“E! Ana o A’u o se Agelu, ma Ua Mafai Ona Maua le Manao o Lo’u Loto”

Peresitene Gordon B. Hinckley

Ou te uunaia outou … ia faaaoga malumalu o le Ekalesia. Ia outou o i ai ma faataunuuina le galuega sili ma le ofoofogia ua faataatia mai e le Atua o le lagi le alafua mo i tatou.

Ou uso e ma tuafafine pele, matou te toe faafeiloai atu ia te outou i se konafesi tele O Le Ekalesia a Iesu Keriso o le Au Paia o Aso e Gata Ai mo le lalolagi atoa.

Sa folafola mai e Alema: “E! ana o a’u o se agelu, ma ua mafai ona maua le manao o lo’u loto, ina ia ou alu atu ma tautala atu ma le pu a le Atua, ma le leo e luluina ai le laueleele, ma talai atu le salamo i nuu uma!” (Alema 29:1).

Ua tatou taunuu i se tulaga e toetoe ai lava ina a mafai ona tatou faia lena mea. O taualumaga o lenei konafesi o le a faasalalauina i le salafa o le lalolagi, ma o le a faafofogaina le au failauga ma maimoaina e le Au Paia o Aso e Gata Ai i konetineta uma. Ua matua tele naua so tatou tulaga alualu i luma, i lo tatou vaaia lea o le faataunuuga o le faalepo sa ta’ua i le Tusi o Faaaliga: “Na a’u iloa foi le tasi o agelu ua lele i le taulotoaiga o le lagi, ua ia te ia le tala lelei e faavavau e folafola atu i e nonofo i le lalolagi i atunuu uma, ma itu aiga, ma gagana eseese, ma nuu” (Faaaliga 14:6).

E maeu lava lenei sauniga, ou uso e ma tuafafine. E faigata ona malamalama i ai. O loo matou lauga atu mai lenei Nofoaga Autu [ofoofogia] mo Konafesi. Ou te le iloaina lava se isi fale e faatusatusa i ai.

O i tatou o se aiga tele e tasi, o sui o le aiga o le tagata soifua i lenei lalolagi tele ma le matagofie.

O le toatele o outou sa auai atu i le faapaiaga o le Malumalu o Navu i a Iuni na tea nei. O se sauniga maoae ma le ofoofogia, o se sauniga galo gata. E le gata ina sa tatou faapaiaina ai se fale matagofie, o se Fale o le Alii, ae sa tatou faapaiaina ai foi se maa faamanatu o le Perofeta o Iosefa Samita.

I le tausaga e 1841, e lua tausaga talu ona malaga mai o ia i Navu, sa ia fofogaina mai ai i se uunaiga a le Silisiliese, e tatau ona fausia se Fale o le Alii e fai ma maataua laualuga o le galuega a le Atua i atumauga o lena aai.

E faigata ona talitonu ona o tulaga faigata sa i ai, ae sa mamanuina ai se maota matagofie e tumatilatila i tuaoi o le Iunaite Setete o Amerika i lena vaitaimi.

Ou te le iloa, matua le iloa lava pe sa i ai se isi fale e faapena lona mamanuina ma lona matagofie i le setete atoa o Ilinoi.

Sa tatau ona faapaiaina mo le galuega a le Silisiliese, e faataunuu ai Ona faamoemoega mo le faavavau.

E leai se taumafaiga na mele. Leai se taulaga e le’i mafaia. O le lima tausaga na sosoo ai, sa tofi ai e tamaloloa le maa ma faataatia le fusi faavae ma le faavae, o puipui faapea foi teuteu. E faitau fiaselau i latou sa o i le itu i matu, ma nonofo ai mo se vaitaimi e tatuu laau, o le anoanoai o laau, ona fusifusi faatasi ai lea e fai ai vaa laupapa e faatafetafea ifo i le vaitafe i Navu. Sa tipi mai i na laupapa ni ata teuteu matagofie. Sa aoina pene e faatau ai fao. Sa faia se osigataulaga e le mafaatusalia e fai ai tioata. Sa latou fausia se malumalu o le Atua, ma sa tatau o se mea aupito sili e mafai ona latou faia.

