O Le Igoa o le Ekalesia E Lē Fetuuna’ia

Konafesi aoao ia Oketopa 2021

O Le Igoa o le Ekalesia E Lē Fetuuna’ia

Saunia e Elder Neil L. Andersen

O Le Korama a Aposetolo e Toasefululua

Pe a tatou mulimuli ma le naunautai i le fautuaga a le Alii e pei ona faaalia mai e ala mai i Lana perofeta soifua, aemaise lava pe afai e feteenai ma o tatou uluai mafaufauga, e manaomia ai le lotomaualalo ma le ositaulaga, e faamanuiaina i tatou e le Alii i se mana faaopoopo faaleagaga.

I se fonotaga ma le au faasalalau i le aso 16 Aokuso, 2018, na saunoa ai Peresitene Russell M. Nelson: “Sa uunaia e le Alii i lo’u mafaufau le taua o le igoa na Ia faaalia mo Lana Ekalesia, O Le Ekalesia a Iesu Keriso o le Au Paia o Aso e Gata Ai.¹ E i ai sa tatou galuega i o tatou luma ia ogatusa ai i tatou lava ma Lona finagalo.”²

E lua aso mulimuli ane, i le aso 18 o Aokuso, sa ma i ai faatasi ma Peresitene Nelson i Montreal, Kanata. I le mae’a ai o la matou fonotaga ma tagata o le Ekalesia i le maota matagofie o Palais de Congrés, sa tali ai e Peresitene Nelson ni fesili mai le au failipoti. Sa ia faailoa atu e faapea “o le a avea o se lu’itau le [toefaamautuina o le igoa o le Ekalesia, ma] toe aveese [se] aga masani o le silia ma le selau tausaga.” Ae na ia faaopoopo atu, “o le igoa o le Ekalesia e lē fetuuna’ia.”³

E fitu vaiaso mulimuli ane, sa saunoa ai Peresitene Nelson i le konafesi aoao: “Sa uunaia e le Alii i lo’u mafaufau le taua o le igoa na Ia folafolaina mo Lana Ekalesia, O Le Ekalesia a Iesu Keriso o le Au Paia o Aso e Gata Ai. … O le Faaola lava Ia na fetalai, ‘Aua e faapea lava ona ta’ua la’u ekalesia.’” Ona toe ta’ua lea e Peresitene Nelson, “O le igoa o le Ekalesia e lē fetuuna’ia.”⁴

O Se Fesili Lelei

Sa tulai mai se fesili lelei: Aisea [ua faamalosia ai] i le taimi nei ae ua fiasefulu tausaga o tatou taliaina le igoavalaau o “Mamona”? “O Le Aufaipese a le Tapeneko Mamona,” o vitio pupuu “O A’u o se Mamona,” o le pese a le Peraimeri “O A’u o se Tamaitiiti Mamona”?

O le mataupu faavae a Keriso e lē māsuia ma e faavavau. Ae, ua faaalia mai laasaga patino ma le taua o le galuega a le Faaola i o latou taimi talafeagai. O le taeao nei na saunoa ai Peresitene Nelson, “O le Toefuataiga o se faagasologa, ae le o se mea e tupu.”⁵ Ma na fetalai mai le Alii, “O le a oo mai mea uma i lo latou taimi.”⁶ O lo tatou taimi lenei, e toefaamautu ai ma faaalia le igoa o le Ekalesia.

O le faasinomaga ma le taunuuga o Le Ekalesia a Iesu Keriso o le Au Paia o Aso e Gata Ai e manaomia ai le valaauina o i tatou i Lona suafa. Sa ou i ai talu ai nei i Katelani, Ohaio, lea na valo’ia ai e Iosefa Samita, a o i ai ma ni nai tagata toalaiti o le Ekalesia, “O le a faatumulia e lenei Ekalesia ia Amerika i Matu ma Saute—o le a faatumulia ai le lalolagi.”⁷ Sa faamatalaina e le Alii le galuega o lenei tisipenisione o “se galuega ofoofogia ma le mea e ofo ai.”⁸ Sa Ia fetalai mai e uiga i se “feagaiga [o le a] faataunuuina i aso e gata ai,” ma faatagaina ai “tagata uma … o le a faamanuiaina le lalolagi.”⁹

O anotusi o lenei konafesi ua faaliliuina tuusa’o atu i gagana e 55. Mulimuli ane, o le a faalogoina nei upu ma faitauina i gagana e 98 i le silia ma le 220 atunuu ma teritori.

