O Mai i Siona! O Mai i Siona!
O mataupu faavae o le alofa, galue, faalagolago o le tagata ia te ia lava, ma le faapaiaga e aumai mai le Atua. O i latou o e taliaina ma taitaiina i latou lava e tusa ai ma nei mea, e avea ma e loto mama.
Ao matou feiloai atu i tagata o le Ekalesia i soo se itu o le lalolagi, e tasi lava le luitau e foliga mai e laugatasia ai tagata uma lava: o le le lava o le taimi e faia ai mea uma e manaomia ona faataunuuina. O i latou e utiuti mea ua maua, o le mea e manaomia, o se taimi tele ina ia mauaina ai mea e tatau ai mo le olaga. O i latou o e ua tele mea ua maua, o le mea o lo o manaomia ia lava se taimi e fiafia ai i oa matagofie o le olaga. E faalotovaivai tagata le luitau, aua foi o le taimi e faatapulaaina; e le mafai e le tagata ona faaumiumiina aso pe faaopoopo foi le tausaga.
E tuuaia amioga ua aoaoina e tagata o le lalolagi mo lenei mea. Ao finau le lalolagi i se auala faatulagaina lelei e faafoe ai le taimi, e atili faatosina atu ai i tatou ia saga tulimatai atu i mea o le lalolagi. Peitai o le olaga e le o se finauga ma le taimi–o le finauga i le va o le lelei ma le leaga.
O se mea e tatau ona fai e uiga i nei mea uma, e mafai ona avea o se filifiliga sili ona faapopoleina i le olaga. I le 1872, na fautuaina ai e le Perofeta o Polika Iaga le Au Paia i lenei lava mataupu. Sa ia saunoa mai: “Taofi! Faatali! Afai e te ala i le taeao, ae e te lei sauni e ai se meaai, … punonou i luma o le Alii, ole atu ia te ia ina ia faamagalo a outou agasala, ma ia puipuia mai outou i le aso atoa, ia faasaoina mai outou i faaosoosoga ma le tiapolo, ina ia taitai a outou galuega i le sao, ina ia e faia se mea i lena aso e aoga mo le malo o le Atua i le lalolagi. Pe i ai ea so outou taimi e faia ai lenei mea?… O lau fautuaga lenei mo le Au Paia o Aso e Gata Ai i le aso. Taofi, aua e te faanatinati… . Ua tele naua lo outou vavevave; e le o lava lo outou auai atu i sauniga, e le o lava lo outou tatalo, e le o lava lo outou faitauina o Tusitusiga Paia, e le o lava lo outou mafaufau loloto, o taimi uma lava o lo o outou pisi ai i nisi mea, ma o lo outou vavevave ua outou le iloa ai le mea e tatau ona fai muamua… . Sei ou faafaigofieina atu lava lea faaupuga—o se tasi o olaga sili ona faigofie e faamanatu mai ai le aiga lea e mafai ona faaaogaina—‘Ia saunia e tali soo se faamanuiaga,’ ina ia mafai ona oo mai uaga o faamanuiaga, ae o lo o mafai ona e faatumuina lau ipu.”1
Ia faaaoga faatulagaga o le talalelei e faatulagaina ai mea e tatau ona ave i ai le faamuamua. Ua poloai mai le Alii, “O le mea lea, aua nei outou saili i mea a lenei lalolagi, ae ao ina outou saili muamua e fausia le malo o le Atua [po o Siona], ma ia faatuina lana amiotonu; ona faaopoopo atu lea o nei mea uma ia te outou.”2
Ao ou tuputupu ae o se tama talavou i le itu i saute o Iuta, o manatu e uiga ia Siona sa sili ona le manino ia te au, nai lo o le taimi lenei. Sa matou nonofo i se aai laitiiti e le mamao mai le Paka Tele o Siona. E masani ona matou lagiina upu nei i le lotu:
Isaraelu, lou Atua,
Fetalai mai foi mai.
Ua pau Papelonia;
Le Atua na lepetia.
