Vitio: O Au Lenei; Auina Atu Au
Bonnie D. Parkin
Ua selau onosefulu tausaga talu ai, i luga o se aega e iloa atu ai le aai o Navu, i Ilinoi, sa faataatia ai e le Au Paia o Aso e Gata Ai le maatulimanu mo se fale o Ieova. Ma e na o le tasi le tausaga mulimuli ane, sa faatuina ai e le Alii e ala mai i le Perofeta o Iosefa Samita le Aualofa mo tamaitai—o se faatinoga talafeagai, na ia saunoa ai, e faaatoa ai le faatulagaga o le Ekalesia. Na avea lena faalapotopotoga a tina ma tamaitai ma meafaigaluega mo le fausiaina ma le faamaeaina o lenei malumalu mamalu ma le ofoofogia. O a tatou measina faaleagaga o ni afafine e osi-feagaiga ma le Atua, i lenei faalapotopotoga paia ma le musuia, na amata iinei i le Aai o Matagofie. O le malumalu o Navu, o se faatusa vaaia o mea ua tatou faataunuuina, o mea e mafai ona tatou faataunuuina, ma mea ua Ia saunia mo Ona afafine faamaoni.
Kathleen H. Hughes
O lena uluai sauniga a le Aualofa sa na o le 20 tamaitai sa auai atu i ai: o nisi e i le va o le 17 ma le 19 tausaga, o nisi o ni uso fou faatoa liliu mai, o nisi ua fai fanau, o nisi foi sa nofofua. E pei lava foi o le Aualofa i le taimi nei! Ma sa televave le ola o le faalapotopotoga, sa aofia ai tamaitai o ituaiga tulaga eseese uma; sa manaomia tamaitai uma—e faapei foi ona manaomia e tamaitai taitasi i le taimi nei. Sa feagai na tamaitai ma tauiviga faigata: o le maliliu o fanau, o le le lava o meaai, o le teena e aiga, o sauaga, ma le leai o se faatuatua. Peitai, talu ai feagaiga sa osia ma le Alii, o lea sa faalogo atu ai le tasi i le isi, sa fefaafaileleai, sa aoao foi ma taitai e le tasi le isi. Sa fefaasoaai a latou meaai ma lavalava faapea foi ma lagona. E pei ona faamanatu atu i le tamaitai talavou o Nancy Tracy i se faamanuiaga na tuu atu i ai: “Ua e iloa le siufofoga o le Leoleo Mamoe Lelei … ma ina ua sau o Ia e faapotopoto i Ana mamoe, sa e iloaina Lana savali ma sa e taliaina ma le fiafia ma le olioli.”1 O tautinoga a nei tamaitai ma lo latou liua, na faaliliu atu i faatinoga o le alofa, agalelei, ma se usoga autasi.
Anne C. Pingree
Sa toetoe lava a tutusa lelei i tatou ma o tatou uso i le vaitaimi muamua o le Aualofa! Sa i ai taimi na lagona ai e le talavou po o le tagata matua, o tagata fāi mai po o tagata faatoa liliu mai, le tuuatoatasi, e le amanaia, e le mafai ona faatoilaloina luitau o le a latou laasia. Peitai, sa laalaa i luma nei uso ua tutumu i le faatuatua, ma tutufaatasi i le tauaveina o la latou pitolaau i le fausiaina o le maota o le Alii. Sa taitasi i latou ma ofoina atu ni a latou meaalofa: foai atu nai ie iti sa ia i latou, suisui laei, fafaga le aufaigaluega, ofo atu a latou measina, saunia malutaga, tausia e mamai ma e ua matutua, ma sa latou su’iina foi le ie puipui o le malumalu. O nai a latou tupe iti sa i ai, semanu e mafai ona latou faatauina ai ni meaai po o ni lavalava, sa latou faatauina ai fao mo le fausiaina o le malumalu ma tioata mo faamalama. Fai mai se tasi uso e uiga i lana taulaga: “Sa lelei se faamoemoega na amata ai ona ou alu i le mea na faamaopoopo i ai foai mo le fausiaina o le malumalu, e ave la’u foai. Ae sa faafuasei ona oo mai se faaosoosoga ia te au … o le tupe [lenei] o le a mafai ona faatau ai mea sa ou manaomia i lena taimi. Ona ou teena ai lea. Sa ou faapea ifo, ‘Afai e na o se fasi falaoa se mea ou te maua i aso taitasi o le vaiaso, o le a ou totogia lenei tupe i le teugatupe e fausia ai le malumalu.’ ”2 Sa manatu uso o le tatou Aualofa i na uluai taimi, o se faamanuiaga “le lafo o tupe iti e fesoasoani i le Usoga mo le fausiaina o le Maota o le Alii.”3 Sa latou fai atu ma le naunautai, “Le Alii e, o au lenei; auina atu au!”
Bonnie D. Parkin
Mai lava i le amataga, o le faamoemoega o le Aualofa o le laveaiina lea o agaga, ma sailia e matitiva ma e le tagolima, e avatu le faamafanafanaga i e ua sauaina, ma fefaamalosia’i e le tasi le isi. A o galulue na uluai uso e fesoasoani i le fausiaina o le malumalu ma maua ai o latou lava faaeega paia, sa latou maua le filemu ma le lototetele mo le malaga faigata sa lupe. Tatou te manaomia foi lena filemu ma le lototetele. Sa manaomia e le Alii i Navu uso taitoatasi—tusa lava po o le a le matua, atamai faaleaoaoga, tupe maua, gagana, ma tomai—e fesoasoani i le faatuina o Lona malo.
E leai foi se eseesega ma le taimi nei! E manaomia uma i tatou i le Aualofa. Ua poloaiina i tatou e lo tatou perofeta soifua ina ia tatou o atu ma faataunuu o tatou tiutetauave e laveaiina ai agaga. Ioe, ua uma ona tatou osifeagaiga ma le paia e faapea ona fai. O le poloaiga muamua a le Perofeta o Iosefa Samita e “fesoasoani i e matitiva,” [ma] “faasaoina agaga,”4 e faatatau foi ia i tatou. E ao foi ia i tatou ona faauouo e le tasi le isi, faamama i avega, ma fetufaai a tatou molimau ma le faatuatua ia Iesu Keriso. Ou te fiafia lava i se mea na ta’ua e se tasi o uluai uso, o Sina Iaga, e uiga i le usoga a le Aualofa: “O se faamanuiaga le potopoto faatasi… . Ua i ai le Agaga o le Atua i le mea nei, ma a tatou talanoa o le tasi i le isi, e faapei o se suauu o sasaa atu mai le tasi ipu i le isi.”5
Uso e, o i sa amata ai la tatou measina o le faatuatua. Pe a tatou vaai i lenei maota ua toefuatai o le Alii, e ao ina tatou manatua ua poloaiina i tatou e Iesu Keriso, i nei aso e gata ai, e fesoasoani i le fausiaina o Lona malo. E ao ona tatou vaavaai atu ia te Ia, faamamalu i Lana perisitua, ma ola ai i a tatou feagaiga. Tusa lava po o a o tatou tulaga ma pe o fea lava tatou te nonofo ai, e mafai—ma e tatau lava—ona tatou laa i luma o ni afafine o le Atua ma fai atu ma le maumaututu, “Le Alii e, o au lenei, auina atu au.”