ඉදිරි කාලයට එරෙහිව හොඳ පදනමක්
ඉදිරි වසර වලදී, සෝල්ට් ලේක් දේවමාළිගාවෙහි වැඩිදියුණු කිරීම් වලට අපව ඉදිරියට ගෙනයාමට සහ දිරිගැන්වීමට ඉඩදෙමු.
සෝල්ට් ලේක් දේවමාළිගාවේ ඉතිහාසය
1847 ජූලි 24 වන දින, ප.ව. 2:00 ට පමණ උණුසුම් දහවල් කාලයට නැවත අපි ගමන් කරමු. බටහිර දෙසට ගමන් කළ පළමු පක්ෂය වූ සභාවේ සාමාජිකයන් 148 දෙනෙකු සමග දින 111 ක දුෂ්කර ගමනකින් පසු, කඳුකර උණ රෝගයෙන් රෝගීව දුර්වල වී සිටි එවකට ප්‍රේරිතවරුන් දොළොස්දෙනාගේ ගණපූර්ණයෙහි සභාපති වූ බ්‍රිගම් යන්ග්, සෝල්ට් ලේක් මිටියාවතට ඇතුළු වුණා.
දින දෙකකට පසු, බ්‍රිගම් යන්ග් සිය අසනීපයෙන් සුවය ලබමින් සිටියදී, දොළොස්දෙනාගේ ගණපූර්ණයෙහි සාමාජිකයින් කිහිපදෙනෙකු සහ තවත් අය සඳහා ගවේෂණ චාරිකාවකට නායකත්වය දුන්නා. විලියම් ක්ලේටොන් මෙසේ වාර්තා කළා, “කඳවුරට සැතපුම් හතරක් පමණ උතුරින්, මට්ටමට හා බටහිර දෙසට බෑවුමකින් තිබූ, ලස්සන බිම් කැබැල්ලකට අපි පැමිණියෙමු.”1
කණ්ඩායම සමග එම ස්ථානය සමීක්‍ෂණය කරමින් සිටියදී, බ්‍රිගම් යන්ග් හදිසියේම නතරවී ඔහුගේ වේවැල බිම සිරකර, “මෙතන අපේ දෙවියන්වහන්සේගේ දේවමාළිගාව නැගී සිටිනු ඇත” යනුවෙන් ප්‍රකාශ කළා. ඔහුගේ සගයෙකු වූ වැඩිහිටි විල්ෆර්ඩ් වුඩ්රෆ්, එම ප්‍රකාශය “අකුණු සැරයක් මෙන් [ඔහු] හරහා ගමන් කළේය” යැයි පැවසූ අතර, සභාපති යන්ග්ගේ වේවැලෙන් ලකුණු කළ ස්ථානය සනිටුහන් කිරීම සඳහා ඔහු අත්තක් බිම හෙළුවා. දේවමාළිගාව සඳහා අක්කර හතළිහක් (16 ha) තෝරාගත් අතර, පරිපූර්ණව දේවමාළිගාව කේන්ද්‍රීය ස්ථානයක් කරමින් “උතුරට & දකුණට, නැගෙනහිරට & බටහිරට” නගරය ඉදිකිරීමට තීරණය වුණා.2
1851 අප්‍රියෙල් ප්‍රධාන සම්මන්ත්‍රණයේදී සභාවේ සාමාජිකයන් “ස්වාමින්වහන්සේගේ නාමයට” දේවමාළිගාවක් ඉදිකිරීමේ යෝජනාව පවත්වාගෙන යාමට ඒකමතිකව ඡන්දය ප්‍රකාශ කළා.3 ඉන් වසර දෙකකට පසු, 1853 පෙබරවාරි 14 වන දින සාන්තුවරයන් දහස් ගණනක් සහභාගී වූ ප්‍රසිද්ධ උත්සවයකදී හෙබර් සී. කිම්බල් විසින් මෙම ස්ථානය කැපකරන ලද අතර දේවමාළිගාවේ අත්තිවාරම සඳහා භූමිය කඩා දැමුවා. මාස කිහිපයකට පසු, අප්‍රියෙල් 6 වන දින දේවමාළිගාවේ දැවැන්ත මුල්ගල් තැබූ අතර වර්ණ ගැන්වීම් සහ පටි සහ පැරණි මණ්ඩපයේ සිට දේවමාළිගා භූමිය දක්වා සභාවේ නායකයින්ගේ නායකත්වයෙන් යුත් පෙරහැරක්, සහ ගල් හතරේ එක එකක් සඳහා ප්‍රකාශයන් සහ යාච්ඤා ඇතුළත් වුණා.4