Ao avea au ma se tamaitiiti laitiiti, sa ou vaaia vanu matagofie ma tumutumu maa maualuluga o lena paka tele. Na tafe fepiopioai solo ai se vai i puipui maualuluga o vanu–o nisi taimi e malu—o nisi foi taimi e tatafe tele ai. Atonu e mafai ona outou vaai faalemafaufau i le fenumiai na lagonaina e lou nei tamaitiiti, ao ou taumafai e tuu faatasi upu o le viiga ma siosiomaga masani o lea paka matagofie. E ui lava ina sa le i matuai fetaui lelei, ae sa teuina i lou mafaufau se lagona, o Siona o se mea mamalu ma paia. O aluga o tausaga, na tuputupu ae ai se malamalamaaga matagofie lava. I tusitusiga paia, tatou te faitau ai, “O lea, e moni, ua faapea mai le Alii, ia olioli ai Siona, aua o Siona lenei—o e loto mama.”4
O le faatuina o Siona e tatau ona avea ma manulauti o soo te tagata lava o lenei Ekalesia. E mafai ona faapea mai ma le saogalemu: Ao tatou saili atu ma o tatou loto atoa ina ia aumaia ma faatuina Siona, o faafitauli e mafua mai i le manatu ua itiiti tele le taimi mo i tatou, o le a mou ese atu. O lo o i ai le olioli ma faamanuiaga e ala mai i le auai i nei gaoioiga lelei. E suia ai le olaga o se tasi. O le a le toe avea le fale ma se fale talimalo, ae o le a avea ma nofoaga o le toafilemu, puipuiga ma le alofa. O le a suia foi tagata. O Siona, o le a taofia ai finauga ma feeseeseaiga; o le a mou ese le faailogaina i vaega ma le mataua; o le a leai se tasi e mativa—faaleagaga pe faaletino; o le a le toe i ai ituaiga uma o amiogaleaga. E pei ona molimauina e le toatele, “e moni lava, e le mafai ona sili i ai le fiafia o se tasi nuu o nuu uma lava … ua faia e le aao o le Atua.”5
O le perofeta anamua o Enoka sa galue i le tele o tausaga i le aumaia o ona tagata i lenei tulaga o le amiotonu. E pei foi o o tatou nei aso, sa latou i ai foi i se taimi o le amioleaga, taua ma le faamaligi toto. Peitai, na tali atu i ai tagata amiotonu. “Ma sa taua e le Alii lona nuu o Siona, aua sa tasi o latou loto ma lo latou manatu, ma sa latou ola i le amiotonu; ma sa leai foi se tasi o i latou sa mativa.”6
Ia maitau lelei le upu aua i lenei mau. Na faatuina Siona ma faamanuiaina aua o olaga na musuia e le Atua ma galuega a ona tagatanuu. O Siona e le oo mai faameaalofa, ae ona o le o mai faatasi o tagata amio mama ma tagata o le feagaiga, na fausiaina ai. Na maitauina e Peresitene Spencer W. Kimball e faapea: “Pe a tatou pepese faatasi ‘O Mai i Siona,’ tatou te mananao ia … o mai i le uarota, i le paranesi, i le misiona, i le siteki, ma tuuina mai le lagolago i le fausiaina o Siona.”7 O le mea lea, tatou te potopoto ai i le ala faatonuina a le Alii, e taumafai ma le faaeteete le Au Paia e aumaia Siona ia pei o le “malo o lo tatou Atua ma lona Keriso,”8 e saunia ai mo le Afio Faalua Mai o le Alii.”9
Ua faamanatu mai e Peresitene Hinckley ia i tatou “o lenei galuega tatou te faia e tulaga ese lava. O le galuega a Keriso. O le malo o le Atua lo tatou Tama Faavavau. O le fausiaina o Siona i le lalolagi.”10
“Afai tatou te fia atiinaeina le Siona lena sa taua e le au perofeta ma lea sa folafola mai e le Alii, ona tatau lea ona tuuese lo tatou manatu faapito. E tatau ona tatou faatoilaloina lo tatou fiafia i mea faigofie ma le filemu, aua e ala mai i taumafaiga fita tatou te faia, atoa ma o tatou puapuaga, o le a tatou masani lelei ai ma lo tatou Atua.”11
O nisi o mataupu faavae ua faapogai ai lenei tulaga maualuga o le perisitua o le alofa, auauna atu, galue, faalagolago o le tagata ia te ia lava, faapaiaga, ma le tausimea.12 Ina ia malamalama atili i le ala e mafai ai ona tatou fausia Siona i luga o nei faavae o upumoni, sei o tatou mafaufau i ni vaega nei se fa.
Muamua o le alofa.
“Ua fetalai mai Iesu … E te alofa atu i le Alii lou Atua ma lou loto atoa, ma lou agaga atoa, ma lou manatu atoa.
“O le poloaiga muamua lena ma le sili.
“E faapena foi lona lua, E te alofa atu i le lua te tuaoi, ia pei o oe lava ia te oe.
