Te Inaomata ni Mwaie
Te tia mwaie n te bareei (ballet) e mwaing nakon iteran te tabo ni kamataku—e kamronron, e minomino, ao e beebete aron waekoana ni kibarake are titebo ma e aki rootaki n ana katikitiki te aonaaba. Kakamwakurina ni kabane a reitinako ni kaota te inaomata.
N aroia ataeinaine aika uarereke aika mwaiti, Maria Victoria Rojas Rivera ae kaain Chile—Mavi arana irouia raoraona—ngke aua ana ririki, e baireia bwa e kan riki bwa te tia barerina (ballerina). Ao n aroia ataeinaine aika uarereke ake tabeman, e kunea bwa kanikanin ao te inaomata are e nooria n te tabo ni kaotioti e bon rangi ni bobuaka. Te kekeiaki ao te motinnano aika kainnanoaki ngkana ko kan riki bwa te barerina (ballerina) ae mwaatai e bon riaon aia kona mwaitia kairake aika iai miia
Boon Taian Mii
“Ngke ko uarereke, ko aki ataa te anganano ae kainnanoaki,” e taku Mavi. “Ngke I moana au kamatebwai ngke 10 au ririki, a tuangira ara tia reirei bwa iteran maiuira e na bane n te mwaie. Ti na riai n taon nanora man bwaai aika mwaiti.”
Bwaai n aron te tai ni inaomata ao amwarake tabeua. E riai Mavi ni kabatia ana tai ao ana kekeiaki ni karaoi waaki ni kamarurug ao ni kataneiai. E na taratara raoi te bwai are e kanna. Ao imwiin te reirei ao te mwaie, ao e bon aki tau te tai ibukia raona.
E baireia Mavi bwa e tau kakaawakin miina irouna ao e na waiakinna.
“Te roro ae 13 nakon 19 a kona n riki bwa taai aika kangaanga,” e taku neiei. “Raraou aki ataia bwa e aera ngkai I aki kona ni kang amwarake tabeua ao ni kabwakanako tai ma ngaia.”
Boon te Inaomata
E kunea ngke e moan waaki Mavi bwa bwaai aika tara n totokoa inaomtana bon ti te kawai raoi are e kona ni kainaomata iai man bwaai aika a na tukia man ana kouru.
“I rineia bwa N na aki tiku ni katairaa, ao I rineia bwa N na kabanea au tai ni kataneiai n onea mwiin te nako n te tabo ni boobwai ae bubura ma raoraou,” E taku Mavi. “Ngkana I kua bwa mwiin te katairaa ke I aki atai nakonakona bwa I aki kataneiai, N na aki kona ni mwaie.”
E aki beebete tauan mwiin katein aroaro akekei, ma e taku Mavi bwa e materaoi.
“Iai aia tai aomata ni kabane are a bwara nanoia iai,” e kaotia Mavi, “ma iai korakoram n rinerine. Tauan mwiin katein aroaro a kona n tara n tutuki, ma tauan mwiin kateim i boni iroum bon te rinerine. Ao I rineia bwa N na butimwaai katei ni maiu aikai bwa I aonga ni mwaie.”
Te Kouru ae Tei-Maan Riki
N te tai teuana inanon ana tai ni kataia n riki bwa te barerina, e kunea Mavi bwa te mwaie tiaki ti ana kouru ke te bwai ae materaoi ae riai n anganano ibukina.
Inanoni kawaina, e reke nanona bwa e na ira Iesu Kristo, ao e ataia bwa te bwai are e reiakinna n te bareei (ballet) ibukin tauan mwiin katein aroaro e kabonganaki ibukin te tia iriira te euangkerio naba. N ai aroia raraona are a mimi bwa e aera ngke e karaoi bwaai are e karaoi ibukin te mwaie, a titirakinna bwa e aera ngkai e maiuakin tuua n te euangkerio aika katutuki.
“I kabwarabwara bwa iai inaomatara n rinerine, ao I reineia bwa N na butimwaea te katei ni maiu aei bwa I aonga ni inaomata man te bure ao ni karekea irou te Tamnei ae Raoiroi,” e taku.
Ke n aron taekinakina iroun te Tia Kamaiu, te tia iriirai e riai n tabeka ana kaibangaki, are e nanonaki bwa e a na kaakea n taonna nanona man bwaai aika tiaki aron te Atua ao kaibwabwarun te aonaaba ao ni kawakin ana tua te Atua (tara Joseph Smith Translation, Matthew 16:26). Tauan mwiin katei n aroaro aio e uotira nakon te “inaomata ao te maiu ae akea tokina, rinanon te Tia Tei ae korakora,” ao kataakin te maiu i tinanikun te tua e na kairiira nakon “tautoronaki ma te mate, n aron ana tautaeka ma mwaakan te riaboro” (2 Nibwaai 2:27).
