“Amuia e Faatupuina le Filemu”
O le filemu o se faamuamua maualuga lea e tatau ona tatou sailia.
O nisi o gaoioiga a le matou aiga e sili ona manatua pea, o malaga ia i le Nuu Paia. Ia i matou lava ia, o asiasiga i lena vaega o le lalolagi sa maua ai aafiaga e suia ai le olaga e ola ai. Ae o le taimi nei, o le Nuu Paia ua avea o se kalone o mea faafatiatama’i ma ua le tatalaina mo i latou e fia o atu i ai mo le faatamaoaigaina faaleagaga. E toetoe lava o vaega uma o le lalolagi ua mafatia i faiga taufaamatau sa le i ai i aso ua mavae. Ua oo mai foi fenumiaiga i le toatele o e tatalo mo le filemu, ae ua faafesagai ma le fefefe ma lenei fili taufaamatau.
Filemu ma Finauga
O taimi matautia o lo o tatou ola ai, sa valoia mai i tusitusiga paia. Sa muai vaaia o tatou aso, o “afi, ma matagi tetele, ma puao o le asu i nuu mamao; … o taua ma tala i taua, ma mafuie i lea mea ma lea mea … o mea leaga e tele i luga o le fogaeleele; … ma mea inosia uma.”1
O lena valoaga o lo o toe faamalosia mai ai se tala faatusi paia e uiga i le olaga o le tagata2 i luga o le fogaeleele: “Sa malosi le mana o Satani i tagata i ona po na, ma sa aasa i o latou loto; ma sa amata mai le taimi lena ona oo mai taua ma le faamaligi toto; ma sa sii foi le lima o le tagata i lona lava uso, ona … o le fia maua o le pule.”3 Mai ona po o Kaino ma Apelu,4 Esau ma Iakopo,5 ma Iosefa lea sa faatau atu i Aikupito,6 ua saga mumu saesae le afi o le faatautee ma amio malolosi ona o fefinauaiga i aiga.
O le feitagai i le va o uso ma tuaoi ua liua ai nei aai paia ua avea ma aai o le faanoanoa. Pe a ou mafaufau i le malaia o ia nofoaga, ou te manatua ai lava se alagaupu faaanamua: “O tagata faatauemu, latou te faamuina le aai: ao e popoto, latou te faaliliueseina le ita.”7
Taitaiga a Talitonuga Faavae
O lo o aumaia i tusitusiga paia le malamalamaaga i le mafuaaga ma le vaifofo o le ma’i o le feitagai i le tagata soifua: “O le tagata o le lalolagi, o le ita lea i le Atua, ma ua faapea talu le pau o Atamu, e faapea foi e oo i le faavavau, faavavau lava. Ae afai e gauai o ia i galuega alofa a le Agaga Paia, ma ua tuu ese le tagata o le agasala, ma ua avea o ia ma tagata amiotonu ona o le togiola a Keriso.”8
E faatoa mafai ona manumalo le filemu pe a suia lena lagona faamisa i le naunautai o le tagata lava ia e ola i se tulaga maualuga atu o le olaga. O le o mai ia Iesu Keriso o le “Alii o le Filemu”9 o le ala lea i le filemu o le lalolagi ma le manatu alofa i tagata.10 Na Ia folafola mai ia i tatou: “Amuia e faatupuina le filemu: aua e taua i latou o atalii o le Atua.”11
Sa aoaoina e Iesu tagata i le ala e ola fegalegaleai ai le tasi ma le isi. Sa Ia tautino maia tulafono sili e lua: muamua, ia “alofa atu i le Alii lou Atua ma lou loto atoa, ma lou agaga atoa, ma lou manatu atoa,”12 ma le lona lua, ia “alofa atu i le lua te tuaoi, ia pei o oe lava ia te oe.”13
Ona Ia toe faaopoopo mai lea, “Ia outou alolofa atu i e ita mai ia te outou, [ma] ia outou faamanuia atu i e ua fetuu mai ia te outou.”14
Sa Ia aoao mai le Tulafono Faaauro: “O mea uma foi tou te loto i ai ia faia e tagata ia te outou, ia faapea lava ona outou faia ia te i latou.”15 E toetoe lava o soo se ituaiga lotu o lo o maua ai lenei mataupu faavae. O isi e pei o Confucius ma Aristotle, sa aoaoina atu foi lenei mataupu.16 Tasi o le mea, o le talalelei e lei amataina i le soifua mai o le Pepe i Peteleema. [O le talalelei] e faavavau. Sa tala’ia i le amataga ia Atamu ma Eva. E i ai vaega o le talalelei sa faasaoina i le tele o tu ma aganuu. E oo lava i manatu faanuupo e le iloa le Atua, ae sa faatamaoaigaina lava i fasi vaega o upumoni mai tisipenisione na muamua atu.
