona ni kamaiuaki ke ni karekei kakabwaia aika akea tokia (tara I-Rom 3:23–24). Rinanon Ana akoi, a na bane ni manga kautaki ao naake a kakoauaa ao a iriiria a kona ni karekea te maiu ae akea tokina (tara Ioane 3:15). E ngae n anne, rinanon Ana akoi, ao reitakira aika tabu ma buura ao ara utu a kona n reiti nako n akea tokia (tara Mataio 16:19; 1 I-Korinto 11:11; D&C 132:19). Kakabwaia aika akea tokia aikai bon Ana bwaintangira nakoira; bon akea te bwai ae ti kona ni karaoia i boni iroura ae e na tau ibukina ke ni karekei nakoira.
E ngae n anne, a kamataata koroboki aika tabu bwa ti karekei bwaninin kakabwaia n Ana akoi rinanon ara onimaki ao ara ongeaba nakon Ana reirei. Te Abotoro ae Bauro e reirei bwa ti aki kona ni kamaiuira i bon iroura; ti kainnanoa ana akoi te Uea: “Bwa kam kamaiuaki n te akoi i bukin te onimaki; ao kam aki naba i roumi: bwa bon ana bwai n tituaraoi te Atua: ao kam aki kamaiuaki n taiani mwakuri, bwa e kawa ni kamoamoa temanna. Bwa bon ana mwakuri ngaira, aika ti karikaki i nanoni Kristo Iesu i bukini mwakuri aika raraoi, ake E karaoaia te Atua ngkoa bwa ti aonga n nakonako iai” (I-Ebeto 2:8–10).
E kabwarabwara Iakobo: “Ao ai aron naba te onimaki, ngkana akea ana mwakuri, ao e mate ngkai ti ngaia… . Kam nora te aomata bwa e karaoiroaki n ana mwakuri, ao e aki n ti te onimaki.” (Iakobo 2:17, 24). Ngaia are te Tia Kamaiu e kona n tuanga te ataeinimwaane ae kaubwai are bwabwaina te ongeaba ao e tangira te maiu ae akea tokina bwa e mwaiti riki ae na karaoia (tara Mataio 19:16–22; Ruka 18:18–23). Aomata Aika Itiaki ni Boong Aika Kaitira a kakoaua bwa Ana akoi Kristo e kabwaninaki korakorana nakoia naake a kakoaua Kristo ao a karaoi mwakuri are e reiakini. “Ti ataia bwa bon rinanon te akoi are ti kamaiuaki, imwiin bwaai ni kabane ake ti kona ni karaoi” (2 Nibwaai 25:23; e katuruturuaki).
E ngae ngke ara mwakuri aika raraoi a aki kona ni kaitiakira man ara bure, a bon kaota nanora ae korakora ibukin ara onimaki iroun Iesu Kristo ao ara kakaonimaki n te kawai are E toua.
Ko kakoaua bwa Iotebwa Timiti e bon kakannato n anga tabeua n aron Iesu Kristo ibukin buokan kamaiuaia aomata?
I aki. Iotebwa Timiti bon te burabeti ae kakannato n rongorongoia aomata. Te mwakuri are e karaoia iaan Ana kairiiri te Atua e karokoa nakon te aonaaba kakabwaia ao atatai ake a anganaki Ana burabeti te Atua ao taan iriiria n tain ngkoa te O ao te Nu Tetemanti ma a tia ni bua. Iotebwa Timiti, n ai aroia burabeti n taai ake ngkoa, bon ana toro te Uea ae Iesu Kristo are e anga reirei bwa te kamaiuaki ao kakabwaia ni kabane are akea tokia a ti kona n reke rinanon ara Tia Kamaiu: “Boton tuua n ara aro bon aia kakoaua Abotoro ao Burabeti, ibukin Iesu Kristo, bwa E mate, e taunaki, ao e manga uti n te katenibong, ao e rierake nako karawa; ao ni kabane bwaai ake a irekereke ma ara aro bon iriana.”1 N te tai teuana te Burabeti e anga te reirei aei, “Ngkana ti iangoa tabun ao kororaoin ara Mataniwi ae kakannato, are e a tia ni kauka te kawai are ti a kona iai n nako Nakoina, are E bon anga Ngaia bwa te karea, a na bon marau nanora ibukin ana nanorinano.”2