නිම්න තට්ටුව සමීක්‍ෂණය කරන විට ඔහු එම බිම පය තබන විටම තමාට දර්ශනයක් තිබූ බව “දැන් මම දන්නවා වගේම, මේ දේවමාළිගාවක් ඉදිකිරීමට මට අවශ්‍ය භූමිය එය බව, [එවකට] මම දැනගෙන හිටියා” ලෙස කියමින් බිම් කැඩීමේ උත්සවයේදී, සභාපති යන්ග් සිහිපත් කළා.5
වසර දහයකට පසුව, බ්‍රිගම් යන්ග් 1863 ඔක්තෝම්බර් ප්‍රධාන සම්මන්ත්‍රණයේදී පහත සඳහන් අනාවැකිමය අවබෝධයක් ලබාදුන්නා: “දේවමාළිගාව සහස්‍රය පුරා විඳදරාගන්නා අයුරින් ඉදිකර ඇති ආකාරය දැකීමට මට අවශ්‍යයයි. අප විසින් ගොඩනගන එකම දේවමාළිගාව මෙය නොවේ; මෙවැනි සිය ගණනක් ස්වාමින්වහන්සේට ඉදිකර කැපකරනු ඇත. මෙම දේවමාළිගාව පසු-දවස්වල ශුද්ධවන්තයන් විසින් කඳුකරයේ ඉදිකරන ලද පළමු දේවමාළිගාව ලෙස හඳුන්වයි. … මට අවශ්‍ය වන්නේ එම දේවමාළිගාව … කඳුකරයේ සිටින දෙවියන්වහන්සේගේ සාන්තුවරයන්ගේ ඇදහිල්ල, නොපසුබට උත්සාහය සහ කර්මාන්තයේ ආඩම්බර ස්මාරකයක් ලෙස නැගීසිටීමයි.”6
මෙම කෙටි ඉතිහාසය සමාලෝචනය කිරීමෙන් බ්‍රිගම් යන්ග්ගේ දර්ශනය ගැන මා තුල ගෞරවයක් ඇති කරනවා—පළමුවෙන්ම, හැකිතාක් දුරට සහ එම ස්ථානයේ සහ වේලාවේ ඇති ඉදිකිරීම් ක්‍රම උපයෝගී කරගනිමින් සහස්‍රය පුරා විඳදරාගැනීමට සෝල්ට් ලේක් දේවමාළිගාව ඉදිකරන බවට ඔහු සහතික වුණා, එමෙන්ම දෙවනුව, සිය ගණනින් පවා, ලොව පුරා අනාගත දේවමාළිගා වල වර්ධනය පිළිබඳ ඔහු අනාවැකි පැවසුවා.
සෝල්ට් ලේක් දේවමාළිගාවේ ප්‍රතිසංස්කරණය
බ්‍රිගම් යන්ග් මෙන්, අදත් අපගේ අනාගතවක්තෘවරයා සෝල්ට් ලේක් දේවමාළිගාව සහ අනෙක් සියල්ල දෙස ඉතා පරිස්සමින් යුතුව බලාගන්නවා. වසර ගණනාවක් පුරා, පළමු සභාපතිත්වය, වරින් වර, සෝල්ට් ලේක් දේවමාළිගාවේ අත්තිවාරම ශක්තිමත් බව සහතික කිරීම සඳහා මුලසුන දරන සභානායකත්වයට උපදෙස් දී තිබෙනවා. මා මුලසුන දරන සභානායකත්වයේ සේවය කරන විට, පළමු සභාපතිත්වයේ ඉල්ලීම පරිදි, භූ කම්පන සැලසුම් සහ ඉදිකිරීම් ශිල්ප ක්‍රම වල නවතම දියුණුව ඇගයීම ඇතුළුව, සෝල්ට් ලේක් දේවමාළිගාව පිළිබඳ සමස්ත පහසුකම් සමාලෝචනයක් අප විසින් සිදුකළා.
