Avea ia Sili Atu ia Keriso: O Le Faataoto i le Malifa
I le taimi a le Alii, e le o le mea tatou te amata ai, ae o le mea tatou te aga’i i ai e sili ona taua.
A o ou laitiiti, sa i ai ni o’u naunautaiga. I se tasi aso ina ua tuua le aoga, sa ou fesili ai, “Mom, o le a se mea e tatau ona ou faia pe a ou matua: se tagata taalo pasiketipolo faapolofesa po o se tama pese lauiloa?” Ae paga lea, o Kalaka “nifopu” e leai ma se foliga talenia i taaloga po o se faailoga o tomai faamusika i le lumanai. E ui foi i le mau taumafaiga, ae sa faafia ona le taliaina a’u i le polokalama faaakatemia maualuga a le aoga. Sa iu ina fautuaina e o’u faiaoga e tatau ona ou taulai i vasega masani. Na mavae taimi, sa ou atina’eina ni mausa mo suesuega tauia. Ae e le’i tupu vagana ai o le taimi o la’u misiona na ou lagonaina ai le amata fana’e o o’u gafatia faaleatamai ma faaleagaga. Sa faaauau pea ona ou galue malosi. Peitai mo le uluai taimi i lo’u olaga, sa ou faato’ato’aina ai le faaaofia ai o le Alii i lo’u atina’ega, ma sa faia ai se eseesega uma.
Uso e ma tuafafine, i le Ekalesia lenei, tatou te talitonu i gafatia faalelagi o fanau a le Atua ma i lo tatou tomai e avea ai o se mea e sili atu ia Keriso. I le taimi a le Alii, e le o le mea tatou te amata ai, ae o le mea tatou te aga’i i ai e sili ona taua.1
Ina ia faapupulaina lenei mataupu faavae, o le a ou tusia sina matematika faavae. Ia, aua le popole i le faalogoina o le upu matematika i le konafesi aoao. Ua faamautinoa mai e lo’u faiaoga matematika i le BYU-Idaho faapea e oo lava i le tagata faatoa amata o le a malamalama i lenei manatu faavae tutotonu. E amata i le fuafaatatau mo se laina. O le faalavefau, mo o tatou faamoemoega, o le amataga lea o la tatou laina. E mafai e le faalava ona i ai se itu maualuga pe maualalo e amata ai. O le malifa o le laina e mafai ona lelei pe le lelei foi.
E tofu uma i tatou ma faalalava eseese i le olaga—tatou te amata i nofoaga eseese ma taleni eseese ma faamanuiaga o le olaga. O nisi e fananau mai ma ni faalalava e maualuluga, e tumu i avanoa. O isi e feagai ma tulaga e faigata ma foliga mai e faapito’au.2 Ona tatou agaigai ai lea i luma i luga o se malifa o le alualu i luma faaletagata lava ia. E matua itiiti le filima’otia o lo tatou lumanai e le itu tatou te amata ai ae tele atu e lo tatou malifa. E silafia e Iesu Keriso lo tatou gafatia paia tusa lava pe o fea tatou te amata ai. Na Ia silafia i le tagata ‘aisi, le tagata agasala, ma le tagata ma’i. Na Ia silafia i le tagata faifaiva, o le ao lafoga, ma se selote. Po o fea lava tatou te amata ai, ae faitaulia e Keriso mea tatou te fai i mea e tuuina mai ia te i tatou.3 E ui ina taulai le lalolagi i o tatou faalalava, e taulai le Atua i o tatou malifa. I le metotia e filima’oti ai mea e le Alii, o le a Ia faia mea uma e mafai ona Ia faia e fesoasoani ai ia i tatou e liliu a tatou malifa aga’i i le lagi.
O lea mataupu faavae e tatau ona faamafanafanaina ai i latou o e o tauivi ma malolo ia i latou o e foliga e maua avanoa uma. Sei ou amata atu i le talanoa atu i tagata taitoatasi e i ai tulaga e faigata e amata ai, e aofia ai le mativa, tapulaa le mauaina o aoaoga, ma tulaga luitauina faaleaiga. O isi e feagai ma luitau faaletino, faafitauli o le soifua maloloina faalemafaufau, po o tulaga malolosi e sosolo i le toto ae lei fananau mai.4 Mo soo se tasi o loo tauivi i itu e faigata ai ona amata, faamolemole ia iloa e silafia e le Alii o tatou tauiviga. Na Ia “[ave] i ona luga [o tatou] vaivaiga, ina ia [mafai] ona faatumuina ona loto i le alofa mutimutivale, … ina ia [mafai] ona ia silafia … le ala e fesoasoani ai ia tei [tatou], e tusa ma [o tatou] vaivaiga.”5
Se’i ou faasoa atu ni eria se lua o le faamalosiauga mo i latou e feagai ma tulaga faigata e amata ai. Muamua, taulai i le mea o loo e aga’i i ai ae le o le mea sa e amata ai. E sese lou le amana’iaina o ou tulaga—e moni ma e manaomia ona talanoaina. Ae o le soona-taulai i luga o se itu e faigata ona amata ai, e mafai ona afua ai ona faamatalaina ai oe ma e oo lava ina faatapulaa ai lou gafatia e filifili.6
I le tele o tausaga ua mavae, sa matou galulue ai ma se vaega o talavou o le aai-i-totonu o Boston, Massachusetts, o e sa tele ina fou i le talalelei ma faamoemoega o le Ekalesia. Sa faaosoosoina a’u e faaluafesasi lo’u lotomalamalama ma le popolega mo o latou tulaga ma se manaoga e tuumaualalo tulaga faatonuina a le Atua.7 Sa i’u ina ou iloaina o le auala e sili ona mamana e faaalia ai lo’u alofa o le aua lava nei tuumaualaloina o’u faamoemoega. Faatasi ai ma mea uma sa ou iloa e fai, sa matou taulai faatasi i o latou gafatia, ma sa tofu amata e i latou taitoatasi ona faaeaea o latou malifa. Sa faifai malie lo latou tuputupu a’e ma le mautu i le talalelei. O le taimi nei, ua uma ona latou faamisiona, ua faauu mai kolisi, ua faaipoipo i le malumalu, ma o loo taulamua i ni olaga matagofie patino ma faapolofesa.
