O le Peteriaka o le Siteki
E i ai se manatu faapitoa o le Alii i le peteriaka, o le o loo umiaina se tofiga e tulaga ese i totonu o le Ekalesia.
I le limasefuluvalu tausaga ua mavae, sa ou tuitui atu ai i le faitotoa o le fale o J. Roland Sandstrom, le peteriaka o le Siteki a Santa Ana Kalefonia, ma se pepa faamaonia mai lo’u epikopo e faia ai lo’u faamanuiaga faapeteriaka. Ma te le’i feiloai muamua lava ma e ma te le’i toe feiloai mo le 14 tausaga. Na ma toe feiloai i le 15 tausaga mulimuli ane. O le taimi lea, ua avea a’u ma se tasi o le Toasefululua, sa ou faamanuiaina ai o ia i le aso na sosoo ma le aso na maliu ai.
Sa tilivaina atu le faamanuiaga ia te a’u i le meli i le vaega o lo o o’u faamautu ai i se nofoaga a le fuavaalele lea sa ou i ai. Ou te leiloaina i le taimi lena, e pei o le taimi nei, o se peteriaka e i ai se malamalama faaperofetaga, o ana faamanuiaga o le a sili atu ona avea ma se taiala ia te a’u. Sa avea ma se talita ma se puipuiga.
O loo poloai mai le faaaliga “o le tiute a le Toasefulu ma le Toalua, i paranesi tetele uma o le ekalesia, e faauuina faifeau evagelia, e pei ona faasinoina ia i latou i le faaaliga.”1
Na saunoa le Perofeta o Iosefa Samita, “O se Faifeau Evagelia o se Peteriaka lea… . “Soo se mea lava e faatuina ai le Ekalesia a Keriso i le lalolagi, e tatau ona i ai se Peteriaka mo le manuia o fanau a le Au Paia, e pei ona sa i ai ia Iakopo i le tuuina atu o lana faamanuiaga faapeteriaka i ona atalii.”2
O loo tautala ia tusitusiga paia i ituaiga peteriaka se tolu: tama o aiga3, o taitai perofeta i aso anamua, ma le peteriaka o le siteki, o se tofi faauuina i le Perisitua Mekisateko.4
O le tama o se peteriaka i lona aiga ma e mafai ma e tatau ona tuuina atu faamanuiaga faatama i lana fanau.
Seia oo mai i nai tausaga ua mavae atu, o peteriaka uma lava o siteki sa valaauina ma faauuina e se sui o le Korama a Aposetolo e Toasefululua. Ina ua faateleina le aofaiga o siteki, o lea na faasafua atu ai loa lenei tiutetauave i le peresitene o le siteki.
E pei foi o isi tofi i totonu o le Perisitua Mekisateko—o toeaina, faitaulaga sili, Fitugafulu, ma Aposetolo—o le peteriaka o le siteki e faauuina nai lo le faamanuiaina i se tofiga.
E tuuina atu e le peresitene o le siteki se igoa i le Korama a Aposetolo e Toasefululua. O igoa taitasi uma e matuai iloiloina ma le faaeteete ma manatunatu ma le agaga tatalo i ai. Afai e faamaoniaina, ona lagolagoina lea o le peteriaka i le konafesi a le siteki ona faauuina lea. Ona, faatasi ai ma malamalama faaperofetaga, ia tuuina atu ai lea ia faamanuiaga i luga o ulu o i latou o e omai ua fautuaina mai e le epikopo o le latou uarota.
O lo o i ai se tusi, Faamatalaga ma Fautuaga mo Peteriaka. E aoaoina ai le peresitene o le siteki ma le peteriaka e uiga i lenei tofi paia. O lenei tusi sa talanoaina mo le tele o tausaga e le Au Peresitene Sili ma le Korama a le Toasefululua. O taimi uma lava e iloiloina ai, e faaitiitia ai lona lapoa. Sa faapea mai se tasi o uso sinia, “Uso e, e le tatau ona tatou aia tele i le va o le Alii ma ana peteriaka.”
