E Leai Ea Ni Pulu Pasama i Kiliata?
O le mana faamalolo o le Faaola ua le gata i Lona gafatia e faamalolo o tatou tino, ae atonu foi e sili atu ona taua, Lona gafatia e faamalolo o tatou loto.
E le’i leva ona maea la’u misiona, a o avea ma tama a’oga i le BYU, sa ou maua se telefoni mai lo’u tamā. Sa ia ta’u mai ua maua o ia i le kanesa o le atealii ma e ui ina sa le’i tele se avanoa e sao mai ai i lea ma’i, ae sa naunau o ia ia toe malosi ma toe foi i gaoioiga masani o lona olaga. O lena telefoni sa o se taimi taua tele mo a’u. Sa avea lava lo’u tamā ma o’u epikopo, o la’u uo, ma lo’u faufautua. A o matou mafaufau ma lo’u tina, o o’u uso ma tuafafine i le lumanai, sa foliga mai ua nenefu. Sa auauna atu lo’u uso laitiiti o Dave i se misiona i Niu Ioka, ma auai mai o ia mai se mea mamao i nei mea faigata ua tutupu i le aiga.
Sa fautuaina e fomai i lena taimi se ta’otoga e taumafai ai e taofi le sosolo o le kanesa. Sa anapopogi ma tatalo ma le lotonaunau lo matou aiga mo se vavega. Sa ou lagona ua lava lo matou faatuatua e mafai ai ona faamaloloina lo’u tamā. A o le’i faia le ta’otoga, sa ma tuuina atu ma lo’u uso matua o Norm se faamanuiaga i lo’u tamā. Faatasi ai ma le faatuatua uma sa mafai ona ma tuufaatasia, sa ma tatalo ia mafai ona faamaloloina o ia.
Sa faatulaga le ta’otoga mo se taimi umi, ae ina ua mavae sina taimi puupuu, sa sau le fomai i le potu faatalitali e feiloai ma lo matou aiga. Sa ia fai mai a o latou amataina le ta’otoga, sa mafai ona latou vaaia ua sosolo faasoloatoa le kanesa i le tino o lo’u tamā. E faavae i mea sa latou matauina, ua toe nei na o ni nai masina e ola ai lo’u tamā. Sa matua leai so matou faamoemoe.
Ina ua ala mai lo’u tamā mai le ta’otoga, sa naunau e fia iloa pe na manuia le togafitiga. Sa matou faasoa atu ia te ia le tala faanoanoa.
Sa faaauau pea ona matou anapopogi ma tatalo mo se vavega. A o vave ona fai ifo le soifua o lo matou tamā, sa amata ona matou tatalo ina mafai ona saoloto o ia mai tiga. Mulimuli ane, a o faatetele le ogaoga o lona tulaga, sa matou ōle atu i le Alii e faataga o ia ia vave ona maliu. E na o nai masina talu ona uma le ta’otoga, e pei ona valo’ia e le fomai tipitipi, ae maliu loa lo’u tamā.
Sa liligi mai le alofa tele ma le tausiga i luga o lo matou aiga e tagata o le uarota ma matou uo. Sa matagofie le matou sauniga o le falelauasiga e faamamalu ai le soifuaga o lo’u tama. Peitai, a o mavae atu aso, sa amata ona matou lagonaina le tiga o le to’esea o lo’u tamā, sa amata ona ou tau mafaufau pe aisea na lē faamaloloina ai lo’u tamā. Sa ou tau mafaufau pe sa le’i lava le malosi o lo’u faatuatua. Aisea na maua ai e nisi aiga se vavega, ae e le’i maua e lo matou aiga? Sa ou a’oa’o i la’u misiona e liliu atu i tusitusiga paia mo tali, ma o lea sa amata ai ona ou sailiili i tusitusiga paia.
O loo a’oa’o mai i le Feagaiga Tuai e uiga i se mea faamanogi po o se suauu sa faaaoga mo le faamaloloina o manu’a, lea sa gaosi mai se laau sa ola i Kiliata. I ona po o le Feagaiga Tuai sa oo ina lauiloa le suauu o le “pulu pasama o Kiliata.”1 Sa tagi auē le perofeta o Ieremia i le malaia na ia vaaia i lona nuu ma sa faamoemoe mo se faamalologa. Sa fesili Ieremia, “E le i ai ea ni pulu pasama i Kiliata; e le o i ai ea se fomai [iina]?”2 E ala mai tusiga faafatua’iupu, musika, ma faatufugaga, sa tele ina faasino atu i le Faaola o Iesu Keriso, o le Pulu Pasama i Kiliata ona o Lona mana faamalolo ofoofogia. E faapei o Ieremia, sa ou tau mafaufau, “E leai ea ni pulu pasama i Kiliata mo le aiga o le au Nielson?”
