Masowen ewe Pwon mi Pin
Ach sipwe nomw ren Kot me fiti emon me emon won An ei anen pwon mi pin sipwe feioch ren masowen ewe pwon mi pin.
Pwi me fefinei achengicheng, ewe porous porousen emon Kinter a kaeo an epwe iotek. “Kinisou ngonuk ren ewe mesen A, me ewe mesen B, … ewe mesen G.” Ewe semirit a sopweno an we iotek, “Kinisou ngonuk ren ekkewe mesen X, Y, Z. Semei mi Napanap non Nang, kinisou ngonuk ren ewe nampa 1, ewe nampa 2.” Noun ewe Kinter we sense a nuokus nge a uti. Ewe semirit a apasa, “Kinisou ngonuk ren ewe nampa 5, ewe nampa 6—me kinisou ngonuk ren nei we sensen Kinter. I chok ewe a mut ngeni ei ai upwe asopwano ai iotek.”
Samach won Nang a ausening ngeni an emon me emon semirit iotek. Ren ennetin tong, a mochen sipwe nuku me choni ewe pwon mi pin.
Ei fonufan a uur ren mettoch ese ennet, ika nikinik met ese pung, me foffor mi emweningaw. Usun chommong mettoch a mwochomwoch me etitipan. Nupwen sia nikitano ekkewe maas, nikinik, sokkun fofforun sani me koput, sipwe mochen mettoch nap seni ekkewe mettoch mwitir ne suueno, esor ennetin ar wewen, mocheniaiti mettochun fonufan. Kinisou Chapur, pwe mi wor anen ponuen met mi auchea.
Nupwen sia feito ngeni an Kot we annuk mi nap sipwe tongei I me chon oruuch ren ewe pwon mi pin, sisapw ekieki nge kich chon ekis me wasona pwe wesen kich pwukutan Noun semirit.1 Ekkewe napanapen kapas seni nom mi chiwen pung. Ach nikitano manauach kewe ngeni masowen ewe pwon mi pin, sipwe kuna me winiti ion sipwe winiti2 ngaseno, manau, ennet—me ait ngeni kich usun auchean nefinach. Ach choni pwon mi pin sia fori me aponueta ennetin npwon ngeni Kot me ekkoch, non angangepin, minne mi etiwa ewe manamanen Kot an epwe pwano non manauch.3 Nupwen sia pwon meinisin tufichich, sipwe fokkun winino seni nomw. Masowen ewe pwon mi pin a ngenikich neniach, kokkot, me tufichin winiti. A awora nuku ngeni manau me manau ese much.4
Ekkewe pwon mi pin a winiti eu pisekin tong ngeni me seni Kot me seni me ren emon me emon. Kot Samach won Nang, a fokkun tongei kich me sinei kich nap seni ach tongei me sinei pusin kich. Nuku non Jises Kraist me an emon ekesiwin (aier) a awora kirekiroch, umoumoch, omusano. Ekkei a anisi ewe metek, tipitipingaw, apuungungaw sia mefi non ei manau. Nge Kot, Samach won Nang a mochen sipwe angei an we niffang mi murino—An pwapwa, An we manau ese much.5
Samach Kot I emon Koten pwon mi pin. Me ren nikinikin, A “aponueta pwon mi pin me pwari an umoumoch.”6 An we pwon mi pin ese much “ren ukukun nangatamen fansoun epwe soposopono, are ewe fonufan epwe nonnom, are epwe wor emon aramas won ewe fonufan epwe amanaua.”7 Esapw wor namwoten ach nukunukumang non manauach me tipemwaramwar, nge sipwe pwapwa me chengen non nefinach non ewe pwon mi pin “epwe pochokun seni ewe senin mano.”8
An Kot kewe annuk me pwon mi pin mi namwot ngeni aramas meinisin nge ar feioch epwe ngeni emon me emon pwisin. Me ren Kot epwe chok taitap, emon me emon non eu me eu neni me tappin fansoun ra tongeni angei ekkewe annukun pwon. Non an Emon Pungun Finata—emon me emon epwe finata ika epwe etiwa ekkewe annuk. An Kot kewe annuk a wor kapasen emwen non anen An we pwon mi pin. Sia eita ngeni an Kot we kokot epwe uweato Noun kewe semirit non imwan ewe kokkoten amanauen, kokkoten manau ese much, kokkoten pwapwa. Amanauen, manau ese much, mun pwapwa selestial a tufich pokiten Jises Kraist “mine awora ei unusochun achasefan.”9
Ach sipwe nomw ren Kot me fiti ekkoch won An ei anen pwon mi pin sipwe feioch ren masowen ewe pwon mi pin.
