O Le Mutimuti Alofa Tumau o le Faaola
O le faailoaga o le mutimuti alofa mo isi o le ute lea o le talalelei a Iesu Keriso.
O se tasi o mataupu faavae aupito sili ona maoae na a’oa’o mai e le Faaola i le taimi o Lana misiona i le lalolagi o le taua o le taulimaina o isi i le mutimuti alofa. Se’i o tatou toe mafaufau i le mataupu faavae lenei ma lona faaaogaina tonu e ala i le mafaufau i le tala o le asiasiga a Iesu i le fale o Simona le Faresaio.
O le Evagelia a Luka o loo ta’u mai e faapea sa i ai se fafine, sa mafaufauina o se tagata agasala, sa ulufale atu i le fale o Simona a o i ai Iesu iina. I le lotosalamo faamaulalo, sa faalatalata atu ai le fafine ia Iesu, mulumulu Ona a’ao i ona loimata, soloi i lona lauulu, ma sogi atu ma uuina i se suauu faapitoa.1 Sa mafaufau ifo le talimalo faamaualuga ia te ia lava ma le inoino ma le faasausili, o lē sa manatu ua sili atu lona mamā nai lo le fafine, “A [na] se perofeta lenei, po ua iloa e ia lenei fafine, ma lana amio, ua ia pa’i atu ia te ia; aua o le fafine agasala ia.”2
O le uiga faafia paia o le Faresaio, na afua ai ona ia faamasinoina ma le amiolētonu ia Iesu ma le fafine. Ae i Lana silafiaga aoao, sa silafia ai e le Faaola le mafaufau o Simona ma, i le poto tele, na Ia lu’iina ai le uiga vaai maualalo o Simona, ma faapea foi ona a’oa’iina o ia i lona lē faaaloalo i le taliina o se mālō faapitoa e pei o le Faaola i lona fale. O le mea moni, o le a’oa’iga tuusa’o a Iesu o lea Faresaio, na avea o se molimau faapea e moni lava sa ia Iesu le meaalofa o valo’aga ma o lenei fafine, faatasi ai ma se lotomaualalo ma le loto salamo, sa salamo ma faamagaloina ana agasala.3
E faapei o le tele o isi mea na tutupu i le taimi o le misiona a Iesu i le lalolagi, o lenei tala ua toe faaalia ai faapea sa galue le Faaola ma le mutimuti alofa ia i latou uma o ē na o mai ia te Ia—e aunoa ma se faailoga tagata—aemaise ai i latou o ē sa sili ona manaomia Lana fesoasoani. O le loto salamo ma le alofa migao na faaalia e le fafine ia Iesu o faamaoniga ia o lona salamo faamaoni ma le naunau ia maua le faamagaloga o ana agasala. Peitai, o le talitonuga faasausili o Simona, faaopoopo i ai ma lona loto maaa,4 na taofia ai o ia mai le faaali atu o le lotomalamalama mo lena agaga ua salamo, ma sa ia vaai atu foi i le Faaola o le lalolagi ma le faalotolotolua ma le manatu faatauvaa. Na faailoa mai i ona uiga lona ituaiga olaga sa na o le maua’i ma le tausiga o tulafono e aunoa ma se uiga, ma le faalialiavale i fafo o ona talitonuga maumaututu e ala i le mita’i mai o ia lava ma le pa’ia pepelo.5
O le auaunaga mutimuti alofa ma patino a Iesu i lenei tala, o loo faapupula mai ai se faataitaiga atoatoa o le ala e tatau ona tatou fegalegalea’i ai ma o tatou tuaoi. E le mafaitaulia faataitaiga o loo i tusitusiga paia i le ala na faaosofia ai le Faaola i le mutimuti alofa tumau, e fegalegalea’i ma tagata i Ona taimi ma fesoasoani ai ia i latou o ē sa mafatia ma i latou sa “lailoa ma tuulafoa’iina, e pei o mamoe e leai so latou leoleo.”6 Sa Ia faaloaloa atu Lona a’ao mutimutivale ia i latou o ē sa manaomia le toomaga mai a latou avega, i le faaletino ma le faaleagaga.7
O le uiga mutimuti alofa o Iesu sa maua’a i le alofa mamā,8 e pei o Lona alofa lē ponā ma le atoatoa, o le fatu lea o Lana taulaga togiola. O le mutimuti alofa o se uiga faavae lea o i latou o ē tinoū mo le faapaiaga ma e femilosa’i faatasi ma isi uiga faaKerisiano e pei o le faanoanoa faatasi ma i latou o ē faanoanoa ma i ai le lotomalamalama, alofa mutimutivale, ma le agalelei.9 O le faaalia o le mutimuti alofa mo isi, o le mea moni, o le ute lea o le talalelei a Iesu Keriso ma o se faailoga manino o lo tatou latalata faaleagaga ma faalelagona i le Faaola. E le gata i lea, e faaalia ai le maualuga o Lana tosinaga i le ituaiga olaga tatou te ola ai ma faapupula mai ai le tele o mea e gafatia o o tatou agaga.
