KO HA FUʻU LILIU LAHI ʻO E LOTÓ
Hili ʻeku ako nēsí, ne u ngāue ʻi ha falemahaki maʻá e fānaú ʻi he feituʻu naʻe tauhi ai e kau mahaki ʻoku fuʻu faingataʻaʻiá. Ko e meʻa ne u fie maʻú ke u ako pea maʻu ha taukei ke fakamoʻoniʻi ʻoku ou lava ʻo fai e ngāué. Neongo ia, naʻe ʻikai te u ʻiloʻi ʻe fuʻu faingataʻa pehē— fakaesino mo e fakaeloto fakatouʻosi. Naʻe ʻikai mahino kiate au hono ʻuhinga naʻe angakovi pehē ai ʻa e māmaní ʻo aʻu ki hano fakalaveaʻi pē ʻe he mātuʻá ʻenau fānaú tonu ʻo ʻikai toe lava hano fakaleleiʻi. Naʻe ʻikai foki mahino kiate au hono ʻuhinga naʻe fakangofua ai pē ʻe he ʻOtuá ke mate ʻa e fānau īkí. Hili ha taʻu ʻe taha ʻeku ngāue ʻi he falemahakí, kuo ongosia moʻoni hoku laumālié.
Ne u toki ʻiloʻi ai naʻe lolotonga akoʻi hoku fāmilí ʻe he kau faifekau ʻo e Siasí. Ne lōloa hoku taimi ngāué ʻo ʻikai lava ke u ʻi ʻapi he taimi naʻe akoʻi ai e ngaahi lēsoní. Naʻe ʻikai fuoloa kuo papitaiso hoku tehiná mo ʻeku faʻeé. Ne u ongoʻi hangē kuó u tuēnoa pē mo ʻeku ngaahi fehuʻí pea mo ʻeku ngaahi palopalema ne teʻeki ai fakaleleiʻí. Neongo e feinga hoku fāmilí ke aleaʻi ke mau feʻiloaki mo e kau faifekaú, ka naʻe ʻikai pē te u fie feʻiloaki mo kinautolu. Ka ʻi he taimi naʻe ʻaʻahi ange ai ʻa Sisitā Sionisoni mo Sisitā Māsukí, ne mau talanoa. ʻI heʻena ʻaʻahi hokó, naʻá na akoʻi kiate au ha lēsoni fakalaumālie, pea naʻe lava ke u maʻu ha tali ki he ngaahi fehuʻi ne fuoloa ʻeku nofo mo iá. Naʻe taimi siʻi pē mei ai kuo papitaiso mo hilifakinima au.
Talu mei heʻeku hoko ko e mēmipa ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní mo ʻeku ongoʻi hono poupouʻi au ʻe heʻeku tui kia Sīsū Kalaisí. Kuó u toutou aʻusia ʻa e mālohi ʻo e lotú peá u ongoʻi kuó u haʻu mei he fakapoʻulí ki he māmá. ʻI he taʻu ʻe ono kuó u kau ai ki he Siasí, kuó u tui pau ko Sīsū Kalaisi ʻa hoku Fakamoʻuí. Pea koeʻuhí ko Sīsū Kalaisi, ʻoku ou maʻu ai he taimí ni ha faingamālie ke u toe ofi ange ki heʻeku Tamai Hēvaní.