එකල පළමු සභාපතිත්වය ලබාදුන් සමාලෝචනයේ කොටස් මෙන්න: “සෝල්ට් ලේක් දේවමාළිගාව සැලසුම් කිරීමේදී හා ඉදිකිරීමේදී හොඳම ඉංජිනේරු, නිපුණ ශ්‍රමය, ඉදිකිරීම් ද්‍රව්‍ය, ගෘහ භාණ්ඩ සහ කාලානුරූපව පවතින සම්පත් භාවිතා කරන ලදි. එය 1893 දී කැපවූ දා සිට, දේවමාළිගාව ස්ථීරව සිට ඇදහිල්ලේ හා බලාපොරොත්තුවේ ආලෝකයක් ලෙසත් ජනතාවට ආලෝකයක් ලෙසත් සේවය කර ඇත. දේවමාළිගාව හොඳ තත්ත්වයේ පවත්වාගෙන යාමට, පිරිසිඳු කිරීමට හා නඩත්තු කිරීමට විශාල අවධානයක් යොමුකර ඇත. ග්‍රැනයිට් බාහිර හා අභ්‍යන්තර මහලේ සන්ධි සහ ආධාරක බාල්ක හොඳ තත්ත්වයේ පවතී. දේවමාළිගාව සඳහා බ්‍රිගම් යන්ග් විසින් තෝරාගත් ස්ථානය ඉතා හොඳ පස් හා විශිෂ්ට සංයුක්ත ගුණාංග ඇති බව මෑත අධ්‍යයනයන්ගෙන් සනාථ වේ.”7
බාහිර තට්ටුව සහ මතුපිට ප්‍රදේශ, යල්පැනගිය උපයෝගිතා පද්ධති සහ බව්තීස්ම ප්‍රදේශ ඇතුළු දේවමාළිගාව අලුත් කිරීම හා යාවත්කාලීන කිරීම සඳහා සාමාන්‍ය අලුත්වැඩියාවන් සහ වැඩිදියුණු කිරීම් අවශ්‍ය බව සමාලෝචනයෙන් නිගමනය වුණා. කෙසේවෙතත්, දේවමාළිගාවේ අත්තිවාරමේ සිට ඉහළට ආරම්භ වන වෙනම වඩාත් පුළුල් භූ කම්පන වැඩිදියුණු කිරීමක් සලකා බැලීමද නිර්දේශ කළා.
දේවමාළිගාවේ පදනම
ඔබට මතක ඇති පරිදි, මීට වසර 127 කට පෙර දේවමාළිගාව නිමවූ දා සිට මේ දක්වා දේවමාළිගාවට හොඳ සේවයක් කළ මුල් දේවමාළිගා අත්තිවාරම ඉදිකිරීම සඳහා සභාපති බ්‍රිගම් යන්ග් විසින්ම සවිස්තරාත්මකව සම්බන්ධ වී තිබුණා. දේවමාළිගාව සඳහා අළුතින් යෝජිත භූ කම්පන වැඩිදියුණු කිරීමේ පැකේජය, අත්තිවාරම දැමීමේ තාක්ෂණය උපයෝගී කරගනු ඇති අතර එය ඉදිකරන අවස්ථාවේදී පවා සිතාගත නොහැකි වුණා. මෙය භූමිකම්පා ආරක්ෂාව සඳහා නවීනතම, බොහෝ නවීනතම ඉංජිනේරු විද්‍යාව ලෙස සැලකෙනවා.
