Ua Faamanuiaina Le Ekalesia i le Lalolagi Atoa i Siufofoga o Perofeta
Ina tatou faalogologo atu ia i perofeta o o tatou vaitaimi, a o latou fesoasoani mai ina ia tatou tulimatai atu i mea o loo faaautu i ai le fuafuaga a le Foafoa.
O se olioliga ma se avanoa taua le avea ma se vaega o le Ekalesia ua soo ai le lalolagi, ma aoaoina ma faagaeetia ai e ni perofeta, o tagata vaai, ma tali faaaliga! O lo o faasalalauina lenei konafesi i atunuu e 68 ma ua faaliliuina i gagana e 55. E moni lava o se Ekalesia ua i ai i le lalolagi atoa, ua soo atunuu eseese i tagata o le au paia. O i tatou uma o ni fanau a se Atua soifua alofa, o lo tatou Tama Faalelagi lea. Ou te faailoa atu lo’u alofa ia te outou, o’u uso e ma tuafafine pele.
I le tolu masina talu ai sa tatou auai faatasi i lalo o le taitaiga musuia a Peresitene Gordon B. Hinckley, i le faapaiaga o le Malumalu o Navu lea sa toe fauina. Na tatou toe mafaufau ai i le Perofeta o Iosefa ma toe faafou ai lo tatou manatulia o uluai paionia, o a latou osigataulaga, o loimata, faapea foi lo latou lototele, faatuatua ma le faalagolago i le Alii. E leai ni o’u augatama sa i ai i paionia o le senituri e 19. Ae peitai, talu mai uluai aso o lo’u auai i le Ekalesia ua ou lagonaina lava se lagona fesootai atu i na uluai paionia o e na sopoiaina ia fanua lafulafua. O i latou o o’u augatama faaleagaga, e faapena foi i tagata taitasi uma o le Ekalesia, tusa lava po o le a le atunuu, gagana, po o le aganuu. Sa latou faatuina se nofoaga saogalemu e le gata i sisifo, ae faapena foi le faavae faaleagaga mo le fausiaina o le malo i atunuu uma o le lalolagi.
Talu ai ona ua talia le savali o le talalelei toefuataiina a Iesu Keriso i le lalolagi atoa, o lea ua avea ai i tatou uma o ni paionia i o tatou lava tulaga ma nofoaga o tatou i ai. O le taimi o le faanununu o le maea ai—o le Taua Lona Lua a le Lalolagi i Siamani, sa faatoa aoao ai lo’u aiga e uiga i le Ekalesia a Iesu Keriso o le Au Paia o Aso e Gata Ai. O le taimi lena sa Peresitene ai Siaosi Alapati Samita. Sa na o au o se tamaitiiti, e faalua ona leiloloa uma a matou meatotino i totonu o le fitu tausaga. Sa avea i matou ma ni tagata sulufai ua le mautonu le lumanai. Peitai, o tausaga foi na e fitu sa sili atu ni mea na matou maua nai lo mea e mafai e soo se aofaiga o tupe ona faatau. Sa matou mauaina se sulufaiga faalelagi, o se nofoaga o le puipuiga mai le faanoanoa—o le talalelei lea a Iesu Keriso ma Lana Ekalesia, sa taitaia e se perofeta moni o lo o soifua.
O le taimi lea o lo’u olaga faatamaitiiti, sa ou taalo ai i fale ua talalautasi i pomu, ma sa ou ola a’e i faatafunaga na afua ona o le taua lea sa toilalo ai lo’u atunuu ma sa ou iloaina, sa matua’ia e lo’u atunuu le tiga matautia i le tele o atunuu i le taimi o le Taua Lona Lua a le Lalolagi.
O le tala lelei faapea na faia e Iesu Keriso le Togiola atoatoa mo le tagata, e faaolaina ai tagata uma mai le tuugamau ma tauia ai tagata taitoatasi e tusa ma ana galuega, o le mana faamalolo lea na toe aumaia ai le faamoemoe ma le filemu i lo’u olaga.
Po o a lava o tatou luitau o le olaga, e mafai ona mama a tatou avega pe afai e le gata ina tatou talitonu ia Keriso, ae talitonu foi Na te mafaia ma o Lona mana e faamamaina ai ma fesoasoani i o tatou olaga, ma talia Lona filemu.