Ata

O Le Afio Mai Faalua

Pe a oo ina toe afio mai le Faaola i le mamalu ma viiga, o le a aofia tagata faamaoni o Le Ekalesia a Iesu Keriso o le Au Paia o Aso e Gata Ai i totonu o atunuu uma, o tagata uma, o ituaiga uma, ma aganuu uma o le lalolagi.

O Le Tosinaga Tuputupu A’e o le Ekalesia

O le tosinaga a le Ekalesia toefuataiina a Iesu Keriso e lē na o luga o i latou o tagata o le Ekalesia o le a i ai. Ona o faaaliga faalelagi i o tatou taimi, ona o tusitusiga paia ua toefuatai mai i le lalolagi, ma le meaalofa mamana o le Agaga Paia, o le a avea ai i tatou ma malamalama i luga o le mauga a o faateteleina le faapogisaina o le lalolagi i le lē talitonu ia Iesu Keriso. E ui e toatele e ono faatagaina le lalolagi e faaluafesasi lo latou faatuatua i le Togiola, ae o le a “lē aveesea lava [i tatou] i fafo mai lo [tatou] nofoaga.”¹⁰ O le a talileleia e Kerisiano e le o ni tagata o le tatou ekalesia la tatou matafaioi ma la tatou molimau mautinoa ia Keriso. E oo lava i Kerisiano ia na vaavaai mai ia i tatou ma le masalosalo o le a talia i tatou o ni uo. I nei aso o le a oo mai, o le a valaau ai i tatou i le suafa o Iesu Keriso.

Matou te faafetai atu mo a outou taumafaiga malualii e faalauiloa le faaaogaina o le igoa moni o le Ekalesia. I le konafesi i le tolu tausaga talu ai, sa folafola mai ai e Peresitene Nelson faapea “o lo tatou gaua’i atu ma le ma’elega e faaaoga le igoa sa’o o le Ekalesia a le Faaola … [o le a aumaia ia i tatou] se faatuatua faateleina ma le mauaina o le mana sili atu faaleagaga.”¹¹

Ua vaaia le moni o lenei folafolaga e soo tuuto i le lalolagi atoa.¹²

Fai mai Uso Lauri Ahola mai le Iunaite Setete i sasae e i ai taimi na faigata ai ia te ia ona faaaoga le igoa atoa o le Ekalesia. Ae ona o le fautuaga a le perofeta, sa ia tumau ai pea. I se tasi taimi, sa ia asiasi ai i se uo i le lotu a se isi faatuatuaga. O ana upu ia:

Na fesili se uo, “O oe o se Mamona?”

“‘O a’u o se tagata O Le Ekalesia a Iesu Keriso o le Au Paia o Aso e Gata Ai, ioe.’ Na ou fai atu ai. Sa amata ona ia fesili mai ia te a’u i nisi o fesili, na amata i le: ‘Pe talitonu le Ekalesia Mamona …?” Ma o taimi uma, sa ou amataina la’u tali i le fuaitau: ‘I le Ekalesia toefuataiina a [Iesu] Keriso, matou te talitonu …’

“… Ina ua ia matauina ou te lē taliaina le faalaniga o le “Mamona”, sa ia fesili sa’o mai ia te a’u, ‘E le o oe ea o se Mamona?’

“O lea na ou fesili ai ia te ia pe na te iloa o ai Mamona—na te le’i iloa. Sa ou fai atu ia te ia o Mamona o se perofeta … [ma sa] faamamaluina [a’u] e fegalegalea’i ma [ia].

