“Boni Ngai te Kawai”
E anga te reirei ae kakaawaki ngke E kangai te Tia Kamaiu, “Boni Ngai …”
N tabetai ko na kona n ururinga te bwai ae riki ma koroboki aika tabu man taian banna aika karina n reke nakoim ngkana ko a wareware. N aron te katooto, e a tia n reke nakoim ni mwaitin te tai n ana Euangkerio Ioane are e taekinna bwa Iesu e taekina te taeka ae “Boni ngai”? Ngke e taekina aio Iesu, e bon aki toki ni karaoa te kabotau bwa aonga aomata n ataia bwa antai Ngaia ao tera ae E karaoia ibukia. Tarai raoi taian kabotau aikai, ao ko na bon reiakina ae mwaiti ibukin te Tia Kamaiu.
Te Berena ni Kamaiu
“Ngai te berena ni kamaiu: ane nako Iu ao e na bon aki baki; ao ane onimakinai ao e na bon aki taka… . Ngai te berena are kamaiu are ruo mai karawa: ngkana e amwarake n te berena aei te aomata, ao e na maiu n aki toki” (Ioane 6:35, 51).
Te Toa ibukin te Riao e kauringa kamaiuaia tibun Iteraera mai Aikubita ao ni ikotaki ma kanakin te burawa are e aki karikaki. Ngke e a uakaan te waaki ni kauring aei, e karaoa te kakai Iesu ibukin kamwarakeaia 5,000. A mwaiti ake a noora te kakai aei ao a iririia ibukina bwa E a tia n angania te amwarake, ma E bon reireinia bwa a na kakaea te amwarake “ae teimatoa nakon te maiu ae aki toki” (Ioane 6:27). Imwina E reireinia taekan te manna, ni kauringira bwa e roko mai karawa ni kamwarakeia tibun Iteraera inanon te rereua. E taekinna, “Ngai te berena ni kamaiu,” e tuangia ibukin te amwarake n tamnei are e kanakomaia Tamana are i Karawa rinanona, ao n aron naba te berita are E uotia ibukin te maiu ae akea tokina.
N tain Toan te Riao imwina riki, e kabongana Iesu te berena n onea mwin rabwatana bwa kanga mwakoron te toa. Ngkana ti kana te berena ni katoa wiiki n tain te bootaki n toa, ti a bon kauringaki ibukin Iesu Kristo—Ana anga karea, Mangautina, ao te berita ibukin teimatoan kanan tamneira rinanon raonakira iroun Tamneina.
Otan te Aba
“Otan te aba Ngai: ane irai ao e na bon aki nakonako n te ro, ma e na karekea te ota ni kamaiu” (Ioane 8:12).
E taekinna Iesu bwa Ngaia Otan te Aba n tain te Toa n Umwa n Rianna. Ni katoa tairiki n tain te toa a bane ni kauraaki tauran te tembora ni kanikinaea Otan te Atua, are e kanakoaki nakon te aba. E taekinna Ioane bwa Iesu “bon te Ota ni koaua, are kaotaia aomata ni kabaneia are roko iaon te aba” (Ioane 1:9). Ao rinanon te Burabeti Iotebwa Timiti e kaotia te Uea bwa Otan Kristo bon rinanona ae ngaia are e kaotai ara taratara; bon te ota naba are e kaotai ara atatai ao n anga te maiu nakon bwaai ni kabane ao bon te tua are e bane n taui taekan bwaai ni kabane (tara D&C 88:11, 13).
A kaotaki ara kantaninga ao tamneira rinanon Iesu Kristo. E kaira kawaira Otana, ni buokira ni kaota ae raoiroi ao ae buakaka ao e kaota nakoira te kawai nakon te maiu ae akea tokina.
Te Kai ae te Kureebe ni Koaua
“Ngai kaina, ngkami mwangana: Ane maeka inanou, ao Ngai inanona, ao e kariki uaa aika bati: bwa kam aki kona te bwai teuana ngkana kam a raure ma Ngai” (Ioane 15:5).
E kabotaua Iesu ma te kai ae te kureebe ni koaua. Kain te kureebe aei e aki ti taua rabwatan te aroka ni wakaana nakon te tano, ma e bon kamwarakeia ni kabane taian mwaanga ake a uarereke, ake a bwebwe mai iai ao a kariki uaa. Iesu Kristo bon boton ara kantaninga oin reken kanan tamneira ao rikirakera. Ti karekea te korakora Irouna are ti kainnanoia bwa ti na maiu ni kororaoi ao ni karaoi mwakuri aika raoiroi. Bon Ngaia naba aan te Ekaretia ao oin reken te kariaiakaki n tataekinan te euangkerio ao ni butinako ni kabuta te aonaaba.
Te Tia Kawakin Tibu ae Raoiroi
“Boni Ngai te tia kawakin-tibu ae Raoiroi; ao I ataia au tibu, ao a atai au tibu” (Ioane 10:14).
Oin taben tia kawakin tibu bon te kairia tibu nakon te amwarake ao te ran ao ni kaokia nakon kamanoaia nakon te nanai. Te tia kawakin tiibu e kamanoia tibu man te kangaanga n aron maan aika kakang ao taan iraa. Ibukina bwa e ataia ana nanai, e kona n ataia ngkana e bua ana tibu, ao e nako ni kakaea. A ongotaeka ana tibu irouna ao a onimakinna ni koaua.
Iesu, bon te tia kawakin Tibu ae Raoiroi, e weteira ngkana ti bua, ao ngkana ti reiakinna ni kawakin Ana taeka, E kairira nakon tawana aika katanaki ibukin te kamaiuaki ao te maiu ae akea tokina, ni kamanoira man taian kangaanga ibukin te mate ao te bure.
“Bon iai Ngai”
“E taku Iesu nakoia, E boni koaua ae I tuang ngkami bwa ngke e tuai ni bungiaki Aberaam, ao bon iai Ngai” (Ioane 8:58).
N aron ae, ti taekinna, “Bon iai Ngai,” e taekinna ni kabane Iesu. Ma aei, E taekinna bwa bon Ngaia te Tia Karikibwai ibukin te aonaaba ao Iehova, te Atua n te O Tetemanti, are bon arana ni koaua nanona “Ae Ngai” (tara Te Otinako 3:14).
Iesu bon Natin te Atua, te Mesia ao te Tia Kamaiu, ngaia are kamaiuira man ara bure ao te mate. Ibukina bwa antai Ngaia ao tera are E a tia ni karaoia ibukira, ti a kona ni karekea te maiu ae akea tokina ao n riki ngaira n aron ae ti bon riai.