Pechekun ne Pworacho Ngeni ewe Chon Koum

Seni Elter Peter M. Johnson

Seni Ekkewe Fiik

Ifa usun sipwe kuna ei kinamwe, chiechemeni pwe ion kich, me pworacho ngeni ekkei unungat pisekin angang an ewe chon koum?

Pwi me fefinei, kinisou ren mettoch meinisin oua fori pwe opwe winiti, me pwan anisi pwan ekkoch ar repwe winiti chon tapweno mwirin Jises Kraist me angei ekkewe feiochun ewe tempel mi pin. Kinisou ren ami tupwon. Ami mi amwarar; ami mi ningoch.

Iei ai iotek pwe sipwe esinna ewe apungunon ewe Ngun mi Fel ren ach sipwe ennetin weweiti pwe kich noun Kot. “Ewe Famini: Eu Esinesin ngeni ewe Fonufan” a apasa “Non meinisin aramas—mwan me fefin—mi för non nikinikin Kot. Emon me emon mi eu ngun mi achengicheng noun emon sam me in me won nang, me, usun chok, emon me emon a wor an fetanin napanap me tufich napanap.”¹ Kich “ngun mi auchea mi kefinata pwe sipwe feito non ei fansoun soponon pwe sipwe fiti ewe angangenen fori ekkewe nongonongen ewe angangen fansoun soponon.”² Presiten Russell M. Nelson a apasa: “Ami mi kaeo non ewe nenian ngun an epwe ammonakemita ren mettoch meinisin oupwe kuna non ei nosoponon ewe fansoun soponon (nengeni D&C 138:56). Ena kaeo a nikitu non ami!”³

Ami noun Kot at me nengin mi kefin. Mi wor remi ewe pechekun ne pworacho ngeni ewe chon koum. Nge, ewe chon koum mi sinei kemi. A sinei usun ami newo non nang me a achocho ne apwangapwanga ami kofich won fonufan me nang ren an epwe aea ekkei unungant mettoch:

• Nikotupotup

• Oumwes

• Epinukungau

Nikotuputup

Ewe chon koum a aea ewe pisekin angangen nikotupotup non ewe ranin Moses. Ewe Samon a apasata ngeni Moses:

Pwe i noun we at.

Mei wor ren ewe Samon ew angang ngeni Moses, o i mi for non nikinikin Noun we Anaemon.⁴

Mwirin ei nemasepwi mi amwarar, Setan a achocho ne otupu Moses Ekkewe kapas i a apasa mi sokkono, a apasa Moses, noun aramas, pin ngeniei.⁵ Ewe nikotupotup esap chok an ereni pwe epwe pin ngeni Setan, nge a nikotupotup a nom non an apasata pwe Moses i emon noun aramas. Chechemeni, ewe Samon a keran ereni Moses pwe i emon noun Kot, mi for non nikinikinin Noun we Anaemon.

Ewe chon koum a woneno ne otupu Moses, nge Moses a engino o a, apasa, Suu seni ei, Setan, pwe ei chok emon Kot upwe fen ngeni, minne I ewe Koten ning.⁶ Moses a chechemeni ion i pwisin—emon noun Kot.

An ewe Samon kapas ngeni Moses mi pwan fich ngenikemi pwan ngeniei. Kich sia for non nikinikin Kot, me mi wor ach angang seni I. Ewe chon koum a achocho ne otupwukich pwe sipwe monnuki ennetin ion kich pwisin. Ika sise sinei ion kich pwisin, mi weires pwe sipwe esinna ion kich sipwe tongeni winiti.

Oumwes

Ewe chon koum a achocho an epwe oumwesi kich ach sipwe kun seni Kraist me An anen pwon mi pin. Elter Ronald A. Rasband a apasa ei: “Setan a mochen pwe sisap ekieki usun ach kapasen pwarata, nge ewe Samon a mochen epwe asarama kich non ach sipwe kaeo me fiti I non An angang.”⁷

Non ach ei ran, mei wor chommong minen osukosuka ekiek, usun Twitter, Facebook, urumotun kachito, pwan tepetep sokkun mettoch. Ekkei pekin kompiuter mi kan amwarar, nge ika sise tumunuoch, ra tongeni osukosuka kich pwe sise apwonueta ach tufichin nang. Ach sipwe aeaochu ekkan metoch mi tongeni awora ewe manamanen nang minne epwe etufichikich pwe sipwe kuna manaman ren ach achocho ne ionifengeni Israel won ekkewe ru epekin ewe mangak.