“‘Ae,’ sa ou faaauau, ‘sa le’i maliu Mamona mo a’u agasala. Sa le’i … puapuagatia Mamona i Ketesemane pe na maliu i luga o le satauro [mo a’u]. … O Iesu Keriso o lo’u Atua ma lo’u Faaola. … Ma o Lona suafa ou te manao e iloa ai a’u. …’

“… Ina ua mavae ni nai sekone o le filemu, [na alaga le uo], ‘O oe o se Kerisiano!’”¹³

Ata

Peresitene Nelson i le konafesi aoao

O manatua upu a Peresitene Nelson? “Ou te folafola atu afai o le a tatou faia le mea sili tatou te mafaia e toefuatai ai le igoa sa’o o le Ekalesia a le Alii, o le a liligi mai i lalo e Ia o lē e ana le Ekalesia Lona mana ma faamanuiaga i luga o ulu o le Au Paia o Aso e Gata Ai, i auala tatou te le’i vaaia lava.”¹⁴

E Tatala e le Alii i Taimi Uma le Ala

E tausia pea e le Alii Ana folafolaga. E tatala e lē aunoa e Ia le ala mo i tatou a o tatou faia Lana galuega.

Mo le tele o tausaga sa tatou faamoemoe ai e faatau mai saite autu o le initoneti o le ChurchofJesusChrist.org ma le ChurchofJesusChrist.com. Sa leai se tasi o nei saite na fuafua mo le faatauina atu. E tusa o le taimi o le faasilasilaga a Peresitene Nelson, sa faafuasei ona maua uma i laua. O se vavega lava.¹⁵

O le tosinaga a le Alii na faalauteleina ai a matou taumafaiga e iloilo ia igoa ua loa ona faapipii i le Ekalesia.

I le agai i luma i le faatuatua, o le igoa o le Aufaipese a le Tapeneko Mamona sa suia i le Aufaipese a le Tapeneko i le Lotoa o le Malumalu. O le uepisaite LDS.org, lea na silia ma le 21 miliona asiasiga i ai i masina taitasi, sa sui i le ChurchofJesusChrist.org.¹⁶ O le igoa o le LDS Business College sa suia i le Ensign College. Sa suia le tulaga o le uepisaite a le Mormon.org i le ChurchofJesusChrist.org. E silia ma le tasi le afe oloa sa i ai le igoa “Mamona” po o le “LDS” sa pipii i ai a ua suia. Ua fetuunaia e le Au Paia faamaoni o Aso e Gata Ai a latou uepisaite, faasalalauga, ma faitotoa o le Twitter.

Ata

Faatusa fou o le Ekalesia

Ua matou taliaina se faatusa fou e totonugalemu ia Iesu Keriso.

“I le totonugalemu o le faatusa o loo i ai se ata o le faatagata maamora a Thorvaldsen o le Christus. O loo faaalia ai le Alii toetu ma soifua o loo aapa atu e opo mai tagata uma o le a o mai ia te Ia.

“I se tulaga faafaatusa, o Iesu Keriso o loo tu i lalo o le faaofuofu [e faamanatu] mai ia i tatou le Faaola toetu o loo tu a’e mai le tuugamau.”¹⁷

Ata

Igoa o le Ekalesia i gagana

Ata

Igoa o le Ekalesia i gagana faaopoopo

Ua fetuunaia le mamanu o Le Ekalesia a Iesu Keriso o le Au Paia o Aso e Gata Ai i le silia ma le 50 gagana. Ua maua igoa fou o saite autu i le salafa o le lalolagi.

Talisapaia mo le Fesoasoani a Isi

Tatou te talisapaia le tele o tagata lelei ma le tauagafau o ē ua faamamaluina lo tatou manao ina ia valaau i tatou i lo tatou igoa sa’o. Sa ou faitau talu ai nei i se tusiga na si’i mai ai se saunoaga a se katinale Katoliko sa faatatau i le “Au Paia o Aso e Gata Ai.”¹⁸ A o ma talanoa ma se taitai o se lotu Kerisiano i se masina talu ai i le Iunaite Setete i sasae, sa ia faasino i le Ekalesia i le ta’ua muamua ai o le igoa atoa, ma sosoo ai ma le, “o le Ekalesia a Iesu Keriso.”

