Faalologo Ia, Ina Malu Ia
O Ana afioga i tusi paia ua lava ia: “Ina soia, ma ia outou iloa o au lava o le Atua.”
O le lagiina o musika e le aufaipese a Alii Talavou ua faamumu ai le afi faamanatu i lo’u mafaufau, o pese sa ou usuina a o ou tamaitiiti. Matou te usuina ma le malosi ma le naunautai le:
Sa i ai se matou taitai pese sa aoaoina i matou tama ina ia iloa pepese. E tatau lava ona matou pepese. E faalala mai e Tuafafine Stella Walters le laau pe toe o ni nai inisi oo mai i o matou isu, ma tata faatatau lona vae i le fua o le pese, ma e ‘o’i’o’ī ai le fola o le fale.
Afai e lelei ona matou usuina, ona tuu mai lea e Tuafafine Walters matou te filifilia se pese matou te fiafia i ai e usu. Toetoe lava o taimi uma, matou te filifilia ai le:
Matai e, ua sou le vasa,
Ua tele nei le afa!
Ua pouliuli le lagi!
Leai se toafilemu.
A tuu ea matou e oti
A o lo o e tofa
Ua malosi mai pea le sami
O se tuugamau lena?
Ona sosoo ai lea ma le tali faalototele:
Matagi ma galu, malu ia Oe:
Filemu, filemu.
Sou, po o fili, po o tagata
Leai o se sami na te malua
Le vaa e tofa ai o Ia
Le Pule o lalo nei ma luga
E usitai ia oe Iesu:
Filemu, filemu.
E usitai ia oe Iesu:
Fifilemu.2
A o ou tamaitiiti, sa mafai ona ou malamalama i le matautia o se sami e felafoaiina e matagi. Peitai, e le i tele so’u malamalama i isi temoni e mafai ona tuliaupuina o tatou olaga, faataumaoi o tatou moomooga, lepetia lo tatou olioli ma tata’ieseina mai la tatou faigamalaga i le malo selesitila o le Atua.
E umi tele se lisi o temoni faatamai, ma ua tofu iloa e alii taitasi, pe talavou pe matua, ia temoni e ao ona latou tau. O le a na o ni nai temoni ou te ta’ua: o le Temoni o Matapeapea; o le Temoni o Le Faamaoni; o le Temoni o Aitalafu; o le Temoni o Masalosalo; o le Temoni o Fualaau Oona; ma Temoni masaga o Faasausili ma Legavia. O nei temoni e mafai ona faia mea matautia i o tatou olaga. A tuufaatasi nei temoni ona mafai lea ona oo atu lou olaga i se faatamaiga faaleagaga.
O le tusi a Failauga o lo o ta’u mai ai ni fautuaga e faatatau i le matapeapea, ina ia tatou faaeteete ma ia faautauta: “O le ua manao i le ario, e le malie o ia i le ario; o le ua manao foi i le oloa tele, e leai sana mea e maua ai.”3
Sa apoapoai mai Iesu, “Ia outou, ia leoleo outou ia te outou aua le matapeapea; aua e le ola se tasi i le tele o ana mea ua ia te ia.”4
E ao ina tatou aoao e tuu eseese mea tatou te manaomia mai le manaolasi.
Pe a tatou talanoa e uiga i le temoni o lē faamaoni, e mafai ona tatou maua i ni nofoaga eseese. O se tasi o ia nofoaga o le aoga. Ia tatou aloese mai le kopi, talapepelo, o le faaaogaina o isi po o soo se mea faapena. Ia avea le faamaoni ma o tatou tulaga faatonuina.
Pe a faia faaiuga, aua le fesili “Pe o le a le manatu o isi?” ae fesili “O le a so’u manatu ia te au lava ia?”
O uunaiga e fusi mai le temoni o aitalafu, e tele taimi o aso taitasi e sunu’i mai ai ia te i tatou. Ou te fia ta’ua le fautuaga mai ia Peresitene Gordon B. Hinckley:
“Ua ou popole lava i aitalafu o loo tulai mai e tatau ona totogi faavaega, lea o loo faamalumalu mai i luga o tagata o le atunuu, e aofia ai ma o tatou lava tagata [o le Ekalesia]… .
“Ua faaseseina i tatou i faasalalauga taufaaosooso. Ua tauaveina e le televise se valaaulia faatosinaloto e faaune ai tupe e oo atu i le 125 pasene o le tau o se fale. Ae le ta’ua lava se tului… .
“Ou te iloaina atonu e tatau ai pe afai e faaune mai e fai ai se fale. Peitai, ia tatou faatauina se fale e mafai ona tatou gafatia ma o le a faaitiitia ai tupe totogi, lea o le a faamalumalu mai pea lava pea i o tatou ulu, e aunoa ma se alofa po o se malologa mo le 30 tausaga.”5
Ou te fia faaopoopo atu i ai: E le tatau ona ova atu mea e fia maua nai lo tupe maua.