E taua le mata’ituina o faatinoga mutimuti alofa a Iesu, sa le o ni faailoaga maoae na faatonuina e fai sa faavae i se lisi o galuega e ao ona faamae’a, ae o faailoaga i aso uma o le moni o Lona alofa lē ponā mo le Atua ma Ana fanau ma Lona naunautaiga tumau e fesoasoani ia i latou.
Sa mafai e Iesu ona faailoa manaoga o tagata e oo lava i se mea mamao. O lea, e le o se mea e ofo ai, mo se faataitaiga, o le taimi lava na mae’a ai le faamalologa o se auauna patino a le taitai o le toaselau,10 sa maliu atu Iesu mai Kapanaumi i le aai e igoa o Naina. O iinā sa faatino ai e Iesu se tasi o vavega aupito agamalu o Lana misiona i le lalolagi ina ua Ia poloaiina se taule’ale’a na maliu, le atalii e toatasi o se tina ua oti lana tane, e toetu mai ma ola. Sa lagonaina e Iesu e le gata i le mafatia matuitui o lena tina mativa, ae o tulaga faigata o lona olaga ma sa faaosofia ai o Ia i le mutimuti alofa moni mo ia.11
E faapei lava foi o le fafine agasala ma le fafine Naina ua oti lana tane, e toatele foi tagata i totonu o lo tatou li’o o tosinaga o loo sailia le mafanafana, gauaiga, amanaiaina, ma soo se fesoasoani e mafai ona tatou ofo atu ia te i latou. E mafai ona avea i tatou uma ma ni meafaigaluega i a’ao o le Alii ma galulue ma le mutimuti alofa ia i latou e lē tagolima, e faapei lava foi ona faia e Iesu Keriso.
Ou te iloaina se teineitiiti sa fanau mai ma se vete tugā i lona laugutu āluga. Sa tatau ona faia i le aso lona lua o lona ola, le uluai ta’otoga o le mau ta’otoga. I le faaosofia ai i se mutimuti alofa moni mo i latou o ē o’o i lenei luitau e tasi, sa saili ai lenei teineitiiti ma ona matua e avatu le lagolago, malamalama’aga, ma le fesoasoani faalelagona i isi o ē e feagai ma lenei mea moni faigata. Sa la tusi mai ia te a’u talu ai nei ma faasoa mai: “E ala i le luitau a lo ma afafine, sa matou maua ai le avanoa e feiloai ai ma tagata ofoofogia o ē sa manaomia le faamafanafanaga, lagolago, ma le faamalosi’auga. I se taimi ua mavae, sa talanoa ai lo ma afafine, ua 11 nei tausaga le matua, ma matua o se pepe sa i ai foi lea luitau. I le taimi o le talanoaga, sa aveese vave ai e lo ma afafine le ufifofoga sa ia faia ona o le faama’i oti, ina ia mafai ai e matua ona vaai atu e i ai le faamoemoe, e ui e umi se taimi mo lena pepe e faaleleia ai le faafitauli i nai tausaga e sosoo ai. Matou te lagonaina lava le lotofaafetai mo le avanoa e avatu ai lo matou lotomalamalama ia i latou o ē puapuagatia, e fai ona faia e le Faaola mo i matou. Matou te lagonaina le tuuitiitia o lo matou tiga i taimi uma matou te faato’amalie ai le tiga o se isi tagata.”