මෑතකදී එහි සංවර්ධනයේදී ආරම්භ වන මෙම තාක්ෂණය දේවමාළිගාවේ අත්තිවාරමෙන් ආරම්භ වන අතර භූමිකම්පාවකින් සිදුවන හානි වලට එරෙහිව ශක්තිමත් ආරක්ෂාවක් සපයනවා. සාරාංශයක් ලෙස, එය පොළොව හා අවට පරිසරය භූ කම්පන සිදුවීමකට ලක්වුවද, එය ස්ථීරව සිටීමට දේවමාළිගාව ශක්තිමත් කරනවා.
මෙම තාක්ෂණය උපයෝගී කරගන්නා දේවමාළිගා ප්‍රතිසංස්කරණය පසුගිය වසරේ පළමු සභාපතිත්වය විසින් ප්‍රකාශයට පත්කළා. මුලසුන හෙබවූ සභානායකත්වයේ මගපෙන්වීම යටතේ ඉදිකිරීම් මීට මාස කිහිපයකට පෙර එනම් 2020 ජනවාරි මාසයේදී ආරම්භ වුණා. එය ආසන්න වශයෙන් වසර හතරකින් නිමකිරීමට ඇස්තමේන්තු කර තිබෙනවා.
ඔබේ පුද්ගලික පදනම සහතික කිරීම
සෝල්ට් ලේක් දේවමාළිගාවේ මේ සුන්දර, උතුම්, උසස් හා විස්මිත ජීවිතයේ ඉදිරි සිව් වසර ගැන කල්පනා කර බලන විට, මම එය වසා දැමීමේ කාලයකට වඩා අලුත් කිරීමේ කාලයක් ලෙස සිතනවා! ඒ හා සමානව, අප අපෙන්ම මෙසේ අසාගත හැකියි, “සෝල්ට් ලේක් දේවමාළිගාව පුළුල් ලෙස අලුත් කිරීම අපගේ අධ්‍යාත්මික පුනර්ජීවනය, ප්‍රතිනිර්මාණය, නැවත ඉපදීම, පුනර්ජීවනය හෝ ප්‍රතිෂ්ඨාපනය සඳහා අපව පොළඹවන්නේ කෙසේද?”
භූ කම්පන වැඩිදියුණු කිරීමක් පවා වුවද, අපට අවශ්‍ය නඩත්තු හා ප්‍රතිසංස්කරණ කටයුතු කිරීමෙන් අපටත් අපගේ පවුල් වලටත් ප්‍රයෝජන ගත හැකි බව ස්වයං විග්‍රහයකින් හෙළි වෙනවා! අපට එවැනි ක්‍රියාවලියක් මෙසේ ඇසීමෙන් ආරම්භ කළ හැකියි:
“මගේ අත්තිවාරම මොන වගේද?”
“මගේ සාක්ෂිය රැඳී ඇති, මගේ පෞද්ගලික අත්තිවාරමේ කොටසක් වන, ඝණ බිත්ති සහිත, ස්ථාවර, ශක්තිමත් මුල් ගල් වලින් සමන්විත වන්නේ මොනවාද?”
“අපගේ ජීවිත තුල නිසැකවම සිදුවනු ඇති භූමිකම්පා සහ කැලඹිලි සහිත භූ කම්පන සිදුවීම් වලට ඔරොත්තු දීමට පවා මටත් මගේ පවුලේ අයටත් ස්ථිරව හා නිශ්චලව සිටීමට ඉඩ සලසන මගේ අධ්‍යාත්මික හා චිත්තවේගීය චරිතයේ පදනම් අංග මොනවාද?”