Matou te toe talosaga atu nei i peresitene taitasi o siteki ma peteriaka taitasi ina ia toe faitau i lenei faamatalaga puupuu. Faitau soo i ai.
E le faia ni faasalalauga a peteriaka mo ni tagata e o atu mo faamanuiaga. E tatau i tagata o le Ekalesia ona sailia ia faamanuiaga a o musuia ai i latou ina ia faia. E leai se matua faatulagaina e mafai ai e se tasi ona mauaina se faamanuiaga faapeteriaka. Ia mautinoa e le epikopo ua lava le matua o le tagata e malamalama ai i le uiga ma le taua o le faamanuiaga.
O se faamanuiaga faapeteriaka e pu’eina ma tusia e se tasi ua tofiaina e le peresitene o le siteki. O lena faamanuiaga e avea o se ‘oa e patino i le tagata lava ia.
E le tatau ona tatou faatagaina isi tagata e faitau i o tatou faamanuiaga faapeteriaka, se’i vagana ai o tagata totino o o tatou lava aiga e le tatau foi ona tatou talosaga atu i isi e faaliliuina. E le mafai foi e le peteriaka po o le epikopo ona faaliliuina.
A o valaauina ma faauuina e le Toasefululua ia peteriaka, sa matou fetufaaia ni aafiaga na matou oo i ai. Na matou aoaoina e i ai se manatu faapitoa o le Alii i le peteriaka, o le o loo umiaina se tofiga e tulaga ese i totonu o le Ekalesia.
Ou te manatuaina se konafesi na matuai loa ma afu le soifua o le peteriaka. E ui lava o le a avea o ia ma se peteriaka faauuina i lona olaga atoa, ae ua oo mai le taimi ua le talafeagai ai ona ia toe tuuina atu ni faamanuiaga.
Sa fautuaina mai e le peresitene o le siteki se alii e lava lona tomai faaletaitai. Ae peitai, ou te le’i maua le lagona e tatau ai ona avea o ia ma se peteriaka.
Na ou iloa na saunoa atu le Au Peresitene Sili i peresitene o siteki: “Talu ai ona ua faataunuuina ma le mamalu e se alii ona tiute i se tulaga faaletaitai ma ua lava foi lona matua, e leai se mafuaaga e le tatau ai ona avea o ia ma se peteriaka lelei; … [O ia le tagata ua tatau] ona atinaeina i totonu ia te [ia] le agaga o peteriaka; o le mea moni lava, o [lona] uiga sili lea ona taua, … [o se tagata] e atamai, o loo i ai foi le meaalofa ma le agaga o faamanuiaga.”5
A o tau amata le sauniga o le afiafi, sa savali mai ai se toeaina ua toeitiiti lava oo mai i luma, ae sa le mafai ona maua sona nofoa, o lea na toe foi atu ai i le pito i tua o le falelotu. Sa le pei ona laei o le toatele o isi ma e iloga mai lava o le tele o lona taimi e galue ai i fafo.
Sa ou musumusu atu i le peresitene o le siteki, “O ai le la toeaina?”
I lona taumatea o le mea o loo i lo’u mafaufau, na ia faapea mai ai, “Oi, ou te manatu e le mafai ona avea o ia ma o matou peteriaka. E nofo o ia i le uarota pito i sili ona mamao ma na te le’i umiaina lava se tofiga faataitai i se au epikopo po se fautua maualuga.”
Na valaaulia o ia e tuuina atu le tatalo amata ma e le tele ni ana upu na tautala ai ae oo mai lena faamautinoaga, e pei ona faia i faaaliga, “O le peteriaka lea.”
E pei ona ou manatua, e toaono ona atalii ae toatasi lona afafine. O le uii sa faamisiona i le taimi lena, e pei o ona uso matutua o e ua faaipoipo ma nonofo i vaega eseese o le atunuu, o loo auauna atu ma le faamaoni i le Ekalesia.
