Foun ira
Anomwu mesemi me netipemi epwe anongonong won ewe Chon Amanau Jises Kraist, me ewe pwapwa ese much a chok feito seni I.
Ngang mi sinei met oua ekieki! Emon chok nusun chon afanafan iwe sipwene rong seni Preseten Nelson. Uwa anean pwe oupwe tumunoch ren fitu minich nupwen sia witii nouch achengicheng soufos, ua finata ew itenap mi fokkun ameseik: ai itenap foun ira.
Fiti anuwan, nikinikin, me ngaren berry, uch, sennia, me kangit, ika foun ira mi sokkono usun kiwano ika pomegranate, foun ira ew anno sia sani non fansoun nangatam.
Fansoun An angang won fonufan, ewe Chon Amanau a anono fengeni foun ira ngeni mettoch auchea esemuch. A apasa, “Oupwe sinnenir ren minne ra fori.”1 “Efoch ira mi och a uwa och.”2 A pesei kich sipwe ionfengeni “uwar kewe fan iten ewe manau ese much.”3
Non ew tan mi fatafatoch kich mi sineochu non ewe Puken Mormon, ewe Soufos Lehi a kuna inisin non “ew rochen me toputopun fonu pon.” Mi wor konik mi nimengaw, ew toputopun rochopwak, aan mi sokkono, me aan mi annuk, pwan ew wokun mecha4 unukun ew aan mi wenechar me aukukkun mi weneno ngeni efoch ira ning mi wor “foun ira [ra fori] an emon epwe pwapwa.” An awewei ewe tan, Lehi a apasa: “Ua ... ochoch seni ewe foun ira; ... a fokkun ngarangar, nap seni meinisin foun ira ua neni ... akkom. … [Me] a fokkun aurano nguni ren pwapwa chapur.” Eifoun ira a “[watte] annon [seni] meinisin foun ira.”5
Wewen ewe Ira me Uwan kewe
Met ei ira me uwan mi fokkun auchea a esisinata? A wewe ngeni “ewe tongen Kot”6 me a esinei an Samach won Nang kokkoten ngaseno mi amwarar. “Pun Kot a fakkun tongei chon fonufan, ina minne a fangeno Noun we anamon, pun iteitan aramas mi nuku i resap mano, nge repwe kuna manau ese much.”7
Ei foun ira mi auchea a esissina ekkewe amwararen feiochun an ewe Chon Amanau Achasefan ese wor nonnon. Esapw chok ren ach sipwe manau sefan mwirin ach manau won fonufan, nge ren ach nuku non Jises Kraist, ach aier, me aneasochisi ekkewe annuk, sia tongeni musono seni ach tipis me fan ew sipwe uta nimenimoch me mwen Samach me Noun we.
Ach ochoch ewe foun iran ewe ira a pwan esissina pwe sia etiwa ekkewe angangepin me pwonen ewe kapas allim mi niwinsefan—sia papatais, angei ewe niffangen ewe Ngun mi Fel, me tonong non imwen ewe Samon ach sipwe efeioch ren manaman seni won tekia. Seni ewe chenin Jises Kraist me ren ach aponueta ach pwon mi pin, sia angei ewe pwon ese aukuk ren ach nom ren ach famini mi tupwen non unusen esemuch.8
Ese amairu pwata ewe chon ngang a anapanapa ewe fonu ira pwe “ewe mi fokkun apwapwa ngeni ewe ngun.”9 Mi ennetin apwapwa!
Ewe osukosuken nonomwech
Usun sia fen kaeo, pwe mwirin ach neni ewe auchean foun iran ewe kapas allim mi niwin sefanito, ach ennet me nikitu ngeni ewe Samon Jises Kraist mi chok weires epwe fis. Usun a fen fateno fan chomong non ei mwichenap, sia soposopono ne kuna osukosuk me otuputup, fitikoput me fitikoko, emichimich me sossot ra eriki netipach seni ewe Chon Amanau me ewe pwapwa me ning sia fen kuna ren ach tapweno mwirin I.
Pokiten ei sosot, an Lehi tan a pwan wato ew aurour! Won epekin ewe chonupupu mi wor ew womongun imw ren aramas mi sokopat ierir ra itini autun pour, asawa, me turunufasei ekkewe mi wenechar ra tapweno mwirin Jises Kraist.