“Te ongeaba e uota te inaomata ae korakora riki ao te rau nakon bwaai nako,” e taku Mavi. “Au kouru aki tiatianaki nakon te maiu n te aonaaba aei ma a ikotaki ma are akea tokina.”
E Materaoi te Anganano
Mavi e mwaie nako ni iteran te tabo ni kaotikoti n aron te banikai ae uotaki n anga, n taakini baina ao n reitinako man ana kai ni mwaie teuana nakon are imwiina —développé ao pirouette, glissade ao grand jeté.
Te bareriina e kona ni kamwakura rabwatana n aanga aika kona ni maraki iai angia aomata. Te inaomata ni kamwakuri e kainnanoaki ibukin te itoman ma taan mataku. Ma e ngae ngke te bareriina e karaoi ana kai bwa a tara n aki kangaanga n tabo ni kamataku, ma e a tia ni kekeiaki i tinanikun te tabo ni kamataku.
Imwiin waniua te ririki n anganao ao aoa aika mwaiti ni kataneiai ni katoa bong, neiei e maiuakina mina n te tabo ni kamataku—ao n te euangkerio.
“Aomata a iangoia bwa e tikiraoi ao e kankan,” e taku Mavi. “Ma kamwakurina a bon tiatianaki. E kainnanoa te korakora ae mwaiti n tiatianiko n aron arei.”
Kabotauan te euangkerio e bon kakaawaki. Irirakin Kristo e kainnanoa te korakora. Ao a kakukurei kaniwanga.
“Te kaniwanga man anganano aika mwaiti bon au konaa ni mwaie,” e taku Mavi. “I namakina te korakora, ao I namakina ana kairiiri te Tamnei ae Raoi ni mwanekau ni kabane— n te tabo ni kamataku ao i tinanikuna.”
I Tuai n Toki ma te Mwaie
N aron are e taekinna Nibwaai, n te tai are ti namakina ae ti tangiria n ira Kristo ao ti a tia ni bwabetitoaki ao ni kamatoaki, ti riai n teimatoa ni ua te toki (tara 2 Nibwaai 31:19–20). Iroun Mavi, te bareei (ballet) e kainnanoa naba te mwakuri korakora.
Imwiin ana mwaie i Paraguay, e oki nako Viña del Mar, Chile, n tia reirei tabeua ririki. Ngkai e tangiria ni mwaie n are i aona riki. E tia ni katea ana kouru aika boou are a karokoa i Argentina, Germany, Ireland, ao Spain ni kamatebwai ao n ukeraki irouia kurubu ni bareei (ballet) aika kakaokoro.
E ataia ae riai n reitinako ni keiaki—iaon te tabo ni kamataku ao n te euangkerio. E riai ni botumwaaka n tiatiana aroarona ngkana e tangira te inaomata n rinerine. Ao e riai ni botumwaaka n te onimaki ngkana e tangira te inaomata are e reke ngkana ko riki bwa te tia iriiria. “Ngkana kam botumwaaka n taua au taeka,” e reirei te Uea, “ao bon au reirei ni koaua ngkami iai: ao ane a na ata te koaua, ao te koaua e na kainaomatai ngkami” (Ioane 8:31–32).
Te mwaie ma te wanawana
E korakora ana kekeiaki Mavi i tinanikun te tabo ni kamataku bwa e aonga n teimatoa marurungina ao tein rabwatana. Irarikin tararuakin te bwai ae kanna ao taun ana motirawa, Mavi e kabatia te waaki ni kamarurung, ao e kuri ni katoa bong ni mwaie nimaua te aoa. Ma e aki ti tararuaia ibukina bwa ngaia te tia mwaie.
“Ngkai I kaaina te Ekaretia, I ataia bwa rabwatau bon ana tembora te tamnei. Ngkai ngai te tia kamataku, I kainnanoi bwain rabwatau a na mwakuri raoi, ngaia are I katanna nakon au kabanea ni kona. Ma ngkai ngai kaain te Ekaretia, I a kaman ata te bwai ae I riai ni karaoia.”
Ana kakoaua ibukin Tuan te Mauri are e reke man te kaotioti e a tia ni kakorakoraki n te bwai are e rinanoa n te bareei. “Ngkana ko kawakina rabwatam, ko na namakina te kaokoro,” e taku.
Ko riai n tararuaiko ngkana ko kan riki bwa te bareriina, ma e taku Mavi, “Ti riai ni bane ni kawakini rabwatara, e ngae ngke tiaki taan mwaie ngaira. Ti aki anganaki bwa ti na rinea rabwatara, ma ti riai ni kakaitau ibukin are ti a tia n anganaki ao n tararuaia. Bon bwaai n tangira mai iroun te Atua, ti a tia ni bane n anganaki rabwatara bwa iai bukina.”