O le talanoaina o le temoni o fualaau oona, ou te faaopoopo foi i ai ma meainu malolosi. O fualaau oona e faatamaia ai lo tatou tomai e mafaufau ai, e fefulifulia’i ai, ma faia ai filifiliga poto ma le faautauta. O ia mea e masani ona taunuu i amioga leaga malolosi, o le sauaina ma fai faatautala ai fanau ma taitoalua, ma e afua ai foi ona tatou faia amioga e aumaia ai le tiga ma mafatiaga ia i latou e loto mama. “Tau lava ina e tali atu leai i fualaau oona” o se faaupuga lelei tele a se tagata naunau. “E mafai ona lagolagoina lea naunau i le mau:
“Tou te le iloa ea o le malumalu outou o le Atua, o loo nofo foi le Agaga o le Atua i totonu ia te outou?
“Afai e faaleaga e se tasi le malumalu o le Atua, e faaleagaina lena tagata e le Atua; aua e paia le malumalu o le Atua, o outou lava ia.”6
Pe a ou mafaufau i le masaga temoni—o faasausili ma legavia, o le a ou tuu i ai ma le isi e faatoatolu ai, ma o ia lea o ponokalafi. E o faatasi uma le toatolu lea.
O le faaliliuina o le miti a Liae, tatou te iloa ai se faamatalaga e fetaui lelei ma le faataumaoi o ponokalafi po o tusi ma ata mataga: “O puao foi o le pogisa, o tofotofoga ia a le tiapolo ua faatauasoina ai mata, ma faamaaaina ai foi loto o le fanauga a tagata, ma ua taitaieseina ai i latou i ala lautele ina ia latou fano ma ia le iloa.”7
Sa ta’u mai e se Aposetolo o ona po nei, o Hugh B. Brown, e faapea, “Soo se uiga faasausili lava e taa’ina atu ai i mafaufauga leaga, o se le faaaloalo lea i le tino—le malumalu lena e nofo ai le Agaga Paia.”8
Ou te fia faitauina atu ia te outou i le po nei se maataua mai le The Improvement Era. Sa lolomi ma faasalalauina i le 1917, ae e faatatau lava i le mea lea ma le taimi nei: “O le tu ma aga masani i le taimi nei, o le faatosina o le faiga o ofu, o le salalau o tusi ma faamatalaga tusitusia o tala fatu mataga, i tala faatino, aemaise lava o ata tifaga, … o le faatagaina o le faasausili i talanoaga i aso faisoo, o nei mea uma ua auau faatasi e faatupu amioga faatiapolo e faatamaia ai le agaga.”9
Sa ta’ua e Alexander Pope, i lana tusi musuia o le “Essay on Man,” e faapea:
O amioga le mama o se sau’ai taufaafefe,
E tatau ona inoino i ai ae le o le matamata ai;
Peitai ua vaaia soo, ua masani i foliga,
Muamua e onosai, sosoo ma le gaualofa, ona opo ai lea.10
Atonu e mafai ona maua se aotelega o lenei temoni o ponokalafi, i le tusi a Paulo i Korinito: “Ua le maua outou e se tofotofoga e ese i lo tagata: a ua faamaoni le Atua, o le na te le tuuina atu outou i le tofotofoga e sili i se mea ua outou lavatia; a e sauni foi faatasi ma le tofotofoga se mea e sao ai, ina ia outou lava oono.”11
Aua e sili atu ia i tatou taitoatasi ona faalogo ma usitai i le uunaiga a o tatou lotofuatiaifo faamaoni e le aunoa. O le lotofuatiaifo e pei o se uo na te lapataiaina pea lava pea i tatou, a tatou le faalogo ma usitai, ona avea ai lea o ia ma faamasino e faasalaina i tatou.
O le Alii lava Ia na tuuina mai le poloaiga faaiu: “Ia mama outou o e tauave le ipu a le Alii.”12
Uso e, e tasi lava le tiutetauave e leai se tagata e mafai ona aloese mai ai. O le taunuuga o o aafiaga faaletagata.
O a tatou faatosinaga e matua lagona lava i totonu o o tatou aiga. O nisi taimi, e galo ai ia i tatou tama, o i tatou foi sa tamaiti, ma o nisi foi taimi e fai ai tamaiti ma faasoesa i matua.