Soo se mea lava e maua ai, ma pe faapefea foi ona faaalia, e aofia ai lava i le Tulafono Faaauro le faailo tatau o le malo o le Atua. E faasa ai le aia fua o le tasi i aia tatau a le isi. Ua noatia tutusa ai malo, o faalapotopotoga, ma tagata taitoatasi. Faatasi ai ma le agaalofa ma le faapalepale, ua suia ai le tauimasui atu o le “mata i le mata, ma le nifo foi i le nifo.”17 Afai tatou te mananao e tausisia pea le ola ai i lena mataupu faavae tuai e leai se aoga, o lona uiga ua tatou tauaso uma ma le nifoa.18
O lenei mataupu e uiga i le faia i isi tagata, e faapei ona e manao e fai atu ia te oe, e faigofie lava ona malamalama i ai. Ma e faailoa mai ai foi le natura taua o atalii ma afafine taitoatasi o le Atua.19 Ua poloaiina e le mau ia matua e aoao a latou fanau e aua nei tau ma femisaa’i ma latou auauna i le tiapolo, o le e pule i le agasala.” Ae, ia tatou “aoao atu ia te i latou ia fealofani, ma auauna le tasi i le tasi.”20
Sa aoao mai e Iesu le taua o le faaleleiga ma le foia o se eseesega e le tagata lava ia. Sa Ia fetalai mai, “Ai se ita fua i lona uso … e nofo sala o ia i le faamasinoga… .
“Pe afai foi e te avatu lau taulaga i le fata faitaulaga, ona e manatua ai lea ua i lou uso se mea e ita ai o ia ia te oe;
“Ina tuu ia i lea mea o lau taulaga i luma o le fata faitaulaga, ae alu oe ia muai faalelei i lou uso, i le e sau ai, ma avatu lau taulaga.”21
Ua aoaoina i tatou e le Faiaoga Sili “ai se mea tou te tiga ai i se tasi, ia outou faamagaloina, ina ia faamagaloina foi e lo outou Tama o i le lagi a outou agasala.
“Afai foi tou te le faamagaloina, e le faamagaloina e lo outou Tama o i le lagi a outou agasala.”22
Sa tautino mai e Iesu o le a oo mai se aso o le faamasinoga. O le a tuuina atu ai e tagata uma taitoatasi se talaaga o o latou olaga i la le tino, ma pe na faapefea foi ona latou taulimaina isi tagata.23
O Matafaioi a Tagata Lautele
O poloaiga e alolofa i le Atua ma tuaoi, e fesootai. E le mafai ona tatou alolofa atoatoa i le Atua e aunoa ma le alolofa i o tatou tuaoi. E le mafai foi ona tatou alolofa atoatoa i o tatou tuaoi e aunoa ma le alolofa i le Atua. E uso moni lava tagata aua o le Atua foi o lo tatou Tama moni. Ae ui lava i lena, ua tumu tusitusiga paia i tala o le femisaai ma le fetauai. O lo o matua tausalaina ai taua o finauga, ae aloaia matafaioi a tagatanuu e puipuia o latou aiga ma o latou saolotoga.24 Aua “tatou te talitonu i le usitai i tupu, ma peresitene, ma faipule, ma faamasino, i le usitai ma faamamalu, ma lagolagoina le tulafono,”25 o lea o le a toatele ai tagata o lenei Ekalesia e tofia i le tautua faamiliteli i le tele o atunuu. “Tatou te talitonu ua faatuina malo e le Atua mo le lelei o tagata; ma o loo ia faia tagata e tali atu mo a latou faiga e uiga i ia malo, i le faia o tulafono atoa ma le faaaogaina mo le lelei ma le saogalemu o tagata uma.”26
