Ou Te Tatalo Ia Ona Faaaogaina i Tatou
E faia faatasi e taumafaiga laiti se aafiaga tele, ma faalauteleina ai le tele o mea taitasi tatou te faia o ni soo o Iesu Keriso.
O lenei kuki e faia mai le paluga phyllo ma nati pistachio o se faafetai. Sa faia e le aiga o Kadado o ē, mo le tele o tausaga, sa anaina ni fale taomeaai se tolu i Tamaseko, Suria. Ina ua oo mai le taua, sa taofia e se poloka ia meaai ma sapalai mai le taunuu atu i le latou itu o le aai. Sa amata ona matelāina le au Kadados. I le maualuga o lenei tulaga atuatuvale, sa amata ai e le Auaunaga Limafoai a le Au Paia o Aso e Gata Ai ma nisi o le aufaigaluega lototetele a le Rahma Worldwide ona tufatufa atu taumafataga vevela i aso taitasi, faatasi ai ma le susu mo fanau iti. Ina ua mavae se taimi faigata, sa toe amata e le aiga lo latou olaga—faapea foi ma le latou fale taomeaai—i se atunuu fou.
Talu ai nei, sa taunuu ai se pusa kuki i ofisa o le Ekalesia faatasi ai ma le savali lenei: “Mo le silia ma le lua masina, sa mafai ai ona matou maua ni meaai mai le umukuka o le Rahma–Latter-day Saint [Charities]. Ana leai [semanu] matou te matelaina i le oti. Faamolemole ia talia lenei [kuki] … o se [kuki] faataitai mai i la’u faleoloa o se faailoga laitiiti o le faafetai. Ou te ōle atu i le Atua Silisili Ese e faamanuia outou … i mea uma tou te faia.”1
O se kuki o le lotofaafetai ma le manatuaina. E mo outou! Ia i latou uma na tatalo ina ua uma ona matamata i se tala mai talafou, ia i latou uma na volenitia ae sa lē talafeagai ai, pe foai mai ma le agalelei tupe i tupe mo galuega alofa ma le talitonuga o le a faia ai se mea lelei, faafetai lava.
Tiutetauave Paia e Tausi Ē Matitiva
O le Ekalesia a Iesu Keriso ua i lalo o le poloaiga paia e tausi ē matitiva.2 O se tasi lea o poutu o le galuega o le faaolataga ma le faaeaga.3 O le mea sa moni i aso o Alema e moni lava mo i tatou: “Ma sa faapea, i o latou tulaga tamaoaiga, ona latou lē auina ese atu soo se tasi sa lē lavalavā po o se sa fia ʼai, po o se sa fia inu, po o se sa mai, po o se sa lē tausia; ma sa latou lē tuu atu o latou loto i luga o oa; o lea sa latou limafoai i tagata uma, o e matutua ma e laiti, o e pologa ma e saoloto, o tane ma fafine, pe e i fafo o le ekalesia pe e i totonu o le ekalesia, sa leai so latou faailoga tagata e faatatau ia te i latou o e na manaomia le fesoasoani.”4
E tali atu le Ekalesia i lenei poloaiga i ni auala eseese, e aofia ai:
-
o le auaunaga tatou te faia e ala atu i le Aualofa, korama a le perisitua, ma vasega;
-
anapogi ma le faaaogaina o taulaga anapogi;
-
faatoaga ma fale teuapa o le uelefea;
-
nofoaga autu faafeiloai mo tagata malaga mai;
-
aapa atu mo i latou i le falepuipui;
-
taumafaiga o galuega alofa a le Ekalesia;
-
Ma le polokalama JustServe, lea e faafetauia volenitia i avanoa e auauna atu ai.
O auala uma nei, ua faatulagaina e ala i le perisitua, lea e faia faatasi ai e taumafaiga laiti se aafiaga tele, ma faalauteleina ai le tele o mea taitasi tatou te faia o ni soo o Iesu Keriso.
O Perofeta o Tausimea mo le Lalolagi Atoa
Ua i ai i perofeta le tiute mo le lalolagi atoa, e le mo na o tagata o le Ekalesia. E mafai ona ou lipoti atu mai lo’u lava aafiaga le auala e faatinoina ai patino ma le tuuto e le Au Peresitene Sili lena tiutetauave. A o faatupula’ia manaoga, ua poloaiina i tatou e le Au Peresitene Sili ia faateleina lo tatou aapa atu mo galuega alofa i se auala maoae. Latou te naunau i faiga aupito tetele ma faamatalaga aupito laiti.
Talu ai nei, sa matou aumaia ia i latou se tasi o ofu talaloa faafomai mo le puipuiga lea na su’iina e le Beehive Clothing mo falema’i e faaaoga i le taimi o le faama’ioti. I le avea ai ma se fomai, sa matuai fiafia lava i ai Peresitene Russell M. Nelson. Na le’i manao o ia e tau lava ina vaai i ai. Sa manao o ia e faataitai—siaki pito i lalo o lima o ofu ma le umī ma le auala e nonoa ai i tua. Sa ia ta’u mai ia i matou mulimuli ane, ma le ootia i lona siufofoga, “A e feiloai ma tagata i au tofiga, faafetai atu ia i latou mo a latou anapogi, a latou taulaga, ma a latou auaunaga i le suafa o le Alii.”
