KANTANINGAAN TE MANGAUTI
Ngke e a okira mweengana kaainabau ae tangiraki nakon Tamara are i Karawa, e a riai ibukin ara utu bwa ti na kakaea te tabo ni mate ae tamaroa. Ibukin karaoan aei, I a kaitara ma te totoko ngke I a tangiria ni korea te mwakoro n taeka ae tabo ni motirawa iaon atibun etan atuun te mate. Te kibuntaeka aio e aki ira te tua ni kaineti ma te waaki n tararua n te ruanimate.
Ngaia are e riki te waaki ae kangaanga. N tokina te minita ibukin te ekaretia are a bwaina te tabo ni mate arei e a titirakinai ni kaineti ma te kibu n taeka arei. I a karekea au tai ni kaota au koaua bwa I onimakinna ngkana e a roko raoi te mangauti ibukin te rabwata, n ana taeka te Tia Kamaiu: “Ana bane n ongo bwanana ake a mena inanon ruaia mate, ao a na oti nako; akana karaoa ae raoiroi, nakon te mangauti are ana bwai te maiu” (Ioane 5:28–29). I kakoaua bwa te ruanimate aei bon te tabo ni motirawa ae tabu ibukira ni karokoa te Mangauti.
Imwina te minita e a karaoa te iango ae moan te tamaroa: “Korei taian taeka aika iaon atibun etan atuun te mate: ‘Te utu ae te Bohne ao Lehmann a motirawa ikai n tataninga te Mangauti.’” Ngaia are e a karaoaki aei. Ao ni karaoan aei, e a koreaki iaon te atibu au koaua.