Ekkewe aramas non ewe imw ra asawa me takiri ekkewe mi aneasochisi ekkewe annuk, ra aneanei pwe repwe ekisi me asawa ar nuku non Jises Kraist me non An kapas allim. Iwe pokiten kapasen fiu ren kapasen tipemwaremwar me koput ra tori chon nuku, ekkoch ekkewe ra fen neni ewe foun ira ra sawasini ewe kapas allim ra fen etiwa. Sossotun ewe fonufan mi muan ra etipisir; ra kun seni ewe ira me foun ira me, non kapasen ewe Puk fel, “[rikino] ngeni ekkewe aan mi annuk iwe [ra] monucheno.”10
Non ei fonufan ikenai, ekkewe mwichen chon kou noun ewe chon koum ra angang tam, ra mwitir ne awatteno ewe watten me womwongun imw. Kapachetan a paraseno epekin ewe chonupupu, a aneanei epwe choroku imwach kewe, nupwen chon itini me chon asawa ra puchor neuemong neran me nepwin ren pisekin appio won internet.11
Preseten Nelson a awewei, “Ewe chon koum a anapano an achocho ne aosukosuku kapasen pwarata me akouno ewe angangen ewe Samon.”12 Sipwe chechemeni Lehi kapas: “Sisapw ekieki usur.”13
Inamo sisap nuokus, mi auchea sipwe moneta. Fan ekkoch, kukkun mettoch mi tongeni osukosuka ngunuch. Ose mochen ousap mut ngeni ami kapas eis, ekkewe kapasen esit seni ekkoch, nukunukumangen chienemi, are tipis me netipengau epwe okunu kemi seni ekkewe feiochu mi ngar, unus me manaman minne a feito seni ekkewe foun ewe ira. Anomwu mesemi me netipemi epwe anongonong won ewe Chon Amanau Jises Kraist me ewe pwapwa ese much a feito me ren I.
Ewe nuku an Jason Hall
Non June, Ngang me punuei Kathy aua fiti soman Jason Hall. Atun an we mano, a 48 ierin me a angangen Preseten non ewe mwichen elter.
Ikkei an Jason kapas usun ew mettoch a siwini manauan:
“[Atun 15 ieri] [ua] nom non ew aksetenin. … A [feiengaw] uwei me ua peno seni fan mwari feitiw. Use chiwen tongeni amwokutu pechei me ekis mwokutukutun pei. Use chiwen tongeni fetan, uta, … ika pwisin mwongo. A weires ai upwe ngasangas me kapas.”14
“‘Semei achengicheng [non nang],’ Ua tingor, ‘ika a chok wor pei, ngang mi sinei pwe upwe tongeni manau. Kose mochen, Semei, kose mochen. …
“…‘Anomwu pechei, Semei; Ua chok [Iotek fan iten] aean pei.’”15
Jason ese angei aean poun. Ami mi rong ekkewe mwongungu seni ewe wamgonun imw? “Jason Hall, Kot ese ausening om iotek! Ika Kot mi tong, ifa usun a nikitukeno kopwe iei usun? Pwata sipwe nuku non Kraist?” Jason Hall a rong mongungur, nge ese apwonuetar. Nge a kamatip won uwan ewe ira. An nuku non Jises Kraist a nukuchar. A sochungio seni ewe university me apwupwunu ngeni Kolette Coleman non ewe tempel, a awewei pwe Ii ewe tongen manauan.16 Mwirin 16 ierin ar pupunu, pwan ew manaman, nour at auchea, Coleman, a uputiw.
Ifa usun ra amari ar nuku? Kolette a awewei: “Aua nuku non an Kot kokkot. Me a ngenikem apinukunuk. Am mi sinei pwe Jason epwe [non eu ran] pochokun sefan. … Sia sinei pwe Kot a awora fan itach emon Chon Amanau, ewe an asoren achasefan a atufichi kich ne neneno mwach nupwen sia mochen fangeta.”17
Kapas ne soman Jason we, Coleman 10 ierin a apasa pwe seman we a aiti: “Semach won Nang [a wor] an kokkot fan itach, manau won fonufan epwe ammafen, me sia tongeni nom non famini. … Nge … sipwe weri mettoch mi weires me sipwe fori muan.”
Coleman a sopweno: “Samach won Nang a tinato Noun we, Jises, ngeni fonufan. An angang pwe epwe unusoch. Epwe echikara aramas. Epwe tonger. Me mwirin epwe riaffou fan iten ach metek, riaffou, me tipis. Iwe a mano fan itach.” Iwe Coleman a pwan apasa, “Pokiten A fori ei, Jises mi sinei ifa usun ua mefi iei.”
