O Le Alofa Mama: E Tasi le Auaiga, Tasi le Aiga i le Taimi
O le avea ai o i tatou ma ni tamaitai o le feagaiga, … e mafai ona tatou suia le lalolagi ia tasi le aiga, tasi le auaiga i se taimi e ala i le alofa mama, o nai a tatou faatinoga iti ma le faatauvaa o le alofa mama
I ni nai tausaga ua mavae, sa ma asiasi atu ai ma lo’u toalua i le itu i sasae o Perelini, i Siamani. Sa taatitia solo ai ni fasi mea o le pa ta’uta’ua sa tavavae ai tagatanuu o lena aai—sa faasao e fai ma faamanatu o le manumalo o le saolotoga mai le nofopologa. Sa i ai se fasi vaega se tasi o le pa o lo o tusi matamata tetele ai i mataitusi lanumumu upu nei: “E toatele tagata faatauvaa i le tele o nofoaga faatauvaa ua faia mea faatauvaa e mafai ona suia ai le lalolagi.” Ia te au lava ia, o lo o tautala lea faaupuga i mea e mafai e i tatou taitoatasi—o ni tamaitai o le feagaiga ona fai se mea e tulaga ese ai, a o tatou tutulai e ofo atu o tatou loto ma lima i le Alii e ala lea i le alolofa atu ma siitia isi i luga.
E le afaina pe o tatou o ni tagata faatoa liliu mai pe o ni tagata o le ekalesia i o tatou olaga atoa; nofofua, faaipoipo, pe ua oti le toalua; pe tatou te mauoa, matitiva, pe sa aoga, pe le i aoga foi; nonofo i se aai faaona po nei po o se nuu maouta foi i le togavao. O i tatou, o ni tamaitai o le feagaiga, ua faapaiaina i tatou lava mo le galuega a Keriso e ala i a tatou feagaiga o le papatisoga ma le malumalu. E mafai ona tatou suia le lalolagi ia tasi le aiga, tasi le auaiga i se taimi i nai a tatou faatinoga iti ma le faatauvaa o le alofa mama.
O le alofa moni, o le alofa mama lea o le Faaola, o le “alofa aupito i maualuga, tamalii, ma malosi”1 lea tatou te tatalo atu ai i le Tama ma le malosi uma o le loto”2 ina ia tatou mauaina. Ua aoao mai i tatou e Elder Dallin H. Oaks o le alofa moni “e le o se amioga, ae o se tuutuuga po o se tulaga, [e avea ai se tagata].”3 O lo tatou ofoina atu o le alofa moni i lea aso i lea aso “e le o tusia i le vaitusi, a o le Agaga o le Atua soifua i papatusi maa o [o tatou]; … i maatusi o [o tatou] loto.”4 O sia mea itiiti ma sia mea itiiti o a tatou faatinoga o le alofa moni, e suia ai o tatou natura, e faamanino ai o tatou uiga, ma faaiu ai ina avea i tatou ma tamaitai ua i ai le lotototoa ma le naunautai e faapea atu i le Alii, “O Au lenei, auina atu au.”
I le avea ai o Ia ma faaa’oa’o ia te i tatou, sa faasino mai e le Faaola ia te i tatou le uiga o le alofa moni e ala lea i Ana lava faatinoga. E le gata i le auauna atu i le motu o tagata, ae sa faaalia foi e Iesu le loloto o Lona alofa ma le manatu i Lona aiga. Na oo lava i le taimi na mafatia ai o Ia i puapuaga i luga o le satauro, sa mafaufau o Ia i Lona tina ma mea sa ia manaomia:
“Sa tutu latalata ane i le satauro o Iesu lona tina… .
“Ua silasila atu Iesu i lona tina, ma le soo ua alofaina e ia, ua tutu mai, ona fetalai atu lea o ia i lona tina, Sena e, faauta, o lau tama!
“Ua faapea atu foi i lea soo, Faauta, o lou tina! Talu foi lea itu aso ua ave o ia e lea soo i lona aiga.”5
E tuia lava lo’u loto ona ua faaalia i lenei mau le loloto o le naunau faamaoni atu o Ioane ia Maria ina ua faapea mai, “ua ave o ia e lea soo i lona aiga.” Ou te talitonu o faatinoga aupito taua o le alofa moni e laiti ma faatauvaa o latou natura, e faavavau taunuuga, ma e tuuina atu lava i totonu o papuipui o o tatou lava aiga.
A o tatou taulimaina ma le onosai ma le alofa i aso taitasi ni pepe faasaulalala, o tupulaga faigata, o le faigata o tagata tatou te potu faatasi, o toalua ua le toaaga i le lotu, po o matua matutua ua tausi esea, atonu tatou te fesili ifo ia i tatou lava, “Pe taua moni ea lenei mea ou te faia? E afaina pe tulai mai ai i se tulaga ese? Uso pele, o a lava mea tou te faia i o outou aiga, e afaina! E matua afaina lava. Tatou te aoao ma saga aoao i o tatou aiga i aso taitasi, e le uma le alofa mama o le Faaola. E toatele naua uso o le Aualofa, ua tele ni mea lelei ua latou faia i totonu o o latou aiga. O tamaitai faamaoni nei, latou te le mauaina ni faaviiviiga mai le lalolagi—latou te le o sailia foi—peitai “o le alofa atu i isi, e maua ai se eseesega.”6
O ai nei tamaitai e afua ai ona i ai se tulaga ese? I Navu, i le totonugalemu o le ogaoga o le mativa, sa tatala atu ai e uluai uso o le Aualofa o latou loto ma talia i o latou fale le toatele o tagata faatoa liliu mai, o e sa lolofi atu i le aai. Sa latou faasoa atu i ai a latou meaai, o lavalava, ma o le mea e sili ona taua, sa latou faasoa atu i ai lo latou faatuatuaga i le alofa togiola o le Faaola.