Ou te manatua, a ou laitiiti, sa ese lo’u fiafia i taifau. I se tasi aso, sa ou aveina ai la’u taavaletoso ma tuu ai i totonu se atigipusa laupapa e tuu ai moli ‘aina, ona ou alu ai lea e su’e ni taifau. O le taimi lena e tataa solo ai taifau: i le aoga, e savalivali solo i le auala savali, pe feoa’i solo foi i ni fanua tuufua, a o le taimi foi lena e ese le tele o fanua e le i ‘aina. A ou mauaina la se taifau ma pue, ona ou tuua lea i totonu o le pusa, ma ave i le fale ma tuu i le potu koale, ona loka lea o le faitotoa. O le aso lena, masalo pe ono taifau eseese na ou aumaia ma fai ma a’u pagota i le potu koale. Sa ou le iloa po o le a la’u mea a fai i nei taifau uma, o le mea lea ou te lei ta’uina ai lava i se isi la’u mea sa fai.
Sa manava mai lo’u Tama, ma fai lana masani, o le alu lea ma le pakete o koale e faatumu mai i le potu koale. Pe mafai la ona outou vaai faalemafaufau i lona te’i ma le matua fememea’i ina ua tatala atu le faitotoa o faasasaga mai taifau e ono, a o taufai taumafai e sosola ese i le taimi lava lea? Ou te manatua, sa fai mai lemu lo’u Tama ia te au, “Tommy, o potu koale e tuu ai koale. O taifau a isi tagata, o a latou lava meatotino. O le taunuuga o lona tali filemu, sa ou aoaoina ai se lesona i le onosai ma le toafimalie.
Ou te fiafia ona sa aoaoina a’u i lena taimi, aua sa i ai foi se mea faapena na tupu i lo’u olaga i lo’u atalii laitiiti o Kalaka.
E ese foi le fiafia o Kalaka i meaola, o manu felelei, o gata—soo se meaola lava. O nisi taimi e avea lena ma mafuaaga o sina faavesivesi o le matou aiga. I se tasi aso a o tamaitiiti, na sau ai mai le Ana i Provo ma se gata vai ma sa ia faaigoaina ia Amani.
Toeitiiti lava a leiloa Amani i lena lava taimi. Na maua e Sister Monson i le pusatoso e teu ai tui ma sipuni. O gata vai e faigofie ona o i nofoaga e te le mafaufau e o i ai. Ona ave lea e Kalaka ma tuu i le tapu taele, ma palaka le alavai, ae tuu ai sina vai laitiiti i totonu, ae tusi se pepa ma faapipii i tua o le tapu, ma o faaupuga nei sa tusia ai, “Aua le faaaogaina le tapu. O le tapu o Amani.” O lea na matou faaaogaina ai le isi faletaele ae nofo ai Amani i lena potu ua tuufua.
Ae i se tasi aso, sa matou ofo ina ua leiloa Amani. Sa tatau ona faaigoa ia Houdini. Ua leiloa! O lea na faamama ai e Sister Monson le tapu ma toe faasauniuni matou te toe faaaogaina. Sa mavae atu ni aso se tele.
I se tasi afiafi, sa ou manatu ua tatau ona fai sa’u taelega umi; o lea na ou faatumuina ai le tapu i le vai mafanafana, ona ou taotooto ai lava lea i le tapu ma malolo lelei ai. Sa ou taotooto iina ma ou mafaufau ai lava ae oo a’e loa ma le vai ‘oā i le pu lea e alu ai le vai ina ia aua ne’i oso i lalo. E mafai la ona outou vaai faalemafaufau i lo’u te’i, ina ua faataupupula atu la’u vaai i lena pu, ae aau mai i fafo Amani faasaga mai i o’u mata? Sa ou faataio atu i lo’u toalua, “Falanisisi! Amani lea ua sau!”
Na toe pu’eina foi Amani, ma tuu i se pusa maopoopo, ona matou malaga ai lea i le Paka o Vivian i le Ana o Provo, ma toe tatala ai Amani i le vai matagofie o South Fork Creek. Matou te lei toe vaai ai lava ia Amani.
O loo i ai i le Mataupu Faavae ma Feagaiga, vaega e 107, fuaiupu e 99, se apoapoaiga puupuu ae tuusa’o mai mo tagata taitoatasi o loo umia le perisitua: O lea, ia taitoatasi ai le tagata ma aoaoina lana tiute, ma galue i le tofi ua tofia ai o ia, i le maelega atoatoa.” E mamafa pea lava pea ia te au lenei poloaiga, ma sa ou taumafai ou te ola e tusa ai ma ona faatonuga.
