Toefuataiga i Aso Taitasi
Tatou te manaomia le fafagaina faifai pea i aso taitasi i le malamalama faalelagi. Tatou te manaomia “taimi o le faafouga.” Taimi o le toefuataiga faaletagata lava ia.
Ua tatou potopoto i lenei taeao matagofie o le Sapati e talanoa e uiga ia Keriso, olioli i Lana talalelei, ma fesoasoani ma lagolago e le tasi le isi a o tatou savavali i “le ala” o lo tatou Faaola.1
I le avea ai ma tagata o Le Ekalesia a Iesu Keriso o le Au Paia o Aso e Gata Ai, tatou te tauaofia mo lenei lava faamoemoe i aso Sapati taitasi, i le tausaga atoa. Afai e le o oe o se tagata o le Ekalesia, matou te matuā talileleia ma le agalelei oe ma faafetai atu i lou auai mai faatasi ma i matou e tapuai i le Faaola ma a’oa’o e uiga ia te Ia. E faapei o oe, o loo matou tinoū foi—e ui ina lē atoatoa—ia avea ma ni uo, tuaoi, ma tagata soifua e sili atu,2 ma e matou te saili foi e faia lenei mea e ala i le mulimuli i lo tatou Faaa’oa’o, o Iesu Keriso.
Matou te faamoemoe e mafai ona e lagonaina le faamaoni o a matou molimau. O loo soifua Iesu Keriso! O Ia o le Alo o le Atua soifua, ma o loo Ia taitaia perofeta i le lalolagi i o tatou taimi. Matou te valaaulia tagata uma e o mai, faafofoga i le afioga a le Atua, ma taumamafa i Lona agalelei! Ou te tuuina atu la’u molimau patino o loo i ai le Atua faatasi ma i tatou, ma o le a Ia faalatalata moni mai ia i latou uma o ē faalatalata atu ia te Ia.3
Matou te manatu i ai o se faamamaluga le savavali faatasi ma outou i le ala lauiti ma le vaapiapi a le Matai.
O Le Tomai o le Savali i se Laina Sa’o
O loo i ai se manatu fai soo faapea o tagata ua sē, e savavali i li’o. E le’i leva talu ai, sa tofotofo ai e saienitisi i le Max Planck Institute for Biological Cybernetics [Inisitituti mo Suesuega Faasaienisi Faapaiolosi] lena manatu. Na latou ave i latou na auai i se vaomatua tele ma avatu ia i latou ni faatonuga faigofie: “Savavali i se laina sa’o.” Sa leai ni faailoga vaaia i le ala. O autu o le su’ega sa ao ona faalagolago atoa i o latou lagona o le itu e agai i ai.
O le a se tou manatu i le taunuuga?
Sa faia e saienitisi le faaiuga, “E savavali moni lava tagata i li’o pe a leai ni o latou faailoilo faatuatuaina i le itu e savavali i ai.”4 Ina ua fesiligia mulimuli ane, sa fai mai nisi na auai ma lo latou lava talitonuga e faapea, e le’i i ai sina iota na latou se’e ese ai mai le ala. E ui i le maualuga o lo latou talitonuga maumaututu, ae sa faaalia e faamatalaga a le GPS sa latou savavali i li’o felataa’i pe ta’i 20 mita le lautele.
Aisea e faigata tele ai ia i tatou ona savavali i se laina sa’o? E manatu nisi tagata suesue e faapea, o nai se’e ese e matua’i lē taua lava i matapule faaletino o le laueleele e faia ai se eseesega. Na faasino e isi i le mea moni e faapea, e tofu i tatou uma ma se vae e malosi teisi atu i lo le isi. Peitai, e “foliga mai” tatou te tauivi e savavali sa’o i luma “[ona] o le faatuputeleina o le lē mautinoa po o fea o luma o loo i ai le sa’o.”5
Po o le a lava le mafuaaga, o le natura faaletagata: a aunoa ma ni faailoga o le ala, tatou te se’e ese mai le ala.
Sē ese mai le Ala
Pe le mata’ina ea le matua’i laitiiti tele o mea moni o loo mafai ona faia ai se eseesega tele i o tatou olaga?
Ua ou iloa lenei mea mai se aafiaga patino a o avea o se pailate. O taimi uma e amata ai ona ou latalata atu i se malaevaalele, sa ou iloa o le tele o la’u galuega o loo totoe o le a aofia ai le faia pea o faasa’oga iti o le ala e tata’i saogalemu atu ai le vaalele i lo matou ala e moomia ona tulaueleele ai.
Atonu e i ai sou aafiaga talitutusa pe a aveina se taavale. O le matagi, patupatu o le auala, o le lē atoatoa ona faasa’osa’o o uili, o le lē ano i ai—ae le taulia ai amioga a isi avetaavale—o nei mea uma e mafai ona tuleieseina oe mai lou ala faamoemoeina. O le lē magafagafa i nei mea moni e ono i’u ai ina leaga lou aso.6
E faatatau lea mea ia i tatou faaletino.