Aewin, masowen ewe pwon mi pin urenapen Jises Kraist usun “i chon afferun ewe minafon pwon mi pin.”10 Mettoch meinisin a tongeni tufich fan itach nupwen sia “nimenimoch non Kraist … non ewe pwon mi pin an ewe Sam.”11 Meinisin mi och me ekkewe feioch mi pwon epwe wor ngeni ekkewe mi nukuchar tori sopwonon. Ewe “fonuen pwapwa ngeni ekkewe ra aponueta ekkewe annukun Kot” repwe “feioch non mettoch meinisin, me ruu aion me ngun,” me repwe “nonomw ren Kot non … esapw tongeni wes pwawpa.”12
Ika sipwe afona ach kewe pwon mi pin, fan ekkoch mi tufich sipwe mefi pwe sia nomw nein ekkewe chon nang. Me sipwe—ekkewe sia tonger me ekkewe ra efeiochu me ei epek fonufan me ekkewe sia tonger me ra efeiochu kich me enan epek ei fonufan.
Kukuto chok am me Sister Gong aua kuna masowen ewe pwon mi pin ren an we umoumoch me non eu rumen pioing. Emon anuon semenap a fokkun namot ngeni efou kitni. An we famini ra fokkun netipengaw, echikifen, me iotek fanitan an epwe wor siwinin an we kitni. Eu porous ra rong pwe a wor efou kitni, punuwan we a mongunungun ne apasa, “Amwo ewe eu famini repwe pochokun.” Ach choni ewe pwon mi pin, non an ewe aposel Paul kapas, “pwe upwe fituk sipwe aurur fengeni kich ren ach nuku.”13
Non manauach, sia nikitano ach nuku non Kot, nge I ese tongeni nikitano an nuku non kich. Iwe usun, An we tengki non imwan a chok tin fanosun meinisin. A etiwa kich ach sipwe feito ika niwinto ngeni ewe pwon mi pin a aiti ngeni kich An we an. A utiwit an epwe turufi kich, ina mwo ika sia chiwen “towaueno seni.”14 Nupwen sia nengen fichi ren ach nuku ren ewe nikinikin feioch, ika ren met sia fori non manauach, sia tongeni kuna An we umoumoch me pesepes, akaewin non riafou, netipengaw, me sosot, pwan non ach pwapwa. Nge nengeni iteitan sipwe weires ika turutiw, ika pwe sia chok achocho ne feino ngeni, Epwe anisi kich, eu fan eu.
Oruan, ewe Puken Mormon pwan eu pisekin pwarata sia tongeni komoch non pouch. Ewe Puken Mormon ewe pisekin pwon ren ewe achufengenin noun Kot kewe aramas ra osuni pwe eu minefon pwon mi pin.15 Nupwen sia aneani ewe Puken Mormon, akanaemon ika ren ekkoch, noukukun ika nouomong, sia tongeni tingor ren Kot “ren unusen netipach, ren ach mochen sinei, non ach nuku non Kraist,” me sipwe angei seni manamanen ewe Ngun mi Fel Kot epwe aitingonuk ewe Puken Mormon mi ennet.16 Ei a aiti ngeni kich pwe Jises Kraist ach Chon Amanau, Joseph Smith ii ewe soufosun ewe Niwinsefanito, me an ewe Samon we Mwichefen a iteit seni—Ewe Mwichefenin Jises Kraist ren Aramas mi Pin non Fansoun Soponon.17
Ewe Puken Mormon an ekkewe soufosun nomw kapas ngeni noun Liai kewe semirit, “noun ekkewe soufos semirit.”18 Mwirimwirimi kewe ra angei ekkei pwon fanitemi, nonomur, repwe esinna mongungur usun ita nge repwe kapas seni ewe puun me non ewe Puken Mormon.19 Ena mongungu ka mefi nupwen om aneani epwe pwarata ngonuk pwe en “semiritin ewe pwon mi pin”20 me Jises Kraist ii noum we Chon Masen Siip mi murino.
Ewe Puken Mormon a etiwa kich meinisin, non an Alma kapas, sipwe tonong “non ewe pwon mi pin ren [ewe Samon], pwe [sipwe] angang ngeni i me aponueta an kewe annuk, pwe epwe ninau Ngunun we iteitan [woch].”21 Nupwen sia mochen siwin ngeni murino—usun emon a apasa, “wesino ne riaffou kopwe pwapwa winiti pwapwa“—a tongeni suk ngeni kich emwen, aninis, me pochokun. Sia tongeni choni pwon mi pin me fiti Kot me an chon nukuchar sia tongeni angei ekkewe feioch mi pwon non ewe annuk an Kraist22—iei.