Lipoti o Galuega Alofa
I le taitaiga a Peresitene Nelson, ou te lipoti atu ia te outou e uiga i le ala o loo tali atu ai Le Ekalesia a Iesu Keriso o le Au Paia o Aso e Gata Ai i afā, mafui’e, fesiitaiga o tagata sulufa’i—ma e oo lava i se faama‘ioti—e faafetaia ai le agalelei o le Au Paia o Aso e Gata Ai ma le toatele o uo. E ui e silia ma le 1,500 polōketi o le KOVITI-19 sa mautinoa lava o le taulaiga aupito tele lea o le toomaga a le Ekalesia i le 18 masina talu ai, ae sa tali atu foi le Ekalesia i le 933 o faalavelave faalenatura ma faafitauli o tagata sulufai i atunuu e 108. Ae o fuainumera e le o faamatalaina ai le tala atoa. Se’i o’u faasoa atua ni faataitaiga pupuu se fa e faapupula ai le tofo aupito itiiti o le mea ua faia.
Toomaga o le KOVITI i Aferika i Saute
O Dieke Mphuti [o se tamaitai] e sefuluono tausaga le matua o Welkom, Aferika i Saute, na maliliu ona matua i ni tausaga ua mavae, ma tuua ai na o ia e tausi nai ona tei laiti e toatolu. Sa taufaafefe i taimi uma le lē lava o meaai, ae o le lē lava o sapalai a le KOVITI ma faanofoesea na toetoe lava a lē mafai ai. Sa tele ina latou fia’a’ai, na o nai meaai i le agalelei o tuaoi na maua.
I se aso la ia Aokuso 2020, sa faate’ia Dieke i se tu’itu’i mai i lona faitotoa. Sa ia tatalaina ma maua ai ni tagata ‘ese se toalua—o se tasi o sui o le Ekalesia mai le ofisa o le eria i Johannesburg ma le isi o se taitai mai le Matagaluega o Atinaega Faaagafesootai i Aferika i Saute.
O faalapotopotoga nei e lua na aufaatasi e auina atu meaai i aiga o lamatia. Na lagona e Dieke le toomaga a o ia tepa atu i le faaputuga sana ma isi meaai masani, na faatauina i tupe o galuega alofa a le Ekalesia. O le a fesoasoani nei mea ia te ia e tausi ai lona aiga mo ni nai vaiaso seia amata fesoasoaniga a le malo mo ia.
O le tala a Dieke o se tasi o le faitau afe o na aafiaga na tutupu i le salafa o le lalolagi i le taimi o le faama’ioti o le KOVITI e faafetaia ai a outou saofaga faapaiaina.
Toomaga i Afghan Ramstein
Ua tatou vaai uma lava i ata talu ai nei i talafou: e faitau afe tagata sulufai na felelei mai Afghanistan. E toatele na taunuu i nofoaga o ea fosi po o isi nofoaga lē tumau i Qatar, le Iunaite Setete, Siamani, ma Sepania a o le’i faaauau i o latou nofoaga faaiu. Sa faananati o latou manaoga, ma sa tali atu le Ekalesia i sapalai ma volenitia. I le Nofoaga Autu o le Ea Fosi a Ramstein i Siamani, sa saunia ai e le Ekalesia ni foai tetele o napekini, susu mo pepe, meaai, ma seevae.
Sa matauina e nisi o uso o le Aualofa e toatele tamaitai Afghan sa faaaogaina ofutino o a latou tane e ufi ai o latou ulu ona o lo latou ufi ulu masani na saeiese i le vevesi i le malaevaalele o Kabul. I se faatinoga o le faauōga lea na sopo’ia ai soo se tuaoi faalelotu pe faaleaganuu, sa potopoto ai uso o le Uarota Muamua a Ramstein e su’i ni laei masani faaMosalemi mo tamaitai Afghan. Fai mai Uso Bethani Halls, “Sa matou faalogo o manaomia e tamaitai ni ofu tatalo, ma ua matou su’iina ina ia latou [toafimalie] mo le tatalo.”5
Toomaga o le Mafui’e i Haiti
O le isi faataitaiga e sosoo ai ua faaalia ai e te lē tau maumea pe matua e avea ai o se meafaigaluega mo le lelei. O Marie “Djadjou” Jacques e sefuluvalu tausaga le matua e sau mai le Paranesi a Cavaillon i Haiti. Ina ua lūlū le mafui’e matautia e lata ane i lona taulaga ia Aokuso, o le fale o lona aiga o se tasi o le faitau sefulu afe o fale na pa’ū’ū i lalo. E toetoe lava ‘a lē mafai ona vaai faalemafaufau i le faanoanoa o le aveesea o lou fale. Ae nai lo le lolo atu i lena faanoanoaga, sa fesoasoani atu ai Djadjou—ma le maoae—i isi.