Sipwe tumunuoch me sisap tumunungau ren ach aea pekin kompiuter.⁸ Sipwe sopwene kukuta napanap minne sipwe aeaochu kompiuter an epwe kanakicheno ngeni ewe Chon Amanau me etufichikich ne apwonueta An angang ach sipwe ammonata ngeni An we Aruan Wareto.

Epinukungau

Saingon, ewe chon koum a mochen pwe sipwe epinukungau. Sia tongeni epinukungau nupwen sia anonnoi manauach ngeni manauan ekkoch are sia mefi sise apwonueta met aramas are kich pwisin sia mochen.

Nupwen ua poputani ai sukkunen toktor, ua mefi epinukungau. Ewe sukkun a chok etiwa femon chon sukun non ena ier, me ekkewe pwan ekkoch chon sukkun mi kan tipachem. A kan watte ar poin won test me ra fen wisan chon nemenemen angang, me ra kan pwara ren ar nipwakoch. Mwirin ekkewe ru wiik akkom non ewe sukkun, ua mefi epinukungau me tipemwaramwar pwe ir mi amwochuei, naman ra achou ei.

Ua fini pwe ika upwe awesano ekkei ruanu ier non sukkun, upwe anneani unusan ewe Puken Mormon iteitan tetenin sukkun. Iteitan ran nupwen ua anneani, ua esinna pwonuetan ewe Chon Amanau pwe ewe Ngun mi Fel a aitiei mettoch meinisin o a achemma ngeniei mettoch meinisin.⁹ Mi ennetata pwe ngang emon noun Kot, a achemma ngeniei pwe usap anenne inisi ngeni pwan ekkoch, me a awora ngeniei ewe tipepwos non wisei mi pin pwe upwe pworacho.¹⁰

Chienei achengicheng, ousap mut ngeni pwan emon pwe repwe sonani ami pwapwa. Ousap anenne kemi ngeni manauan pwan emon. Ouse mochen oupwe chechemeni an ewe Chon Amanau kapas en tong: “Upwe ngenikemi kinamwe upwe fang ngenikemi pwisin ai kinamwe. Ai fang ngenikemi esap usun an fonufan fang ngenikemi. Ousap noninen are tipemwaramwar, ousap pwan nuokus.”¹¹

Iwe ifa usun sipwe fori? Ifa usun sipwe kuna ei kinamwe, chiechemeni pwe ion kich, me pworacho ngeni ekkei unungat pisekin angang an ewe chon koum?

Akkomw, chechemeni pwe ewe aewin annuk mi napanap pwe sipwe tongei Kot ren netipach, ach manaman, ach ekiek, me ach pechekun.¹² Mettoch meinisin sia fori epwe nongonong won ach tong ngeni I me pwan Noun we. Nupwen sia anapano ach tong ngeni Ir ren ach pwonueta Ar kewe annuk, ach tufichin pwisin tongekich pwan tongei ekkoch epwe napano pwan. Sipwe poputa ne anisi ach famini, chienach, me chon ach piraku fanitan sipwe kunair ren mesan ewe Chon Amanau—pwe ir noun Kot at me nengin.¹³

Aruan, iotek ngeni ewe Sam non itan Jises kraist iteitan ran, iteitan ran, iteitan ran.¹⁴ Me ren iotek sipwe tongeni mefi ewe tongen Kot me pwari ach tong ngeni I. Ren iotek sia apasata ach kinisou me tingor ren ewe pechekun me tipepwos pwe sipwe fanga tipach ngeni tipan Kot me mefi emwen me awenan non mettoch meinisin.

Ua pese ngenikemi pwe oupwe “iotek ngeni ewe Sam ren unusen pochokunen netip, pwe oupwe ureno ren ei tong, … pwe oupwe winiti noun Kot; pwe nupwen i epwe pwato sipwe usun chok i.”¹⁵

Eunungatin, sipwe anneani me ekipwichi ewe Puken Mormon iteitan ran, iteitan ran, iteitan ran.¹⁶ Ai fansoun ekipwichi ewe Puken Mormon mi ochuno nupwen ua anneani ren ew kapaseis non ai ekiek. Nupwen sia anneani ren ew kapaseis, sia tongeni angei pwarata me esinna pwe ewe Soufos Joseph Smith a kapas wenechar nupwen i a apasata, “Ewe Puken Mormon mi wesen pung nap seni puk meinisin won fonufan, … me emon mwan [are fefin] epwe kan ngeni Kot ren an epwe apwonueta nongonongun, nap seni puk meinisin.”¹⁷ Ewe Puken Mormon mi masoueni ekkewe kapasen Kraist me epwe anisikich ne chechemeni ion kich pwisin.

