Ia Tuu i Luga Lo Outou Malamalama
O la’u valaaulia i le asō e faigofie lava: faasoa atu le talalelei. Ia e tu i lou tagata masani ma tuu i luga le malamalama.
A o ou i ai i luga o se vaalele e agai i Peru i ni nai tausaga ua mavae, sa ou nofo i autafa o se tagata na tautino mai lava e ia e le talitonu i le Atua. Sa fesili mai pe aisea ua ou talitonu ai i le Atua. I le talanoaga fiafia na tupu mai, sa ou fai atu ai ia te ia ou te talitonu i le Atua aua na vaai Iosefa Samita ia te Ia—ona ou faaopoopo atu lea o lo’u malamalama e uiga i le Atua na oo mai foi mai i aafiaga patino faaleagaga moni. Sa ou faasoa atu i ai lo’u talitonuga e faapea “ua faailoa mai i mea uma o loo i ai se Atua”1 ma sa ou fesili pe o le a lona talitonuga i le lalolagi—lenei lalolagi avanoa taalaelae—pe na faapefea ona i ai. Sa ia tali mai e faapea, i ana upu, masalo na tupu “le mea faafuasei” na afua ai ona foafoa le ola i se taimi e lē mafuatiaina. Ina ua ou faamatalaina le maualuga o le lē mautinoa le faapea o se “mea faafuasei” ona maua mai ai sea mea matagofie ma faatulagaga tatau, sa filemu o ia mo sina taimi ona ia fai mai lea ma le faaaloalo, “Ua e maua a’u.” Sa ou fesili pe o le a ia faitaua le Tusi a Mamona. Sa ia fai mai o le a ia faitauina, o lea sa ou auina atu ai ia te ia se kopi.
I tausaga mulimuli ane, sa ou maua se uo fou a o ou i ai i se malaevaalele i Lagos, Nigeria. Sa oo ina ma masani a o ia siakiina la’u tusifolau. Sa ou fesili atu e uiga i ona talitonuga faalelotu, ma sa ia faaalia le faatuatua malosi i le Atua. Sa ou faasoa atu le olioli ma le matalasi o le talalelei toefuataiina a Iesu Keriso ma fesili pe na te fia a’oa’o atili mai faifeautalai. Sa ia fai mai ioe, sa aoaoina, ma sa papatisoina. Pe tasi pe lua tausaga mulimuli ane, a o ou savali i le malaevaalele i Liberia, sa ou faalogoina se leo o valaau mai i lo’u igoa. Sa ou faliu, ma sa faalatalata mai lena lava alii talavou ma se ataata lapoa. Sa ma feopoa’i fiafia ma sa ia ta’u mai o la ua toaga i le Lotu ma o loo galulue ma faifeautalai e a’oa’o lana uoteine.
Ou te le o iloa la pe ua faitau e la’u uo lē talitonu i le Atua le Tusi a Mamona pe ua auai foi i le Ekalesia. Sa faia e la’u uo lona lua. Mo i la’ua uma e toalua, o lo’u tiutetauave2—ma lo’u avanoa—sa tutusa lelei: sa tuu i luga le malamalama o le talalelei—ia alofa i ai, faasoa atu, ma valaaulia i se ala masani, ma faalenatura.3
Uso e ma tuafafine, ua ou maua faamanuiaga o le faasoaina atu o le talalelei, ma e ofoofogia. O ni nai faamanuiaga nei:
O Le Faasoaina Atu o le Talalelei e Aumaia ai le Olioli ma le Faamoemoe
Ua outou silafia ma ou iloa sa tatou ola o ni fanau a lo tatou Tama Faalelagi ae tatou te le’i o mai i lenei lalolagi4 ma sa foafoaina le lalolagi mo le faamoemoega o le tuuina atu i tagata taitoatasi o le avanoa e maua ai se tino, maua le poto masani, a’oa’o, ma tuputupu a’e ina ia mafai ai ona maua le ola e faavavau—le soifuaga o le Atua.5 Na silafia e le Tama Faalelagi o le a tatou puapuagatia ma agasala i le lalolagi, o lea na Ia auina mai ai Lona Alo, o lona “ola lē mafaatusatusa”6 ma le taulaga togiola e lē iu7 ua mafai ai ona faamagaloina i tatou, faamaloloina, ma faaatoatoa.8
Ina ia iloa nei upumoni, e suia ai le olaga! Pe a oo ina a’oa’oina e se tagata le faamoemoega mamalu o le olaga, e oo ina malamalama e faamagalo ma fesoasoani Keriso ia i latou o ē mulimuli ia te Ia, ma filifili e mulimuli ia Keriso i le vai papatiso, e suia le olaga mo se mea sili atu—e tusa lava pe le suia tulaga o le olaga.