E faatatau foi ia i tatou faaleagaga.
O le tele o suiga i o tatou olaga faaleagaga—itu lelei ma itu lē lelei—e tupu tupu malie, e taitasi laa i le taimi. E faapei o i latou na auai i le suesuega i Max Planci, atonu tatou te lē iloaina le taimi tatou te se ese ai ma le ala. Atonu foi e maualuluga lo tatou talitonuga maumaututu faapea o loo tatou savavali i se laina sa’o. Ae o le mea moni a aunoa ma le fesoasoani o faailoga ala e taialaina ai i tatou, e lē ma’alofia lava lo tatou se’e ese ma le ala ma i’u ai i ni nofoaga tatou te le’i mafaufau o le a tatou oo i ai.
E moni lenei mea mo tagata taitoatasi. E moni foi mo sosaiete ma malo. Ua tumu tusitusiga paia i faataitaiga.
O loo tusia i le tusi o Faamasino e faapea ina ua maliu Iosua “ua tupu mai le tasi tupulaga … e lē iloa Ieova ma ana galuega na ia faia mo Isaraelu.”7
E ui i faauilavea ofoofogia faalelagi, o asiasiga a agelu, o lavea’iga, ma manumalo faavavega na molimauina e le fanauga a Isaraelu i le taimi o soifua Mose ma Iosua, ae i totonu o se tupulaga e tasi, sa lafoai ai e tagata le Ala ae amata ona savavali e tusa ma o latou lava manao. Ma, ioe, e le’i leva ae latou feagai ma taunuuga lē lelei o na amioga.
O nisi taimi o lenei pa’ū’ū ese e alu ai le fia o augatupulaga. O nisi taimi e tupu i tausaga po o ni masina.8 Ae tatou te lolo uma lava i ai. Tusa lava po o le a le malolosi o o tatou aafiaga faaleagaga na i ai i le tuanai, ae ona o i tatou o ni tagata soifua tatou te agaigai ai lava ina se ese. O le mamanu lava lena mai ona po o Atamu e oo mai i le taimi nei.
O le Tala Fiafia lenei
Ae e le leiloloa tagata uma. E lē pei o le su’ega faasaienitisi mo tagata e se ese, ua i ai ni a tatou faailoga ala vaaia faatuatuaina ia e mafai ona tatou faaaoga e iloilo ai lo tatou ala.
Ma o a la nei faailoga ala?
E mautinoa lava le aofia ai o tatalo i aso taitasi ma le manatunatu loloto i tusitusiga paia ma le faaaogaina o meafaigaluega musuia e pei o le Sau, Mulimuli Mai ia te A’u. O aso taitasi, e mafai ona tatou faalatalata atu i le nofoalii o le Atua i le lotomaulalo ma le faamaoni. E mafai ona tatou manatunatu loloto i a tatou faatinoga ma iloilo taimi o o tatou aso—e mafaufau ai i o tatou naunautaiga ma manaoga pe a mafaufau i Lona finagalo. Afai tatou te see ese, ia tatou aioi atu i le Atua e toefuatai i tatou, ma ia tatou tautino atu e fai le mea sili atu.
O le taimi lenei o le mafaufau ifo o le tagata ia te ia lava, o se avanoa e toe faaleleia ai ma fai suiga. O se vaitau e toe manatunatu loloto ai i le mea e mafai ona tatou savavali faatasi ai ma le Alii ma ia a’oa’oina, faagaeetiaina, ma faamamāina i le afioga tusitusia ma faaalia mai e le Agaga o lo tatou Tama Faalelagi. O se taimi e paia pe a tatou manatua a tatou feagaiga paia e mulimuli i le Keriso agamalu, pe a tatou iloiloina lo tatou alualu i luma ma faaogatusa i tatou lava ma faailoga ala faaleagaga ua saunia e le Atua mo Ana fanau.
Mafaufau i ai o sou lava ia, toefuataiga i aso taitasi. I la tatou malaga o ni tagata sopo i luga o le ala o le mamalu, ua tatou iloa le faigofie tele ona pa’ū’ū ese atu. Ae e pei lava ina mafai e nai sasi laiti lava ona tata’i ese atu i tatou mai le Ala o le Faaola, e faapena foi ona mafai e ni nai faatinoga iti ma le faigofie o le toefaaogatusaina ona taitai mautinoa mai i tatou e toefoi mai i totonu. A oo ina tolotolo mai le pogisa i totonu i o tatou olaga, e pei ona tupu soo, o lo tatou toefuataiga i aso taitasi e tatala atu ai o tatou loto i le malamalama faalelagi, lea e faamalamalamaina ai o tatou agaga, ma tuliesea ai popolega, fefe, ma masalosaloga.
