Titiraki ma Kaekaaia

“Temanna mai buakoia raoraou ae kaain te Ekaretia e aki maiuakina ana kainibaire te euangkerio. I raraoma ibukina. N na kanga ni buokia?”

• Tai karinanoa am kainibaire bwa ko aonga ni buoka raoraom.

• Tataro bwa e na buokiko te Tamnei ae Raoiroi n ata te bwai ae ko riai ni karaoia, ao karaoia!

• Onimaki bwa e na mwakuri Tamam are i Karawa rinanom ni karekea te kaokora ni maiun raoraom.

• Kaoa raoraom bwa e na iri nakon waaki ni kukurei aika ana uotia rake bwa e aonga ni kona n namakina te Tamnei ao ni karekea te nano ni karaoan te babaire ae tamaroa.

• Riiki bwa te banna ni katooto bwa e kanga kawakinan tuua ni uota te kukurei nakoim.

Riaona

Ko kona n ibuobuoki ngkana ko riki bwa raoraona. E kataia raoraom n ataia bwa antai ngaia ao e butimwaeaki ia. E tangira temanna ae na tatae mangaia, nakon waaki ni kakurerei ma ngaia, ao ni iriiria bwa te katooto. N aki rangin n onimakinna bon iroum, ke n rangin ni kautitiraki, e kakaea te tai ae na kona n taetae ma ngaia ibukin taai ngke ko a tia ni maiuakina am kainibaire man tia ni kakabwiakaki.

Karietatai Anuam. Tera ae ko karaoia, tai karinanoa anuam ibukin araia raoraom bwa kona buokia. Kararoako man mwakuri ake e na aki mena ikekei te Tamnei ae Raoiroi ni kairiko. Ibukin am iraorao ao tabeaiangam, a kona raoraom n iangoia bwa ana teimatoa ni iangoi iango aika bure. Ko na bae n tangiria n reitaki ma aomata tabeman nakon are kona uotaki rikaaki naba.

Karekea am tai n tataro. Tataro ibukin raoraom, ma tataro naba ibukim. Tataro ibukin aanga ake e na buokaki iai, ao tataro bwa ko na atai aanga aikanne man kinai ngkana a roko. Tataro bwa ana kaungaaki am mwakuri n aron ana tangira Kristo ibukin raoraom, tiaki ti tenano ni kan bitia. Ao karaoia!

Tai bwara n nano. E aki kona ni bitaki raoraom n te tai naba anne. E tangira te tai ae reitinako, ao te nano ni koaua. Ni koauana, ko na bon aki kona n ataia bwa tera mwiin am taeka ke am katooto aika ko anga, ma ngkana ko kataia n riki bwa raoraona, ao kona bon karika te kaokoro. E na bae te burabeti ae Iakobwa n Ana Boki Moomon n tia n iangoa natina Enoti bwa e aki kakauongo nakon ana reirei, ma n te taina e uringa Enoti “taeka ae [e] aki toki n ongo [ma] iroun tamana,” ao e rairananona (tara Enoti 1:3–5). Am taeka ao am katooto ana iai mwiia, e ngae ngke e na aki eti ngkai.

Kaira raoraom. Uringa ana karaki ni kaikonaki te Tia Kamaiu ibukin te tia kaawakin tiibu are e katikui 99 tibu n nako ni kakaea temanna are e bua. E aki ti kawara te tibu are bua ao n oki nakoia ana nanai n tingaia. E uota rikaaki te tiibu. (Tara Ruka 15:4–7.) Kaoa raoraom nakon waaki ni kakukurei ma aomata aika a ririeta aia kainibaire. E kona ni buokia atatai aikai n nori kakabwaia man te maiu ae etieti man karekea te namakin ae raoiroi ma aomata aika rietata aia kainibaire. Te kantaninga, bwa e na ataia bwa te kukurei are e namakinna rinanon waaki ni kakukurei aikai e rangin n raoiroi riki nakon te kukurei aika aki teimaan ake e karekei man te aki ongotaeka.

Ngkana ko kataia ni buoka raoraom, ko kona n reitaki ma te Uea bwa e na buokiko bukina bwa e tangira raoraom bwa e tangira raoraom bwa e na karaoi rinerine aika tamaroa naba. Ngke e tabe Nibwaai ni buokiia ana aomata, e tuangnga te Uea, “N na kakorakorako n taetae ao n am waaki” (Ereman 10:5; katuruturua taekana)—ao E karaoia. Tamara are i Karawa e na mwakuri rinanom ngkana ko karekea am tai ao korakoram Ibukina.

Tan wareware

Teimatoa n riki bwa raoraona. Raoraom a onimakiniko man tara te mwakuri ae ko karaoia. E bae n tangira te bwai ae iai iroum, ma e aki ataia bwa e na kanga ni karekea. Tiaki n ae ko na kariai bwaai ni kabane ake e taekin man karaoi, ti tuanga bwa ko memena ikekei ibukina. E na kangaanga n tabetai, ma iai uaana ae raoiroi. Tuanga te Uea buokam, ao e na nakoraoi.