I lo tatou nei vaitau, o le Uso ia Knell o se tamaitai o le feagaiga, ua na faia se eseesega. O ia o se tamaitai ua silia ma le 80 ona tausaga, ma ua oti lana tane, e i ai sana tama tama e 47 tausaga, na fanau mai lava e le atoatoa le malosi o lona tino ma le mafaufau. I ni nai tausaga talu ai sa faia ai e lenei uso pele se mea na foliga e le mafai e se tasi ona fai—e aoao lana tama o Keith e faitautusi. O le aoao e faitautusi, o le mea aupito sili lea ona manao ai Keith, peitai, sa ta’u atu e fomai o Keith, e le mafai ona faitautusi. Faatasi ai la ma le faatuatua i le loto o le tina, ma se faanaunauga ia manuia le olaga o si ana tama, sa fai atu ai lenei tamaitai lotomaualalo ua oti lana tane i lana tama “Ou te iloa o le a faamanuiaina oe e le Tama Faalelagi, ina ia mafai ona e faitauina le Tusi a Mamona.”
Sa tusia e Uso Knell faamatalaga nei: “O se galuega faigata mo Keith ma sa le faigofie foi ia te au. O le taimi muamua, sa i ai ni aso leaga, aua sa ou ita. E tele se taimi na alu ai, ma o se tauiviga le tau faitau o upu taitasi. Ou te nofo i ona tafatafa i taeao taitasi. Ou te tago i le penitala ma faasino upu taitasi e fesoasoani ai ia aua nei oso ese lana faitau. Ina ua mavae tausaga uumi e fitu ma le masina e tasi, sa maea ona faitau e Keith le Tusi a Mamona.” Fai mai lona tina, “A faalogo atu o faitauina e ia se fuaiupu e aunoa ma se fesoasoani atu i ai, o se mitamitaga lea e le mafai ona ou faaupuina.” Na ia molimau mai, Óu te iloa e tutupu vavega pe a tatou tuu atu lo tatou faatuatuaga i le Alii.”7
I le lalolagi atoa i Aferika, Asia, o le Pasefika, Amerika i Matu ma Saute, ma Europa, o lo o i ai foi tamaitai alolofa, faatasi ai ma o latou aiga, ua latou faia foi mea e tulaga ese ai o latou nuu. I le motu laitiiti o Trinidad, ua matua gauai atu ai Uso Ramoutar, o se peresitene pisi o le Aualofa a le paranesi, ma lona aiga e fesoasoani i tamaiti o nuu tuaoi. O le aiga o le au Ramoutar e nonofo i se nuu “e malosi tele ai fualaau faasaina” ma e toatele matua ma tagata matutua ua ma’ivalea i meainu malolosi po o le fefaatauaiga o fualaau faasaina. E matua tele le tulaga lamatia o tamaiti ma e masani foi ona leai nisi e vaaia. E toatele e le aooga.
O po o aso Tofi taitasi, e oo atu lava i le 30 tamaiti, e amata atu i le 3 e oo i le 19 tausaga, e nofonofo i se vaega ua ufiufi i fafo o le fale o le au Ramoutar, ma auai ma le naunautai i se vaega ua lauiloa, “O Lo Matou Aiga Tele Fiafia e Tasi.” O tatalo, viiga, pese malie, ma le fetufaaiga o galuega lelei e faia e tamaiti i vaiaso taitasi, o se vaega lena o gaoioiga. O nisi taimi, o fomai, leoleo, faiaoga, po o tatou lava faifeautalai, latou te faamatala maia ni lesona aoga e pei o Ia (B’s) e ono a Peresitene Gordon B. Hinckley. O le aiga o Ramoutar, ua latou laveai maia nei fanau e ala i a latou faatinoga laiti ma le faatauvaa o le alofa moni. O lo latou fetufaai atu o le talalelei i lo latou “Aiga Tele Fiafia e Tasi”, ua auai atu foi ma isi i le Ekalesia.
Uso pele o le Aualofa, ou te iloa pe o fea lava tatou te nonofo ai, pe o a foi tulaga tatou te i ai, o i tatou, o ni tamaitai o le feagaiga, ua fusia faatasi i le amiotonu, e mafai ona suia le lalolagi. Ou te molimau atu e faapei foi ona ta’ua e Alema, “o mea faatauvaa ma mea faavalea ua faataunuuina ai mea tetele.”8 I totonu o o tatou aiga, o na mea laiti ma le faatauvaa—o a tatou faatinoga i aso taitasi o le alofa moni—e folafola atu ai o tatou talitonuga maumaututu, “O Au lenei; auina atu au.”
Ou te tuuina atu la’u molimau, o le faatinoga aupito sili o le alofa moni i le olaga nei ma le faavavau atoa, o le Togiola lea a Iesu Keriso. Na Ia ofoina mai ma le naunautai Lona soifua, e togiola ai a tatou agasala. Ou te faailoa atu lo’u naunau ma le faamaoni i Lana galuega atoa ai ma lo’u manao e auauna atu ia te Ia e le aunoa, i soo se mea Na te tofia i ai au, i le suafa o Iesu Keriso, amene.