“Ae a lou afafine?” sa ou fesili atu ai.
“Oi,” o lana tala lea, “ua e feiloai i ai. O ia o le faletua o se tasi o fesoasoani i le au peresitene o le siteki.”
Sa ou manatu, “O se Peteriaka, o se peteriaka moni lava lenei tagata!”
A o le’i faia le sauniga aofai, sa ou feiloai atu ai i le peteriaka toeaina i le faapaologa ma faapea atu i ai, “O le a matou tuuina atu sina fesoasoaniga ia te oe i lenei aso.”
Sa ia faapea mai, “Oi, faafetai lava! O le a ou matuai talisapaia ma le faafetai.”
Sa ou faapea atu, “Se’i o’u tuuina atu ia te oulua le igoa o le peteriaka fou, ma e na o oe ma le peresitene o le siteki o le a iloaina.”
Ina ua ou ta’uina atu le igoa o le tagata lea, sa popole o ia ma faapea mai, “Pe le o se mea manaia lena! Sa ou vaaia o ia o malaga faatasi mai ma tagata i totonu o le fale, ma ou faapea ifo, “Pe o le a le avea ea o ia ma se peteriaka lelei?” O se faamautinoaga musuia lea mai le peteriaka toeaina.
E leai se mea e faapei o lenei tofi i le Ekalesia atoa po o le lalolagi atoa.
E tatau i peresitene o siteki ona tuuina atu se vaavaaiga, ma se tausiga faapitoa i le peteriaka. E tatau ona e faanofo ia te ia i luga o le tulaga i taimi o sauniga ma ia faailoa atu o ia.
I tulaga e le tupu soo, atonu pe faalua i le tausaga, e tatau ai ona e faatalanoaina le peteriaka ma faitau i nisi o ana faamanuiaga. Faamanatu atu ia te ia o faamanuiaga taitasi e tatau ona tutoatasi ma patino i le tagata. O lenei faitauina faavaitaimi o faamanuiaga e le tatau ona le amanaiaina e le peresitene o le siteki.
Sa ou faauuina i se tasi taimi se peteriaka na matuai faatoilaloina lava e le tiutetauave. Sa le mafai ona ia tuuina atu se faamanuiaga mo ni masina. Na iu ina ua ia talosaga atu i lana peresitene o le siteki pe mafai ona ia tusia atu se parakalafa e avea o se folasaga faataitai i soo se faamanuiaga faapeteriaka. Na faamaonia e le peresitene o le siteki.
Na ia ta’ua mai ia te au lenei mea mulimuli ane: “Ina ua oo atu le alii talavou muamua lava mo lona faamanuiaga faapeteriaka, talu ai ona ua ou taulotoina lenei folasaga ua saunia, sa ou maua le to’a. Sa ou faaee o’u lima i luga o lona ulu, ma e leai ma se upu e tasi na ou faaaogaina. O le aso lena na ou aoaoina ai le e ana na faamanuiaga. E le o ni a’u faamanuiaga ae fetalai mai e ala i le Agaga.”
Ua uma ona ta’ua o se faamanuiaga faapeteriaka o se “’[parakalafa] mai se tusi o mea e te gafatiaina.’ Afai tatou te faitau o tatou faamanuiaga faapeteriaka, o le a tatou vaai ai i le mea o le a faaalia mai e le agaga o valoaga e mafai ona tatou oo i ai.”6
O se vaega taua o se faamanuiaga faapeteriaka o le faailoa mai lea o le gafa. O le suesueina ma le faaeteete o tusitusiga paia, e masani ai se peteriaka ma le faatulagaga faapeteriaka. Na te aoaoina ai le taunuuga o ituaiga o Isaraelu.