භූමිකම්පාවකට සමාන මෙම සිදුවීම් බොහෝවිට අනාවැකි කීමට අපහසු වන අතර විවිධ තීව්‍රතාවයන්ගෙන් යුක්ත වෙනවා—එනම් ප්‍රශ්න හෝ සැකයන් සමග පොරබැදීම, පීඩාවන්ට හෝ විපත්තියට මුහුණදීම, සභාවේ නායකයන්, සාමාජිකයන්, මූලධර්ම හෝ ප්‍රතිපත්ති සමග පුද්ගලික කණගාටුවීම් හරහා කටයුතු කිරීම. මේවාට එරෙහි හොඳම ආරක්ෂාව තිබෙන්නේ අපගේ අධ්‍යාත්මික පදනමේයි.
අපගේ පෞද්ගලික සහ පවුල් ජීවිතයේ අධ්‍යාත්මික මුල් ගල කුමක් විය හැකිද? ඒවා නම් ශුභාරංචියේ ජීවත්වීමේ සරල, සාමාන්‍ය හා වටිනා මූලධර්ම විය හැකියි—පවුලේ යාච්ඤාව, ශුද්ධලියවිලි අධ්‍යයනය, දේවමාළිගා සහභාගී වීම, මෝර්මොන්ගේ පොත, එමෙන්ම එන්න, මා අනුගමනය කරන්න සහ පවුල් නිවෙස් සන්ධ්‍යාවන් මගින් ශුභාරංචිය ඉගෙනීමයි. ඔබගේ අධ්‍යාත්මික පදනම ශක්තිමත් කිරීම සඳහා උපකාර වන වෙනත් සම්පත් අතර ඇදහිල්ලේ කරුණු, පවුල් ප්‍රකාශය සහ “ජීවමාන ක්‍රිස්තුස්වහන්සේ” ඇතුලත් විය හැකියි.
මට නම්, දේවමාළිගා නිර්දේශයක් ලැබීමේ කොටසක් ලෙස සාකච්ඡා කරන ලද ප්‍රශ්න වලට ඇතුලත් කර ඇති මූලධර්ම—විශේෂයෙන් පළමු ප්‍රශ්න හතර, අධ්‍යාත්මික පදනමක් සඳහා ශක්තිමත් පදනමක් ලෙස සේවය කරනවා. මම ඒවා අධ්‍යාත්මික මුල් ගල් ලෙස දකිනවා.
සභාපති රසල් එම්. නෙල්සන් පසුගිය ප්‍රධාන සම්මන්ත්‍රණයේදී ඒවා එකින් එක අපට කියවූ බැවින්, අපි ඇත්තවශයෙන්ම මෙම ප්‍රශ්න වලට හුරු පුරුදුයි.
-
ඔබට සදාකාලික පියාණන් වන දෙවියන්වහන්සේ කෙරෙහි; උන්වහන්සේගේ පුත්‍රයාණන් වන යේසුස් ක්‍රිස්තුස්වහන්සේ කෙරෙහි; සහ ශුද්ධාත්මයාණන්වහන්සේ කෙරෙහි විශ්වාසයක් හා සාක්ෂියක් තිබේද?
රූපයදේවශීර්ෂය -
යේසුස් ක්‍රිස්තුස්වහන්සේගේ වන්දිගෙවීම ගැනත් ඔබගේ ගැලවුම්කරුවාණන් සහ මිදුම්කරුවාණන් ලෙස උන්වහන්සේගේ කාර්යභාරය ගැනත් ඔබට සාක්ෂියක් තිබේද?
රූපයයේසුස් ක්‍රිස්තුස්වහන්සේගේ වන්දිගෙවීම -
යේසුස් ක්‍රිස්තුස්වහන්සේගේ සුභාරංචිය නැවත පිහිටුවීම පිළිබඳව ඔබට සාක්ෂියක් තිබේද?