O nisi taimi i lo’u mafaufau, ou te faalogo pea lava pea i faatonuga taiala na tuuina mai e Peresitene Ioane Teila i le usoga a le Perisitua: “Afai e te le faalauteleina ou valaauga, o le a faamasinoina oe e le Atua mo i latou sa mafai ona e laveaiina, pe ana fai e te faia lou tiute.”13
O le faataunuuina o o tatou tiutetauave, ua ou aoaoina ai a tatou faalogo i se uunaiga mai le agaga, ma faia loa lava e aunoa ma le toe faatali, o le a taialaina e lo tatou Tama Faalelagi o tatou ala ma faamanuiaina ai o tatou olaga faapea olaga o isi. Ou te le iloa se isi aafiaga e sili atu ona faagauloto po o lagona e sili atu ona taua nai lo le gauai atu i se uunaiga, ma iloa ai ua tali mai le Alii i se tatalo a se isi tagata ae auala mai ia te oe.
Atonu ua lava se faataitaiga se tasi ou te tuuina atu. I se tasi aso pe tusa ua silia laitiiti nei ma le tausaga, ina ua uma au galuega i le ofisa, sa ou maua se uunaiga malosi ou te asiasi i se tina matua ua oti lana tane, sa gasegase i le nofoaga e tausi ai tagata matutua o le St. Joseph Villa. Sa ou alu sa’o loa lava i ai.
Ina ua ou alu i lona potu, e leai ma se isi sa iai. Sa ou fesili i se tausimai po o fea o i ai, ma sa faasino au i se potu malolo. O iina na ou maua ai lenei tamaitai lelei ua oti lana tane, o talanoa ai ma lona uso ma se isi uo. Sa manaia se matou talanoaga faatasi.
A o matou talatalanoa, sa ulufale mai se tamaloa i le faitotoa o le potu ma ave sana apainu mai le masini. Sa tilotilo mai o ia ia te au ma faapea mai, “Oi, o oe o Tom Monson.”
“Ioe,” sa ou tali atu ai. “Ae e pei oe o se Hemingway.” Sa fai mai e sa’o o ia o Stephen Hemingway, le atalii o Alfred Eugene Hemingway lea sa fesoasoani ia te au a o ou epikopo, ma sa ou faaigoaina ia Gene. Sa faamatala mai e Stephen sa i ai foi lona tama i le fale lava lea, ma ua toeitiiti maliu. Sa na o lona tauvalaau i lo’u igoa, ma sa mananao le aiga e faafesootai atu au, ae sa le mafai ona maua le numera o la’u telefoni.
Sa ou faamavae ae ma o ma Stephen i le potu i luga sa i ai si alii lea sa fesoasoani ia te au, ma sa potopoto ai le isi vaega o lana fanau, a o lona toalua na maliu i ni nai tausaga ua mavae. Sa manatu le aiga, o le ma feiloaiga ma Stephen i le potumalolo, o se tali mai lea a lo tatou Tama Faalelagi i lo latou faanaunauga tele, ia ou vaai i le latou tama a o le’i maliu o ia. O au foi ia, sa ou lagonaina o le tulaga lena, aua pe ana fai e le ulu atu Stephen i le potu sa ou talatalanoa ai i le taimi tonu lava lena, semanu ou te le iloaina o loo i ai Gene i lena fale.
Sa ma faia se faamanuiaga o Gene. Sa i ai le agaga o le filemu. Sa manaia le ma talatalanoaga, ona ou tuumuli ai lea.
O le taeao na sosoo ai, sa ta’u mai ai i le telefoni, ua maliu Gene Hemingway—ina ua mavae le 20 minute talu ona ia mauaina le faamanuiaga mai lona atalii ma au.
Sa ou tatalo lemu e faafetai atu i le Tama Faalelagi ona o le malosi o Lana taitaiga na uunaia ai au ou te asiasi i le St. Joseph Villa, ma ua taitai atu ai au i la’u uo pele, o Alfred Eugene Hemingway.
Ou te fia manao e mafaufau, a o matou olioli i le uunaiga a le agaga, ma auai i le tatalo lotomaualalo ma tuuina atu se faamanuiaga faale- perisitua, o mafaufauga o Gene Hemingway i lena afiafi sa pei o upu o loo ta’ua i le pese, “Matai e, Ua Sou le Vasa,” lea na ou faitauina atu i le amataga o la’u savali:
Le Faaola e aua ne’i
Toe tuua na o au!
Ou te maua ai le fiafia
I lou maota paia.
Ou te fiafia pea lava i lena pese ma ou te molimau atu ia te outou i le po nei i le mafanafana na te aumaia:
“Sou po o fili, po o tagata,
Leai o se sami na te malua,
Le vaa e tofa ai o Ia,
Le Pule o lalo nei ma luga.
E usitai ia oe Iesu:
Filemu.”14
O Ana afioga i tusi paia ua lava ia: “Ina soia, ma ia outou iloa o au lava o le Atua.”15 Ou te molimau atu i nei mea moni, i le suafa o Iesu Keriso, amene.