O Faamanuiaga o O Tatou Aiga e ala i a Tatou Feagaiga
Afai tatou te tausia a tatou feagaiga, e maoae folafolaga tatou te maua mai ai.
Uso e, ua matagofie tele le tatou mafutaga i lenei afiafi. O outou o ni tamaitai lelei. O outou o ni afafine faamaoni, ma amiotonu o le Atua, o lo o taumafai e faia le mea silisili tou te mafaia e tausia ai feagaiga sa outou osia ma lo tatou Tama Faalelagi.
Ou te faamoemoe ua tofu maua e outou se avanoa e maimoa ai i le pepa o le savali ua matou filifilia e faailoa atu ai la matou autu o le, “O Au lenei; auina atu au.” O le atavali, ua faaigoaina “Ua Taunuu Paionia,” sa tusia e Sister Minerva Teichert, o se tina, o se ava, ma se tusiata faamamaluina. Matou te fiafia i lenei atavali. Matou te fiafia i le pupula a le tamaitai a o savavali ma lona aiga i ona tafatafa. Ae e sili ona matou fiafia i lana ato. E ui lava ina o le a tatou le iloaina po o a mea o lo o i ai i totonu o lena ato, ae e faamanatu mai ai ia te au isi ato ou te vaai i ai i le lotu. Sa ou tauaveina na ato ma ou te talitonu foi o na e ia te outou! O la’u ato sa tauaveina ai, i taimi eseese, a’u tusitusiga paia, o tusi lesona, o fagu, o tusi e faafilemu ai, o pepa, ma penivali.
Uso e, e faapei ona tatou tauaveina a tatou ato i le lotu, e faapena foi, i se tulaga o atalilo, e ao ai ona tatou tauaveina se isi ato i soo se mea tatou te o i ai—ma o totonu o lenei ato o lo o i ai a tatou oa o feagaiga—aua o i tatou o tamaitai o le feagaiga. Ou te manao tatou te talatalanoa e uiga i le auala e mafai ai ona faamalolosia e a tatou feagaiga ia aiga amiotonu.
E taua ona tatou iloaina e le tasi se foliga o se aiga amiotonu. O nisi aiga amiotonu e i ai matua e toalua; ae o nisi taimi, ona o le oti pe ua tatala se faaipoipoga, ona na o le tasi ai lea [o se matua]. O nisi aiga amiotonu e toatele ni fanau, ae o isi aiga, pe leai se fanau ua i ai i le taimi nei. O le toatele lava o le au paia e nofofua i se vaega o o latou olaga, ae ua aoao mai i tatou e Elder Marvin J. Ashton. “O le Atua ma le tagata o se aiga.”1 O nisi aiga amiotonu e na o le tama e faigaluega, a o isi taimi, e tatau ai ona galulue uma le tama ma le tina. O le mea lea, e ui lava atonu e i ai ni o tatou eseesega, ae o mea e tutusa ai aiga amiotonu, o feagaiga na latou osia e paia.
Ou te mafaufau muamua lava i feagaiga e faasino tonu i tulafono o le talalelei: o le sefuluai, o le auai i le lotu, ma le Upu o le Poto, mo se faataitaiga. Uso e, ou te le tau ta’uina atu ia te outou afai tatou te tausia feagaiga, o le a faamanuiaina o tatou aiga. E le faapea la o le a tatou le puapuagatia lava; ae o le iuga, ua tatou iloa o lo o i ai se taui mo le tausia o a tatou folafolaga.
O isi feagaiga e faasino atu ai i tatou i amioga tatau: e le gata i a tatou mataupu faavae o le amio e tatau ai a le tasi i le isi, ae faapea foi i tulaga faatonuina e faasino i o tatou tino. E ao ina tatou aoao a tatou fanau i amioga tatau: o le faamaoni, faaaloalo, amiosa’o, agalelei i upu ma faatinoga. Tatou te auina atu a tatou fanau i se lalolagi ua fai ifo ai nei amioga e tatau ai, ae e tatau lava ona tatou aoaoina i latou e ala i upu ma, o le mea e sili atu ona taua, o faataitaiga, o le faatinoga o le amio tauagafau ma le lelei.