Sa tau mai e se tuafafine fiafia tele sa ou feiloai ai i Onitsha, Nigeria, e faapea mai lava i le taimi na ia aoaoina ai le talalelei ma sa papatisoina (ma o lea ua ou faaaogaina ana upu), “e lelei mea uma mo au. Ua ou fiafia. Ua ou i ai i le lagi.”9 O le faasoa atu o le talalelei e faamumū ai le olioli ma le faamoemoe i agaga o lē na te foai atu ma lē na te taliaina. E moni, “e matua tele lou olioli”10 a o e faasoa atu le talalelei! O le faasoaina atu o le talalelei o le olioli lea i luga o lea olioli, faamoemoe i luga o lea faamoemoe.11
O Le Faasoaina Atu o le Talalelei e Aumaia ai le Mana o le Atua i o Tatou Olaga
Ina ua papatisoina i tatou, sa taitasi i tatou ma ulu atu i se feagaiga12 ma le Atua “e auauna atu ia te Ia ma tausi Ana poloaiga,”13 lea e aofia ai le “tutu o se molimau a [Ia] i taimi uma ma i mea uma, ma i nofoaga uma.”14 A o tatou “tumau” ia te Ia e ala i le tausiga o lenei feagaiga, o le a tafe i totonu o o tatou olaga le mana o le faaleatua mai ia Keriso, e faapei ona maua e se lālā o ana meaai mai le vine.15
O Le Faasoaina Atu o le Talalelei e Puipuia ai i Tatou mai Faaosoosoga
Na poloai mai le Alii:
“Ia tuu i luga lo outou malamalama ina ia susulu atu i le lalolagi. Faauta, o A’u o le malamalama lea e tatau ona outou tuu i luga—mea ia na outou vaai ua ou faia. …
“… Sa ou poloai atu … ia outou o mai ia te au, ina ia outou tagotago ma vaai; ia faapea lava ona outou faia i le lalolagi; ma o soo se tasi na te solia lenei poloaiga ua ia tuu o ia lava ia taitaiina atu i faaosoosoga.”16
O le filifili ia ‘aua ne’i tuu i luga le malamalama o le talalelei tatou te tuu ai lava i tatou i le paolo, lea tatou te aafiagofie ai i faaosoosoga. O le mea taua, e moni le faafeagai: o le filifili e tuu i luga le malamalama o le talalelei e aumaia faalatalata atili ai i tatou i lena malamalama ma le puipuiga na te saunia e tetee atu i faaosoosoga. Oka se faamanuiaga ina a maoae i le lalolagi i lenei vaitaimi!
O Le Faasoaina Atu o le Talalelei e Aumaia ai le Faamalologa
Sa taliaina e Sister Tiffany Myloan le valaaulia e lagolagoina faifeautalai e ui lava i tauiviga mamafa faaletagata lava ia, e aofia ai fesili e uiga i lona faatuatua. Sa ia ta’u mai talu ai nei ia te a’u o le lagolagoina o faifeautalai ua faafouina ai lona faatuatua ma le lagona o le soifua manuia. I ana upu, “O le galuega faafaifeautalai e matuai faamaloloina ai lava.”17
Olioli. Faamoemoe. Mana lagolago mai le Atua. Puipuiga mai faaosoosoga. Faamalologa. O nei mea uma—ma isi mea (e aofia ai le faamagaloga o agasala)18—e faupu’e ai i luga o i tatou a o tatou faasoa atu le talalelei.