“O na poloaiga e lua ua autu ai le tulafono uma ma le au perofeta.”13
O le alofa atu i le Atua e sili atu nai lo se isi lava mea, e uunaia ai i tatou ina ia faia mea e sili ona taua ia i tatou, ma faatulagaina lelei ai o tatou olaga ina ia mafai ona o gatasi ma Ia. O le a faapea foi ona tatou alolofa ai i foafoaga uma a le Atua, e aofia ai o tatou uso a tagata. O le faamuamuaina o le Atua i mea uma, e faamalosia ai le alofa sili atu ma le faamaoni i le va o le tane ma le ava, matua ma fanau. I Siona, tatou te iloa ai “e taitoatasi le tagata ma saili i le lelei o le la te tuaoi, ao faia mea uma i le manatu tasi i le mamalu o le Atua.”14
O le isi o le galue. O le galue o se taumafaiga e faaletino, faalemafaufau, pe faaleagaga foi. Na poloai mai le Alii e faapea “o le a e ai foi au meaai ma le afu o ou mata.”15 O le galue o le puna lea o le fiafia, le taua o le tagata lava ia, ma le tamaoaiga. I totonu o le tamaoaiga o le Atua, e leai se avanoa o le taufaasese ma le faaloloto. O le galue, o galuega faamaoni faatasi ai ma lenei mafuaaga paia e aofia ai mea uma: “A o le galue i Siona, e galue o ia mo Siona, aua afai latou te galulue i le fia fai tupe e fano i latou.”16
Faalagolago o le tagata ia te ia lava o le isi lea. O le taimua o le filifiliga saoloto ma le puipuiga o le tagata lava ia. Ua poloaiina e le Atua le Ekalesia ma ona tagata, ia faalagolago le tagata ia te ia lava ma ia tu saoloto.17 O taimi o le mau o taimi ia e ola faaeteete ai ma teuina ai mea e manaomia. O taimi o le oge o taimi ia e ola fuafua tatau ai ma faaaoga ai mea sa tatou teuina.
“E leai se tagata moni o le Au Paia o Aso e Gata Ai, e maua e ia le tino malosi ma mafai e ia ona ia tauaveina lea tulaga, na te tuuina atu i isi lona tiutetauave o le tausia o ia lava po o lona aiga. Afai lava o loo mafai ona ia galue, e mafai e ia ona tausia ia lava ma lona aiga i le itu faaleagaga ma le faaletino o le olaga, i lalo o musumusuga a le Alii atoa ma lona galue.”18
O i tatou o atalii ma afafine o le Atua ma tatou te faalagolago ia te Ia i mea uma ua tatou maua. Afai o le a tatou tausia Ana poloaiga, o le a Ia le tuulafoaiina i tatou. Peitai, e le faia e le Tama Faalelagi mo i tatou, mea e mafai ona tatou faia mo i tatou lava. O lo o faamoemoe mai o Ia ina ia tatou faaaoga mea ua tatou maua mai ia te Ia, e tausia ai i tatou lava ma o tatou aiga. Afai tatou te faia lea mea, ua tatou faalagolago ia i tatou lava.19
O le mea mulimuli, o le faapaiaga. O le feagaiga o le faapaiaga e aofia ai le osi taulaga; po o se vaega o lona uiga o le, alofa, galue, ma le faalagolago o le tagata ia te ia lava; ma e taua tele foi i le faatuina o le malo o le Atua. “E le mafai ona faatuina Siona,” ua fetalai mai le Alii, “sei vagana e faia i mataupu faavae o le tulafono a le malo selesitila.”20 O le feagaiga o le faapaiaga o le totonugalemu lea o lenei tulafono. E i ai se aso tatou te faaaogaina ai i lona atoatoa. O lenei feagaiga e aofia ai le “tuuina atu e se tasi o lona taimi, taleni ma ana mea e fesoasoani ai e tausia e matitiva ma e le tagolima—pe o le faaleagaga pe faaletino—ma le fausiaina o le malo o le Atua.”21
O mataupu faavae o le alofa, galue, faalagolago o le tagata ia te ia lava, ma le faapaiaga e aumai mai le Atua. O i latou o e taliaina ma taitaiina i latou lava e tusa ai ma nei mea, e avea ma e loto mama. O le lotogatasi i le amiotonu o le faamatalaina lena o uiga o o latou tagata, o lo latou filemu ma le fiafia e avea ma tagavai i malo uma. Ua saunoa mai le Perofeta o Iosefa Samita:
“O le fausiaina o Siona o se mafuaaga ua faafiafiaina ai tagata o le Atua o soo se matua lava; o se autu na laugaina e Perofeta, faitaulaga, ma tupu, faatasi ma se loto malie ma se faamamafaga faapitoa; … ua tuua mo i tatou ina ia tatou vaavaai i ai, auai ma fesoasoani i le tuleiina i luma o le mamalu i aso e Gata Ai [o Siona] … o se galuega ua faamoemoeina e aumaia ai le faafanoga i mana o le pouliuli, toe faafouina o le lalolagi, mamalu o le Atua, ma le faaolataga o le auaiga o tagata soifua.”22
Ou te molimau atu e moni nei mea. O Gordon B. Hinckley o se Perofeta a le Atua i luga o le fogaeleele, e pei ona sa i ai Iosefa Samita, le Itiiti. O le malo o le Atua o le Ekalesia a Iesu Keriso o le Au Paia o Aso e Gata Ai ma o le a avea ma Siona i lona matagofie uma. O Keriso o le Faaola o le lalolagi, le Alo Pele o le Atua soifua, o le Paia. I le suafa o Iesu Keriso, amene.