O Se Tamaitai o le Faatuatua
O se tamaitai o le faatuatua, e faalagolago i le Atua… . Na te iloa mea e finagalo i ai o Ia i lona olaga. E iloa e lea tamaitai Na te silafia o Ia. E fiafia lea tamaitai i Ana afioga, ma e inu tele foi o ia i lena vai ola.
Ou te alofa i le Alii o Iesu Keriso ma Lana Ekalesia ua toefuatai mai i le fogaeleele i o tatou aso. E pele ia te au aoaoga o Lona soifuaga paia, mai lava i lona faatoa soifua mai o se pepe meamea seia oo ina avea ma tagata toetu, o le Alo ia o le Atua.
E pei ona ou faitauina mai itulau o le Tusi Paia, sa ou vaaia ai o Ia i o’u mata faalemafaufau a o “tupu le poto ma le tino o Iesu, ma ua alofagia o ia e le Atua atoa ma tagata.”1 I la’u lava faitauga, sa ou i ai a o Ia faatuina mai e ua oti. Sa Ia faamalolo i e mamai, fagaina le 5000, aumaia le mafanafana ma le faamoemoe ma le filemu i le lalolagi na Ia foafoaina. Sa Ia faamagalo i e sa tauemu ma sauaina ma faasatauro ia te Ia—aua ua latou le iloa le mea ua latou faia. Sa ou vaaia le alofa faaleatua ma Lona manatu i Lona tina e ui lava ina sa matua mafatia o Ia i le ogaoga o le tiga. Sa Ia manumalo i le oti ina ia mafai ai foi e i tatou. Ua Ia saunia se nofoaga mo i tatou i le Lagi faatasi ma lo tatou Tama e Faavavau. Ua Ia aoao mai ia i tatou le ala sili o le fiafia, ma ua Ia aumaia foi ia i tatou le malamalama i lea ala, ma le faamoemoe e mulimuli ai i ai. O Lona soifua, o le faaaoaoga atoatoa lea o le ositaulaga, ma o se soifua tautua ina ia faataunuuina ai le fuafuaga a le Atua Lona Tama.
O se tamaitai o le Au Paia o Aso e Gata Ai e mulimuli i faataitaiga a Keriso i aso taitasi o lona ola, ua amata e ia ona faataunuu le fuafuaga a le Atua lo tatou Tama mo ia. O le faia o lea mea, e mafai ai ona avea o ia ma faatosinaga mamana mo le lelei o le lalolagi i ona po nei ma faafetaiaia ai luitau o le olaga. Ua ou iloaina ia ituaiga tamaitai, ma ua avea i latou ma sulu ta’iala mo au. O tamaitai o le Au Paia o Aso e Gata Ai e mulimuli ia Keriso, o se faaaoaoga lelei lea o se Kerisiano moni. O ia o se tamaitai o le faatuatua ua faalagolago i le Atua, ua mautinoa ma e leai se fefe.
O se tamaitai o le faatuatua, e faalagolago i le Atua ma e i ai lona faamoemoe pe a fetaiai ma faigata. Na te iloa mea e finagalo i ai o Ia i le olaga. E iloa e lea tamaitai Na te silafia o Ia. E fiafia lea tamaitai i Ana afioga, ma e inu tele foi o ia i lena vai ola. E faafetai o ia mo le perofeta ua Ia auina mai mo nei aso e gata ai, ma e faalagolago foi o ia i ana apoapoaiga ma mulimuli ai, aua ua ia iloaina o lona faia o lea mea na te maua ai le saogalemu ma le filemu. O le tatalo na te sailia ai le taitaiga agalelei, ma le le femoumouai atoa ai ma le fesoasoani a se Tama Faalelagi o lo o faafofoga mai. A tatalo o ia, e faalogologo atu foi—ina ia mafai ai ona lua vala o le fesootaiga [ole atu ma le tali mai]. Ua faatuatua foi o ia, o Lana ala filemu ma le toafimalie, Na te taitaiina ai lona lima ma tali mai i ana talosaga.”2
O se tamaitai o le faatuatua e mautinoa aua ua malamalama o ia o le fuafuaga paia a lo tatou Tama Faalelagi ma lana matafaioi e manuia ai olaga. Ua mautinoa e ia, soo se taulaga lava na te faia, e i ai sona aoga mo le faavavau. Ua malamalama o ia i le ositaulaga, mai le soifua o le Faaola. Ua ia iloaina, atonu e faatauvaa lana taulaga pe a faatusatusa i ai, ae ua iloa e ia, e malamalama le Tama Faalelagi ma faatauaina mea na te faia e faamalolosia ai lona aiga ma lona auaiga ma le lalolagi o loo soifua ai. E tuputupu ae lona mautinoa, aua e amiolelei ma agalelei ma tausaafia, ma e sili atu lea nai lo le lalelei. E mama atoatoa ona faamoemoega. E tausaafia ma agaalofa ma agamalu ma agalelei. Ua faatuatua ia te ia le loto o lana tane faapea foi lana fanau.3 E faapena foi i fanau laiti po o le autalavou po o tamaitai ua valaauina o ia e aoao, taitai, auauna atu ma alofa i ai—ua tosina uma atu o latou loto ia te ia ona o le agaga faapitoa na te aumaia. Ua i ona mata foliga o le Atua, lea e matagofie ma taua.4 Ua mautinoa e ia, o lo o ia atiinae se uiga ma ni taga amiotonu e mafai ai ona valaaulia o ia e tu atu i le afioaga o le Tama Faalelagi. O le a mafai ona ia faia ma se malamalama, o iina lava e tatau ona i ai o ia, ma Na te silafia foi o ia, e alofagia foi ma faapelepeleina o ia e faavavau i taimi uma.
