Te Kakoaua ibukin Teuana te Nanai ao Temanna te Tia Kawakin Tiibu a Tauraoi n te DVD

Imwiin kaotakina inanon nimaua te ririki n te Joseph Smith Memorial Building i Salt Lake City, Utah, ao iaan ana kairiiri te Moan Beretitentii, te birim ae Te Kakoaua ibukin Teuana te Nanai ao Temanna te Tia Kawakin Tiibu e a kona ni karekeaki n te DVD n ana tienta n tibwatibwa te Ekaretia.

Te Kakoaua ibukin Teuana te Nanai ao Temanna te Tia Kawakin Tiibu bon karakinan ana mwakuri Kristo nakoia kaain Iteraera n taai ake ngkoa ao Kaotina imwiina i America n taai ake ngkoa, ae kaotaki ni kakoaua aika uoua: te Baibara ao Ana Boki Moomon. E iriira te utu ae oteaki kaaina ae Helam n aia tai ni kakoauai kanikina ibukin rokon te Tia Kamaiu n te Americas.

Ngke e moan kaotaki te birim, Unimwaane Neil L. Andersen man te Itingaun e kabwarabwara, “Te kaantaninga ibukin te birim bon kakoauana bwa Iesu bon Natin te Atua, ‘te oota ao te maiu ibukin te aonaaba,’ ao ni kaota kamiimin rotakin maiuia naake a kakoaua te Tia Kamaiu.”

E riaon uoua te ririki karaoakin te birim ao e kainnanoa te kakae ae korakora iaon kateia kaain America n taai ake ngkoa. E karaoaki te birim i Utah, California, ao Hawaii n 57 taabo n rawetamnei, te kabanea n bubura bon abwakin te tabo ni butibooro. Bon 48 kaain te karao birim, 52 riki kaaina, ao e riaon 1,000 aomata aika buoka kabobongaan te birim. Te Orchestra n Temple Square ao te Tabanaeko Kuaea a karaoa te katangitang ma anene.

Te birim ae 65-te miniti taina e kona n reke n taetae aika mwaiti n te DVD n ana tienta n tibwatibwate Ekaretia n te aonaaba ni kabuta n taian taetae aika 18 (Taetae n te Bai n America, Cantonese, Danish, Dutch, English, Finnish, French, German, Italian, Japanese, Korean, Mandarin, Norwegian, Portuguese, Russian, Spanish, Swedish, ao Ukrainian).