රූපයනැවත පිහිටුවීම -
යේසුස් ක්‍රිස්තුස්වහන්සේගේ පසුදවස්වල ශුද්ධවන්තයින්ගෙන් යුත් සභාවේ සභාපතිවරයාව, අනාගතවක්තෘවරයෙකු, අනාගතය දකින්නෙකු හා එළිදරව් ලබන්නෙකු ලෙසත්, සියලු පූජකත්ව යතුරු ක්‍රියාත්මක කිරීමට බලය ඇති එකම පුද්ගලයා ලෙසත් ඔබ අනුමත කරනවාද?8
රූපයඅනාගතවක්තෘවරුන්
මෙම ප්‍රශ්න ඔබේ පුද්ගලික පදනමේ වටිනා අංග ලෙස එය ගොඩනගාගැනීමට සහ ශක්තිමත් කිරීමට ඔබට උදව් කරන්නේ කෙසේදැයි දැකීමට ඔබට පුලුවන්ද? “නුඹලා ප්‍රේරිතයන්ගෙත් අනාගතවක්තෘවරුන්ගේත් අත්තිවාරම පිට ඉදිකරනු ලැබ සිටින්නහුය. යේසුස් ක්‍රිස්තුස්වහන්සේම එහි කොණේ ප්‍රධාන ගලව සිටින සේක, උන්වහන්සේ තුල මුළු ගොඩනැගිල්ල හොඳ හැටියට එකතුකරන ලදුව, ස්වාමින්වහන්සේ තුල ශුද්ධවූ මාළිගාවක්ව සෑදීගෙන යන්නේය” ලෙස සභාවක් පිළිබඳ පාවුල් එපීසවරුන්ට ඉගැන්වූවා.9
මගේ ජීවිතයේ ලොකුම ප්‍රීතිය වන්නේ යේසුස් ක්‍රිස්තුස්වහන්සේ හා උන්වහන්සේගේ ශුභාරංචිය කෙරෙහි ඇදහිල්ලේ ආදර්ශවත් පුද්ගලයන් වන ලොව පුරා සිටින සභාවේ සාමාජිකයන් දැන හඳුනාගැනීම සහ ඔවුන් තුලින් පෙළඹවීම් ලැබීමයි. හෘදයාබාධ හා වේදනාව නොතකා, භූ කම්පන සිදුවීම් වලට, ස්ථාවර අවබෝධයකින් යුතුව ඔරොත්තු දීමට ඔවුන්ට ඉඩ සලසන ශක්තිමත් පෞද්ගලික පදනම් තිබෙනවා.
මෙය වඩාත් පෞද්ගලික මට්ටමින් ප්‍රදර්ශනය කිරීම සඳහා, මම මෑතකදී ලස්සන, විචිත්‍රවත්, තරුණ බිරිඳක් සහ මවකගේ (අපගේ පවුලේ මිතුරෙකු) අවමංගල්‍ය උත්සවයේදී කතා කළා. ඇය සිය දන්ත ශිෂ්‍ය ස්වාමිපුරුෂයාව මුණගැසී විවාහ වන විට ඇය 1 වන කාණ්ඩයේ පාපන්දු ක්‍රීඩිකාවක්. ඔවුන්ට ලස්සන, වටිනා දියණියක් ලැබීමෙන් ආශිර්වාද ලැබුවා. ඇය අභියෝගාත්මක වසර හයක් පුරා විවිධ ආකාරයේ පිළිකා සමග සටන් කළා. සෑමදා තිබූ ඇය අත්විඳි මානසික හා ශාරීරික පීඩා නොතකා, ඇය තම ආදරණීය ස්වර්ගික පියාණන් කෙරෙහි විශ්වාසය තැබූ අතර, “දෙවියන්වහන්සේ විස්තරයේ සිටී” යන ඇයගේ ප්‍රසිද්ධ කියමන නිසා සමාජ මාධ්‍ය අනුගාමිකයන් විසින් බොහෝවිට එය උපුටා දක්වන්නට වුණා.