Ae o a tulaga faatonuina o amio e faasino i o tatou tino? Uso e, e ao ina avea i tatou ma faataitaiga i a tatou fanau i lavalava tatou te faamoemoe latou te lavalava ai, o foliga vaaia, ma le legavia. I le lua tausaga talu ai, sa tulai ai Peresitene Hinckley i le sauniga lava lenei, ma apoapoai mai ia te i tatou “ia aoao [a tatou] fanau a o talavou ma laiti lava, ma ia aua lava nei fiu.”2 Ua manino le tulaga faatonuina mo i tatou uma, ae o le mea ua tatou iloa, ua tele naua taimi ua avea ai ala o le lalolagi ma o tatou ala ma ala o a tatou fanau.
Sa i ai se taimi na ou faalogo ai i se tina o faapea, o faatosinaga leaga uma o lo o feagai ma lana tama teine, e tatau lava ona ia filifilia pe o a taua e tau ai. Ma o lea sa filifili ai o ia e le tau ma tulaga faatonuina o le faiga o lavalava. Ae o le fai faalelei o lavalava o se taua lea e aoga ona tau ai aua e tele lava ina aafia ai tulaga matuia o amioga tatau. E le faapea la e tatau ona tatou poloaiina a tatou fanau teine ma fanau tama e ufiufi faasoloatoa mai le ua e tau i tapuvae, ae o lona uiga, tatou te fesoasoani ia i latou e fai o latou lavalava e faailoa mai ai o i latou o fanau a le Atua. Uso e, o outou o ni tina atamamai ma maoae. Tou te le manaomia se tusitaulima e otooto atu ai ofu po o lavalava e tatau ai. Mulimuli i le Agaga ona outou silafia ai lea ma a outou fanau le mea e sa’o.
E ao foi ina tatou mautinoa ua malamalama a tatou fanau i le finagalo o le Alii e faatatau i amioga tau i feusuaiga. O le tulaga faatonuina lava e faasino i le legavia, e lei suia lava—e ao i fanau ona iloa le tuaoi. Ae peitai, ua tele naua taimi tatou te vaai ai i a tatou fanau ua latou ta’usa’oina amioga ua latou iloa e le sa’o, ma latou faataita’ia ai amioga a le lalolagi. E ao ina tatou faataatia ese soo se lagona o le maasiasi po o le le fiafia, ina ia mafai ai ona faia ni a tatou talanoaga tuusa’o ma a tatou fanau talavou. E tatau lava ona latou iloa patino, ae le o se tulaga lautele, pe o a amioga e lelei ma tatau ai mo se alii ma se tamaitai a o lei faaipoipo. Afai tatou te le aoaoina i latou i tulaga faatonuina, o lona uiga o le a aoaoina i latou e le lalolagi, ma o le a oo i ni taunuuga matautia.
E faapena foi ona i ai le taufaamatau aupito fou ua i ai nei: o le malamalamaaga faa-tekinisi. O le mea e faanoanoa ai, ona e le mafai e faamama aupito sili ua gaosia, ona faamautinoaina o le a leai se mea leaga e ulufale atu i o tatou aiga. E ui lava ina ofoofogia le Initoneti, ae e ao ina tatou mataala i ai atoa ai foi ma isi faatosinaga o faasalalauga i totonu o o tatou aiga. O tusi ma ata mataga ua matua taatele naua ma ua uluitino i olaga o le au paia, ma ua liliuese ai o latou loto mai tulaga faatonuina a le Atua.
O le feagaiga aupito taua e faasino i aiga o le feagaiga lea o faaipoipoga e faavavau. Ua tatou iloa “o le faaipoipoga i le va o se alii ma se tamaitai, ua faauuina e le Atua, ma o le aiga o le totonugalemu lea o fuafuaga a Le Foafoa, mo le taunuuga e faavavau o Lana fanau.”3 O o tatou aiga, o lo tatou tiutetauave aupito maualuga ma o lo tatou faamanuiaga aupito sili foi lea.