O se tamaitai o le faatuatua e le fefe. E le fefe o ia i se mea leaga aua o lo o faatasi le Atua ma ia.5 E le faauigalua, leai foi se faaletonu i lona olaga. E mafai ona ola o ia i se olaga ua tomatauina i mataupu faavae aua ua ia aoao i aoaoga faavae ma aoaoga a se faiaoga atoatoa, o le Alii ia. O ia o se faataitaiga mamalu ia i latou uma e iloa o ia. E le atoatoa o ia, e moni lea, ae le faapea ona o le leai o ni ona mataupu faavae atoatoa po o se faaaoaoga atoatoa ia Keriso, ae ona o ia o se tagata soifua. E tutu mamao o ia mai faatosinaga leaga ma mea e le mama, ma afai e taulalata atu se mea e le tatau ai mo ia, e pei o ia o se leona fafine o loo puipuia lana fanau. O se tamaitai e le fefe o le faatuatua, e i ai le lototoa e talanoa ai ma lana fanau e uiga i faiga po o amioga e faatamaia ai i latou. E le gata ina latou faalogo a o faamatalatala e ia ana tautinoga, ae latou te vaaia foi ana tautinoga i aso taitasi e ola ai o ia—e ala i le faiga o ona lavalava, o mea na te faitauina ma matamata ai, pe faapefea ona ia faaaogaina ona taimi paganoa, o mea e fiafia ma ata ai, o ai na te faatosina maia, ma pe faapefea ana taga i taimi uma, i mea uma, ma nofoaga uma. E tulaga ese lava ana faiga e matagofie ma tosina atu i ai, e tumu i le fiafia, e tausaafia ma lelei. E mafai ona saogalemu o tatou teineiti ma tamaitai talavou pe a faalagolago i ana faataitaiga lelei. Tatou tatalo foi ina ia faapena ona latou le fefefe a o sailiili e faalauiloa mea e faagaeetia ai, o mea e lelei ma fiafia ai, aua o i latou lava o lo tatou lumanai.
Faafetai lava mo tamaitai o le faatuatua ua i ai i o tatou olaga. O se tamaitai o le faatuatua, e alofa i le Alii. E manao o ia ia silafia e le Alii i le olaga e ola ai, o upu e tautala ai, o le tautua na te avatu i Ana fanau, faapea foi mea uma na te faatinoina. E iloa e lea tamaitai e alofa o Ia ia te ia, tusa lava pe le atoatoa o ia ae o lo o taumafai ina ia lelei atili. Na te iloa, afai ua ia faia le mea aupito silisili na te mafaia, ua lava lea, e pei ona saunoa mai ai Peresitene Hinckley ia i tatou.6
O se tamaitai o le faatuatua ua faamanuiaina e alii faamaoni i lona olaga, o se alii na te umiaina le perisitua a le Atua ma faamamaluina lea avanoa taua: o lona tama, epikopo, tane, tuagane, ma atalii. Latou te faatauaina o ia ma meaalofa faalelagi ua tuuina atu e le Atua i Ona afafine. Latou te lagolago ma faamalosiau ma malamalama i le misiona tele o lona olaga, i le avea ai o ia ma se tamaitai. Latou te alolofa ia te ia: latou te faamanuia ia te ia. E faapena foi ona manuia ia alii ona o lenei tamaitai o le faatuatua a o latou savavali faatasi i le ala o le ola. Ua latou iloa, e faapei ona aoao mai i tusitusiga paia, “e sili ona lelei le toalua i le toatasi… . Aua afai a pau le tasi e faatuina o ia i luga e le la te toalua.”7
E avatu la’u faafetai i tamaitai ofoofogia o le faatuatua ma tamalii ma failauga, faapea foi lo’u aiga pele, o e na latou siitia au ma uunaia au i lo’u olaga. Ua avea i latou ma se faamanuiaga faapitoa maoae a o ou taumafai e faataunuu le feau paia mai le Alii a o avea ai au ma peresitene aoao o Tamaitai Talavou.
Uso e ma tuagane pele, faamolemole ia outou silafia lo’u alofa mo outou, ma lo’u alofa i lo tatou Tama o i le Lagi ma Lona Alo Pele, le Alii o Iesu Keriso. Ou te faamamalu ma auauna atu ia te i la’ua ma lo’u loto atoa e faavavau ma ou te faafetai tele mo le avanoa. I le suafa o Iesu Keriso, amene.