I le taimi o le Taua Lona Lua a le Lalolagi, ina ua faamalosia tagata o le Ekalesia e tau i itu tetee, sa faamautinoa mai e le Au Peresitene Sili e faapea, “ua i ai i le malo le tiutetauave mo le puleaina faalemalo o ona tagatanuu po o mataupu, mo le soifua sololelei faaupu fai, ma le faataunuuina o tulafono faaupu fai, faalenuu ma fafo atu… . Peitai, o le Ekalesia lava ia, e leai sana matafaioi i nei tulafono po o aiaiga, [e ese mai] nai le uunaia o ona tagata ina ia tuuina atu atoatoa … lo latou faamaoni i o latou atunuu.”27
E Mafai Ona Filemu
Ona o le talafaasolopito umi o le faatautee i luga o le fogaeleele, o lea ua manatu ai le toatele ua siliga tali i seu se faamoemoe. Ou te le ioe i lea tulaga. E mafai ona filemu. E mafai ona tatou aoao e alolofa i o tatou uso a tagata i le lalolagi atoa. Pe o i latou o ni Iutaia, Isalama, po o ni uso a Kerisiano, pe lotu Initu, lotu Puta, po o se isi, e mafai lava ona tatou ola faatasi ma taufai saafi faatasi ma le faaaloalo, e aunoa ma le tuulafoaia o o tatou talitonuga maumaututu faalelotu. E sili atu ona tele mea e laugatasia ai i tatou nai lo o tatou eseesega. O le filemu o se faamuamua maualuga lea e tatau ona tatou sailia. Sa talitonu perofeta o le Feagaiga Tuai e mafai ona maua le filemu, ma e tatau ai foi ia i tatou ona manatu faapena. Fai mai le fai Salamo, “O le Atua o lo tatou malu ia ma lo tatou malosi, e fai o ia ma fesoasoani silisili i puapuaga.”28 E faamutaina e ia o taua e oo lava i tuluiga o le lalolagi.”29
Sa tulaga ese lava le faaigoaina o Tama Aperaamo, o se “Uo a le Atua.”30 O le filemu, o se tasi o faamuamua aupito maualuga ia Aperaamo. Sa ia saili atu e avea ma se “alii o le filemu.”31 E mafai ona avea ana faatosinaga ma se aafiaga tele i a tatou taumafaiga i le taimi nei e tulimatai le filemu. O ona atalii o Isamaeli ma Isaako, e ui lava ina eseese tina sa fananau mai ai, ae sa la faatoilaloina o la’ua eseesega ina ua la punouai i le faamoemoega e tasi. Ina ua maliu lo laua tama, sa la galulue faatasi e tanumia le tino maliu o lo la’ua tama faaeaina.32 E mafai foi ona mulimulita’i i latou e tupuga mai ia te i la’ua i lena mamanu.
Ua i ai i fanau a Aperaamo se tomai paia na folafolaina i ai. Sa ta’u atu e le Alii ia Isamaeli o le a avea o ia ma se nuu tele33 ma o fanau foi a Aperaamo, Isaako, ma Iakopo o le a manuia ai nuu uma o le lalolagi.34
O lona uiga o e e tupuga mai ia Aperaamo—ua tuu atu i ai folafolaga maoae o aafiga e le iu—ua latou i ai i se tulaga taua e tulai mai ai o nisi e faatupuina le filemu. Ina ua filifilia i latou e le Silisiliese, o lea e mafai ai ona faasinotonu atu o latou tomai mamana mo le filemu.
O le vaifofo mo faafitauli faaupu fai i ona po nei, e manaomia ai le onosai tele ma le galulue faatasi. O le a matua mafai tele lava ona fai pe afai e tulitulimatai ma le loto tatalo.