O le autu o lenei konafesi o le, “O Au lenei, auina atu au.” O ia upu o se folafolaga a le Alii, ma o se faailoga o lo tatou naunau e auauna atu. Afai tatou te tausia a tatou feagaiga, e maoae folafolaga tatou te maua mai ai. Sa tusia e Peresitene Boyd K. Packer:
“E le o se mea e le masani ai le toesea o se tasi o fanau a ni matua faatuatuaina, e i ai taimi, e i ai aafiaga faapea e leai se mea e mafai i ai. Latou te mafatia ona o atalii ma afafine ua faasagatau atu. Ua latou le iloa pe aisea lava ua latou le mafaia ai ae ua latou taumafai malosi e faia mea e tatau ona latou faia.
O lo’u lava talitonuga maumaututu, e i ai se aso o le a soloia ai… .
“E le mafai ona tatou soona faamamafa atua le taua o le faaipoipoga i le malumalu, o noataga tumau o le sauniga o le faamauga, ma tulaga faatonuina o le agavaa e manaomia ona latou maua. A tausia e matua feagaiga sa latou osia i le fatafaitaulaga o le malumalu, o le a faavavau foi ona fusia atu ai a latou fanau ia i latou.”4
Uso e, e tele naua se faamoemoega ua ou maua mai i lena folafolaga. Ina tatou savavali ia ma le mautinoa, ia afisi mau mai a tatou ato ponapona i o tatou lima, ae lafoai ese mai i a tatou ato mea tatou te le manaomia. O le i ai o isi pauna faaopoopo, o le a faatelegese ai i tatou. Uso e, ina tatou lafoai ia o [faaupuga] “ae a pe a” ma le “pe ana fai” ae lafo [a tatou] avega i le Alii.”5 E tatau ona ou faia faatasi ma outou lenei mea. Ia tatou faia le mea sili tatou te mafaia i aso uma ae tuu atu i le Alii na te faia faaumaina mo i tatou. O se tasi na o ana folafolaga na Ia tuuina mai ia te i tatou.
O le mea mulimuli, sei ou faamatalaina atu se tala e uiga i se tamaitai ou te lei feiloai lava i ai, ae ou te alofa ma le faamaoni ia te ia ona sa faamaoni o ia i ana feagaiga. O le tina o le tina o lo’u tina matua, o Salote Gailey Clark, o se tasi o tagata mulimuli e 295 ia na osia feagaiga i le Malumalu o Navu i le amataga o le malaga umi i sisifo. Sa tapunia le malumalu talu ona tutuliese faamalosi le Au Paia ina ia o ese, peitai o i latou uma lava sa agavaa e lei maua se avanoa e maua ai o latou lava faaeega paia. E tatau i le tina o le tina o lo’u tinamatua ma lona toalua ona taitai lo latou aiga i sisifo, ma sa manao foi o ia i ana feagaiga a o lei aga atu mo le faigamalaga. Sa ou mafaufau ia te ia i le tele o taimi, i nai masina na mavae atu nei. E i ai se aso ou te manao ou te faapea atu ia te ia, “Tinamatua, faafetai mo le tausia o au feagaiga. Ua matua faamanuiaina lava au i le avea ai o au o se tama a lau tama. Ua faamanuiaina au ma lo’u aiga ona o lou faamaoni—ma o le a faaauau ai pea ona manuia ai i matou uma i augatupulaga.” Uso e, o le a i ai se aso e mafai ai ona ta’u mai e a tatou fanau ma a latou fanau ia mea ia i tatou, ma faatatau foi ia i tatou. E i ai se aso o le a latou faafetai mai ai ia i tatou ona o le tausia o lenei “ato” o feagaiga, ma faaaogaina ai e faamanuia ai olaga o o tatou aiga.
Ia faamanuia mai lo tatou Tama Faalelagi ia i tatou ia tatou tausia a tatou feagaiga, ina ia faamalolosia ai o tatou aiga ma manuia ai ona o o tatou olaga amiotonu, i le suafa o Iesu Keriso, amene.