O Foeuli Laiti, Vaa Tetele
Afai tatou te sailia, e moni “O le a tuu [mai] e le Atua ia te [i tatou] le poto e ala i lona Agaga Paia, ioe, e ala i le meaalofa lē mafaamatalaina a le Agaga Paia.”9 O le tele o lo tatou ōle atu, o le a Ia a’oa’o ai foi tatou i le Ala ma fesoasoani ia tatou mulimuli ai.
Ioe, o lea tulaga e manaomia ai le taumafaiga tumau i la tatou vaega. E lē mafai ona faamalieina i tatou i ni aafiaga faaleagaga ua tuanai. Tatou te mana’omia se tafe tumau.
E lē mafai ona faavavau ona tatou faalagolago i molimau a isi. E tatau ona tatou fausia a tatou lava molimau.
Tatou te manaomia le fafagaina faifai pea i aso taitasi i le malamalama faalelagi.
Tatou te manaomia “[taimi o le faafouga].”10 Taimi o le toefuataiga faaletagata lava ia.
“O vai e tafe pea” e le mafai ona “tumau le eleelea”11 Ina ia tausisia le mamā o o tatou mafaufauga ma amioga, e tatau ona tatou taumafai pea ma faaleleia.
I na mea uma, o le Toefuataiga o le talalelei ma le Ekalesia e le o se mea e faa-tasi ona tupu ma ua mae’a. O se faagasologa faifaipea—auaua’i taitasi i le aso, tasi le tagata i le taimi.
A o gasolo atu o tatou aso, e faapena foi o tatou olaga. Na faa’upu e se tasi tusitala faapea: “O se aso e pei o se olaga atoa. E te amata ona fai le mea e tasi, ae uma ane ua fai se isi mea, e te fuafua e alu i se feau, ae e le oo lava i ai. … Ma i le i’uga o lou olaga, o le a i ai lena lava tulaga e tasi o le lē mafuafuaina o lou olaga atoa. O foliga foi na o lou olaga atoa e pei o se aso e tasi.”12
Pe e te manao e suia foliga o lou olaga?
Sui foliga o lou aso.
Pe e te manao e sui lou aso?
Sui lenei itula.
Sui mea e te mafaufau i ai, lagonaina, ma fai nei loa lava.
E mafai e se foeuli laitiiti ona feseua’i se vaa tele.13
E mafai e ni tama’i piliki ona avea ma ni maota matagofie.
E mafai e ni tama’i fatu laiti ona avea ma ni paina uumi.
O minute ma itula e lelei ona faaaoga, o poloka ia e fau ai se olaga e lelei ona ola ai. E mafai ona latou musuia mea lelei, si’itia i tatou mai faataufusi o le lē atoatoa, ma toe faafoi atu i tatou i le ala togiola o le faamagaloga ma le faapaiaga.
O Le Atua o Amataga Fou
Faatasi ma outou, ou te si’i a’e lo’u loto i le faafetai mo le meaalofa ofoofogia o le avanoa fou, ola fou, ma le faamoemoega fou.
Tatou te si’i a’e o tatou leo i viiga o lo tatou Atua agalelei ma le lotofaamagalo. Auā e mautinoa lava, o Ia o se Atua o amataga fou. O le faamoemoega musuia o Ana galuega uma o le fesoasoani lea ia i tatou, o Ana fanau, ia manuia ia tatou sailiga mo le tino ola pea ma le ola e faavavau.14
E mafai ona avea i tatou ma tagata fou ia Keriso, aua ua uma ona folafola mai e le Atua, “O le tele o taimi e salamo ai lo’u nuu Ou te faamagalo ai i latou ia latou solitulafono faasaga mai ia te au”15 ma “ou te le toe manatuaina lava.”16
O’u uso e ma tuafafine pele, uo pele, tatou te see ese uma lava mai lea taimi i lea taimi.
Ae e mafai ona tatou toe foi i luga o le ala. E mafai ona tatou faatautaia lo tatou ala i le pogisa ma tofotofoga o lenei olaga ma toe maua lo tatou ala e foi atu i lo tatou Tama Faalelagi alofa pe afai tatou te sailia ma talia faailoga ala faaleagaga ua uma ona Ia saunia, talia faaaliga faaletagata, ma tinoū mo le toefuataiga i aso taitasi. O le ala lea e mafai ai ona tatou avea ma soo moni o lo tatou Faaola pele, o Iesu Keriso.
A tatou faia lena mea, o le a fiafia mai le Atua ia i tatou. “O le a … faamanuiaina oe e le Alii i le laueleele ua foaiina mai e le Alii lou Atua ia te oe. O le a faia e le Alii oe o se nuu paia ia te ia lava.”17
O le a tatou sailia le toefuataiga i aso taitasi ma tinoū pea e savavali i le Ala o Iesu Keriso, o la’u tatalo lea. I le suafa o Iesu Keriso, amene.