O Vavega o le Talalelei a Iesu Keriso
Ou te iloa e mafai ona aumaia e Lana talalelei ia i tatou le faamoemoe, filemu, ma le olioli, e le gata i le taimi nei, ae o le a faamanuiaina ai foi le anoano o isi i augatupulaga i le lumanai.
Mabuhay! Ou te momoli atu ia te outou alofaaga ma laumata fiafia mai le Au Paia matagofie o le Atu Filipaina. O le tausaga lenei ua faailoga ai le 60 tausaga talu ona taunuu uluai faifeautalai i atumotu o Filipaina. O le asō, e 23 misiona ma e silia ma le 800,000 tagata o le Ekalesia i siteki e 123. Ua fitu nei malumalu o loo faagaoioia, o loo fausiaina, pe ua faasilasilaina atu. O se vavega moni lava lenei mea. O loo tatou molimauina le faataunuuga o le valo’aga i le 2 Nifae 10:21: “Ua tetele lava folafolaga a le Alii ia te i latou o e o i luga o motu o le sami.”
O lenei vavega o se faataunuuga foi o le valo’aga na tuuina mai i se tatalo a Elder Gordon B. Hinckley i lena taimi i Manila i le 1961. I lena tatalo, sa saunoa ai Elder Hinckley: “Matou te talosagaina Au faamanuiaga i luga o tagata o lenei laueleele, ina ia latou fefaauoa’i ma talimalo ma agalelei ma agaalofa atu ia i latou o ē o le a o mai iinei, ma o le toatele, ioe, le Alii e, e faitau afe o ē o le a mauaina lenei savali ma faamanuiaina ai. Se’i E faamanuia i latou i mafaufau mataāla ma loto malamalama, ma le faatuatua e maua ai, ma le lototele e ola ai i mataupu faavae o le talalelei” (at American War Memorial Cemetery, Philippines, Apr. 28, 1961).
I tua atu o le faitau fia afe o le Au Paia o Aso e Gata Ai faamaoni, ua aumaia e le vavega o le talalelei ni suiga lelei i le atunuu ma ona tagata. O a’u o se molimau ola o lenei mea. Sa ono o’u tausaga i le taimi na auai ai o’u matua i le Ekalesia i le motu i saute o Mindanao. I lena taimi, sa na o le tasi le misiona i le atunuu atoa, ma sa leai ni siteki. Ou te faafetai e faavavau mo le lototele ma le tuuto o o’u matua e mulimuli i le Faaola. Ou te faamamaluina i la’ua ma paionia uma o le Ekalesia i Filipaina. Sa latou asaina le gasū o le taeao mo augatupulaga na sosoo ai ina ia faamanuiaina.
Na fai mai le Tupu o Peniamina i le Tusi a Mamona: “Ma e le gata i lea, Ou te manao ia outou manatunatu i le tulaga manuia ma le fiafia o i latou o ē e tausi i poloaiga a le Atua. Aua faauta, e faamanuiaina i latou i mea uma, i mea uma faaletino ma faaleagaga” (Mosaea 2:41).
A o tatou ola ma usiusitai i mataupu faavae ma sauniga o le talalelei, e faamanuiaina, suia, ma liua i tatou ina ia avea atili e faapei o Iesu Keriso. O le auala lena na suia ma faamanuiaina ai e le talalelei le Au Paia Filipaina, e aofia ai ma lo’u aiga. O le talalelei o le ala moni lea i se olaga fiafia, ma faamanuiaina.
O le uluai mataupu faavae o le talalelei o le faatuatua lea i le Alii o Iesu Keriso. E toatele tagata Filipaina e i ai se talitonuga masani i le Atua. E faigofie mo i tatou ona faalagolago ia Iesu Keriso ma iloa e mafai ona tatou maua tali i a tatou tatalo.
O se faataitaiga sili o lenei mea o le aiga o Obedoza. O Uso Obedoza o lo’u peresitene o le paranesi a o avea a’u ma se alii talavou. O le manaoga sili o Uso ma Tuafafine Obedoza o le faamauina lea o lo la aiga i le Malumalu o Manila. Sa latou nonofo i le Aai o General Santos, e 1,000 maila (km) le mamao mai Manila. Mo le aiga e toaiva, o le alu o se malaga i le malumalu sa foliga mai e lē mafai. Ae e pei o le tagata faatauoloa lea na alu ma faatau atu mea uma sa ia te ia ina ia faatauina mai se penina tau tele e tasi (tagai i le Mataio 13:45–46), sa tonu i lenei ulugalii e faatau atu lo la fale e totogi ai le faigamalaga. Sa popole Tuafafine Obedoza ona o le a leai so latou fale e toe foi mai i ai. Ae sa faamautinoa atu e Uso Obedoza ia te ia o le a saunia e le Alii.
Sa faamauina i latou o se aiga mo le olaga nei ma le faavavau atoa i le malumalu i le 1985. I totonu o le malumalu sa latou maua ai le olioli e lē mafaatusalia—le latou penina tautele. Ma le faamaoni i upu a Uso Obedoza, na saunia lava e le Alii. I lo latou toe foi mai i Manila, sa tuuina atu ai e ni uo agalelei ia i latou ni nofoaga e nonofo ai, ma sa mulimuli ane maua so latou lava fale. E tausia e le Alii i latou o ē faaalia lo latou faatuatua ia te Ia.
