Ou te Talitonu Ou te Mafaia, Na Ou Iloa Ou te Mafaia
E ui e le tutusa uma o tatou malamalama, tomai, ma malosi, … o le a faamasinoina uma lava i tatou mo le faaaogaina o nei meaalofa ma avanoa ua tuuina mai ia i tatou.
O’u uso pele e o le perisitua paia, ou te tatalo mo lo outou malamalama a o o’u talanoa atu i lenei aofia toatele i le afiafi nei. E ui o lo o faataunuuina e le peresitene o le Ekalesia, le susuga a Peresitene Gordon B. Hinckley ia ni galuega e toetoe lava a le gafataulimaina. Ae peitai sa avea foi o ia ma se talavou na umiaina le Perisitua Arona e pei o le toatele o outou. O outou alii talavou o le Perisitua Arona o le a avea ma taitai o le Ekalesia i le lumanai. O le afiafi nei ou te fia tuuaso atu ai o’u manatu e manino lava ia te outou. E moomia ona outou malamalama o lena faamanuiaina—e le gata mo outou ae faapea foi i le Ekalesia—o le a faalagolago tele lea i la outou faaiuga ina ia faataunuuina le galuega a le Alii. O le a moomia e outou uma le faatuatua ma le mautinoa e agai ai i luma.
O alii ma tama uma o loo faafofoga mai i lenei afiafi ua tuuina atu i ai le mana silisili o loo i ai i le lalolagi—le perisitua paia a le Atua. O le mana e galue ai i le amiotonu i le suafa o le Alii ina ia fausia le malo o le Atua i le lalolagi. E faamanatu atu ai ia te oe “o aia tatau o le perisitua e le mavavaeeseina ma mana o le lagi, e le mafaia foi ona faatonuina pe faaaogaina ia mana o le lagi tau lava o mataupu faavae o le amiotonu.”1 O le perisitua o se avanoa paia lea, ma o le a faamasinoina i tatou e le Alii mo lo tatou faaaogaina o lenei pule maoae.
Na ou mua’i faalogo i le tala O le Tamai Enisini E Mafaia ina ua faatoa sefulu o’u tausaga. I le avea ai ma se tamaitiiti, sa ou fiafia i le tala aua e faatumulia ia taavale o le nofoaafi i meataalo o manu, o meataalo o tagata faafiafia, o naifi faamoe, o paso, ma tusi e faapea foi i mea mananaia e aai ai. Ae peitai, sa gau le enisini lea e tosoina le nofoaafi i luga o le mauga. O loo faamatalaina le tala e faapea na oo mai se enisini lapoa e laupasese ma sa talosaga atu i ai e tosoina ia taavale o le nofoaafi lea i luga o le mauga, ae na ia manatu e le o se mea taua tele le tosoina o le tamai nofoaafi. Na oo mai le isi enisini, ae le’i aapa atu foi e fesoasoani e toso le nofoaafi laitiiti i luga o le mauga aua o ia o se enisini la’u uta. Na taunuu mai se enisini tuai, ae na te le mafai ona fesoasoani aua na ia faapea atu, “Ua ou lelava… . Ou te le mafaia. Ou te le mafaia. Ou te le mafaia.”
Ona oo mai lea o se tamai enisini laitiiti lanumoana i le auala, ma sa talosagaina o ia ina ia tosoina i luga ia taavale i luga o le mauga i tamaiti o loo i le isi itu. Sa tali mai le tamai enisini, “Ou te le lapoa tele… . Latou te faaaogaina a’u i le na o le fesuiaiga o taavale i totonu o le lotoa. Ou te le’i alu lava i luga o se mauga.” Ae sa popole o ia i le faanoanoa o tamaiti o loo i le isi itu o le mauga pe a latou le maua uma ia mea mananaia o loo i totonu o taavale. O lea na ia faapea atu ai, “Ou te manatu ou te mafaia. Ou te manatu ou te mafaia. Ou te manatu ou te mafaia.” Ma sa ia faapipii atu loa i le nofoaafi. “Puff, puff, chug, chug, a o agaigai atu le tamai enisini lanumoana. ‘Ou te manatu ou te mafaia—Ou te manatu ou te mafaia—Ou te manatu ou te mafaia—Ou te manatu ou te mafaia—Ou te manatu ou te mafaia—Ou te manatu ou te mafaia—Ou te manatu ou te mafaia.’” Faatasi ai ma lea uiga, sa taunuu atu lava le tamai enisini i luga o le mauga ma alu atu i le isi itu o loo faapea atu, “Sa ou manatu ou te mafaia. Sa ou manatu ou te mafaia. Sa ou manatu ou te mafaia. Sa ou manatu ou te mafaia. Sa ou manatu ou te mafaia. Sa ou manatu ou te mafaia.”2
E i ai taimi e valaauina ai i tatou uma e faia ni mea e sili atu nai lo le mea tatou te mafaufau e mafaia. E faamanatu mai ai ia te a’u se faaupuga atamai a Peresitene Theodore Roosevelt, “O a’u ua na o se tagata masani, ae Siaosi, e sili atu lo’u galue malosi i ai nai lo se tagata masani!”3 Tatou te atinaeina a tatou taleni mai lo tatou mafaufau muamua lava lea tatou te mafaia. Ua tatou masani uma lava i le faataoto i taleni. Na tuuina atu e le Matai i le tasi ia taleni e lima, o le isi e lua, o le isi e tasi, “ua faatatau i le mea ua mafai ai e le tagata… .