Ua aoao mai le Usoga: “I le tuuina atu o se faamanuiaga e mafai e le peteriaka ona faailoa atu lou gafa—o lona uiga, o i tatou o Isaraelu, o le aiga la o Aperaamo, ma se ituaiga maoti o Iakopo. I le tele lava o tulaga, o le Au Paia o Aso e Gata e mai le ituaiga o Efaraima, le ituaiga lea na tuuina atu i ai le matafaioi o le taitaiga o le galuega i Aso e Gata Ai. E tusa lava po o se suli tau toto po o se tamafai lenei gafa (Penina Tautele, Aperaamo, 2:10). E taua tele le mea lenei, aua e na o le gafa o Aperaamo e mafai ona faataunuuina ai faamanuiaga silisili a le Alii mo Lana fanau i le lalolagi (Kenese 12:2, 3; Penina Tautele, Aperaamo, 2:11).
“Ona, vaai lea o le peteriaka i le lumanai, ma faamatalaina ia faamanuiaga ma folafolaga, o nisi e faapitoa, o isi e faalauaitele, lea e mafai ona aia i ai le tagata e tusa ma lona gafa … ma o lana pule e faamaufaailoga ai na faamanuiaga i ona luga, ina ia mafai ona ave ma ia e faavavau pe a usiusitai ma faamaoni.”7
Talu ai e tele gafa o augatuaa anamua o loo ia i tatou taitoatasi, e mafai ona toalua ni tagata o se aiga e eseese ia ituaiga o Isaraelu e faailoa atu i ai.
E mafai e se peteriaka ona tuuina atu ia faamanuiaga faapeteriaka i lana lava fanau, o fanau a lana fanau, ma fanau a fanau a lana fanau o e o atu ua uma ona fautuaina atu e lo latou epikopo.
Pe a matou mauaina ni talosaga mo ni tulaga e ese mai ai, mo se tasi e mauaina se faamanuiaga mai se uso o le tama po o le tuagane o le tina po o se uo foi a le aiga, matou te valaaulia i latou ina ia mulimuli i le faatulagaga ua i ai ma ia mauaina o latou faamanuiaga mai le peteriaka i totonu o le latou lava siteki.
I itu o misiona po o siteki e le o i ai se peteriaka, e mafai e tagata ona maua mai se pepa e fautuaina atu ai mai o latou epikopo po o le peresitene o le paranesi e ave i se peteriaka o se siteki e sosoo atu ai.
E i ai taimi e lagonaina ai e tagata e laiti o latou faamanuiaga nai lo le mea na faamoemoeina. Ae a o gasolo pea taimi, o le a latou iloaina ai le mana o faaaliga o loo i ai i totonu.
O nisi taimi o le a popole ai se tasi ona e le’i faataunuuina se folafolaga na faia i totonu o se faamanuiaga faapeteriaka. Mo se faataitaiga, e mafai ona faailoa mai i se faamanuiaga e faapea o le a faaipoipo se tagata, ae le maua se soa. E le faapea o le uiga o lena mea o le a le faataunuuina lava le faamanuiaga. E lelei ona silafia e tutupu mea i le taimi a le Alii, ae le o taimi o tatou. O mea e faavavau lo latou natura e leai ni taimi faatapulaa. Mai le muai olaga e oo mai i lo tatou olaga nei e oo atu i veli o le oti, o lo tatou ola e faavavau.
O tulaga e pei o le matua o le soifua ma le le atoatoa o le soifua maloloina, o le siitiaese mai le siteki, po o se valaauga foi e faamisiona, e moomia ai ona fautua atu e le peresitene o le siteki i le Korama a Aposetolo e Toasefululua le faanoiina faamamaluina o le peteriaka mai lana auaunaga.
Na faamatalaina e Peresitene Harold B. Lee le valaauina o se peteriaka. Na la o atu ma le peresitene o le siteki i le fale o le tamaloa. Sa o atu ma ona atalii i le faatoaga o le uelefea i le aso atoa ma sa matuai lelava ma vaivai ma sa palapala uma ma afu.