Ia, Liliu Atu i Lo Tatou Avanoa Sili
Uso e ma tuafafine, “e toatele o loo oo i ai i vaega … uma, [ituaiga,] ma tapuaiga … o ē ua taofia mai le upu moni ona ua latou le iloa le mea e maua mai ai.”19 O le manaomia ona tuu i luga o lo tatou malamalama e le’i maoae atu lava i le talafaasolopito atoa o le tagata soifua. Ma e lei mafai lava ona faigofie ona maua le upumoni.
Sa faagaeetia Jimmy Ton, o lē sa ola a’e i le Lotu Puta, e se aiga sa faasoa atu lo latou olaga i luga o le YouTube. Ina ua ia iloa o i latou o ni tagata o Le Ekalesia a Iesu Keriso o le Au Paia o Aso e Gata Ai, sa ia su’esu’eina i luga o le initoneti le talalelei, faitau le Tusi a Mamona e faaaoga ai le app, ma sa papatisoina o ia ina ua mavae ona feiloai ma faifeautalai i le kolisi.20 Ua avea nei Elder Ton ma faifeautalai faamisiona.
O ia ma ona uso a faifeautalai i le salafa o le lalolagi o le autau a le Alii—na saunoa ai lo tatou perofeta.21 Ua suia e nei faifeautalai le mea e lilifa i ai le lalolagi: e ui ina lipotia mai i sailiiliga faapea o le Tupulaga Z ua liliu ese mai le Atua,22 o loo faaliliu mai e le tatou autau talavou23 alii ma tamaitai faifeautalai ia tagata i le Atua. Ma o le faateleina o le aofai o tagata o le Ekalesia ua tuufaatasia ma faifeautalai i le faasoaina atu o le talalelei, fesoasoani i le tele ma le tele o uo e o mai ia Keriso ma Lana Ekalesia.
Sa fesoasoani a tatou Au Paia o Aso e Gata Ai i Liberia e faaulufale mai le 507 o uo i le vai papatiso i le 10 masina na leai ai ni faifeautalai faamisiona e galulue i lo latou atunuu. Ina ua faalogo se tasi o o tatou peresitene ofoofogia e faapea atonu e toefoi atu faifeautalai faamisiona, sa ia fai mai: “Oi ua lelei, ua mafai nei ona latou fesoasoani ia i matou i la matou galuega.”
E sa‘o o Ia: o le faapotopotoina o Isaraelu—o le galuega aupito silisili i le lalolagi24—o lo tatou tiutetauave o le feagaiga. Ma o lo tatou taimi lenei! O la’u valaaulia i le asō, e faigofie lava: faasoa atu le talalelei. Ia e tu i lou tagata masani ma tuu i luga le malamalama. Tatalo mo le fesoasoani a le lagi ma mulimuli i uunaiga faaleagaga. Faasoa atu lou olaga i le tulaga masani ma faalenatura; ma valaaulia se isi tagata e sau ma vaai, e sau ma fesoasoani, ma ia sau ma auai.25 Ma olioli a o maua e oe ma i latou e te alofa i ai faamanuiaga folafolaina.
Ou te iloa o Keriso o loo folafola atu ai nei tala lelei i ē agamalu; o Keriso o loo fusifusi ai ē loto momomo; o Keriso o loo tala’i atu ai le saolotoga i ē nofopologa; ma o Keriso, e na o Keriso lava, e foai atu ai i ē faanoanoa le matagofie e sui a’i le lefulefu.26 O le ala lea o le manaomia tele o le faalauiloa atu o nei mea!27
Ou te molimau atu o Iesu Keriso o lē na te taitaiina ma faaatoatoaina lo tatou faatuatua.28 O le a Ia faaumaina, o le a Ia faamae’aina, lo tatou faatinoina o le faatuatua—po o le a lava le le atoatoa—i le tuuina i luga o le malamalama o le talalelei. O le a Ia faia vavega i o tatou olaga ma i olaga o i latou uma Na Te faapotopotoina, aua o Ia o le Atua o vavega.29 I le suafa ofoofogia o Iesu Keriso, amene.