A’u uo pele, a tatou tinoū ma le loto i ai e tuufaatasia se uiga mutimuti alofa i o tatou ala o le olaga, e pei ona sa faaa’oa’o mai e le Faaola, o le a atili ai ona tatou nofouta i manaoga o tagata. Faatasi ai ma lena nofouta faateleina, o le a sasala ai lagona o le naunau atu faamaoni ma le alofa ia tatou faatinoga uma. O le a aloa’ia e le Alii a tatou taumafaiga, ma o le a faamanuiaina moni i tatou i avanoa e avea ai o ni meafaigaluega i Ona a’ao i le faamalūlūina o loto ma aumaia le toomaga ia i latou o o latou “lima ua tautau i lalo.”12
O le a’oa’iga a Iesu ia Simona le Faresaio na faamanino mai ai foi e lē tatau lava ona tatou faia ni faamasinoga soonafai ma le ‘ina’inā i o tatou tuaoi, auā tatou te manaomia uma le malamalama ma le alofa mutimutivale mo o tatou lē atoatoa mai lo tatou Tama Faalelagi alofa. Pe le o le mea tonu foi lea na a’oa’o mai e le Faaola i se isi taimi ina ua Ia fetalai, “Se a le mea e te vaai atu ai i si fasi laau i le mata o lou uso, a e te le iloa e oe le utupoto i lou lava mata?13
E manaomia ona tatou mafaufau faapea e lē faigofie ona malamalama i tulaga uma e afua ai uiga faaalia po o le tali mai o se tasi. E mafai ona taufaasese foliga vaaia, ma e tele taimi e le ta’u mai ai se fuataga sa’o o le amio a se tagata. E lē pei o oe ma a’u, e mafai e Keriso ona silasila manino i itu uma o se tulaga e tulai mai.14 E ui foi ina Ia silafiaina o tatou vaivaiga uma, ae e lē soona ta’usalaina i tatou e le Faaola ae faaauau pea ona galue faatasi ma i tatou i le mutimuti alofa mo se taimi umi, e fesoasoani ai ia i tatou e ‘eu ese le utupoto mai i o tatou mata. E silasila pea Iesu i le loto, ae le o foligavaaia.15 Na tautino mai o Ia lava, “Aua le soona faamasino a ia faamasino i le faamasinoga tonu.”16
Ia, manatu i le fautuaga poto a le Faaola i soo e toasefululua sa Nifae e faatatau i le fesili lenei:
“Ma ia outou iloa o le a avea outou ma faamasino o lenei nuu, e tusa ma le faamasinoga o le a ou tuu atu ia te outou, lea o le a tonu. O lea, o a ituaiga o tagata e tatau ona outou i ai? E moni ou te fai atu ia te outou, e pei lava o au nei.”17
“O lea ou te manao ia outou atoatoa e pei lava o aʼu, po o lo outou Tamā o le o i le lagi e atoatoa.”18
I le matalalaga lenei o loo faafitoitonu e le Alii le faamasinoga i luga o i latou o ē ua tau’aveina e i latou lava ia faamasino i vaivaiga o isi ma le amiolētonu. Ina ia faaagavaaina i tatou lava e faia faamasinoga amiotonu, e tatau ona tatou tauivi e avea e faapei o le Faaola ma vaai atu ma le mutimuti alofa i faaletonu o isi, e ala atu i Ona fofoga. Manatu o loo umi pea le taimi tatou te tau atu ai i le atoatoaga, atonu o le a sili atu pe afai tatou te nonofo ifo i a’ao o Iesu ma ōle atu mo le alofa mutimutivale mo o tatou lava faaletonu, e faapei ona faia e le fafine salamo i le fale o le Faresaio, ae ‘aua le soona faaaluina le taimi ma le malosi tatou te vaai ai fua i faaletonu o isi.
A’u uo pele, ou te molimau atu a tatou tauivi e faatino le faataitaiga mutimuti alofa a le Faaola i o tatou olaga, o le a faateleina lo tatou malosi’aga e viia ai uiga tausaafia a o tatou tuaoi ma o le a faaitiitia ai lo tatou lagona faalenatura e faamasino atu i o latou faaletonu. O le a faatupula’ia la tatou fesootaiga ma le Atua, ma e mautinoa lava o le a suamalie o tatou olaga, o le a sili ona agamalu o tatou lagona, ma o le a tatou maua le punavai e lē muta o le fiafia. O le a lauiloa i tatou o ni tagata e faatupuina le filemu,19 o a latou upu e mālū e pei o le sau o se taeao o le tautotogo.
Ou te tatalo ia atili tele lo tatou tali-tiga ma le malamalama i isi ma ia faato’afimalieina e le alofa mutimutivale o le Alii, i le agamalu atoatoa, lo tatou lē onosa’i i o latou faaletonu. O le valaaulia lea a le Faaola mo i tatou. Ou te molimau atu o loo soifua o Ia. O Ia o le faataitaiga atoatoa o le tulaga faaleso’o alofa mutimutivale ma le onosa’i. Ou te molimau atu ai i nei upumoni i le suafa paia o Iesu Keriso, amene.