Reirei man Te Nu Tetemanti
Kimwareirei man te Rairannano
Inanon ana tai ni ibuobuoki ngke maiu, e kaota ana tangira ae korakora te Tia Kamaiu nakoia natin te Atua mwaane ao aine—riki nakoia naake a tia ni bure. N te kaikonaki ibukin te tiibu ae bua, buan te mwakoro n tirewa, ao te nati ae bakatae, e katuruturua te Uea kakawakin kawarakiia naake a touanako te kawai teuana ke a bua ao namakinan te kimwareirei ngkana a oki (tara Ruka 15). Te katooto, E taku, “Te kimwareirei ibukin te aomata ae buakaka ae ti temanna ae raira nanona, nakon te kimwareirei ibukiia aomata aika raoiroi aika ruangauni ma ruaman, aika akea bureia aika a riai n rairi nanoia iai” (Ruka 15:7).
I tangiria ni kabanea au iango nakon te kimwareirei ae korakora are e roko irouia naake a rairinanoia ao te namakin ibukin te kimwareirei aika ti karekei ngkai ti buokiia tabeman rinanon te kawai n raira n nano.
“A karikaki aomata, Bwa Aonga Ni Karekea te Kimwareirei”
Te kimwareirei e korakora riki nakon karekean namakinan te kimwareirei ae rau ke namakinan te kukurei. Te kimwareirei ni koaua, ke “te kimwareirei are akea tokina” (2 Nibwaai 8:11), e roko man kanamakinan mwaakan te Mwakuri ni Kamaiu rinanon te rairanano ni koaua ao man ana kamatoa te tamnei are ti kona ni kamaiuaki man ara bure rinanon te Uea Iesu Kristo ao ni karekea te maiu ae akea tokina.
Te burabeti ae Riaai e reirei bwa ana babaire Tamara are i Karawa ibukira ngaira n tatabemaniira nako bwa ti “aonga ni karekea te kimwareirei” (2 Nibwaai 2:25) ao bon ti te kawai ae koaua ni karekean te kimwareirei ae akea tokina bon ti rinanon ana Mwakuri ni Kamaiu Iesu Kristo.
E ngae ngke tiaki kona ni karekea te kimwareirei ae bwanin n te maiu aei (tara D&C 93:33–34), ti kona ni karekea n te bong ae koraki man kaotan te kimwareirei ngkana ti maiuakina te euangkerio. E reirei Moomon te kawai ibukin kakaean te kimwareirei ngke taku ibukiia Nibwaite aika onimaki, “A bon aki toki n aki mamatam man tataro, ao a rikirake ni matoatoa ma ni matoatoa riki n aia nanorinano, man n nene riki n onimakinan Kristo, n onrake tamneia n te kimwareirei ma te raunnano, eng, n te aro ae a itiaki ma ni katabuaki nanoia, ao katabuan nanoia e reke ibukin anganakin te Atua nanoia” (Ereman 3:35).
Onrake n te Kimwareirei rinanon te Tamnei ae Raoiroi
Inanon booki aika tabu aika mwaiti ao burabeti a taekina namakinan te kimwareirei ao namakinan te Tamnei ae Raoiroi n taekaia aika ti tebo. Te katooto, n te boki ae Mwakuri ti reirei ma iai bwa “ana reirei Iesu a kaonaki n te kimwareirei, ao n te Tamnei are Raoiroi” (Mwakuri 13:52). Ao te Uea e berita nakoia akana Iria bwa E na angania Tamneina, are e na kaota am iango, ao e na kaona tamneia ma te kimwareirei (tara D&C 11:13).
Ngkana ti ataia bwa kanoakira ma te kimwareirei bon kanoakira naba ma te Tamnei are Raoiroi, ti namakinna bwa te kukurei ni koaua e roko man rairan nanora man ara bure ao ni maiuakina te Tamnei n te kororaoi. Irarikin anne, ngkana ti namakina te Tamnei, ti kona ni kunea te kimwareirei ibukin atakin ae ti a tia ni katabuaki imatan te Atua.
Te kimwareirei are e roko man te raira n nano e kakoauaki n aroia aika kakaokoro. Te moan bon te kimwareirei ao te rau are e roko nako nanon te tamnei are e a tia n rairanano ngke e kabebeteaki rawawatana man te bure. Te kauoua bon te kimwareirei ae korakora are e reke irouia ake a buokiia tabeman rinanon kawain te rairanano. Ao te kabanea bon kimwareirein nanon te Tia Kamaiu ngke E noriira bwa ti ira Ana reirei man onimakina Mwaakan ana angakarea ni kamaiu.
Ngkana ti kabongana te Mwakuri ni Kamaiu ni maiura, ti riai n iangoa te Tia Kamaiu ao Ana bwai n tangira nakoira ae akea tokina, kamwakuran te onimaki Irouna, man ukoukora ana kamatoa te tamnei are E kona ao e na kamaiura man ara bure ao mamaarara. Ngaia ae, ti na namakina te kimwareirei ao te rau are ti kona ni karekea ti mairoun te Tamnei ae Raoiroi. Ara atatai e na titebo ma are irouia kaain Taraemera: “Tamnein te Uea e roko nako aoia, ao a onrake n te kimwareirei, ibukin karekean kabwaraan aia bure, man karekea te rau, ibukin rianakon aia onimaki iroun Iesu Kristo ae riai n roko” (Motiaea 4:3).
