Ana Katooto Temanna
Atuun te e-meeri ae tibwa roko e uota nakoiu te rongorongo ae kananokaawaki: “Te Taunimate ibukin Wendy Knaupp.” Ngke I kaoi rannimatau, I iangoa te bong 40 te ririki n nako ngke ngai ma toau ni mitinare ti kaitibo ma Wendy ao Paul Knaupp i rarikin te titoa ni ue n te tabo n turein i Frankfurt. Bon taanga n ataei mai America aika mwakuri n te taanga ni buaka i Germany, a raroa nako man mweengaia, a kaantaninga bungiakin aia moan nati. Ibukina bwa ara beretitenti n te mition e rangi ni kaungaira bwa ti na “mitinare n taai nako,” ti moana ara marooro ma ngaia.
Ngke ti reireinia man aia marooro mitinare, I rootaki n te oota n tamnein Wendy. E rangi ni kukurei ao e oota ao e maiu tamneina. E namakinna I nanona Kaokan Bwaai ma te namakin ae koaua. Ti bon kakatonga ngkai ti kaan ao ti kona n noora rikiraken ana koaua ao n noora rikiraken te ootan i ubuna.
30 tabun te ririki i mwiina, ao Wendy e kauringa a na moan tai ni kawariira: “N na bon ururinga te namakin are e reke irou ngke I moan ongo karakinan Iotebwa Timiti! I kona n nooria n au iango ara ruu ae uarereke n te borauatao i Germany are tao bon buburan ara ru ni matu n te bong aei, ao ti bane n tekateka i mangeen te kainiwene/kaintekateka [ni kaaitaraia mitinare]. I uringa namakinan te mimi ao te raunnano. I namakinna n taai nako bwa iai te bwai ae aron aei ikekei n te tabo teuana. E aki mataata irou bwa te Atua e na katikuira bwa ti na aiwa n tatanako n aron ae ti karaoia… . E bon tara n eti ao I kakoaua.”
E ngae n anne, tabeua te tai imwiin ara baire bwa ti na bwabetitoaki, a koangoaki Wendy and Paul iroun temanna kaain aia utu are e kabuakaka ana tua te Ekaretia ibukiia naake a kona n anganaki te nakoanibonga. A mangaongao ao a bwarannano. A taku bwa ti na aki ma kawaria—ma ti teuana te tai bwa ti na kabo nakoia. Ti babanga ni kaekai aia titiraki ma ti ataia bwa iai riki ara tai teuana. Ngke ti marooro I namakina kairakiu bwa N na wareka te koroboki ae tabu ma ngaia ae I tibwa nooria n au kamatebwai, karakinan Betero ao Kononerio ni Mwakuri 10–11. N te tairiki arei, I a tibwa kakoaua ana berita te Uea nakoia mitinare: E na anganira te bwai are ti riai n taekinna n te aoa are ti kainnanoia iai. E a tia ni berita nakoira bwa ngkana ti karaoi baikai te Tamnei ae Raoiroi e na kaoti nakoira bwaai ake ti na taekin (tara D&C 100:6, 8). Ti bane n namakina tamnein te rau ngke ti uaia n tataro.
Tabeua ririki imwiina ao Wendy e taekina te namakin aio: “I aki uringa te bwai are a tuangira ke te bwai are ti taekinna, ma te oota … te Tamnei … e a oki ao I ataia bwa e koaua, ao e ngae ngke I aki ota ni bwaai ni kabane, te rongorongo e bon koaua naba ngkai ao ti kainnanoia bwa ti na butimwaia, ao n te tai teuana ni boong aika imwaira ti na bon oota iai.”
Paul ao Wendy a bwabetitoaki. N te tai ae aki maan ao a kabaeaki n te tembora. Ribuakon katakiia n te maiu n utu, a karikiia niman natia aika a kakaonimaki n te Ekaretia. Tabeman a karaoa aia mwakuri ni mitinare. Paul bon te tia reirei. Paul ao Wendy a uaia n anenei anene aika tikiraoi n te umwantabu. Wendy e kaira te kuaea n ana uoote inanon ririki aika bati. A tangira te tembora ao a ataia i bon irouia “te kimwareirei are e reke irouia aika a itiaki” (Enoti 1:3).