Lolomi Fesootai
Sa ia vaaia se tuaoi matua o tauivi ma amata ona tausia o ia. Sa ia fesoasoani i isi e aveese otaota. E ui lava i lona vaivai, ae sa ia aufaatasi ma isi tagata o le Ekalesia e tufatufa atu meaai ma pusa o mea tumama i isi. O le tala a Djadjou ua na o se tasi o le tele o faataitaiga mamana o auaunaga na faatino e le autalavou ma talavou matutua a o latou tauivi e mulimuli i le faataitaiga a Iesu Keriso.
Toomaga i Lologa i Siamani
I ni nai vaiaso a o lumanai le mafui’e, sa tuuina atu ai e se isi vaega o talavou matutua se auaunaga faapena i le isi itu o le Vasa o Atelani. O lologa na lofia ai Europa i sisifo atoa ia Iulai, o lologa sili ona matuiā ia i le tele o tausaga.
Ina ua maui atu le vai, sa iloiloina e se tasi o pule o faleoloa i le taulaga o Ahrweiler, Siamani, mea na faaleagaina ma sa matua’i lofituina lava. O lenei tamalii lotomaualalo, o se Katoliko faamaoni, sa musumusu atu se tatalo ina ia auina mai e le Atua se tasi e fesoasoani ia te ia. O le taeao lava na sosoo ai, na taunuu ai Peresitene Dan Hammon o le Misiona a Siamani Frankfurt i luga o le auala ma se vaega toalaiti o faifeautalai o loo ofuina taoofu samasama o Lima Fesoasoani . Na oo atu le vai i le 10 futu (3 m) i luga o puipui o le faleoloa a le pule, ma tuua ai se vaega loloto o le palapala. Sa suaina e volenitia le palapala, aveese le kapeta ma faamago, ma faaputu mea uma i le auala mo le aveesea. Sa galue le pule o le faleoloa ma i latou mo le tele o itula, ma le maofa i le auina mai e le Alii o se vaega o Ana auauna e tali lana tatalo—ma i totonu o le 24 itula!6
“Ia, Ou Te Tatalo Ia Ona Faaaogaina i Tatou”
I le talanoa ai e uiga i taumafaiga o galuega alofa a le Ekalesia, sa saunoa ai Elder Jeffrey R. Holland i se tasi taimi: “E tali mai tatalo … i le tele o taimi … e ala i le faaaogaina e le Atua o isi tagata. Ou te tatalo ia Ona faaaogaina i tatou. Ou te tatalo ia avea i tatou ma tali i tatalo a tagata.”7
Uso e ma tuagane, e ala i la outou auaunaga, foai, taimi, ma le alofa, ua avea ai outou ma tali i le tele o tatalo. Ae, e tele na’ua isi mea e fai. I le avea ai ma tagata ua papatisoina o le Ekalesia, ua noatia ai i tatou i se feagaiga e tausi i latou e lē tagolima. O a tatou taumafaiga taitoatasi e lē manaomia ai se tupe po o ni nofoaga mamao;8 latou te manaomia le taitaiga a le Agaga Paia ma se loto naunautai e fai atu i le Alii, “O A‘u lenei; auina atu a’u.”9
O Le Tausaga e Finagalo Malie Mai ai le Alii
I le Luka 4 o loo tusia ai faapea na afio atu Iesu i Nasareta, i le mea na ia soifua a’e ai, ma tu i luga i le sunako e faitau. Sa lata i le amataga o Lana galuega i le olaga nei, ma sa Ia sii maia se fuaitau mai le tusi a Isaia:
“Ua i o’u luga le Agaga o le Alii, aua ua na faauu mai ia te au e folafola le tala lelei i e matitiva; ua auina mai a’u e ia e faamalolo i e loto momomo, e tala’i le saolotoga i le tafeaga, ma ia pupula mata o e tauaso, e tuu saoloto i e ua faasauaina,
“E tala’i le tausaga e finagalo malie mai ai le Alii. …
“… O le aso nei ua taunuu ai lenei Tusi, o outou o faalogologo ai.”10
Ou te molimau atu o loo faataunuuina foi tusitusiga paia i o tatou lava taimi. Ou te molimau atu ua afio mai Iesu Keriso e faamalolo i ē loto nutimomoia. O Lana talalelei o le toe faaleleia lea o le vaai a le tauaso. O Lana Ekalesia o le tala’i atu lea o le lavea’iga i ē ua nofopologa, ma o loo tauivi Ona soo i le lalolagi atoa e faasaoloto i latou ua sauaina.
Se’i o’u faai’u atu i le toe fai atu o le fesili na fesili ai Iesu i Lana Aposetolo o Simona Peteru: “Pe e te alofa mai ia te a’u?”11 O le ute o le talalelei o loo i ai i le auala tatou te taliina ai lena fesili mo i tatou lava ma “fafaga [Ana] mamoe.”12 Faatasi ai ma le migao tele ma le alofa mo Iesu Keriso lo tatou Matai, ou te valaaulia i tatou taitoatasi ia avea ma se vaega o Lana galuega ofoofogia, ma ou te tatalo ia Ona faaaogaina i tatou. I le suafa paia o Iesu Keriso, amene.