Te u lau ʻa e Tohi ʻa Molomoná
Ko e maka tuʻu-lotó ko e foʻi maka ia ʻi loto mālie ʻi ʻolunga ʻi ha ʻaleso. ʻOkú ne puke fakataha ʻa e ngaahi maká kotoa ke nau tuʻu maʻu. Kapau ʻe toʻo ʻa e foʻi maka tuʻu-lotó, ʻe holo leva ʻa e ʻalesó.
Naʻe pehē ʻe he Palōfita ko Siosefa Sāmitá, “Naʻá ku fakahā ki he kau takí ko e Tohi ʻa Molomoná ko e tohi tonu taha ia ʻi ha toe tohi he funga māmaní mo e maka-tuʻu-loto ʻo ʻetau tui fakalotú pea ʻe ofi ange ai ha tangata ki he ʻOtuá ʻaki haʻane tauhi hono ngaahi akonakí, ʻi ha toe tohi” (Ngaahi Akonaki ʻa e Kau Palesiteni ʻo e Siasi: Siosefa Sāmita (2007), 73; ko e toki tānaki atu hono fakamamafaʻí).
ʻE tokoni atu ʻa ʻekitivitií ni ʻi hono muimuiʻi hoʻo lau ʻo e Tohi ʻa Molomoná he taʻú ni. Toʻo fakalelei ʻa e ngaahi peesi ko ʻení mei he makasiní. Kosi ʻo toʻo ʻa e konga fakatātaá mei he konga ki lalo ʻo e pēsí, pea tautau ki ʻolunga ʻa e ʻalesó. Ko e ʻosi pē haʻo lau ha konga mei he Tohi ʻa Molomoná (ʻe koe pē pe fakataha mo ho fāmilí), kosiʻi ʻo toʻo ʻa e fakatātā totonú, ʻo fakapipiki ia ki he feituʻu totonu he ʻalesó. Mahalo naʻa fie lau pē ʻe he fānau kei iiki angé ʻa e ngaahi vahe ʻoku hiki mataʻitohi fakahihifi atú.
Fakatokangaʻi ange: Kapau ʻoku ʻikai ke ke fie toʻo ʻa e ngaahi pēsí mei he makasiní, ʻe lava pē ka ʻai ha tatau ʻo e ʻekitivitií ni pe paaki mei he ʻInitanetí ʻi he www.lds.org. Ko e lea faka-Pilitāniá, lomiʻi ʻi he “Gospel Library.” Ko e ngaahi lea fakafonua kehé, lomiʻi ʻi he “Languages.”