Na saunoa Peresitene Lee, “Sa ou matuai faateleina lona vaivai ina ua ou ta’uina atu ia te ia le mea na ou alu atu ai—o le a valaauina o ia e avea ma peteriaka o le siteki.”
Ina ua maea le sauniga o le konafesi i le taeao, lea sa tuuina atu ai se molimau uiga ese a lea alii, sa latou o atu loa i se ofisa i le pito i lalo.
Na tusi atu ia Peresitene Lee le faletua o le peresitene o le siteki, o le sa auai ai: “A o e savali atu e tuu ou lima i luga o [lona] ulu, sa ou faapea ifo, O ia o se tagata matou te faifaimea faatasi. Matou te o i ni faigamalaga faatasi ma ia, e o i siva… . O lea o le a avea ma se vaega o lona tiutetauave le faailoa mai o le gafa e omai ai tagata uma i nei faamanuiaga. E le’i a’oga o ia i nisi gagana ese—o le a faapefea ona ia iloaina?
“… Na e savali atu ma tuu ou lima i luga o lona ulu, ma na sau se malamalama mai ou tua ma alu atu sa’o lava i totonu ia te oe ma alu atu i totonu ia te ia. Ma sa ou manatu ifo, Pe le o se mea ua talafeagai ea le oo mai o le susulu o le la i totonu i le na o le taimi lava lea. Ona ou iloaina lea e leai se [faamalama,] e leai se la susulu. Sa ou molimauina le tali i la’u fesili… . O lena malamalama e sau mai se mea e sili atu nai lo Brother Lee ma ui atu ia Brother Lee ma oo atu i totonu o lenei peteriaka. Ona ou iloa ai lea le mea o le a ia maua mai ai faamatalaga—e ala mai i faaaliga a le Atua Silisiliese.”8
Ma e tatau lava ona i ai. Soo se taimi lava e faauuina ai se peteriaka pe fofogaina atu se faamanuiaga, o lena lava foi malamalama, e ui e le mafai ona vaaia, ae o loo i ai. E faatagaina ai se peteriaka e faailoa atu le gafa ma tuuina atu se faamanuiaga faavaloaga, e ui lava o ia o se tagata e masani ai.
Aua ne’i tuua le tofi o le peteriaka e le amanaiaina pe tuulafoaia. E taua i le malosi faaleagaga o le siteki.
O lenei, i peresitene o siteki, ia vaavaai le galuega a lau peteriaka o le siteki. Ia e malamalama i mea o loo ia faia. Ia faatalanoa o ia ma faitau nisi o ana faamanuiaga.
I le tautala atu i peteriaka, ua filifilia outou i se tofi e toalaiti lava ni alii ua valaauina i ai pe umiaina. E tatau ona e ola i se tulaga e mafai ai ona e tuuina atu faamanuiaga faavaloaga ma le musuia e ala mai i musumusuga faaleagaga. Ia avea ma se peteriaka lelei i totonu o lou lava aiga. Ola ina ia agavaa mo le Agaga. Ia iloa le olioli i lou valaauga.
O le peteriaka e le’i vaai muamua lava ia te a’u, na faia se folafolaga lea e faatatau ia i tatou uma ina ia “saili le upumoni ma mulimuli i ai ina ia mafai ai ona e aloese mai le sese, o le le talitonu, masalosalo ma le lotovaivai.”9 E tele taimi na ou maua ai le malosi mai le faitauina o lena faamanuiaga faapeteriaka na tuuina mai e se auauna musuia a le Alii.
Ou te molimau atu o lenei tofiga paia, o se tofi e mamalu, o se faamanuiaga i lenei Ekalesia, o se faataitaiga o faamanuiaga ua faatuina e le Alii i Lana Ekalesia mo le faamanuiaina o i tatou uma. Ma ou te molimau atu ai ia te Ia i le suafa o Iesu Keriso, amene.