O le mataupu faavae lona lua o le talalelei o le salamo. O le salamo o le fulitua i le agasala ma liliu atu i le Atua mo le faamagaloga. O se suiga o le mafaufau ma le loto. E pei ona a’oa’o mai Peresitene Nelson, o le “faia ma le lelei teisi atu i aso taitasi” (“E Mafai Ona Tatou Faia Ia Lelei Atu ma Ia Lelei Atu,” Liahona, Me 2019, 67).
O le salamo e pei lava o se fasimoli. I le avea ai ma se enisinia talavou o vailaau, sa ou faigaluega i se falegaosi fasimoli i Filipaina. Sa ou a’oa’o i le auala e fai ai fasimoli ma le faagasologa o le auala e faia ai. Pe a e tuufaatasia ni suauu faatasi ma se vailaau akalai ma faaopoopo i ai vailaau tapē siama, o le a gaosi mai ai se mea malosi tele lea e mafai ona tapēina siama ma vairasi. E pei o le fasimoli, o le salamo o se vailaau faamamā. E aumaia ia i tatou le avanoa e aveese ai o tatou eleelea ma o tatou otaota tuai, ina ia tatou agavaa ai e faatasi ma le Atua, aua “e leai se mea le mamā e mafai ona mautofi i le malo o le [Atua]” (Alema 11:37).
E ala i le salamo tatou te utuvai ai mai le mana faamamā ma faapaiaina o Iesu Keriso. O se vaega autu o le faagasologa o le liuaina. O le mea lenei na tupu i tagata Aneti-Nifae-Liae i le Tusi a Mamona. O i latou o sa Lamanā o ē na matua’i liua atoatoa ma e latou te “le’i toe pa’ū’ū ese lava” (tagai i le Alema 23:6–8). Sa latou tanumia a latou au’upega o le taua ma sa le’i toe eliina lava i luga. E sili ia i latou le oti nai lo le solia o lena feagaiga. Ma sa latou faamaonia lena mea. Ua tatou iloa o la latou ositaulaga na aumaia ai vavega; e faitau afe i latou sa tau faasaga ia te i latou sa lafo i lalo a latou au’upega ma sa liuaina. I ni tausaga mulimuli ane, o o latou atalii, o ē ua tatou iloa o ni fitafita talavou maoae, sa puipuia i le taua e faasaga i vaega maoae sa ono manumalo!
Sa oo foi lo’u aiga ma le tele o le Au Paia Filipaina i se faagasologa talitutusa o le liua. Ina ua matou taliaina le talalelei a Iesu Keriso ma auai i le Ekalesia, sa suia o matou ala ma la matou aganuu ina ia ogatasi ma le talalelei. Sa tatau ona matou lafoai ese tu ma aga sese. Sa ou vaai i lenei mea i lo’u tamā ina ua ia a’oa’o e uiga i le talalelei ma salamo. O ia o se tagata e malosi le ulaula, ae sa ia tia’ieseina ana sikareti ma sa le’i toe pa’i lava i ai. Ona o lana faai’uga e sui, ua faamanuiaina ai augatupulaga e fa mai ia te ia.
O le salamo e taitai atu ai i tatou e osia ma tausia feagaiga e ala i sauniga paia. O le sauniga muamua o le faaolataga ma le faaeaga o le papatisoga e ala i le faatofuina mo le faamagaloina o agasala. E faatagaina e le papatisoga i tatou e mauaina le meaalofa o le Agaga Paia ma ulu atu i se feagaiga ma le Alii. E mafai ona tatou faafouina lenei feagaiga o le papatisoga i vaiaso uma a o tatou aai ma feinu i le faamanatuga. O se vavega foi lenei mea!
Uso e ma tuafafine, ou te valaaulia outou ia aumaia lenei vavega i o outou olaga. O mai ia Iesu Keriso ma filifili e faatino lou faatuatua ia te Ia: salamo ma osia ma tausia feagaiga o loo maua i sauniga o le faaolataga ma le faaeaga. O le a faatagaina e lenei mea oe e tauamo faatasi ma Keriso ma maua ai le mana ma faamanuiaga o le faaleatua (tagai i le Mataupu Faavae ma Feagaiga 84:20).
Ou te molimau atu i le moni o Iesu Keriso ma o loo soifua o Ia ma e alofa ia i tatou taitoatasi. Ou te iloa e mafai ona aumaia e Lana talalelei ia i tatou le faamoemoe, filemu, ma le olioli, e le gata i le taimi nei, ae o le a faamanuiaina ai foi le anoano o isi i augatupulaga i le lumanai. O le mafuaaga lena mo laumata fiafia ma lalelei o le Au Paia Filipaina. O le vavega lava lea o le talalelei ma le mataupu faavae a Keriso. Ou te molimau atu ai i nei mea i le suafa paia o Iesu Keriso, amene.