ඇයගේ එක් සමාජ මාධ්‍ය සටහනක, “ඔබ වටා ඇති සියලු හදවතේ වේදනාවන් සමග ඔබට තවමත් ඇදහිල්ල ඇත්තේ කෙසේද?” කියා යමෙක් ඇගෙන් ඇසූ බව ඇය ලියා තිබුණා. ඇය මේ වචන වලින් තදින් පිළිතුරු දී තිබුණා: “මෙමෙ අඳුරු කාල වලදී මාව ගෙනියන්නේ ඇදහිල්ලයි. ඇදහිල්ල තිබීමෙන් අදහස් කරන්නේ නරක කිසිවක් සිදුනොවන බව නෙවෙයි. ඇදහිල්ල තිබීම මට නැවත ආලෝකය ලැබෙනු ඇතැයි විශ්වාස කිරීමට ඉඩදෙනවා. එමෙන්ම මම අඳුර හරහා ගමන් කර ඇති නිසා එම ආලෝකය වඩාත් දීප්තිමත් වනවා. වසර ගණනාවක් තිස්සේ මා දුටු අන්ධකාරය තරම්ම වැඩි ආලෝකයක් මා දැක තිබෙනවා. මම ආශ්චර්යයන් දැක තිබෙනවා. මට දේවදූතයින්ව දැනී තිබෙනවා. මාගේ ස්වර්ගික පියාණන් මා රැගෙන යන බව මම දැනන් ඉඳලා තියෙනවා. ජීවිතය පහසු වූවා නම් ඒ කිසිවක් අත්විඳින්නට ලැබෙන්නේ නෑ. මේ ජීවිතයේ අනාගතය නොදන්නා නමුත් මගේ ඇදහිල්ල එසේ නොවෙයි. මා ඇදහිල්ල තබා නොගැනීමට තීරණය කරන්නේ නම් මම තෝරාගන්නේ අන්ධකාරයේ ඇවිදින්නට පමණයි. මක්නිසාද ඇදහිල්ල නොමැතිව, ඉතිරිවන්නේ අන්ධකාරය පමණයි.”10
ස්වාමින්වහන්සේ වන යේසුස් ක්‍රිස්තුස්වහන්සේ කෙරෙහි ඇදහිල්ල පිළිබඳ ඇගේ නොසැලෙන සාක්ෂිය—ඇගේ වචන වලින් සහ ක්‍රියාවෙන්—අන් අයට ආශ්වාදයක් වුණා. ඇගේ ශරීරය දුර්වල වුවත්, ඇය අන් අයව ශක්තිමත් වීමට ඔසවා තැබුවා.
සභාවේ ගණන් කල නොහැකි තරම් අනිකුත් සාමාජිකයින්, මෙම සහෝදරිය වැනි රණශූරයන්, සෑම දිනකම ඇදහිල්ලෙන් ගමන් කරන, අපගේ ගැළවුම්කාරයාණන් වන යේසුස් ක්‍රිස්තුස්වහන්සේගේ සැබෑ හා නොබිය අනුගාමිකයන් වීමට උත්සාහ කරන අය ගැන මම සිතනවා. ඔවුන් ක්‍රිස්තුස්වහන්සේ පිළිබඳ ඉගෙනගන්නවා. ඔවුන් ක්‍රිස්තුස්වහන්සේ පිළිබඳ දේශනා කරනවා ඔවුන් උන්වහන්සේව අනුකරණය කිරීමට උත්සාහ කරනවා. ඔවුන්ගේ ජීවිතයේ දවස් ස්ථාවර හෝ නොසන්සුන් භූමියක වේවා, ඔවුන්ගේ අත්තිවාරම ශක්තිමත් හා තල්ලු කළ නොහැකි බව ඔවුහු දන්නවා.
“How firm a foundation, ye Saints of the Lord” සහ “who unto the Savior for refuge have fled” යන පදවල ගැඹුරු අරුත තේරුම්ගත් භක්තිමත් ප්‍රාණයන් වන්නේ මොවුනුයි.11 සාන්තුවරයන්ගේ නමට සුදුසු අධ්‍යාත්මික පදනමක් සකස් කර ඇති සහ ජීවිතයේ බොහෝ කැලඹිලි තත්වයන් මැඩපැවැත්වීමට තරම් ශක්තිමත් හා සුරක්ෂිතව සිටින අය අතර ඇවිදීම ගැන මම මැනිය නොහැකි තරමින් කෘතඥ වෙනවා.