Stephanie C., 16, USA

Ko riai n riki bwa te banna ni katooto ae raoiroi nakoia raoraom. Kaoa bwa e na kaea te waaki ni kakukurei n te roronrikirake. E rangin ni mwakuri riki ngkana ko bon iria. Tibwaua am kakoaua n aron te bwai ae ko a tia ni karekea ngke ko a tia ni irii kainibaire n te euangkerio.

Jared Q., 16, Philippines

Iai raoraou ae rangi ni kakaonimaki n te tai ae maan n te Ekaretia. E aki toki n roko n tingaia bukina bwa ana utu a tia ni baireia bwa ana aki manga oki ni iri. I rangi ni mimi n aron korakorana ao nanona. Ma n te taina I ongo bwa e aki manga oki n taromauri. I namakina ana wirikiriki te Tamnei bwa n na riai n taetae ma ngaia. I tuanga bwa I a tia n rangin ni kukurei ngke e roroko n ti ngaia nakon te taromauri, ao I tuanga bwa e na aki bwara nanona. Te Taabati are imwiina e roko nakon te taromauri n toa ao man te tai anne are e a reitinako n roroko nakon te taromauri. Man ara onimaki ao maiuakinan te euangkerio ae maiu, ti kona n riki bwa katooto nakoia raoraora man anganiia te tangira ao te boutoka ae a kainnanoia.

Marina V., 18, Sweden

I taku bwa e rangi n tamaroa ngkana ko taetae nakoina. Bon taekina ae koaua ma e na bebete. I taku bwa e tangira te korakora, ao e raoiroi riki ngkana ko karaoia imwiin am tataro bukina bwa ko kona ni karekei ibuobuoki. Iai naba raoraou ae akakin aei, ao bukina bwa I tangiria n nako mangaia nakon aba n uea ae tiretio I kabanea korakorau ni kairiia nakon te kawai ae tamaroa. Ko na bae ni bita arom bwa e aonga ni iai mwiina nakoia aomata tabeman. E rangi ni kakawaki bwa ko na kekeiaki ni katoa bong ni kakororaoiko.

Eimi H., 17, Japan

Iai raoraou ae aki irii tabeua ana kainibaire te Ekaretia, ao I nanokawaki ngke I aki tuangnga au namakin ibukina n aron te bwai aei. Tuanga raoraom am namakin, ao tataro ibukina. Teimatoa n riki bwa raoraona ma ti ngkana ko teimatoa n aki karaoa te mwakuri are e karaoia. Ngkana e rangi ni kakaiaki, taekinna nakon te bitiobi.

Deborah S., 14, USA

N na kataia ni karaoi bwai aika kakukurei nakon raoraou aika iai mwiia aika raraoi ake aki tibanako man moan tuua n te euangkerio. Ti kona n noria n te kawai aei bwa a rangi ni bati kawai ibukin karekean te kukurei n aki karaoi mwakuri aika aki eti. N na aki kaunga ni bwaai aika bure ma n na reireinna mani kakorakora rinanon kateiu. E rangi n raoiroi ngkana ko tuangnga bwa ko tabeakinna man kauringnga bwa mamarana a kona n riki bwa te korakora (tara Ita 12:27). Tuangnga bwa ngaia ae na riai ni karaoa te babaire ma ko mena ikekei ni boutokaia. Ko tangiria n teimatoa ni korakora ao n aki kariaia ana waaki ni kukurei raoraom bwa e na kairoroiko.

Jorge B., 17, Ecuador

Te banna ni katooto e rangi ni kakawaki n aron taian kangaanga aikai. Ti kona naba n tataro n tainako ibukiia raoraora ao ni ukoukori kawai ibukin buokaia. Ti kona n aki mamatam ao n tuanga Tamara are i Karawa bwa e na anganiira taeka aika riai bwa e na buokiia ni kaotaia bwa bukin tera maiuakinan te euangkerio e kakukureira.

Virginia C., 17, Uruguay

A kantaningaaki kaeka bwa ana ibuobuoki man otaraoi, ma tiaki katanoakin ana reirei te Ekaretia.

A rawata ara kairake aika a katikaki nakon te kawai ae bure man kaririaki bwa ana katoonga buren te aonaaba. Kairake aikai a ukoukoria ake iai irouia te konabwai n tei ni matoa ibukin te koaua ma te nano ae korakora. Rinanon maiuakinan te maiu ae kororaoi ao ma takinan te bai ae ibuobuoki ao te nano ae ota, ko kona ni kamaiuia, ao ko kona ni maiu. E na kanga ngkanne aron kukureim. E na kanga te maiu are akea tokina n riki bwa te kakabwaia are ko riai ni kaman anganaki.”

Beretitenti Thomas S. Monson, Moan Kauntira n te Moan Beretitentii, “Katooto Ibukiia Taan Onimaki,” Ensign, Nobembwa 1992, 98.