“Ona alu ai lea o le na i ai taleni e lima ua faatau atu ai, ia maua ai foi isi taleni e lima.
“Ua faapea foi o le na i ai taleni e lua, ua maua ai foi e ia le tasi lua..
“A o le na i ai le tasi, ua alu ma eli i le eleele, ua na ai ario a lona alii.”
Ina ua mavae se taimi umi ona fesili atu lea o le Matai mo se lipoti. O le na mauaina taleni e lima na lipoti atu faapea na ia toe maua le isi lima faaopoopo, ma mauaina le faamalo “Ua e faamaoni i nai mea itiiti. Ou te tofia oe e pule i mea e tele.” O le na mauaina taleni e lua na toe maua le isi lua faaopoopo ma maua foi le folafolaga e pulea i mea e tele. Ae o le na mauaina le taleni e tasi na toe foi mai ma le taleni lenei e tasi, ma faapea atu, “Le alii e, na ou iloa o oe o le tagata faigata, ua e selesele i le mea e te le’i luluina ai saito, ua e faapotopoto foi i le mea e te le’i faataapeapeina ai mea:
“Ona ou fefe ai lea, ua ou alu ma ou nana la’u taleni i le eleele.”4
I le lipotiina atu o lana tautua, sa tuuaia sese ai e lenei auauna faatamala lona matai i ona lava vaivaiga.5 Sa mafai lava ona ia faataavaleina le tupe ma maua ai le tului nai lo le tanumia i le eleele. Na aveesea lana taleni mai ia te ia ma tuuina atu i le tagata ua i ai taleni e sefulu. Ona ta’u mai ai lea e le Alii ia i tatou, “Aua o se ua i ai ni mea, e foaiina atu ia te ia, e atili tele ai ana mea: a o le ua leai ni mea, e faoa le mea ua i ai.”6
Atonu tatou te manatunatu pe na talafeagai le aveeseina mai o le taleni mai le na laitiiti ana taleni ae tuu atu i le tagata sa sili ona tele. Ae peitai, mai le amataga, na faamalamalamaina mai ai e le Alii e faatatau lava i le mea ua mafai ai e le tagata.7
O nisi o i tatou ua faamalieina lava i tatou i le mea o loo mafai ona tatou faia nei. Ua tatou fiafia i le faaupuga “ia aai ma inu, ma ia olioli” ae o loo tele ia avanoa mo le alualu i luma ma le atinaeina. Tatou te misia ia avanoa e fausia ai le malo o le Atua ona ua i ai lo tatou manatu e i ai le isi tagata o le a faia. Ua ta’u mai e le Alii ia i tatou o le a Ia tuuina mai mea e tele ia i latou o e naunau. O le a faalauteleina i latou i a latou taumafaiga, e pei o le tamai enisini a o ia tosoina le nofoaafi i luga o le mauga. Ae o i latou o e faapea ane, “Ua lava ia te i matou, e aveeseina ia te i latou o mea ua ia te i latou.”8
Ua tuuina mai e le Alii i Ana auauna uma, e aofia ai i latou uma e umia le perisitua, ia taleni faaleagaga. O le Alii, o le na faaeeina mai ia i tatou nei taleni, ua fetalai mai, “Ou te talitonu e te mafaia. Ou te talitonu e te mafaia.” E ui e le tutusa uma o tatou malamalama, tomai, ma malosi, ae eseese foi o tatou avanoa e faaaoga i ai nei meaalofa faaleagaga, ma o le a faamasinoina uma lava i tatou mo le faaaogaina o nei meaalofa ma avanoa ua tuuina mai ia i tatou.
O loo aofia i le talafaasolopito o le Ekalesia ia i latou na umia le perisitua e maoae le malolosi. E toaitiiti nisi sa atamamai ae sa tumau ai pea ma e le’i faatuatuaina ma o lea na le toe maua ai ia meaalofa faaleagaga ma taleni na matuai faaeeina mai e le Alii ia i latou. Ou te fia faamatalaina atu ia te outou se tasi faapena.
