Wintoon Karawa
E reke au moan mwakuri raoi ngke tao 13 au ririki. Bon ngai te tia nikiri nutibeeba, I bon ururinga butiu n au bwatika n te tabo are ti maeka iai i Salt Lake City ni katoa tairiki, ni karenakoi nutibeeba nakon kaintamwaraken aia auti kaain rarikira. E aki bati te mwane iai, ma ni katoa namwakaina ngkana e reke boou, bon akea te nanououa bwa N na kabwaka au kabwianibwai. Au karo a tia ni katea te banna ni katooto ibukin kabwakaan te kabwianibwai, ao I ataia bwa bon te tua mai iroun te Uea (tara D&C 119:3–4).
I uringnga ngke I ira rinanoan mwiin te kabwianibwai ngke te kairake ngai ma tinau ao tamau. Bon te bwai ae I tataneiai iai ni kakawara te bitiobi ao ni kaotia bwa I kakabwaka au kabwianibwai ae bwanin. Ngke I a ikawai riki ao e a mwaiti riki au kareke mwane, I aki toki ni moanibwaia kabwakaan au kabwianibwai.
Ngke I a riki bwa te karo, e kakaawaki irou bwa natiu n tatabemania a na kawara te bitiobi n tain rinanoan mwiin te kabwianibwai. Buu ao ngai ti kataia ni moantaai n reireinia bwa a na kabwaka aia kabwianibwai iaon aia mwane are ti angania bwa ngkana a ikawai e na riki bwa te bwai ae a tia n noori kakabwaia mai iai ao a na ataia ae a riai ni karaoia.
A na Roko Kakabwaia
Ngke ti moan mare Titita Richards ao ngai, ti bon reirei ao ti teutana ara karekemwane ni kaitarai ara kabanemwane. Kabwakaan ara kabwianibwai bon te anganano ae korakora. Ma Titita Richards e aki kona ni iangoia bwa ti na kabongana mwanen te kabwianibwai ibukin bwaai riki tabeua aika ti rangi ni kainnanoi, n aron te amwarake ao boon te auti. E bon teimatoa bwa ti na kabwaka moa ara kabwianibwai, ao ti aki toki ni kakaraoia. N tabetai bon ti teuana te bene n nikirana imwiin kabwakaan boon bwaai ake a riai ni kabwakaaki, ma tarana bwa e bon tau ibukia. Bon te kakabwaia anne man kamwakuran ara onimaki ni kabwaka te kabwianibwai.
Teuana te kakabwaia ae I kakoaua ae reke man kabwakaan te kabwianibwai bon inanon au ririki ni mwakuri akea te tai ae I a tia n tiku ni maan n akea au mwakuri. N te taina ngke I moan mwakuri I kamotirawaki man au mwakuri, ao e aki koro uoua te wiiki ao e a manga reke au mwakuri ae mwaiti riki iai boou nakon are mai mwaaina. N au tai ni mwakuri n te kambwana teuana, I rinanon taai ngke a kamotirawaaki ake I rarikiu, ma I aki kamotirawaaki. I kakoaua bwa te Uea e kakabwaiaai bukina bwa I kabwaka au kabwianibwai.
Tariu ao mwaneu aika uarereke, ngkana kam kamwakura ami onimaki are kainnanoaki ibukin kabwakaan te kabwianibwai, I berita nakoimi, kam na bon kakabwaiaaki. E aoria ngkana e uarereke are ko anga, tai tabwara ni kabwaka. Moanibwaia karaoana ngkana e reke am mwane teutana. Ko na karikirakea am onimaki ni karaoi bwaai aika ko aki kaantaningai bwa ko kona ni kakoroa nanona. Ko na wanawana n aron bairean am mwane, ao ko na karekea onimakinam i bon iroum aika kakukurei aika reke man ataakin ae ko karaoa te bwai ae tuangko te Uea bwa ko na karaoia. Aio bon oin reken te korakora, ao ko kona ni mwioko iai n taai aika na roko.
I ataia bwa Titita Richards ao ngai ti kareikei kakabwaia aika mwaiti i mwiin kakabwakaan ara kabwianibwai. I a tia naba ni kakoaua taonakon kakabwaia aika reke irouia Aika Itiaki ni Boong Aika Kaitira aika kakaonimaki n taabo aika tei n okoro n te aonaaba ibukina bwa a kukurei ni kabwaka aia kabwianibwai.
Te Ekaretia i India
Teuana te bwai ae riki ae tiku mwiina irou. N te ririki 2000 e reke au tai ni ira te bootaki ibukin katabwenaan aontano ibukin aia moan autinibootaki Aika Itiaki ni Boong Aika Kaitira are e boureirei are e na kateaki i India. Nnen te umwantabu bon i Rajahmundry, te kawa ae bubura ae kaan ma mataniwiin te aba mai mainiku.