I le lotolotoi o nei gaoioiga, sa fasiotia ai le Perofeta ma lona uso o Ailama i Karefasi i le aso 27 o Iuni 1844.

E leai se tasi o i tatou o soifua ma ola i le taimi nei, e mafai ona malamalama i le matautia o le aafiaga na feagai ma le Au Paia. Sa maliu lo latou taitai—o ia, o le alii o faalepo ma faaaliga. Sa le na o so latou taitai o ia. O ia o lo latou Perofeta. Sa matua tele lo latou faanoanoa. Sa matautia foi lo latou mafatiaga.

Peitai, o Polika Iaga, le Peresitene o le Korama a le Toasefululua, na avea ma o latou taitai. Sa tuu atu e Iosefa lana pule i tauau o le Au Aposetolo. Sa naunau Polika e faauma le malumalu ma sa agai pea i luma le galuega. Sa latou tulitulimataia lo latou faamoemoe i le ao ma le po, e ui lava i faiga taufaamatau na lamatia ai lo latou soifua e tagata faatupu faalavelave. I le 1845, sa latou iloa e le mafai ona latou nonofo i le aai na latou faato’aina mai laufanua faataufusi o le vaitafe. Sa latou iloa ua tatau ona latou tuua lea nofoaga. Na avea ma se taimi ua tatau ona faanatinati; muamua, ia faauma le malumalu, ma le lona lua, ia fau ni taavaletoso e ao i ai mea latou te faaaogaina ma agai atu ai i le vao i Sisifo.

Sa amata galuega o sauniga a o lei maea atoatoa le malumalu. Sa matua faanatinati lava seia oo i le taumalulu o le 1846, ma sa amata ona tapunia o latou fale ma tuua, ae agaigai malie atu taavaletoso i le Magaala o Parley agai atu i le faatausiusiuga o le vai, ona laasia ai lea o le vaitafe ma ona auvai agai i le itu o Iowa.

Sa faaauau le malaga i sisifo. Sa liu’aisa le vaitafe ma sa maatiati le malulu. Ae o lena tulaga na mafai ai ona latou sopo i luga o le aisa.

I tua i sasae, sa latou toe tepa tasi atu ai i le aai sa latou moemiti i ai ma le malumalu o lo latou Atua. Ona latou vaavaai atu ai lea i sisifo i se taunuuga e lei oo i ai lo latou silafia.

Na sosoo ai ma le faapaiaina o le malumalu, ma o i latou sa faapaiaina, sa latou “amene” i ai ma latou agai atu loa i sisifo. Sa susunuina mulimuli ane le malumalu e se tagata susunu fale ma sa toetoe ina uma ai ma lona ola i lana faiga faatiapolo. Sa iu ina faatamaia e se asiosio le tele o mea na totoe ai. O le Fale o le Alii, le faamoemoega sili o a latou galuega, a ua leai.

Sa toetoe lava ina avea Navu ma aai tuufua. Na tauau lava ina mou uma atu. Sa suotosinaina le mea sa tu ai le malumalu ma toto ai faatoaga. Sa mavae atu tausaga, ma sa oo malie mai se malamalama. Sa fagua manatu o o tatou tagata, o e na tupuga mai ia i latou sa soifua ai iina, ma manatua o latou augatama, ma sa i ai lo latou faanaunauga e faamamalu ia i latou o e sa totogia se tau matautia tele. Na faasolosolo malie ona toe tulai mai le aai ma sa i ai le toefuataiga o vaega o Navu.

O uunaiga a le Agaga ma sa faaosofia foi i le faanaunauga o lo’u tama, o le sa galue auauna o se peresitene o le misiona i lena eria, ma sa manao e toe fausia le malumalu ae sa le mafai ona faia, na matou faasilasilaina ai i le konafesi ia Aperila i le 1999, o le a tatou toe fauina lena fale ofoofogia.

