Te Rao Nakon te Rao
Ana Kairiiri te Tina
“Tai kaaki ana tua tinam” (Taeka n Rabakau 1:8).
Tinau bon te tina ae okoro. Ngai te ikawai ibuakoia naati mwaane aika waniman, ao iai naba itiman maneu. N te utu ae bubura, iai katabean tinau ae korakora. Te bwai ae tamaroa ae karaoia tinau ibukira bon bwabetitoakira nakon Ana Ekaretia Iesu Kristo Ibukiia Aika Itiaki ni Boong Aika Kaitira. E anganiira te tai n reiakina te euangkerio. E biti maiura te tai ae aekan aei.
I uringa te bong are ti kawaraki iai irouia mitinare. Tao 10 ke 11 au ririki. A tibwaua te rongorongo mitinare ibukin te Moan Kaotioti. N te tai are ongora iai tinau, e a rairaki naba. E kakoaua ae Iotebwa Timiti e noora te Tama ao te Nati.
Ti moana kaean te taromauri. I aki tangiria n kan butimwaea te euangkerio n te moan tai, ma a kaungaai mitinare bwa N na kamatebwai arona ni kabane. N te tai are I karaoia iai, I a tangiria naba. I rangi ni karabwarabwa ibukin tinau. E karekea ana koaua inanon moan rokoia mitinare. Man te tai are e bwabetoaki iai ni karokoa te bong aei, e tuai man kabuaa kaean te botaki n taromauri n te Ekaretia.
E rangi ni korakora ana boutoka tinara nakoira. E kaitiaki ara kabaraki mainaia n taai nako ni katoa Kaonobong bwa aonga n tauraoi ibukin te Tabati. Ti kabiri ara kau ao aia kau tarira ao mwanera aika a uarereke. Ti maeka n te tabo ae a kainano kaaina i Guatemala, ao kaain rarikira a ngareakiniira ngkana ti bwaina te kabaraki mainaina ao te neketai nakon te taromauri.
E anganiira te ninikoria tinara n taai nako ibukin karaoan te eti. Ibukin ana kairiiri, ti rangi ni kakaonimaki n te Ekaretia. I uringa bwa n te tai teuana, e beku tamau n te Reirei n Tabati bwa te beretitenti, mwaneu are e ikawai e beku n te Moanrinan bwa te beretitenti, ao tinau e beku bwa te beretitenti n te Botaki n Aine, ao tariu ake aman a kabuta, a katauraoa, ao a kakabwaia te toa.
Ibukin kainanora n te mwaane, e kantaningaia tamau bwa N na ibuobuoki ni kareke mwane ibukin te utu. I tangiria ni kan karaoa au mwakuri ni mitinare, ma ngkae e a koro 19 au ririki, e tuangai bwa N na tataninga teuana te ririki ibukin nakou ni mitinare bwa e aonga n reitinako au mwakuri ni buokiia au utu. Ngke e a koro 20 au ririki, e tuangai bwa N na tataninga riki teuanan te ririki ibukin te mwakuri ni mitinare.
Imwaiin koron au ka 21 n ririki, e rangi ni kan bubuti ngkana I kona n tataninga teuana riki te ririki. Ma e tuangaki iroun tinau, “Kanakoa bwa e na beku, ao ti na kakabwaiaki iai.” E riki aio. Imwaain au mitinare, bon ti tariu ae uarereke ao ngai are ti mwakuri ni buoka boutokaan ara utu. N te tai are I a nako iai nakon au mition, uoman riki tariu ao maneu ake uoman aika a ikawai a moana mwakuria, ngaia are e a tamaroa riki te kareke mwaane ibukin te utu.
Kakabwaia ake a reke ao wewete ake I karekei n te Ekaretia a tia ni kairai bwa N na rangi n tatangira tinau riki. Inanon mwakoron maiu ni kabane, I uring arona ni kairi ae akea iaona ao ana katooto. E uarereke ana reirei tinau, ma ana atatai n taian koau n te euangkerio ao rabakauna ni mwakuri ao ana atatai ibukin te maiu a bon rianako.
E kakukurei uarerekeu ibukina bwa iai tinau n te mweenga are e tararuaai. Iai irouna te kamanga, ao e kakaei anga n tainako bwa ti na unga. E kabanei aoa aika mwaiti n tibwauai iaon uarerekena ao iaon tibuna te unaine ao ai tinana ao ai tamana ao reitakina ma ngaiia.
I kakoaua te tua are karineaia kaaro. Ni bwaai ni kabane ake I karaoi, ni boong naba aikai, bon man ana kairiiri tinau.