Te taina ngke ti ira te taromauri i London, buu, Marie, ao ngai ti kaitibo ma te aine ae arana Libby Casas ae roko mai Maine. Bukina bwa ti tenaan Knaupps ae ti kinaia i Maine, ti titirakinna ngkana e kinaia. E oota ubuna: “I kinaia? Wendy bon raou ae I tatangiria. E kabwarabwara te euangkerio nakoiu!” E kaitibo Wendy ma Libby n te tabo ni uati—uoman tiina aika uati aia bareka—ao e tibwaua te euangkerio ma Libby n aron are ti karoia ma Wendy n te tabo n turein. Te bwai ae anaa nanon Libby ibukin te Ekaretia bon mwaakan ana banna ni katooto Wendy—n tina, ni buu, ao n aomata. Iroun Libby, mai moana, Wendy bon te rongorongo ibukin Kaokan Bwaai.
Imwiina ao tenaan Knaupps a maeka i Oregon. N te ririki ae nako, imwin ongora bwa e a kaentia Wendy, ti kakabwaiaki ni kunea bwa a roko i Utah n tain te maungatabu ni kabuta. Buun Wendy, natiia te mwaane ae a tibwa bane ana tai ni mitinare, ao ngai ti anganna te kakabwaia. Ti tibwai bwaai ake ti rinanoi abwi te ririki n nako. E mataata bwa te euangkerio e rangi ni kakaawaki irouia. Bon boton ao te kantaninga ni maiuia ao maiuia natiia. Bon nanoia ae korakora Paul ao Wendy bwa ana marurung bwa aonga ni kakoroa nanon miia ni uaia ni mwakuri bwa mitinare.
E aki maan imwiina ao e mate neiei. E koreia n ana reta nakoiu Wendy, “I namakinna raoi bwa I mena inanoni bain te Uea. E kona ni karaoa are e tangiria, ao I mena n Ana tararua.” E kaota ana kakaitau ibukin te euangkerio ao ana utu, ao ngkanne e korea, “Ai tamaroara te Uea!”
Ngkai e a nako Wendy, ao natina a rangi ni ururingnga. Ngke e kororeta natia te mwaane nakoira ni kaota matena, e taku, “Ko rabwa ngkai ko uota Tinau nakon otan te euangkerio. E a tia n ongeaba nakon tuua inanon maiuna.” E taku bwa e kororeta nakoina tinana n te taina, “I tangira te Uea ao I kakaitau [Nakoina] n akea tokina ngkai e uota te euangkerio ae akea boona nako nanon maiu. I kan kaotia bwa I kakaonimaki ao I bon kekeiaki ni karaoi.”
Bukina bwa te euangkerio e rangi ni kakawaki iroun Wendy ao ana utu, ngaira ake ti riki bwa ana mitinare ti ataia bwa kimwareireia e na korakora (tara D&C 18:15) ma ngaia n abanuean Tamara. Te euangkerio e bon rangi ni kakawaki irouna, ngaia are bwaai ake I rinanoi ma ngaia ngke I mitinare a rangi ni kakaawaki irou. E aki kamiimi ngke e taku te Uea bwa karaoan te mwakuri ni mitinare bon te bwai are e na riki bwa te kabanea ni kakawaki iroum (tara D&C 15:6; e katuruturuaki).
E taku Beretitenti Gordon B. Hinckley: “I tangiria ni bubutia Aika Itiaki bwa a na karaoa aia kabanea ni kona ni karekei [araia aomata aika ko kinaia] aika kan reireiaki ake a na kona n reireiniia [mitinare]… . Ibukin am kekeiaki ao aomata ni kabane ake ko nooria bwa a roko inanon te Ekaretia a na uota te kukurei nako nanon maium. I karaoa anne bwa te berita nakoimi n tatabemani ngkami” (“Inspirational Thoughts,” Riaona, Okitobwa 2003, 3).
I a tia n ata nanon te berita anne. I bubuti ngkami bwa kam na kaira ti temanna naba te aomata nakon te Ekaretia n te ririki aei—ao a na aki bwara n nano ngkana a kaitara ma tabeua kakaitara. Ngkana ko taraia raoi bwa e na bua am tai, ko na taekinna ma Wendy Knaupp, “Ai tamaroara te Uea!”