Na taitai atu e Samuel Brannan nisi o le Au Paia e taamilo atu i le Cape Horn i luga o le vaa o le Brooklyn. Sa faia sina latou malologa puupuu i Hawaii a o le’i tuuvaa atu mo le Faga o San Francisco. Na talitonu o ia o le toatele o le Au Paia e le tatau ona nonofo i Mauga Papa ae tatau ona o atu i Kalefonia. O lea na ia malaga atu ai agai i sasae ma fetaui ai ma le uluai vaega o tagata faimalaga mai sa i lalo o le taitaiga a Polika Iaga i le Vaitafe Lanumeamata, i Wyoming. Na ia faaaogaina ona mana uma e faatauanau ai ma taumafai e faatalitonu ia Polika Iaga ina ia faaaoga ia avanoa na ia lagona o loo ofoina mai e Kalefonia. Na tali atu Polika Iaga, “Afai tatou te o i Kalefonia, e le mafai ona sili atu ma le lima tausaga o tatou nonofo ai; ae ia tatou nonofo i totonu o mauga, ma e mafai foi ona totoina ai a tatou lava pateta ma aai ai; ma ua ou fuafua ou te nofo ai iinei.”9 Sa nonofo faatasi ia Brannan ma le toatele o le Au Paia mo ni nai aso, ae talu ai ona o lona ulumalo ma lona manatu faapito, sa ia toe foi atu ai i Kalefonia ia Aokuso 1847.
E pei o le enisini lapoa e le’i naunau e tosoina ia taavale i luga o le mauga, sa faapea foi ona le taulai atu ia Sam Brannan i le fausiaina o le malo o le Atua. Ae sa naunau atu o ia i le faiga o le pisinisi ma le sailia o tupe. Na avea o ia ma uluai milionea i Kalefonia, faatasi ai ma le tele o pisinisi ma le tele o fanua na umia. Talu ai ona o ia sa avea ma taitai o lena vaega o le Au Paia, o lea sa talosagaina ai o ia e Peresitene Iaga ina ia tuuina atu se lipoti mo le sefuluai na ia aoina mai tagata o le Ekalesia i Kalefonia, e aofia ai i latou sa lolofi atu i le taimi na maua ai le auro, ae na te le’i faia. Na te le’i faaaogaina foi tupe e faatuina ai le Ekalesia pe fesoasoani ai foi i tagata o le Ekalesia iina.
Sa matuai faamanuiaina ia Brannan i le faatutuina o pisinisi ma le mauaina o fanua mo lona lava lelei, mo sina vaitaimi, ae na i’u lava i le oo atu i faigata. E le’i nonofo faatasi lona aiga. E maliu o ia ua tuua na o ia, ua matuai gau aano lava i le faaletino, faaleagaga, ma le tulaga tau tupe. E sefuluono masina e leai ma se tasi na alu atu e aveese mai lona tino maliu. Na i’u lava ina ua tuu i le Fanua Maliu o le San Diego Mount Hope. E tele mea na maua e Sam Brannan i lona olaga, ae i le faaiuga na matautia se tau na ia totogiina mo lona le faamamaluina o lana auaunaga faaperisitua, ma lona toilalo e mulimuli i le perofeta a le Atua.10
O i tatou o e o loo umiaina nei ia tiute faaleperisitua o lenei Ekalesia e tatau nei loa ona mulimuli ma lagolagoina lo tatou perofeta, o Peresitene Gordon B. Hinckley.
E pei o le “Tamai Enisini Lea Na te Mafaia,” e moomia ona tatou i ai i le ala sao ma atinaeina a tatou taleni. E tatau ona tatou manatua o le perisitua e faatoa mafai ona faaaoga mo faamoemoega amiotonu. Afai tatou te faaaogaina i “soo se faiga lava o le amioletonu, faauta, e punitia lava le lagi; e tiga le Agaga o le Alii; pe a aveeseina foi, Amene i le perisitua po o le pule a lena tagata.”11
Ina ia tumau ai i le ala sao e tatau ona tatou faamamaluina ma lagolagoina i latou o e o loo umiaina ia ki pulefaamalumalu o le perisitua. Ua faamanatu mai ia i tatou e faapea “e toatele e valaauina, ae toaitiiti e filifili.”12 O afea e filifilia ai i tatou? E filifilia i tatou e le Alii pe a tatou faia le mea sili e tulei ai i luma lenei galuega paia e ala i a tatou taumafaiga ma taleni faapaiaina. O a tatou taumafaiga e tatau lava ona taitaia e mataupu faavae o le amiotonu e pei ona faatulagaina mai e le Alii i le vaega e 121 o le Mataupu Faavae ma Feagaiga.
“E le tatau ona faatumauina se mana po o se uunaiina e le pule o le Perisitua, tau lava i le tauanau atu, i le faapalepale, le agalelei, ma le agamalu, ma le alofa faamaoni.