O Peresitene Tavita O. Makei o le perofeta i le taimi o lo’u talavou. Sa foliga mai ou te iloaina lelei lava o ia: Sa mafai ona ou lagonaina lona alofa, agalelei, ma le malualii; sa ia aumaia ia te au le mautinoa ma le lototoa i lo’u olaga talavou. E ui lava ina sa ou ola ae i le fiaafe o maila i Europa. Sa ou lagona na te faatuatuaina au, ma sa ou le manao foi e faatiga ia te ia.
O se tasi puna o le malosi, o se tusi lea na tusia e le Aposetolo o Paulo ao i ai o ia i le falepuipui, sa faatuatusi ia Timoteo, o lona fesoasoani aupito faatuatuaina ma lana uo. Sa ia tusia:
“Aua ua le foaiina mai e le Atua ia te i tatou le Agaga e matau ai, a o le Agaga e faamalosi ai, ma alofa ai, ma mafaufau tonu ai.
“O lenei, aua e te ma i le molimau i lo tatou Alii” (2 Timoteo 1:7–8).
O upu nei mai se tasi o Aposetolo anamua a lo tatou Faaola, e tagitagi mai pea ia te au ma le taua tele, ina ua maea le taua, e oo lava i le taimi nei. Peitai, e toafia i tatou ua faatagaina lo tatou atuatuvale e pulea i tatou i taimi o le lilivau faava-o-malo, o le faaletonu o le tamaoaiga ma upufai o malo, ma luitau faaletagata lava ia.
O lo o tumau pea le siufofoga o lo o fetalai mai ai le Atua ia te i tatou. O le a laugatasia lava le taulimaina e le Atua o le fanauga a tagata. Atonu tatou te i ai i se uarota tele po o se paranesi laitiiti foi, e ono ese lo tatou tau ma laau, e ono eseese foi a tatou tu ma aga i fanua ma gagana, ma e mafai foi ona matua ese le lanu o o tatou pa’u. Peitai, o le mana ma faamanuiaga aoao o le talalelei toefuataiina e avanoa mo tagata uma, tusa lava po o a tu ma aga i fanua, tagatanuu, faiga faaupufai, tu masani, gagana, tamaoaiga o le siosiomaga, po o tulaga faaleaoaoga.
O lea ua toe i ai i le taimi nei ia aposetolo, o tagata vaai, ma tali faaaliga o i latou ia o leoleo i le olo, o avefeau faalelagi, o upu moni e faamalolo ai. E fetalai mai le Atua ia i tatou e ala mai ia i latou ia. Ua latou matuai silafia lava le eseese o tulaga o lo o soifua ma ola ai i tatou o tagata o le au paia. O lo o i ai i latou i lenei lalolagi, ae le o ni o le lalolagi i latou.
Ua i ai so tatou perofeta soifua i luga o le fogaeleele, le susuga ia Peresitene Gordon B. Hinckley. Na te silafia o tatou luitau ma popolega. Ua ia te ia ni tali musuia. I se tausaga talu ai, sa ia aoao mai ai i tatou i lana ala mautinoa ma le manino. Na ia saunoa mai:
“E leai se mea e fefe ai fua. E mafai ona tatou maua le filemu i o tatou loto ma le filemu i o tatou fale. E mafai ona avea i tatou uma lava, ma faatosinaga o le lelei i lenei lalolagi… .
“… O lo tatou saogalemu, o loo i le salamo lea. O lo tatou malosiaga, e maua mai i le usiusitai i poloaiga a le Atua.” (“O Taimi o Loo Tatou Ola Ai,” Liahona, Ian. 2002, 86)
E tulei saunoa mai perofeta ia i tatou i le suafa o le Alii, i upu faigofie. E pei foi ona faamaonia mai i le Tusi a Mamona, “Aua ua foai mai e le Alii le Atua le malamalama i le mafaufau, aua foi ua tautala mai o ia i tagata i o latou mafaufau e tusa ma la latou gagana, i le fanauga a tagata seia latou malamalama” (2 Nifae 31:3).