Sa valoia e Isaia le faamoemoe i o tatou vaitaimi. Ina ua saunoa o ia e uiga i le faapotopotoina o Isaraelu ma le toefuataiiga o le Ekalesia e ala mai i le Perofeta o Iosefa Samita, sa tusia ai e Isaia:
“O le aso foi e toe tuu atu faalua ai e le Alii lona aao e laveaiina e ua totoe o lona nuu, …
“E faatuina foi e ia le tagavai mo nuu ese, ma faapotopotoina e ua tulia o Isaraelu, ma aofai e ua faataapeapeina o Iuta i itu e fa o le lalolagi.”35
E mafai ona faataunuuina nei valoaga o le faamoemoe, pe afai e faaaoga e taitai ma tagatanuu o malo ia aoaoga a Iesu Keriso. Ona mafai lea ona avea lo tatou tisipenisione, ma vaitaimi aupito sili o le filemu ma le alualu i luma nai lo se isi lava taimi. O le a tanumia tu faanuupo. O taua foi ma ona tulaga matautia, o le a avea ma mea e nutimomoia ai le loto. O sini foi a nuu ma malo o le a taufai lagolagoina. O i latou e faatupuina le filemu, e mafai ona taulamua i le faatufugaga o le galulue faatasi, avatu le fesoasoani i e o loo manaomia, ma avatu foi le faamoemoe ia i latou o e atuatuvale. O ia ituaiga o tagata lotonuu, o le a viia e augatupulaga o a taeao, ma o le a faamanuina foi i latou e lo tatou Atua Faavavau.
O le faamoemoega o le lalolagi o le Alii ia o le Filemu—o lo tatou Foafoa, o le Faaola, o Ieova, ma le Faamasino. Ua Ia tuuina mai mo i tatou le soifua lelei, ia maua atili le ola, ma le ola e faavavau. O le ola—filemu—e tumu i le tamaoaiga, e mafai ona maua e i latou o e tausi i Ana mataupu36 ma mulimuli i Ona ala i le filemu. Ou te tautino atu lenei mea i le lalolagi uma.
Tagata o le Ekalesia
O le avea ai ma tagata O Le Ekalesia a Iesu Keriso o le Au Paia o Aso e Gata Ai, o le a la se mea o finagalo ai le Alii mai ia i tatou? I le avea ai ma se Ekalesia, e tatau ona tatou “tetee atu i taua ae talai atu le filemu.”37 O le avea ai ma tagata taitoatasi, e tatau ia i tatou ona “tatou tausisi i mea e tupu ai le filemu.”38 E tatau ona avea i tatou ma faatupu filemu i o tatou lava olaga. E tatau ona tatou ola i le filemu—i le avea ai o ni ulugalii, aiga, ma tuaoi. E tatau ona tatou ola i le Tulafono Faaauro. Ua ia te i tatou tusitusiga a e na tupuga mai ia Iuta lea ua tuufaatasia ma tusitusiga a e na tupuga mai ia Efaraima.39 E tatau ona tatou faaaogaina ia tusitusiga paia ma faalautele atu ai le li’o o lo tatou alofa e opo mai le fanauga uma a tagata. E ao ona tatou aumaia le alofa faalelagi, ma faailoa atu i o tatou tuaoi ma uo, ia aoaoga faavae o le lotu ua toefuataiina mai. E tatau ona tatou auauna atu i ai e tusa ma mea tatou te mafaia ma avanoa. E tatau ona faaeaea i a tatou mataupu faavae ma tutu atu e puipuia le mea tonu. E tatau ona tatou faaauau e faapotopoto mai Isaraelu ua faasalalauina, mai tulimanu e fa o le lalolagi, ma ofo atu i ai sauniga ma feagaiga e faamau faatasi ai aiga e faavavau. O faamanuiaga na e tatau ona tatou avatu i tagata o nuu uma.
O lo tatou ola ai faapea, o le a faamanuiaina ai i tatou e lo tatou Matai. Na Ia aumaia lenei folafolaga: “Aua e te fefe, aua ou te ia te oe; aua le fetepatepai, aua o au o lou Atua: ou te faamalosia oe, e moni, ou te taofia oe i lo’u lima taumatau e i ai le amiotonu.”40
O la tatou galuega e paia. O la tatou mataupu o le galuega o le mamalu e faavavau mo tagata uma. Ma o le avea o i tatou ma e e faatupuina le filemu, o le a ta’ua ai i tatou o atalii o le Atua. Ou te molimau atu ai i le suafa o Iesu Keriso, amene.