Mammasa ne Iotek Fansoun Meinisin (Alma 34:39; Moronai 6:4; Luke 21:36)
Akkachocho fansoun meinisin epwe namwot ne fiu ngeni chipwang me tumunungaw.
Ua ennetin iotek ren ewe aninisin Ngun mi Fen epwe anisuk pwan anisiei non ach ei pwapwa me fen fengen.
Non April 1976, Elter Boyd-K. Packer a fos ngeni ekkewe sarafon ewe Mwichefen non mwichenapen Mwichifen. Non itenapen an afanafan mi itefouno “Spiritual Crocodiles,” a porous usun nupwen a no ngeni Africa ren wisan a kuna ekkoch crocodile mi monono me ra chok mamasa inet atun repwe ne nini ener maan mi tumunungaw. I a pwan awewei ekkewe crocodile ngeni Satan, minne a niapeni sarafo mi tumunungaw me rese essina pwe a opano ewe ninin fonufan ren tipis.
Ngang uwa 23 ieri nupwen Elter Packer a afafana ena porous, non na atun a fitu chok ran a tori fansoun am me Susan aupwene etiwa aewin noum we semirit. Aua men chechemeni me sani masouen an afanafan itenapan suseni tipis me angangochun ne porous usun mokutukutun maan ren epwe aiti auchean pekin ngun.
Am me Susan aua pwan sai ngeni Africa fan chommong fan iten wisem. Me aua pwan tongeni kuna ekkewe maan mi amwaarar minne ra nom non na fonu. Ren met aua chechemeni usun an Elter Packer ewe afanafan a anisikem non manauem, aua fen achocho ne katon me kaeo mettoch mi auchea seni fofforun ekkewe maanun Africa.
Uwa mochen porous usun fofforun me mwokutukutun ruemon cheetahs am me Susan aua katon atun ra kutta ener me awewei ekkoch ekkewe mettoch aua kuna ngeni ach manaueni ewe kapas allimen Jises Kraist.
Cheetahs me Topis
Cheetahs ir ekkewe maan mi mwitir won unusen fonufan me ra fokkun mwitir ne sa mwitirir ukukun 75 ren eu awa (120 km/h). Ekkei maan mi ningoch ra tongeni poputa ne uta chok me saa ren mwitirin 68 mile ren eu awa (109 km/h) non chok unugat seken. Cheetahs ra kutta ekkewe maan mi chok arorokan ra mwitir ne cher me nireno.
Am me Susan aua katon non ruu awa ruemon naion non ar tapwei eu mwichen topis, ekkewe chia mi chommongono me non Africa. Ewe fetin a men tam, non nenien Africa a chooneno me ekkewe maan ra opono nein ewe fetin non ar tapwei ewe mwichen topis. Ekkewe cheetahs ra imufesen non 100 iach (91m) nge ra angang fengen.
Emon cheetah a chok mwommot non ewe fetin me ese mokut, me ewe emon a minatiw inisin me ekkis me ekkis a kunnungeni ekkewe topis rese kuna. Iwe ewe cheetah a chok mwommot a feinno nein ewe fetin atun chok ewe emon cheetah a mwommot. Ei nikinikin ekkis siwin nefinen ewe emon cheetah a kunnungeni ekkis me ewe emon cheetah a chok uta non ewe fetin a soposopono fan chommong fansoun. Ra fori ei nikinikin mwokutukut ekkis me ekkis ne osukosuka ekkewe topis pwe resapw essina ewe osukosuk epwe torir. Ekkewe ruemon cheetahs ra tipepos me sopweno, ne angang fengen ne kuta ener mwongo.
Nefinen ewe watte mwichen topis me ekkewe cheetahs ra kanneto fitemon watte topis ra uta won ekkoch chukuchukun puunun machang usun nikukutong me katon usun chon mammasa. Ewe tufichin kuna pokiten ar nom won ekkewe chukuchukun puun a anisi ekkei topis mi mammasa me kuna napanapan osukosuk.
Iwe mwitir chok, nupwen ekkewe cheetahs ra kanneto me a tufich repwe niap, unusen ewe mwichen ekkewe topis ra suuu. Use sinei ika mi wor are ifa usun ekkewe topis mi mammasa ra ait ngeni ewe watten mwich, nge mi wor eu esisin a ngenir, me meinisin ekkewe topis ra saa ngeni eu neni mi nukunukoch.
Me met ekkewe cheetahs ra pwan fori mwirin? Rese witi, ra chok poputa sefan ar nikinikin ekkis siwin seni emon epwe minatiw inisin me kine ngeni ekkis me ekkis me ewe emon epwe chok mwommot non ewe fetin. Ei nikinikin kut ener mi chok soposopono. Rese kouno. Rese asese ika witi ekkis fansoun. Ra tipepos ne apwonueta ar kokkot ne osukosuka me imufesen. Am me Susan aua katon ekkewe cheetah tori ra touano me ause kuner, ra mokut ngeni ekkewe topis ekis me ekis fansoun meinisin.