I mwananga nako Rajahmundry ma buu; te beretitenti n te mition, Ebenezer Solomon; ao buuna. Ngke ti a roko n te tabo n turein ae rangi ni mwaiti kaaina i Rajahmundry, e roko irou te namakin n nanoangakiia aomata aika mwaiti ake I nooria ni maeka ma te kainnano ae korakora. A mwaiti aomata aika matu iaon te buroa ae matoatoa n taabo are iai te mwaawa iai. Ngke ti a roko n te tabo are e na katabwenaaki, I noora te kaokora ae korakora imarenan te kananokawaki are I a tibwa tia ni kakoaua ao te kimwareirei are I nooria ni mataia kaain te Ekaretia are a ikotaki ni kamaurira. A kimwareirei ao a kateitei baia ngke ti roko. A bon rangi ni kukurei ao a ingainga. A bon maeka naba n te aro ni kainnano ni kabotauaki ma anua ni maiu tabeua, ma bon akea nooran te bwarannano ke akea nanon maiuia.
I ataia n te tai naba arei bwa e aera ngkai e rineaki te tabo aei ibukin te umwantabu. I kan kaotia bwa I aki ataia bwa e aera ngkai e kanakoaki mwanen te Ekaretia nakon te tabo ae raroa nako aei. Ma imwiin kaitibou ma Aika Itiaki i Rajahmundry, a bane ni kaekaaki au titiraki. Aika Itiaki ni Boong Aika Kaitira aika a rangi ni kakaonimaki ao n ingainga nakon reken oin aia autinibootaki.
Ana Angabwai te Aine ae Tia ni Mate Buuna
I mwiin te bootaki ni katabwena aontano, Beretitenti Soloman e kairai nakoia aman aine aika tia ni mate buuia aika tia ni bwabetitoaki n ririki aika nako. Bon te 70 tabun aia ririki. Beretitenti Solomon e kaongoai bwa aine aikai a kakabwakai aia kabwianibwai ae bwanin man te tai are a bwabetitoaki iai. I mimi ngkai a teimatoa ni kabwaka aia kabwianibwai aine aika kakaonimaki aikai, n te tabo ae mwaiti te bwai ae kainnanoaki iai, ma I kakoaua bwa bon anganano mai irouia.
I titirakina Beretitenti Solomon bwa iraua ae a kabwaka aine aikai ni katoa namwakaina. E anganai mwaitina n te rupee, mwanen India. I aki ataia bwa mwaitira, ngaia are I a titirakinna mwaitina ni kabotauaki ma mwanen U. S. N na bon aki kona ni mwaninga ana kaeka: “A bon kabwaka ae i marenan teuana-ao-te-itera ao uoua te bene.” I a manga kauringaaki bwa kabwakaan te kabwianibwai e aki kakaawaki te mwane, ma e kainnanoa te onimaki! I namakina te nanorinano n ataia bwa te kakabwaia n te umwantabu e reke irouia Aika Itiaki aikai ibukina bwa iai nanoia n anganano ni kabwaka aia kabwianibwai—e ngae ngke ti taian bene. I ataia bwa te Uea e rairi bene aikekei nakon taraa aika mirion.
Te kabwianibwai tiaki te tua ibukin te mwane—bon te tua ibukin te onimaki. E tuatua te Uea 10 te katebubua man ara karekemwane ao tataninga bwa E na nooria bwa ti na kamwakuri ara onimaki Irouna ni karaoa te anganano anne. Iai irouia Aika Itiaki i Rajahmundry te onimaki anne.
I rootaki ngke ti roko n te tabo ni kateitei ni kunea bwa e takinaki te kie ae uraura man te kawai ni karokoa te oning are a ikotaki iai Aomata Aika Itiaki. Tao bon 30 te mita anauna. I aan te oning bon kaintekateke aika nangoaki ni kunnikai ae uraura ae te velvet. A bubura ao a tararaoi. Te kie ao kaintekateka a bon mangaingai, ma anne bon aia kabanea ni kona are a anga Aika Itiaki. A bon aki kona n anga are tiaki te kabanea n tamaroa. I bon namakina te nanorinano. Aika Itiaki i Rajahmundry a katea te banna ni katooto ibukiia aika kakaonimaki n anga nakon te Uea, ni kabwakaan aia kabwianibwai ke karekean te tabo ni maeka ae te kabanea n tamaroa ibukiia taan kairiiri n te Ekaretia aika kawaria.
Taraan 10 te katebubua iroum man am karekemwane, e uarereke ke bubura, akea te bwai ae na reke iai ke e aki rangi ni kakaawaki. I berita nakoim, e bon kakaawaki. E bon kakaawaki bwa ko na maiuakina te tua ibukin te kabwianibwai ngkai ibukina bwa e na kakorakora am onimaki ao ni katauraoiko ibukin katakim n taai rimwi.
Te Uea e anganiira te berita bwa ngkana ti ongeabe nakon Ana tua, E kabaeaki bwa e na karekei nakoira kakabwaia are e berita ibukina (tara D&C 82:10; 130:21). I kakoaua te berita anne ni maiuia Aika Itiaki i Rajahmundry, ao ko kona ni kakoaua te kakabwaia anne n oin maium ngkana ko kakaonimaki ni kabwaka am kabwianibwai.