“I le agalelei, ma le malamalama mama, e matua faalauteleina ai le aga e aunoa ma le pepelo, e aunoa ma le faaoleole.”13
Ua tuuina mai le perisitua ina ia faamanuiaina ai olaga o isi. Na saunoa ia Peresitene Tavita O. Makei: “O le natura faavae lava o le Perisitua ia e faavavau. E pei ona vaaia i le ola le faaalia ai o le mana. E mafai ona tatou mafaufau i le mana o le Perisitua e pei o se faatanoa vai tele. O sea ituaiga mana e avea ma se taunuuga o mea lelei pe a oo mai le malosi e faamatuuina atu ai i vanu, fanua, togalaau ma aiga fiafia; e faatoa faaalia la le mataupu faavae o le mana pe a aoga i olaga o tagata, ma liliuina ai o latou loto ma manaoga e agai i le Atua, ma uunaia ai le auauna atu i o latou uso a tagata.”14 Afai tatou te le o auauna atu i isi, e le o i ai la se aoga o le perisitua ia i tatou aua e le o se mana e nofonofo. Uso e, ia lotofoai i le mana o faamanuiaga lea e ala mai i le perisitua, ae maise lava i tagata o outou lava aiga. Manatua na fetalai mai le Alii, “Ai se e te faamanuiaina, o le a ou faamanuiaina.”15
I le saunia mo le taimi o le a tatou lipoti atu ai i le Alii mo lo tatou lava auaunaga faaleperisitua, o fea o le a tatou i ai? Ia manatua “o le leoleo o le faitotoa o Le Paia o Isaraelu lea; na te le tofia ai se auauna.”16
Ou te faamoemoe o le a le pei i tatou o le enisini lapoa laupasese, ua faamaualuga tele e taliaina ai ia tofiga ua tuuina mai ia i tatou. Ou te tatalo ia aua ne’i pei i tatou o le tagata o loo i le solo lauiloa o le na faapea mai:
Le Tama, o fea e tatau ona ou galue ai i lenei aso?
Na faatumulia a’u i lagona o le alofa ma le mafanafana.
Ona Ia faasino mai lea o sina fasi fanua
Ona fetalai mai lea, “Tausi le la mo a’u.”
Sa vave ona ou tali atu, “Oi e leai; e le o le la!
Aisea, e leai se tasi o le a vaai atu i ai,
E tusa lava po o le a le lelei o sa’u galuega e faia;
Ou te le fia galue i le la vaega.”
Ma o le upu na Ia fetalai mai ai, e matuitui;
Sa Ia tali mai ma le malu:
“Oi, le pele e, mafaufau lelei i ou lagona.
Po o e galue ea mo i latou pe mo a’u?
O Nasareta o se tamai nofoaga,
E faapena foi ia Kalilaia.”17
Ou te faamoemoe foi o le a le pei i tatou o le enisini la’u uta, sa le naunau e “alu i le maila faaopoopo” e auauna atu ai. Ua aoaoina i tatou e le Matai e faapea “ai se na te tauanau mai lua te o ma ia i le maila e tasi, ina o ia oulua ma ia i maila e lua.”18 O nisi o taimi sili ona tauia o o tatou olaga o taimi e tuuina atu ai se auaunaga faaopoopo a o faalogoina le faapea mai o le tino e moomia se malologa ae o o tatou tino o loo tulai ma faapea atu, “O a’u lenei; ia auina atu a’u.”19
Pe faapei foi o le enisini tuai, pe tatou te faapea atu ua tatou lelavava—pe ua matutua tele foi! Ou te faamanatu atu ia te outou o Peresitene Hinckley ua 92 ae o loo malosi pea lava!
Ou te faamoemoe ia mafai ona tatou pei uma o le “Tamai Enisini Lea e Mafaia.” E le lapoa tele, sa na o le fesuiaiga lava o taavale sa faaaoga ai, e le’i alu foi i luga o se mauga, ae sa naunau. O lena tamai enisini sa tosoina i luga se nofoaafi, ma tolotolo atu lava i luga o le mauga ma toe ifoifo i lalo ma faapea ane, “Sa ou manatu Ou te mafaia.” E tatau ia i tatou uma ona aeaina ia mauga tatou te le’i feaei ai muamua.
Uso e, e maoae la tatou galuega ma e mamafa foi o tatou tiutetauave faaperisitua. Ou te faamoemoe ma tatalo ina ia mafai ona tatou agai i luma i lenei galuega paia ma le lotomaualalo, agaga tatalo, ma le lotogatasi i lalo o le taitaiga a le Agaga o le Alii ma le taitaiga a Peresitene Gordon B. Hinckley, i le suafa o Iesu Keriso, amene.