“Bwa I Aonga ni Kairiia Aomata Nakon te Rairanano”
Imwiin namakinan te kimwareirei are e reke man ana kakabwaia te Mwakuri ni Kamaiu, ti kona naba ni karekea te kimwareirei man kaoakiia tabeman nakon Kristo. E taku Aramwa, ngke e tabe n reireina natina ae Ereman: “I a tia ni beku n aki motirawa, bwa I aonga ni kairiia aomata nakon te rairanano; bwa I aonga ni kairiia bwa a na katonga te kimwareirei ae rianako are I a tia ni katoonga, bwa aonga naba ngaia ni manga bungiaki iroun te Atua, mani kaonaki iroun te Tamnei ae Raoiroi.
“Eng, ao ngkanne nooria, O natiu, te Uea e bon anganai te kimwareirei ae rianako n uaan au beku” (Aramwa 36:24–25).
E angareirei te Tia Kamaiu bwa ngkana ti kabanei ara bong ni mwakuri n reireiniia tabeman taekan te rairannano ao n uota ti temanna te aomata nakoina, ti na karekea te kimwareirei ae korakora ma te aomata anne inanon abanuean te Tama.
Ao ngkana e na korakora kimwareireira ma te aomata ae ti temanna are ti a tia ni uotia nakon te Tia Kamaiu inanon abanuea te Tama, ana mwaitira korakoran kimwareireira ngkana ti a uotia tamnei aika mwaiti Nakoina (tara D&C 18:15–16).
“E na korakora Kimwareireim Ngkana E Rairananona te Aomata”
N tokina, I aki kona ni buoka ni iangoa ao ngkoa te namakin ae kakoroa nanona te Tia Kamaiu ae riai n namakinna ni katoa tai ngkana ti raira nanora man ara bure ao mani kamanena ana mwakuri n anganano inanon maiura. Ni koauana raoi e bon kaotia Ioane ngke e kaokioka ana namakin te Tia Kamaiu: “Akea au kimwareirei ae mwaiti riki nakon aei ae te ongo bwa a nakonako natiu n te koaua” (3 Ioane 1:4). Kristo, e taetae Ibukina, e taku E a tia Ngaia ni karekea te kimwareirei ae korakora ngke e rairananona temanna te aomata (tara D&C 18:13).
Imwiin reiakinaia Nibwaite ibukin Ana Mwakuri ni Kamaiu ao tera ae a kainanoia bwa a na karaoia bwa kam aonga n tei n akea barekami i Matau, Iesu e kabwarabwara Ana namakin nakoia man taku: “E korakora au kimwareirei, ibukimi … ; eng, ao e bon kimwareirei te Tama ao ana anera aika tabu ni kabane, ibukimi ao te roro aio; bwa akea mai buakoia ae bua… . Ao e bon bwanin kimwareireiu irouia” (3 Nibwaai 27:30–31).
I kakoaua bwa ti kona ni kunea te kimwareirei n te maiu aei ao te kimwareirei ae bwaninin n te maiu are imwiina man “ti tarataraan Iesu are te tia karika ara onimaki ; te tia kakoroa are taona nanona nakon te kaibangaki ibukin te kimwareirei are e kamenaaki imwaina, e aki mutiakina kamamaeana, ao e tekateka iangaatain ana kaintokanuea te Atua” (Ebera 12:2; katuruturua raoi taekana).
Te kimwareirei ibukin temanna ae raira nanona
Ti kona n reiakina riki te kimwareirei are rimwiaki n te rairanano ni koaua ngkana ti kamatebwaii aia atatai te Abotoro ae Bauro ao Aramwa te tetei, e ngae ngke ara atatai a bae n aki rang ni kakubanako (taraa Mwakuri 8:1–3; 9:1–31; Motiaea 27:8–31; Aramwa 36:5–24). Bauro ao Aramwa bon aomata aika ninikoria aika nako ni bwainikiriniia aomata aika Itiaki. Inanon aia tai ni karaoi mwakuri ni iowawa, mwaane ni kauoman aikai a kawaraki iroun te iruwa mai karawa. Ana anera te Uea e kaoti nakon Aramwa, ngke Iesu boni ngaia e bon taetae nakoni Bauro, e tuanga, “Ko aera ngkai ko bwainikirinai?” (Mwakuri 9:4).
A bwaka ni kauoman mwaane aikai nako aontano imwiin are a ongo ao a nooria. E bae newen Aramwa ao Bauro e riki ni mataki. Ae kakawaki riki bwa mwaane aikai a bon kamaiuaki man aia bure ao bon ti tebo naba aron bwakaia. E titiraki Bauro, “Te Uea teraa te baere I riai bwa nna karaoia?” (Mwakuri 9:6). E waekoa ni bitaki maiuna nakon te Tia Kamaiu ao e toui mwin ana kaetieti te Uea ma te koaua. Aramwa e kabwarabwara ana rairannano:
“Ma ngaia are ia kammarakaki n uringakin au bure aika mwaiti nooria I uringa naba are I ongo ngke tamau e taetae ni burabeti nakoia aomata ibukin rokon Iesu Kristo Natin te Atua bwa e na kamaiu ibukin buren te aonaaba.
“Ao ngkanne ngke au iango e iangoa raoi te koaua aio I tang i nanou: O Iesu, ngkoe Natin te Atua, nanoangaai, ngkai I mena n te aro ae kananokawaaki ae moan te mao, man otabwaniniaki n ana kabaebae te mate ae aki totoki.
“Ao ngkai, nooria, ngke I iangoa aio, I aki manga uring marakiu; eng, I a aki manga karawawataaki n uringakin au bure.
“Ao O, te kimwareirei teraa, ao te oota ae tamaroa teraa are I nooria; eng, tamneiu e a onrake n te kimwareirei are rianako n aron marakiu!” (Aramwa 36:17–20; katuruturua taekana).
Unimwaane Craig C. Christensen man te Itingaun.