O lo tatou tiutetauave e le gata ia faalogo ae ia faia foi Lana upu, ina ia tatou maua faamanuiaga o sauniga ma feagaiga o le talalelei toefuataiina. Na Ia fetalai mai, “Ua noatia au le Alii, pe a outou faia mea ou te fai atu ai; a e pe a outou le faia mea ou te fai atu ai, e leai sa outou folafolaga” (MFF 82:10).
Atonu e i ai ni taimi tatou te maua ai lagona lofituina, tiga, pe ua tauau lava ina tatou faavaivai, a o tatou taumafai atili e avea ma tagata atoatoa o le Ekalesia. Ia outou mautinoa, o lo o i ai le pulupasama i Kiliata. Ina tatou faafofoga atu ia ma faalogologo i perofeta o o tatou vaitaimi, a o latou fesoasoani mai ina ia tatou tulimatai atu i mea o lo o faaautu i ai le fuafuaga a le Foafoa mo le taunuuga e faavavau o Lana fanau. Ua silafia i tatou e le Alii, e alofa o Ia ia te i tatou, e finagalo o Ia ina ia tatou manuia, ma ua Ia uunaia i tatou ina ua fetalai mai: “Ia pule foi ia faia … mea uma i le poto ma le auauai lelei, aua e le tatau i [alii ma tamaitai] ona momoe vave e silia ma le malosi ua ia [te i latou] … . [Peitai] e tatau ona [latou] filifiliga” (Mosaea 4:27).
Pe o tatou maelega ea i le tausiga o poloaiga a le Atua, e aunoa ma le tamomoe e sili atu ma lo tatou malosi? Pe na ona tatou savalivali lava? Pe o tatou faaaogaina ea ma le poto o tatou taimi, taleni, ma mea ua tatou maua? Pe o tatou tulimatai atu ea i mea e sili atu ona taua? Pe o tatou mulimulita’i ea i fautuaga musuia a o tatou perofeta?
O se tasi o faataitaiga e taua tele mo tagata o le faamalolosia lea o o tatou lava aiga. O le mataupu faavae o afiafi faaleaiga, sa tuuina mai ia tatou i le 1915. Sa toe faamanatu mai e Peresitene Makei i matua i le 1964 e “leai se isi faamanuiaga e mafai ona suitulaga i le toilalo o le aiga” (sii mai le J.E. McCulloch, Home: The Savior of Civilization [1924], 42; i le Conference Report, Apr. 1964, 5). O le 1995, na taloina ai e perofeta o o tatou vaitaimi le lalolagi atoa, ina ia faamalolosia le aiga aua o le iunite faavae lea o nuu. Ma o le tolu tausaga talu ai sa tuuina mai ai ma le alofa e le Au Peresitene Sili ma le Korama a Aposetolo e Toasefululua se timaiga: “Matou te fautuaina matua ma fanau ina ia tuu atu le faamuamua aupito maualuga i tatalo faaleaiga, o afiafi faaleaiga, suesuega ma le aoaoina o le talalelei, ma gaoioiga lelei faaleaiga. Peitai, tusa lava po o le a le taua ma le talafeagai o isi tulaga manaomia po o gaoioiga, e le tatau ona faatagaina e suitulaga i tiute ua tuuina mai le lagi, ia e na o matua ma aiga e mafai ona faataunuuina lelei ai.” (“Tusi mai le Au Peresitene Sili,” Liahona, Tesema, 1999, 1).
Ia toe faafouina lo tatou lotomaualalo ma le faatuatua ma lo tatou faamaoni i a tatou tautinoga e mulimuli i perofeta, o tagata vaai, ma tali faaaliga i le maelega atoatoa. Ia tatou faalogo ma aoaoina ma faamalamalama e i latou o lo o umia ki o le malo. Ma a o tatou auai i lenei konafesi, ia suia o tatou loto, ia i ai se manaoga tele e faia mea lelei (tagai Alema 19:33), ma ia avea ai i tatou o paionia i le fausiaina o se faavae faaleagaga o le a faatuina ai le Ekalesia i le itu lalolagi o tatou i ai. I le suafa o Iesu Keriso, amene.