I le Mareko mataupu 2 o le Feagaiga Fou, tatou te maua ai le Faaola i Kapanaumi. Sa salalau le tala i le laueleele atoa e uiga i le mana faamalolo o le Faaola, ma e toatele tagata sa malaga i Kapanaumi ina ia faamaloloina e le Faaola. Sa toatele na’ua sa faapotopoto i totonu ma faataamilo i le fale lea sa i ai le Faaola ma sa leai se avanoa mo Ia e talia ai i latou uma. Sa fata mai e ni alii se toafa se tagata ma’i supa ina ia faamalolo e le Faaola. Sa lē mafai ona latou sao atu i totonu i le tumutumu, o lea sa latou faava ai le taualuga o le fale ma tuutuu ifo ai i lalo le tagata ma’i ia feiloai ma le Faaola.
Ina ua ou faitauina lenei tala, sa ou maofa i le fetalaiga a le Faaola ina ua Ia feiloai atu i lenei tagata: “Atalii e, ua faamagaloina au agasala.”3 Sa ou mafaufau faapea pe ana faapea o a’u o se tasi o alii e toafa sa fataina lenei tagata, semanu ou te fai atu i le Faaola, “Na matou aumaia o ia iinei ina ia faamaloloina.” Ou te manatu atonu e tali mai le Faaola, “Ua ou faamaloloina o ia.” Pe sa ou le’i malamalama atoatoa ea—o le mana faamalolo o le Faaola sa le gata i Lona gafatia e faamalolo o tatou tino, ae atonu foi e sili atu ona taua, Lona gafatia e faamalolo o tatou loto ma loto nutimomoia o lo’u aiga?
Sa a’oa’o mai e le Faaola se lesona taua e ala i lenei aafiaga a o Ia faamaloloina faaletino lea tagata. Na oo ina manino ia te a’u o Lana savali o le, e mafai ona Ia pa’i atu i mata o i latou o e tauaso ma mafai ai ona latou vaai. E mafai ona Ia pa’i atu i taliga o i latou o ē tutuli, ma mafai ai ona latou faalogo. E mafai ona Ia pa’i atu i vae o i latou e lē mafai ona savavali, ma mafai ai ona latou savavali. E mafai ona Ia faamalolo o tatou mata ma o tatou taliga ma o tatou vae, ae o le mea e sili ona taua o na mea uma, e mafai ona Ia faamalolo o tatou loto a o Ia faamamāina i tatou mai agasala, ma siitia a’e i tatou mai o tatou tofotofoga faigata.
Ina ua faaali atu le Faaola i tagata i le Tusi a Mamona i le mavae ai o Lona Toetu, sa Ia toe fetalai atu e uiga i Lona mana faamalolo. Na faalogoina e sa Nifaē Lona siufofoga mai le lagi o faapea mai, “Pe tou te le foi mai nei ea ia te au, ma salamo ia outou agasala, ma liliu, ina ia ou faamaloloina outou?”4 Mulimuli ane, na a’oa’o mai le Faaola, “Aua o tagata faapena ia outou galulue pea i ai; ona tou te le iloa pe o le a latou toe foi mai ma salamo, ma o mai ia te au ma le faamoemoe atoa o le loto, ma o le a ou faamaloloina ai i latou.”5 Sa le’i faasino le Faaola i se faamalologa faaletino ae o se faamalologa faaleagaga o o latou agaga.
Ua aumaia e Moronae se malamalama’aga faaopoopo a o ia faasoa maia upu a lona tamā, o Mamona. I le mavae ai ona tautala e uiga i vavega, na faamalamalama mai e Mamona, “Ma ua fetalai mai Keriso: Afai tou te faatuatua mai ia te au o le a outou maua le mana e fai ai soo se mea e tatau ai ia te au.”6 Sa ou a’oa’oina e faapea o le faamoemoega o lo’u faatuatua e tatau ona o Iesu Keriso, ma sa manaomia ona ou taliaina le mea sa tatau ia te Ia a o ou faatinoina le faatuatua ia te Ia. Ua ou malamalama o le maliu o lo’u tamā sa tatau ai i le fuafuaga a le Atua. O le taimi nei, a o ou tuuina o’u lima i luga o le ao o se tasi e faamanuia i latou, ua ia Iesu Keriso lo’u faatuatua, ma ua ou malamalama e mafai ma o le a faamaloloina faaletino se tagata pe afai e tatau ai ia Keriso.
