Ne Fakamoʻui Nai Au?
Naʻe kole mai hoku kaumeʻa ko Lesielí ke ma maʻulotu mo ia. Naʻá ne ngāue mālohi ʻi he tui naʻá ne kau ki aí pea ne u fie ʻilo pe ko e hā e kehekehe hono siasí mei hoku siasí. Ne u poaki ki heʻeku mātuʻá ke ma ō. Naʻá na talamai ʻe lava ke ma ō he ʻoku ʻikai fepaki ʻenau taimi lotú mo ʻetau taimi lotu ʻatautolú.
Naʻe lahi e ngaahi meʻa fekauʻaki mo hono siasí naʻe kehe kiate au: naʻe kehe ʻa ʻenau ngaahi hivá mo ʻenau lotú; naʻe kehe mo e founga lea ʻa e faifekaú. ʻI hono tufa mai ʻo e peleti lī paʻangá, naʻe ʻikai ke u fakapapauʻi pe ko e hā e meʻa ke faí.
Faifai pea kole mai ʻa e faifekaú ki ha taha pē ai kuo teʻeki ai ke ne tali ʻa Sīsū Kalaisi ko hono Fakamoʻuí ʻi he ʻao ʻo e kakaí, ke ne ʻalu ange ki muʻa. Naʻe fanafana mai ʻa Lesieli mo fakaʻaiʻai au ke u ʻalu. Naʻá ku momou. Kuo teʻeki kole ʻa e pīsope ia homau uōtí ki ha taha ke ʻalu ange ki muʻa ʻo tali ʻa Kalaisi ʻi he ʻao ʻo e kakaí. Naʻe ʻikai te u ʻilo e meʻa ke faí. Mahalo pē kuo teʻeki ai ke u fai ha meʻa naʻe mahuʻinga ki hoku fakamoʻuí. Ne u foki mei he fakatahaʻangá kuó u puputuʻu.
ʻI heʻeku fakakaukau ki he meʻá ni kimuiange aí, ne u ʻiloʻi kuó u ʻosi tali ʻa Sīsū Kalaisi ko hoku Fakamoʻuí ʻi he ʻao ʻo e kakaí. Naʻe papitaiso au ʻe he tokotaha naʻá ne maʻu ʻa e mafai ʻo e lakanga fakataulaʻeikí meia Sīsū Kalaisi. Ko hono papitaiso aú ko haʻaku fuakava ia mo e Tamai Hēvaní te u toʻo kiate au ʻa e huafa ʻo Sīsū Kalaisí pea hoko ko ʻEne ākonga. Naʻá ku palōmesi te u tauhi ʻEne ngaahi fekaú pea feinga ke u hangē pē ko Iá. Naʻe ʻi hoku papitaisó ha ongo maʻu lakanga fakataulaʻeiki naʻá na hoko ko e ongo fakamoʻoní, pehē ki hoku fāmilí pea mo e kāingalotu ʻo e uōtí.
Talu mei hono papitaiso mo hilifakinima aú mo ʻeku maʻu ʻa e faingamālie ʻi he Sāpate kotoa pē ke toʻo ʻa e sākalamēnití peá u toe fakamoʻoniʻi ki heʻeku Tamai Hēvaní ʻe kei hokohoko atu pē ʻeku toʻo kiate au ʻa e huafa ʻo Kalaisí.
ʻE ʻi ai e taimi ʻe niʻihi ʻe fai mai ai ʻe he kakai Kalisitiane mei he ngaahi siasi kehé ʻa e fehuʻi tatau pē mo ia naʻe fai mai ʻe he faifekau ʻa hoku kaumeʻá, ka ʻe fakalea kehe ia. Mahalo te nau fehuʻi mai pe kuo fakamoʻui kitautolu. Kuo tokoni mai ʻa ʻEletā Tāleni H. ʻOakesi, ko e mēmipa ʻo e Kōlomu ʻo e Kau ʻAposetolo ʻe Toko Hongofulu Mā Uá, ke mahino kiate kitautolu ʻa e fehuʻi ko ʻení pea tau tali ki ai: “ʻOku faʻa fakaʻuhingaʻi kehe ʻe he kakai Kalisitiané he taimi ʻe niʻihi ʻa e ngaahi foʻi lea mahuʻinga ʻi he ongoongoleleí hangē ko e fakahaofí pe fakamoʻuí. Kapau te tau tali ʻo fakatatau ki he ʻuhinga ʻa e tokotaha ʻokú ne fai mai ʻa e fehuʻí ʻi haʻane fehuʻi pe kuo ‘fakamoʻui’ kitautolu, kuo pau ko ʻetau tali ki aí ko e ‘ʻio.’”1
Ne u kei ngāue pē ki hono fakatupulaki ʻeku fakamoʻoni kia Sīsū Kalaisí ʻi he taimi ne u ʻalu ai ki he siasi hoku kaumeʻá. Talu mei ai mo ʻeku ʻiloʻi ko e lahi ange ʻeku ako ʻa e ongoongoleleí ʻi he folofolá mo e lea ʻa e kau palōfita moʻuí, ko ʻeku mateuteu ange ai pē ia mo loto-falala ke u tuʻu ko ha fakamoʻoni ʻo e ʻOtuá ʻi he taimi kotoa pē (vakai, Mōsaia 18:9).