Non ena pwinin Am me Susan aua fofoos fengen usun met aua fen kuna me kaeo. Aua pwan aporousa met a fis ngeni nouem kewe semirit noun noum kewe me ait ngenir ekkewe mettochun kaeo mi auchea. Iei upwe pwan foos usun unugat ekkena mettochun kaeo.
Mettochun Kaeo #1—Tumunuoch seni Mi Ngaw a Asokkano Nikinikin
Me rei, ekkewe cheetahs ramen ningoch, sokkono, me maan minne ua mochen katon. Unen emon cheetah mi nofit on me chon tori ekkis chon nofitin pwech fiti tikitikin chochchon a men och ne anisir pwe ra tongeni opono nupwen ra achocho ne kuut ener mwongo nein ewe fetin non Africa.
Non ei napanap, ekieki me foffor mi ngaw won pekin ngun fan chommong repwe usun nikinikin mettoch mi och, saani, ika apwapwa. Iwe, non ei fansoun fonufan, mi namwot pwe emon me emon kich sipwe fokun tumunoch seni mettoch mi ngaw minne a pomweni pwe mi och. Usun Isaiah a apasa, “Riaffou ngeni ir ekkewe ra eita ngaw ngeni och, me öch ngeni ngaw, ekkewe ra siwini rochopwak ngeni saram, me saram ngeni rochopwak, ekkewe ra siwini kipwin ngeni ngarangar, me ngarangar ngeni kipwin!”1
Non ei fansoun watte osukosuk ren tufichin atai manau mi epinipin usun mi wor an emon mummuta me fitikoko a wewe ngeni tufichin emon ne fori met a mochen, sia men feioch pwe sia manau non ei fansoun soponon atun ewe saram seni ewe kapas allim mi niwinsefanito a asarama manauach me anisikich ne esinna an ewe chon koum kokkot mi rochopwak ne osukosuk me imufeseni.
“Iwe ekkewe mi tipachem me etiwa ewe ennet, me ra anommu ewe Ngun mi Fel an epwe emwenir, me rese tupuno we iei uwa apasa ngonuk, ir resap ukukuno me koturunong non ewe ekei, nge ir repwe soposopono non na ran.”2
Mettochun Kaeo #2—Neneno me Mammasa
Ren emon topi, eu chok kukkun fansoun tumunungaw ika tanechpwak epwe atufichi ewe mwitirin ninino an emon cheetah. Usun chok, tumunungaw ika tanechpwak won pekin ngun a tongeni muut ngeni ewe fofforun ewe chon koum epwe tori kich. Ach tumunungawen mettochun ngun a etiwa watte osukosuk non manauach.
iStock.com/Angelika
Nifai a anapanapa usun non ewe ranin soponon Setan epwe achocho ne echipa me emichereno noun Kot kewe ngeni tumunun “mochenin fonufan, pwe repwe apasa: Meinisin mi murinno non Zion; ewer, Zion a feioch, meinisin mi murinno—me iwe iei ewe tefin a otupano ngunur, me emwenireno ekis me ekisitiw ngeni hell.”3
Akkachocho fansoun meinisin epwe namwot ne fiu ngeni chipwang me tumunungaw. Ren epwe or tumunuoch a wewe ngeni ewe nikinikin ika fofforun tumunu ne mammasa fan iten tufichin osukosuk ika efeiengaw. Me ewe kapas mammasa a fiti ewe fofforun kopwe neneno ne rangana me tumunu. Ren pekin ngun, a namwot sipwe nenneno me tumunuoch ngeni ekkewe memmefin ewe Ngun mi Fel me ekkewe esisin seni noun ewe Samon chon mammasa won ekkewe imwen mammas.4
“Ewer, iwe ua pesekemi ... pwe oupwe soposopono mwitir ne iotek, pwe ousap emwenieno me ren ewe sossotun ewe tefin, ... pwe iwe, i esap aniwini ngeni kemi mettoch mi och.”5
Ach anonga manauach won me non ewe Chon Amanau me An kapas allim a atufichi kich ne pworacho ngeni ewe mochenian inis ne winiti chipwang won pekin ngun. Seni ach efeioch ren foun mesach ne kuna me seningach ne ausening,6 ewe Ngun mi Fel a tongeni awatteno ach tufichin nengeni me ausening nupwen sise nuku mi namwot sipwe nengeni me ausening ika nupwen sia ekieki ese wor met sipwe kuna ika rongorong.
“Mammasa, iwe, pwe kepwe monneta.”7
Mettochun Kaeo #3—Weweiti ewe Kokkotun ewe Chon Koum
Emon cheetah a nikinikin niapeni pwan emon maan ren anan. Unusen ewe ran, iteitan ran, emon cheetah a nikinikin niapeni.
