Te Kamatenano
Ngke tetei ngai, I kunea te kamatenano n te iteraniba are e a tia n raeaki man te boki n reirei ae uarereke ao n tia n raraea n te tabo n nakonako irarikin te kawai. I ikawai rake n autin te tautaeka aika boraoi ao bon akea raraou, ma iai teniua au bwaai ni kakakibotu: booki, tamnein Elvis Presley, ao taian kamatenano. I tatangirii kamatenano. E roota au itera are I aki kona ni kina. E tara n akea te taeka are e na kabwarabwara. I kan ataa te kamatenano, I anaia ao I uotia nakon mweengau.
I wareka te kamatenano anne ni katoa bong, n tabetai tabeua te tai n te bongina, inanon ririki ake imwiina. Tekatekau n te tai ni kiraati, nakonakou imarenan taian umwanreirei, ma tekatekau n ti ngai n tain te motirawa ae uarereke, e roroko mwakoron te kamatenano n au iango. I tuai ni kamatenanoa te kamatenano mai imwaaina, ma e rangi ni kaokoro aio. Iai te bwai inanona ae taetae ao e ringai.
N tabetai iai te bwai ae karaba
E wirikiriki, “Ngkoe te ianena ikai,”
Ao I namakina bwa I ririanna
Man te tabo ae karietaki.
I namakina ae I kaokoro ma ataei ake tabeman. N tabetai I namakinna bwa iai te mweenga teuana n te tabo teuana, ao ngkana I rangi ni kataia ao I uringnga teutana. E kaungai namakinan aikai te kamatenano. Man te tai teuana nakon teuana I buutia man ruun te taibora ao I warekia. I kan ataia bwa iraman aomata ake titebo ma ngai n te aonaaba ao ngkana arona bwa N na kaitibo ma tabeman mai ibuakoia.
Ibukin te wanawana ao te iango ae mimitong
Iai bukin karokoau, nakon te aonaaba aei
I bon aki kona n ataa aei
Baike imwain bungiakiu.
Ko kona ni iangoa aron mimiu n ririki aika mwaiti imwiina ngke, bon te tia kakae ngai are I tabe n tekataka n au moan tai ni ira te bootaki n toa. I kauka te boki n anene nakon te iterana ni baa are e kaotaki ao n noora te kamatenano are I kunea n ririki ake a maan n nako. E kaokoro aron aneneakina ma are I aneneia n takaruaia ibon irou ngkana I tuai kan matu ke ngkana I uti n te nukanibong n tang, ma I kina e ngae ngke te naan nooti ake a katangaki n te biano.
O Tamau are i Karawa,
N te tabo ae rietata ao ni mimitong,
Tao nna manga roko iroum n ningai
Ao nna nora matam n ningai?
Ngke a bane aomata n anenea “O Tamau” (Hymns, no. 292), inanon tekatekau ao e a bon taonai te tang, n atakin ae te Atua e a tia ni karokoa te anene anne inanon kawaiu ngke I uarereke.
N te tabo ni maeka ae tabu,
E a tia ni maiu tamneiu?
N au moan tai n ataei,
I a tia n karikirakeaki irarikim?
Ngke I tabe n tekateka inanon tain te bootaki n toa, n ongora nakon au kamatenano ngke e tabe n aneneaki irouia kaain te taromauri, I ataia ae I mena n te kawai ae eti. I ataia ae te bwaai are a reireiai mitinare e koaua. I ataia ae Ana Ekaretia Iesu Kristo Ibukiia Aomata Aika Itiaki ni Boong Aika Kaitira bon tii ngaia te Ekaretia ae koaua n te aonaaba. Ai ngaia are ngke I katorobubua ao n tuanga te Atua ngkana eti irouna ae N na bwabetitoaki ao ni kamatoaki nakon te Ekaretia, I aki rangi ni mimi ngke kaekaana bon eng.
Imwiin teniua te wiiki n reirei iroun Unimwaane Walker ao Unimwaane Whittaker, Unimwaane Walker bon ngaia are kateboai inanon te ran ni bwabetito. I tebokaki ni kaitiakaki, I bon itiaki nakon are I tuai man namakinna mai imwaaina ao nakon are I kona ni iangoia. A raonaki unimwaane aikai n te mronron ae kaainaki irouia ake a taua te nakoanibonga ake a kamatoaai bwa kaain te Ekaretia bon au moan bitiobi, te mwaane are e kaeka te tareboon n te bong are I tuatua bwa ana kawarai mitinare.
I kona n teimatoa n ongo taekan au kamatenano n ai aron te koorati n te anene ae buti n te ea imarenaia aomata ake I kaitibo ma ngaia ao ni katoai mwakuri ake a karokoai inanon te Ekaretia—taeka ake a ringa te nano ae rawawata are rangi n tangiria ni kan ataa riki Tamana ae Akea Tokina.
I ataa wetean Tamau,
Rinanon te tamnei mai eta,
Ma, reken te kiing n ataibai
Are e kaokaki, I aki ataa bukina.