අපගේ පෞද්ගලික ජීවිතයේදී එවැනි පදනමක ඇති වැදගත්කම අපට ඉක්මවා යා හැකි යැයි මම සිතන්නේ නෑ. කුඩා කල සිටම, අපගේ ප්‍රාථමික දරුවන්ට මෙම සත්‍යය ගායනා කරන විට මෙසේ උගන්වනු ලැබෙනවා:
ඥානවන්තයා පර්වතය මත තම නිවස ඉදිකළා,
වැසි ඇද හැලෙමින් කඩා වැටුණා. …
වැසි ඇද හැළුණා, ඒනිසා ගංවතුර උඩට ආවා,
පර්වතය මත වූ නිවස නිශ්චලව නැගී සිටියා.12
ශුද්ධලියවිලි මෙම පදනම් මූලධර්මය ශක්තිමත් කරනවා. ගැලවුම්කරුවාණන් ඇමරිකාවේ ජනතාවට මෙසේ ඉගැන්වූවා:
“තවද නුඹලා මෙම දේවල් නිතර කරන්නේ නම්, නුඹලා මාගේ පර්වතය මත ගොඩනගා ඇත්තෙහුය.
“එහෙත් නුඹලා අතරින් කවරෙකු වුවත් මේවාට වඩා හෝ අඩුවෙන් කරන්නේ නම්, මාගේ පර්වතය මත ගොඩනගා නොමැත්තේය, එහෙත් වැලි අත්තිවාරම මත ගොඩනගා ඇත්තේය; තවද වැසි වැස, තවද ජලය ගලා, තවද හුලඟ හැමුවේය, තවද එම නිවස මත ගැසුවේය, තවද එය වැටෙන්නේය.”13
සෝල්ට් ලේක් දේවමාළිගාවෙහි සැලකිය යුතු අලුත්වැඩියාවන් “සහස්‍රය පුරා විඳදරාගන්නා අයුරින් ඉදිකරන ලද දේවමාළිගාව” දැකීමේ බ්‍රිගම් යන්ග්ගේ අභිලාශය ඉටුකිරීමට දායකවනු ඇතැයි සභාවේ නායකයින්ගේ අවංක බලාපොරොත්තුවයි. ඉදිරි වසර වලදී, සෝල්ට් ලේක් දේවමාළිගාවට අප විසින් සිදුකරන මෙම වැඩිදියුණු කිරීම්, පුද්ගලයන් සහ පවුල් වශයෙන්, අපවද, රූපක වශයෙන්, “සහස්‍රය තුලින් විඳදරාගන්නා අයුරින් ගොඩනගා ගැනීමට” අපව පොළඹවන ලෙස මාගේ යාච්ඤාවයි.
“සැබවින් ජීවනයවූ ඒ ජීවනය අල්ලාගන්නා පිණිස මතු කාලයට යහපත් අත්තිවාරමක් තබාගන්ටත් ආඥාකරපන්න” යන ප්‍රේරිත පාවුල්ගේ ඉල්ලීම ඉටුකරන විට අපි එසේ කරනවා.14 යේසුස් ක්‍රිස්තුස්වහන්සේගේ වන්දිගෙවීම පිළිබඳ අපගේ සාක්ෂිය සහ අපගේ ගැළවුම්කරුවාණන් සහ මිදුම්කරුවාණන් වශයෙන් උන්වහන්සේගේ භූමිකාව අපගේ ප්‍රධාන මුල් ගල බවට පත්වීම, අපගේ අධ්‍යාත්මික පදනම ස්ථීර කරනු ඇතැයි මාගේ දැඩි යාච්ඤාවයි, මම උන්වහන්සේගේ නාමයෙන් සාක්ෂි දරනවා, යේසුස් ක්‍රිස්තුස්වහන්සේගේ නාමයෙන්, ආමෙන්.