Saingon, angei ewe sakramen non iotek iteitan wiik, iteitan wiik, iteitan wiik. Seni ekkewe angang mi pinen ewe pristut, fiti pwan ewe sakramen, ewe namanamen Kot mi tongeni pwa non manauach.¹⁸ Elter David A. Bednar a afanafan: “Ewe anukun sakrament mi pin me tungor fan fitu usun enetin aier pwe sipwe tongeni nimenimoch non pekin ngun. Ewe foforun sakrament, a pusin nonom won pusin i, ese tongeni epwe amworano tipis. Nge ika sia mwoneta ekiekich me fiti ewe fenin sakrament mi pin fiti netipechou me netip niamam, iwe ewe pwon pwe Ngunun epwe nonom rech fansoun meinisin.”¹⁹

Ren ach sipwe ani ewe sakramen non ach netipetekision, sia chechemeni an Jises riaffou non ewe atake mi pin itan Gethsemane me An asor won ewe irapenges. Sia pwari ach kinisou ngeni ewe Sam ren an tinatiw Noun we Anaemon, ach Chon Amanau, me pwari ach tipengeni ach sipwe apwonueta an annuk me pwe sipwe chechemeni I fansoun meinisin.²⁰ Mei wor asaramen ngun mi fiti ewe sakramen—mi kefin ngeni emon me emon, mi manaman, me mi auchea.

Chienei kan, ua pwon pwe nupwen sia achocho ne tongei Kot ren unusan netipach, iotek non itan Jises Kraist, anneani ewe puken mormon, me angei ewe sakramen non iotek, epwe wor rech ewe tufich, fiti ewe pechekunan ewe Samon, pwe sipwe akkufu ekewe nikotupotup an ewe chon koum, ekisatiw ekkewe oumwes mi osukosuka ach tufich non pekin ngun, me ungeni ekkewe epinukungau mi eweiresi ach tufichin mefi ewe tong an Samach won Nang me Noun we ngenikich. Sipwe poputa ne wesewesen weweiti ion kich pwisin pwe kich noun Kot at me nengin.

Pwi me fefinei, ua pwarata ai tong ngeni kemi me ua apasata ai kapasen pwarata pwe ngang mi sinei Samach won Nang mi manau me pwe Jises I ewe Kraist. Ua tongei Ir. Ewe Mwichefenin Jises Kraist ren Aramas mi Pin non Fansoun Soponon ina ewe muun Kot won fonufan. Mei wor ach sekening mi pin pwe sipwe ammonata ewe fonufan ngeni ewe Aruan Niwinsefaniton ewe Messaia. Non iten Jises Kraist, amen.

Esinesin

1. An Ewe Famini: Esinesin ngeni ei FonufanLiahona, May 2017, 145.

2. Nengeni Doctrine and Covenants 138:53; nengeni pwan Doctrine and Covenants 138:54–56.

3. Russell M. Nelson, “Stand as True Millennials,” Liahona, Oct. 2016, 48.

4. Nengeni Moses 1:4, 6.

5. Nengeni Moses 1:12.

6. Nengeni Moses 1:20; nengeni pwan Moses 1:16–19, 21.

7. Ronald A. Rasband, “Lest Thou Forget,” Liahona, Nov. 2016, 115.

8. Nengeni Becky Craven, “Careful versus Casual,” Liahona, May 2019, 9–11.

9. Nengeni John 14:26.

10. Wisach mi pin pwe sipwe angei manau ese much ikamwo emon a angei ingeitin fonufan ren an angang. Ewe Ngun mi Fel a achemma ngenikich usun wisach mi pin pwan ion sia tongeni winiti ika sia annomukich won ewe anen pwon mi pin me pworacho, ren pechekunun ewe Samon, ekkewe sosotun ewe chon koum.

11. John 14:27; auchean mi pachenong.

12. Nengeni Matthew 22:37–38.

13. Nengeni John 3:16; 1 John 4:19; Mosaia 2:17.

14. Nengeni 3 Nifai 18:18–21.

15. Moronai 7:48; auchean mi pachenong.

16. Nengeni Kevin W. Pearson, “Stay by the TreeLiahona, May 2015, 114–16.

17. Nepoputan ewe Puken Mormon.

18. Nengeni Doctrine and Covenants 84:20–21.

19. David A. Bednar, “Always Retain a Remission of Your Sins,” Liahona, May 2016, 61–62.

20. See Moronai 4:2–3; 5:1–2; nengeni pwan Doctrine and Covenants 20:76–79. Ouse mochen oupwe esinna pwe sia manau non ew fansoun mi kan namwot pwe Ngunun epwe nonnom rech fansoun meinisin.