Sa matou iloa o le faaopoopo o upu e ono i lo tatou igoa, o le a lē faigofie mo le au faasalalau, ae e pei ona sa mua’i ta’u mai e Peresitene Nelson, “o le a gauai mai le au faasalalau faitofā i le tali mai i la tatou talosaga.”¹⁹ Faafetai atu mo le tuuina mai ia i matou o lea lava amana’ia e tasi o loo tuu atu i faalapotopotoga faaleaganuu, taaloga, faaupufai, po o nuu e ala i le faaaogaina o lo matou igoa moomia.

O le a i ai ni nai tagata o ē, faamoemoe e to’ese pe tuuitiitia le taua tele o la tatou misiona, o le a faaauau pea ona valaau i tatou o “Mamona” po o le “o le Ekalesia Mamona.” Ma le faaaloalo, matou te toe talosaga atu ai i le tofā lē faaitu’au a le au faasalalau ina ia faamamaluina lo matou manao ina ia valaau i matou i lo matou igoa ua toeitiiti 200 tausaga le matua.

O Le Lototele o le Au Paia o Aso e Gata Ai

E afe ma afe le Au Paia o Aso e Gata Ai o ē folafola atu ma le lototoa le igoa o le Ekalesia. A tatou faia la tatou vaega, o le a mulimuli mai ai foi ma isi. Ou te fiafia i le tala lenei mai Tahiti.

Na tonu ia Iriura Jean ua sefulu-tausaga e mulimuli i le fautuaga a Peresitene Nelson.

“I lana vasega i le a’oga, sa latou talanoaina ai la latou faaiuga o le vaiaso … ma sa talanoa Iriura e uiga … i le lotu.

“Sa fai atu lona faiaoga o Vaite Pifao, ‘Oi, o oe la o se Mamona?’

“Na ta’u atu ma le lototoa e Iriura, ‘Leai … o a’u o se tagata O Le Ekalesia a Iesu Keriso o le Au Paia o Aso e Gata Ai!’

“Sa tali atu lona faiaoga “Ioe, … o oe o se Mamona.’

“Na fai atu pea lava Iriura, ‘Leai faiaoga, o a’u o se tagata O Le Ekalesia a Iesu Keriso o le Au Paia o Aso e Gata Ai!’

“Sa maofa Ms. Pifao i le talitonuga maumaututu o Iriura ma sa taumafaufau pe aisea sa ia faaaoga ai pea lava [le] igoa umi o lana lotu. [Sa tonu ia te ia e aoao atili e uiga i le Ekalesia.]

“[Mulimuli ane, ina ua] papatiso [Sister] Vaite Pifao [sa ia faaalia le lotofaafetai] ona sa usitai Iriura i le fautuaga a Peresitene Nelson.”²⁰

Ata

Tuafafine na aoao e uiga i le Ekalesia ona o lana tamaitiiti aoga

“O le igoa o le Ekalesia e lē fetuuna’ia.” Ia tatou agai i luma i le faatuatua. Pe a tatou mulimuli ma le naunautai i le fautuaga a le Alii e pei ona faaalia mai e ala mai i Lana perofeta soifua, aemaise lava pe afai e feteenai ma o tatou uluai mafaufauga, e manaomia ai le lotomaualalo ma le ositaulaga, e faamanuiaina i tatou e le Alii i se mana faaopoopo faaleagaga ma auina mai Ana agelu e lagolago i tatou ma tutu i o tatou tafatafa.²¹ Tatou te maua le faamautinoaga a le Alii ma Lana faamaoniga.

O a’u o se molimau patino i le mana o le lagi ua i ai i luga o lo tatou perofeta pele, o Peresitene Russell M. Nelson. O lona naunautaiga faamaoni o le faafiafia o le Alii ma faaamanuia fanau a lo tatou Tama Faalelagi. Mai aafiaga paia, patino, ou te molimau atu ai i le alofa o le Alii mo ia. O Ia o le perofeta a le Atua.

Ou te molimau atu o Iesu o le Keriso, o le Alo o le Atua. I le suafa o Iesu Keriso, amene.