Setan “i ewe chon koum ngeni wenechar me ekkewe ra achocho ne fori mochenin Kot.”8 Unusen ran, iteitan ran, eu chok mochenin me popun pwe noun Kot kewe at me nengin repwe riaffou usun chok i.9
An ewe Sam kokkotun pwapwa a for ne awora emwen ngeni Noun kewe semirit, pwe repwe mefi pwapwa mi sopweno, me aniwinir ren tumun ngeni I fiti inis mi manausefan me fefeita unusoch. Ewe tefin a angang pwe noun kewe at me nengin repwe osukosuk me sau me kouno ren ar tufichin fefeita ese much. Ewe chon koum a angang fansoun meinisin ne fiu ngeni ekkewe kinikinin an ewe Sam kokkot a oput nap seni mettoch meinisin.
Setan ese wor inisin, me an fefeita ese much a fen kouno. Usun chok konik non eu chonupupu a kouno ren eu minen epit, an ewe chon koum tufichin fefeita a osukosuk pokiten ese wor inisin futuk. Pokiten an ungeni, Lucifer a pwisin epeti ekkewe feioch me fiisioch mi tufich ren eu inisin futuk me chuun. Eu wewen ewe kapas non pukefel poutmwanino a fatafatoch non an ese tongeni soposopono ne fefeita me winiti usun Samach won Nang.
Pokiten eu inisin futuk a nom nukunapen an ewe Sam kokkotun pwapwa me ach fefeita non pekin ngun, Lucifer a achocho ne osukosuka ach tufichin fefeita ren an sotunikcih ne fori mettoch mi mwan ren inisich. Preseten Russell M. Nelson a aiti kich pwe tumunun ngunuch a nom ren “‘sisap fori ewe aewin kukkun mettoch epwe emweni tori ia sisap feinno ia me fori met sisap fori.’ … Pun kich aramas mi wor rech mochenin [inis] mi namwot ngeni ach sipwe manau. ‘Ekkei mochen mi fokkun namwot ngeni ewe soponon tappin aramas. Iwe, met ewe chon koum a fori? … A awata kich ren met kewe sia mochen. A sotunikich ne mwongo mettoch sisap mwongo, ne unumi mettoch sisap unumi, me tongei usun met ese och sipwe tongei!’”10
Eu mettoch mi ennetin ngaw pwe ewe chon koum, ewe a riaffou pokiten ese wor pwisin inisin, a etiwa me sotuni kich ne fiti i non an riaffou ren ach atai inisich. Ewe pisekin angang ese wor an me ese tongeni aea ina ewe aewin mettoch minne a echipa kich ngeni ach kiteterinon non pekin inis me ngun.
Ach weweiti ren kokkotun ewe chon koum a men namwot ach sipwe ennetin monneta ngeni ewe tufichin fiu.11 Pokiten Kaptin Moronai a sinei kokkotun ekkewe chon Leiman, a monneta ne fiu ngenir atun ra war me a pworacho.12 Me ena chok nongonong me pwon a pwan ennet ngeni kich.
“Ika oua fen moneta ousap nuokus.”
“Me kesap nom fan nemenien ewe chon koum.”13
Etiwa, Pwon, me Kapasen Pwarata
Usun chok sia tongeni kaeo mettoch mi auchea seni fofforun ekkewe cheetah me topis, emon me emon kich sipwe achocho ne kuna ekkewe mettochun kaeo me esinesin mi nom non met a fiis non manauach iteitan ran. Ren ach achocho ngeni pwe ach ekiek me netipach repwe suk ne angei emwen seni nang me ren ewe manamanen ewe Ngun mi Fel, ina atun kich mi tongeni angei emwen mi nap me pwan esinesin mi auchea ne tumuni kich repwe poputa seni met a fiis non manauach. Kapas monomon mi men auchea ra nom non ekkewe pukefel me pwan non manauach.
Uwa chok aporousa usun unugat ekkewe mettochun kaeo non met a fis non Am sai me Susan non Africa. Uwa etiwa me pesei kemi opwe ekieki usun met a fis nefinen ekkewe cheetah me topis me achocho ne esina pwan ekkoch mettochun kaeo fan itom me omw famini. Ouse kan mochen oupwe chechemeni fansoun meinisin pwe imwomw ina ewe ennetin nenien kaeo me manaueni ewe kapas allim.
Ren omw apwonueta ei tungor ren nuku, ekiek mi asaram epwe toruk, memmefin pekin ngun epwe watteno non netipomw, me kopwe esinna met kopwe fori ika sopweno ne fori pwe kopwe tongeni “angei wom [ewe] fouten epet [an Kot], pwe ka tongeni pworacho ngeni ewe ran mi ngaw, ka fori unusen omw tufich, pwe kopwe tongeni pworacho.”14
Uwa pwon pwe ekkewe feioch seni monneta me tumun non pekin ngun epwe toruk non manuaomw ren omw mammasa ne iotek ren tipepos me fansoun meinisin.
Uwa pwarata pwe soposopono won ewe aanen pwon mi pin epwe wor tumun ngeni pekin ngun me epwe etiwa pwapwa ese muuch non manauach. Me uwa pwarata pwe ewe Samon a manausefan me manau epwe anisuk me apechekunok non fansoun mi och me ngaw. Usun ekkei nongonong ua pwarata non iten Jises Kraist mi pin, amen.