Au Baka n Amwarake n te Itita ae Aki Kantaningaaki
Te itita bon te bong ni motirawa ae onoti n taai nako inanon au tai ni ikawairake. Imwiin te taromauri a na bae au karo n reireia te utu te reirei iaon te Mwakuri ni Kamaiu ao te Mangauti; ao n te tairiki ao ti na bae ni karaoa te baka n amwarake ae moan te kangkang. N tabetai a raoniira raoraora n ara katairiki n amwarake, ae bon rangi ni kakukurei ao ma ni kangkang. Ibukin taian katei aikai, e a riki te Itita bwa te bong ni motirawa ae rangi ni mamate nanou iai—bon ana tai te utu ae tabu n bukamarua Mangautin te Tia Kamaiu.
Teuana te ririki inanon au kamatebwai i London, I a kunea bwa I tiku tii ngai n tain te Itita. E aki botaki au uoote ni karokoa ae e a rangi ni bwakantaai, ai ngaia are auan te ingabong e a rangi n tara n abwabwaki imwaain tain te Taromauri. I iangoa au utu, ae a raroa nako, ni bukamarua te bong arei n akea ngai, ao I namakina te akea n anginnano ma te nanokawaki.
N te moan tai I tangiria ni kakaea kukureiu ibukin nanoangaeakiu, ma imwiina I moanna ni iangoia bwa tera ae I kona ni karaoia n te bong bwa e na korakora riki nanona. E nako au iango nakoia aomata ake I kakaitibo ma ngaiia n te kawai i aan tano ae ononrake irouia aomata. N aron are n taian kaawa aika bubura, te kawai i aan tano e bon riki bwa te katantan n tabetai irouia mwaane ao aine ake a bubuubuti te mwane. I a namakina te nanoanga ibukin kainnanoia, ao I ataia bwa tiaki tii ngai ni maeka i London ni kabanea au Itita n tii ngai. Buokakiia aika ko aki kinaia e na tara n riki bwa te kawai ae raoiroi ni kaotan au kakaitau ibukin taian Itita aika tamaroa ake I a tia ni kukurei inanona n au tai n ataei.
I karaoi taian bakete ni katawanou aika kanoaki n te tiaeniwiti, uaanikai, bwerena, ao taian mooi. Imwiina I waekoa ni kaineta te kawai i aan tano, ni kakaeia aomata ake I a tia ni katinanikuia n tabetai. Angiina a rangi ni kakaitau ni koaua ibukin te amwarake. I taekinna nakoia n tatabemaniia, “Kukurei n te Itita!”
Ngke ai tii teuana nikiran te katawanou, I a roko iroun te mwaane ae bwarannano imwiin aki karauana. A rangi ni bareka ana kunnikai, ao ko kona n nora ubuna ae e a tia n rangi ni korakai, ao matana e kaota te nanokawaki ae korakora. Ngke I anganna ana katawanou, e tararake n taraai ma te mimi.
“Tera te baei?” e titiraki.
“Te katawanou, nao,” I kaeka.
“Ko rabwa, ko rangi ni bati n rabwa,” e taku. E waekoa ni bitaki taraan ubuna nakon te kakukurei ao te kakaitau. E ingarakea te bakete ni konna, ao e taua kanga ti tebo ma te kaubwai ae rangi ni kakaawaki.
“Teraoi naba ngkoe,” I taku, ao I riingaki n aron taraan ubuna. “Kukurei n te Itita, nao.”
“Kukurei n te Itita!” e kaeka.
Ngke I okira mweengau, ana taeka te Uea are Beniamina e roko nakon au iango: “Bwa taraia, tiaki ngaira taian rarikin ni kabane?” (Motiaea 4:19). I a ataia bwa n akean te Tia Kamaiu, ngaira ni kabane ti na bane ni teweaki nako, ni bwarannano, ao n tiku ni maroa. Ma e anga baina te Tia Kamaiu nakoira n taai nako ao n anganiira te bwai ae ti rangi n tangiria: te kantaninga bwa ti kona ni itiaki, bwa ti na manga maiu riki, ao bwa ti na manga oki Nakoina n te bong teuana.
Ngkai I kaaitara ma te bure ao te mate, I tei naba i matan te Tia Kamaiu n ai aron te tia bubuti. E anga baina nakoiu n anga ana nanoanga. N te bong teuana ngkana I a tei i Matana, e na mwakoro iaon ubu te kakaitau ae moan te korakora, n aron are I a tia n noria, ni itera tabeua aika uarereke, iaon ubun te mwaane ae mangori aei.
Inanon nakonakou n okira mweengau, I moana tangiu. E bua maroaau, n oneaki mwiina n te kimwareirei ao te ataibwai ae nano riki n ana taeka te Uea Beniamina ao n ana nanoanga te Tia Kamaiu. I tataro ni kainabwabu ni karabwarabwa nakon te Uea ibukin ana bwaintangira te mwaane aei nakoiu ae aki kantaningaaki. I a tia n anganna ana katawanou ae beebete; ao e a tia n anganai boon mwiina te baka n amwarake n te Itita ae koaua.