E Aera E Tuangai te Tamnei?
N tain te kabuebue n 1980, iaon kawaiu n toki au mwakuri ni ibuobuoki i Massachusetts Boston Mission. N te tairiki teuana iai ara tai ae ti kabaea bwa ti na reireina ataein te reirei ae kaunganano ibukin ara mwakuri ni mitinare rongorongon te babaire ni kamaiu.
N taai aika mwaiti imarenan taai n reirei, I rangi ni kukurei n okiokin ana kakoaua te Tamnei ae Raoiroi nakoiu bwa reirei ake ti anga a bon koaua. I uringa aron au tataro ngke I kuri n takarua: “I a tia n ata aei. I a tia n anga te reirei aei n te tai ae rawata inanon uoua te ririki n nako. I karabwarabwa n namakinan Tamneina, ma taiaoka ni kakoaua nakoia naba nakoia au taan kakae!”
N te tai ae aki maan imwiin te tairiki anne, I kaitibo ma au beretitenti n te mition, ao e tuangai bwa e a tia ni mate tinau ngke e kabuanibwai n te ka. Bon arona bwa, e riki bwa te kubanako ae korakora nakon au utu ao te botanaomata ae bwanin. Ma ngke e a toki namakin aikai ao e reke au tai ni karaua ni iangoia raoi. E mataata raoi uringan mwaakan te Tamnei are I karekea n tain te reirei ibukin te babaire ni kamaiu. I ataia ae aio Ana mwakuri Tamara are i Karawa ae tatangira are e katauraoai imwaain buan tinau.
Akea te tai ae I aki uringa iai ana reirei ao aron ana iraorao tinau. Ma akea naba te tai are I aki kauringaaki iai bwa e kanga aron ana tangira Tamara are i Karawa are e tararuaai ao ni katauraoai ibukin buan tinau.