“Unungat ran mwirin Jises a mano, I … a manau sefan ren inisin mi unusoch. Ei mi auchea ngeniei pokiten ngang mi sinei … inisin [semei] we epwe unusoch me aupwe nom fengen non ew famini.”
Coleman a apasa: “Iteiten nepwin seni nemonukonui semei a apasa ngeniei, ‘Papa a tongeok, Samach won Nang mi tongeok, me en emon at mi murino.’”18
Pwapwa a waroto pwokiten Jises Kraist
Preseten Russell M. Nelson a awewei pwata a wor an ewe faminien Hall a mefi pwapwa me apinukunuk. A apasa:
“Ewe pwapwa sia mefi ese anongonong won nonnomuch kewe nge mi anongonong won met mi nom nukanapen manauach.
“Nupwen sia anongononga manauach won an Kot kokkoten amanau … me Jises Kraist me An kapas allim, sia tongeni mefi pwapwa ese nifinifin met mi fis—are ese fis—non manauach. Pwapwa mi feito seni me pokiten I. I ewe popun pwapwa. …
“Ika sipwe nenengeni ekkewe chon fonufan … , sisap kuna pwapwa. … [Pwapwa] ew nifang a feito nupwen sia achocho ne manauoch, usun Jises Kraist a aiti.”19
Ew pwon nupwen ka niwin
Ika ese nom remi ewe uwan ewe ira ren ekkoch fansoun, kose mwochen kopwe sinei pwe poun ewe Chon Amanau mi chok itiu ngeni kemi. A kori kich non tong, “Aier me feito rei.”20 An foun ira mi chommong me mi chok ukkuwa. Ese tongeni kamo ren moni, me ese amam emon a ennetin mochen ewe foun ira.21
Ika ka mochen niwin ngeni ewe ira me neni foun we sefan, poputa ne iotek ngeni Semom won Nang. Nuku non Jises Kraist me pechekunen an asoren achasefan. Ua pwon ngeni kemi pwe nupwen oupwe kun ngeni ewe Chon Amanau non ekiek meinisin,22 uwan ewe ira epwe ami sefan, mi anno ngeni ami neni, pwapwa ngeni ngunumi, “ewe mi unusen auchea me nein ekkewe niffangen Kot.”23
Unungat week a no, ua kuna ewe pwapwan an ewe Chon Amanau foun ira mi pwano nupwen Kathy me ngang aua fiti efeiochun ewe Lisbon Portugal Tempel. Ennetin ewe kapas allim mi niwinsefanito a suk ngeni Portugal non 1975 nupwen ketiwen namanam a tufich. Chommong ekkewe Sounang mi tupwen ekkewe ra akkom neni ewe foun ira nupwen ese wor mwicheich, ese wor imwen fan, me ese wor tempel mi arap ngenir kukun seni 1,000 mwain tawawan ra fitikem ne pwapwa pwe uwan ewe ira auchea iei a nomw non imwen ewe Samon non Lisbon, Portugal. Ua sufonuti me asamonu ekkei Aramas mi Pin non Fansoun Soponon ekkewe mi annomu manauer won ewe Chon Amanau.
Ewe Chon Amanau a apasa, “Ion epwe nonnom non ngang o ngang non i, epwe uwa chommong, pun ami ousap tongeni fori och mettoch me nuki.”24
An kapas nesesorei ngeni chon ewe Mwichefen, Preseten Nelson a apasa, “Pwi me fefinei mi acheingicheing, ami nenien apirun uwan met a feito seni seni ach anneasochisi ekkewe afanafanen Jises Kraist. Iwe apwan apachata: “Uwa kinisow ngeni kemi! Ngang ua tongeikemi!”25
Am mi tongeok, Preseten Nelson.
Ngang emon chon kuna ewe manamanen pwarata mi nom ren nouch achengicheng Preseten. I ewe soufosun Kot. Usun Liai me nom, Preseten Russell M. Nelson a kokkori kich me meinsin chon ewe faminien Kot, ar repwe feino me ochoch foun ewe ira. Amwo epwe wor rech ewe tekison me pochokun ne tapweno mwirin an aurour.
Ua tekison ne pwarata pwe Jises Kraist i ewe Noun Kot. An tong, an manaman, me chen mi esenipato mettoch meinisin mi auchea ese much. Ua pwarata non iten Jises Kraist, amen.