KO HA FAKAMOʻONI FAKATĀUTAHA KI HE FAKAMOʻUÍ
ʻOku ou tui pē ko hono papitaiso au ʻi hoku taʻu 11, ko e kamataʻanga ia ʻo ʻeku fakamoʻoni kiate Ia ʻa ia ko Hono Siasí ē ne u kau ki aí. Talu mei ai mo ʻeku maʻu ʻa e loto holi ke muimui ʻi he ngaahi akonaki ʻa Sīsū Kalaisí pea moʻuiʻaki ʻa e ngaahi tefitoʻi moʻoni ʻo e ongoongoleleí.
Naʻe kamata māmālie pē hono maʻu ʻeku fakamoʻoni kia Sīsū Kalaisí pea naʻe tupulaki ia ʻi heʻeku ngāue mālohi he Siasí. Ne u faʻa ongoʻi maʻu pē ʻa ʻEne ʻofa lahi kiate kitautolú ʻi he ngaahi meʻa fakaʻofoʻofa ʻo natulá, pea naʻe tupu heni ʻa ʻeku houngaʻia lahi ange ʻiate Iá. Kuó u ongoʻi ʻa e fakamoʻoni ʻa e Laumālié kiate au ʻi heʻeku ʻaukai mo lotu pea maʻu ʻa e tali ki he ngaahi lotu ko iá, peá u ʻiloʻi ko Sīsū Kalaisi ʻa e taukapo ʻi hotau vahaʻa mo e Tamai Hēvaní. Kuó u maʻu ha fiefia ʻi heʻeku ofi kiate Ia heʻeku toutou ʻalu ʻo lotu he temipalé.
Kuo tupulaki ʻeku fakamoʻoní pea ʻoku fakamālohia ia ʻi hono kotoa ʻo ʻeku moʻuí, pea ʻi he ʻaho ní ʻoku ʻikai ha toe veiveiua ʻi hoku ʻatamaí ko Sīsū Kalaisí ko e ʻAlo Ia ʻo e ʻOtuá—ko hoku Fakamoʻui mo hoku Huhuʻi. ʻOku ʻomi ʻe he ʻilo ko ʻení ha loto-fakapapau mo ha nonga kiate au.