Lona lua, ia faaaofia ai le Alii i le faagasologa o le siitia o lau malifa. A o avea ma peresitene o le BYU–Pathway i le Lalolagi Atoa, ou te manatua lo’u nofonofo i se faigalotu tele i Lima, Peru lea sa lauga ai Elder Carlos A. Godoy. A o ia tilotilo atu i le potopotoga, sa foliga lofituina o ia i le matauina o le toatele o tamaiti aoga faamaoni o le iunivesite o le uluai augatupulaga. Atonu na ia tomanatu ai i lona lava ala na ui mai ai i na tulaga, sa ta’ua ai e Elder Godoy ma le tuia o lona loto: o le a “fesoasoani le Alii e sili atu i le mea e mafai ona e fesoasoani ai ia te oe lava. [O le mea lea] ia faaaofia ai le Alii i le faagasologa.”8 Na aoao mai e le perofeta o Nifae “e faaolaina i tatou i le alofa tunoa, pe a uma mea uma e mafai ona tatou faia”9 E tatau ona tatou faia la tatou mea sili,10 lea e aofia ai le salamo, ae e na o le alofa tunoa lava o le Alii e mafai ai ona tatou iloa lo tatou gafatia faalelagi.11
Ma le mea mulimuli, sei ou faasoa atu ni eria se lua o se fautuaga mo i latou e i ai itu faaeaea e amata ai. Muamua, pe mafai ona tatou faaalia si lotomaualalo mo tulaga atonu tatou te le’i foafoaina e i tatou lava? E pei ona sa ta’ua e le Peresitene sa i ai o le BYU o Peresitene Rex E. Lee i ana tamaiti aoga, “Ua tatou feinu uma mai vaieli tatou te le’i eliina ma faamafanafanaina i tatou lava i afi tatou te lei tafuina.”12 Ona ia valaaulia lea o ana tamaiti aoga e toe faafoi ma faatutumu vaieli faaleaoaoga sa fauina e uluai paionia. O le lē mafai ona toe totoina fatu i laufanua na totoina e isi, e mafai ona tutusa ma le toe faafoi o se taleni e aunoa ma le faateleina.
Lona lua, o le taulai atu i se itu maualuga e amata ai, e mafai ona tele ina maileia ai i tatou i ni lagona ua tatou lauolaola, ae o le mea moni, atonu ua fai si to’a o lo tatou malifa i totonu. Na aoao mai le polofesa Harvard o Clayton M. Christensen e faapea o tagata e sili ona faamanuiaina o i latou e aupito lotomaualalo ona ua lava lo latou mautinoa ia faasa’oina ma aoao mai soo se tasi.13 Sa fautua mai Elder D Todd Christofferson ia i tatou ia “saili ma le naunautai ni auala e talia ai e oo lava i le sailia o faasa’oga.”14 Tusa lava foi pe foliga mai o loo gasolo lelei mea, e tatau lava ona tatou sailia avanoa e faaleleia ai e ala i talosaga ma le lototatalo.
Tusa lava po o fea tatou te amata ai i tulaga e tele pe faigata, o le iloa o lo tatou gafatia maualuga na o lo tatou faia ia avea le Atua ma a tatou paaga e mafai ai ona tupu. Sa ma talanoa talu ai nei ma se faitofā iloga faaleatunuu, o le sa fesili e uiga i tulaga manuia o tamaiti aoga o le BYU–Pathway. Sa atamai o ia ma sa faamaoni foi lana fesili, ae na manino lona manao i se tali faalepoto salalau. Sa ou faasoa atu ia te ia a matou polokalama faatumauina ma taumafaiga faafaiaoga faufautua. Ae sa ou faaiu i le fai atu, “O ni faiga lelei uma nei, ae e ala ona alualu i luma a matou tamaiti aoga ona matou te aoao atu ia i latou o latou gafatia faalelagi. Vaai faalemafaufau pe afai o lou olaga atoa, na ta‘u atu ia te oe e le mafai lava ona faamanuiaina oe. Ona mafaufau lea faapea sa aoaoina oe o oe o se atalii po o se afafine o le Atua e i ai gafatia faalelagi?” Na tu o ia, ona tali mai lea, “Mamana tele lena mea.”
Uso e ma tuafafine, o se tasi o vavega o lenei mea, le Ekalesia a le Alii, e tofu mafai e i tatou taitoatasi ona avea o se mea sili atu ia Keriso. Ou te le iloa se isi lava faalapotopotoga e tuuina atu i ona tagata ni mau avanoa e galulue ai, toe faafoi atu ai, salamo, ma avea ma tagata ua lelei atili. Pe tatou te amata i tulaga faigata po o le ‘oa faaleagaga, ia tatou faatepa taulai la tatou vaaiga ma a tatou malifa agai i le lagi. A tatou faia, o le a siitia e Keriso i tatou i se nofoaga e maualuga atu. I le suafa o Iesu Keriso, amene.