O le Togiola a le Faaola, lea ua tatou maua ai uma Lona mana togiola ma gafatia, o le faamanuiaga tupito lea ua ofoina mai e Iesu Keriso i tagata uma. A tatou salamo ma le faamoemoega atoa o le loto, e faamamāina i tatou e le Faaola mai agasala. A tatou gaua’i atu ma le fiafia o tatou loto i le Tama, e oo lava i tulaga silisili ona faigata, o le a si’i a’e e le Faaola a tatou avega ma faamāmāina.7
Ae o le lesona sili atu lea na ou a’oa’oina. Sa ou talitonu sese faapea o le mana faamalolo o le Faaola sa le’i aoga mo lo’u aiga. Pe a ou toe tepa nei i tua ma mata atamai ma le poto masani, ou te vaaia le mana faamalolo o le Faaola sa molimauina i olaga o tagata taitoatasi o lo’u aiga. Sa ou matua’i taulai i se faamalologa faaletino, ma o lea sa ou lē iloa ai vavega sa tutupu. Sa faamalosia e le Alii ma si’i a’e lo’u tina i talaatu o lona malosi i lenei tofotofoga faigata, ma sa soifua o ia i se olaga umi ma uluuluola. Sa ia te ia se tosinaga lelei ma maoae i lana fanau ma fanau a fanau. Sa faamanuiaina a’u ma nai o’u uso ma tuafafine e le Alii i le alofa, lotogatasi, faatuatua, ma le maufetuuna’i lea na avea o se vaega taua o o matou olaga ma o loo faaauau ai pea i le taimi nei.
Ae faapefea lo’u tamā? E faapei o i latou uma o ē salamo, sa faamaloloina o ia faaleagaga a o ia sailia ma mauaina ia faamanuiaga ua avanoa ona o le Togiola a le Faaola. Sa ia maua se faamagaloga o ana agasala ma ua faatalitali nei i le vavega o le Toetutu. Sa a’oa’o mai le Aposetolo o Paulo: “Aua faapei ona oti uma ia Atamu, e faapea foi ona faaolaina uma ia Keriso.”8 Tou te silafia, sa ou fai atu i le Faaola, “Na matou aumaia lo’u tamā ia te oe ia faamalolo,” a o lea la ua faamanino mai nei e le Faaola ia te a’u e faapea na Ia faamaloloina o ia. Sa aogā le pulu pasama mo le aiga o le au Nielsen—e le o le ala na matou faamoemoe i ai, ae i se ala e sili atu ona taua ua faamanuiaina ai ma o loo faamanuiaina ai pea o matou olaga.
I le Ioane mataupu 6 o le Feagaiga Fou, sa faia ai e le Faaola se vavega mata’ina. Faatasi ai ma ni nai i’a ma ni nai potoi areto, sa fafagaina ai e le Faaola le 5,000. Ua faatele ona ou faitauina lenei tala, ae e i ai se vaega o lena aafiaga sa ou misia a o lea ua tele sona aogā ia te a’u. Ina ua uma ona fafaga e le Faaola le 5,000, sa Ia fetalai atu i Ona soo e ao uma fasi areto na totoe, o toe’aiga, ia na tutumu ai ato e 12. Sa ou tau mafaufau pe aisea na faaavanoa ai e le Faaola le taimi e fai ai lena mea. Ua oo ina manino mai ia te a’u e faapea, o se tasi lesona e mafai ona tatou a’oa’o mai lea mea o lenei: Sa mafai ona Ia fafagaina le 5,000 ma sa i ai pea mea na totoe. “Ua lava lo’u alofa tunoa mo tagata uma.”9 E mafai e le mana togiola ma le faamalolo o le Faaola ona ufitia soo se agasala, manu’a, po o tofotofoga—e tusa lava po o le a le telē po o le faigata—ma e i ai pea mea e totoe. Ua lava ma totoe Lona alofa tunoa.
Faatasi ai ma lena iloa, e mafai ona tatou agai atu i luma ma le faatuatua, ma le iloaina a oo mai taimi faigata—ma e mautinoa lava o le a oo mai—pe aafia foi o tatou olaga i le agasala, e tulai le Faaola ma le “faamalologa i ona apaau,”10 ma valaaulia i tatou e o mai ia te Ia.
Ou te tuu atu la’u molimau ia te outou e uiga i le Pulu Pasama i Kiliata, le Faaola o Iesu Keriso, lo tatou Togiola, ma Lona mana faamalolo ofoofogia. Ou te tuu atu la’u molimau i Lona naunau e faamalolo oe. I le suafa o Iesu Keriso, amene.