Sa matua sagisagi fiafia tagata. Sa taufai o mai alii ma tamaitai ma se faanaunauga e fia fesoasoani. Sa tetele ni tupe na foai mai faapea foi ma tomai. Sa toe saunia foi e totogi soo se aofaiga. E ao ina tatou toe fausia le Fale o le Alii e fai ma faamanatuga i le Perofeta o Iosefa ma se taulaga i lo tatou Atua. I le aso 27 o le masina o Iuni na mavae atu nei, i le aoauli pe tusa o le taimi tonu lea na tagatavaleina ai Iosefa ma Ailama i Karefasi i le 158 tausaga ua mavae, sa tatou faia ai le faapaiaga o le fale fou matagofie. O se fale o le matagofie silisili. O loo tu i le mea tonu lava na tu ai le malumalu muamua. O fua o le tele o lona tino mai e tutusa lelei lava ma le mea sa i ai. O se fale e fetaui lelei ma le talafeagai e faamanatu ai le Perofeta maoae o lenei tisipenisione, o Iosefa le Tagata Vaai.

E maeu lo’u faafetai, matua faafetai lava i le mea ua tulai mai. O le aso, pe a faasaga i sisifo, i luga o matietie maualuluga e iloa atu ai le aai o Navu, e faafesagai ma le Misisipi, ma i luga o laufanua valevalenoa o Iowa o loo tu ai le malumalu o Iosefa, o se maota matagofie o le Atua. O iinei i le Vanu o Sate Leki, pe a faasaga i sasae agai i le malumalu matagofie o Navu, o loo tu ai le malumalu o Polika, le Malumalu o Sate Leki. O lo o faasaga atu le tasi i le isi e faapei o ni poloka e taofi ai tusi, ae o le va o lo o i ai voluma o tusi o lo o tusia ai talafaasolopito o le puapuagatia, o le faanoanoa, taulaga e oo lava i le oti o le faitau afe o i latou sa malaga mai i le malaga umi mai le Vaitafe o Misisipi i le Vaituloto Masima Tele.

O le malumalu o Navu o le lona 113 ai lea o malumalu ua faaaogaina nei. Talu mai lena taimi, sa matou faapaiaina ai se isi malumalu O Le Hague i Netalani e atoa ai le 114. O nei fale matagofie e eseese le tetele, ma mamanu faatusi ata, ua salalau solo i atunuu o le lalolagi. Sa fausiaina e tautua ai o tatou tagata mo le faataunuuina o le galuega a le Silisiliese, o lana fuafuaga o le faataunuuina lea o le faaofuina o le tagata i le tino ola pea ma le ola e faavavau (tagai Mose 1:39). Na fausia nei malumalu ina ia faaaogaina. Tatou te faamamaluina lo tatou Tama pe a tatou faaaogaina.

I le amataga o le konafesi, ou te uunaia outou, ou uso e ma tuafafine, ina ia faaaoga malumalu o le Ekalesia.

Ia outou o i ai ma faataunuuina le galuega sili ma le ofoofogia ua faataatia mai e le Atua o le lagi le alafua mo i tatou. O iina tatou te aoao ai i Ona ala ma Ana fuafuaga. O iina tatou te osia ai feagaiga e taitai atu ai i tatou i ala o le amiotonu, o le le manatu faapito, ma le upumoni. O iina tatou te fesootai faatasi ai o ni aiga, i lalo o se feagaiga e faavavau e faia i le pule o le perisitua a le Atua.

Ma o iina foi e mafai ai ona tatou avatu nei lava faamanuiaga ia i latou o augatupulaga na muamua, o o tatou augatama ia o loo faatalitali i le auaunaga lea e mafai ona tatou tuuina atu i le taimi nei.

Ia i ai faamanuiaga o le lagi i o outou luga, o’u uso e ma tuafafine. Ia pa’i atu le agaga o Elia i o outou loto ma uunaia ai outou e faia lena galuega mo isi, o e ua le mafai ona agai i luma sei vagana ai ua outou faia. Ia tatou olioli i le avanoa matagofie ua tatou maua, ou te tatalo atu ai ma le lotomaualalo i le suafa o Iesu Keriso, amene.