Niwinsefaniton mumutan pristut an epwe efeiochu Noun semirit meinisin iei ewe aunungatin anukunuk non masowen ewe pwon mi pin. Non ei kinikinin fansoun, John ewe Soupaptais me ekkewe Aposel Peter, James, me John ra feito me chon kapasen pwarata seni Kot ar repwe eniwinato An we manamanen pristut.23 An Kot we pristut me An kewe annuk ra anisi kich me fonufan me apungano pwonen nefin non nang.24
Pristut a tongeni efeiochu kich seni uputiw ngeni peias—seni iten emon monukon me efeioch ngeni eu fenin peias. Efeiochun pristut ren echikar, aurur, aurour. Emon semenap a song ngeni noun ewe at tori ewe fansoun a tongei me epichano an we a ngeni noun we at ewe umoumoch ren an a efeiochu ren ewe pristut. Ewe chok emon memper non an we famini, emon fopuun ese weweochuti usun an Kot we tong fanitan tori ewe fansoun a angei eu murinon efeiochun pristut. Epek ewe fonufan, mweno ren petriark ra amoneta non ngun ar repwe fori efeiochun petriark. Nupwen ewe petriark a watiw poun won mokurom, a mefi me apasa an Kot tong ngonuk. Epwe apasa usun mwirimwirum kewe non ewe imwen Israel. Epwe apasa eu me eu ekkewe feioch seni ewe Samon. Ochun ekiek, punuwen emon petriark a aporousa ngeni ei usun porousan me an we famini ar ra tingor fan iten ewe Ngun, akkaewin non ekkewe ran semer we a ngenir ekkewe efeiochun petriark.
Saingonon, ekkewe feiochun mi choni ewe pwon ra fis nupwen sia tapweno mwirin noun ewe Samon soufos me pwapwa non manaueni pwon, mi pachenong non pupunu. Pwon mi pin ren pupunun epwe winiti murino me ese much ika sia finata pwapwan punuwach me ach famini akom mwach. Usun “ngang” winiti “kich,” sipwe wakateno fengen. Sipwe chinnapeno fengen; sipwe kukukunnuno fengen. Nupwen sipwe efeiochu fengeni kich non ach monnuki inisich, sipwe kuna ach epinukunuk me pwapwa non ei manau me fefeino ese much.
Ina mwo nonnomuch mi tongeni sokofesen, nupwen sia fori ukukun ach tongeni, me tingor ren unusen netipach me kutta An aninis, ewe Samon epwe emweni kich, non An fansoun me an kokot, me ren ewe Ngun mi Fel.25 Pwonen pupunu mi pin ra apochokun me ren tipeu nefinen ekkewe chon forrir—a eu achem faniten Kot me ach sufoniti ach pungun finata me ewe feioch ren An aninis nupwen sia kutta fengeni.
Feiochun masowen ewe pwon mi pin ngeni tetenin famini sia mefi me non imwach me netipach. Ouse mochen oupwe mut ngeni ei upwe awewe ren met mi fis ngeni ei pwisin.
Nupwen am me Sister Gong aua tong fengen aua mochen pupunu, ua kaeo usun pungun finata me fini. Non eu fansoun, aua nomw non ruu muun mi sokofesen me ruu fonu mi towau. Iei popun ua tongeni ai upwe apasa pwe ua kaeo nonomun aramas me neni non unusen fonufan.
Nupwen ua kapas eis, “Samach won Nang, upwe punuweni Susan?” Ua mefi kinamwe. Nge nupwen ua kaeo ai upwe iotek ren ennetin netip, “Samach won Nang, ua tongei Susan ua mochen upwe punuweni. Ua pwon pwe upwe emon mwan murino me semenap murino”—nupwen ua anganga me fori met mine ua finata, iwe eu pochokun me fatochun memef a tori ei.
Iei am we uruon Gong me Lindsay FamilySearch, tutunap, me sassing a anisi kem ne kuta me achufengeni non manauen tettenin aramas mi choni ei pwon mi pin.26 Pachonong, am sufoniti mwirimwirim kewe:
Inen inem we chinap Alice Blauer Bangerter, ewe a unungat an tingorun pupunu non eu ran, mwirin a tingorei punuwan we epwe fori efoch tikin peche won ewe minen for butter pwe epwe tongeni for butter, eeken, me anea fan eu chok.
Semen semem we Loy Kuei Char a achoku noun semirit me ekkoch pisekin an we famini won emon tonki nupwen ra pwereno won ewe watten chuk non Hawaii Big Island. Mwirimwirin an faminien Char angang weires me fangono ar fansoun a efeiochu am famini ikenai.
Gram Mary Alice Powell Lindsay a anamon fiti nimmon kukkun semirit nupwen punuwan we me noun mwanichi ra mano ru ran nefiner. Emon inenap ese wor punuwan non 47 ier, Gram a tumunu an we famini fan nurun tong seni ekkewe souemwen me memper. Non ekkena fansoun, Gram a pwon ngeni ewe Samon ika pwe epwe anisi, iwe esapw tongeni an epwe ngunungun. Ewe Samon a anisi. Ese tongeni ngunungun.
Pwii me fefinei, pwarata seni ewe Ngun mi Fel, mettoch meinisin mi murino me ese much a auchea non An Kot, Samach Ese Much, me Noun we, Jises Kraist, me An we Achasefan. Ach Samon, Jises Kraist, I ewe Chon Afforun ewe minafon pwon mi pin. Pwarata usun Jises Kraist ina popun ewe Puken Mormon.27 Seni ewe pwarata me pwon mi pin, Kot a eniwinato ewe manamanen pristut an epwe efeiochu meinisin noun Kot semirit, pachenong ewe pwon mi pin ren pupunu, mwirimwirin famini, me efeiochun emon me emon.
Ach we Chon Amanau a pwarata, “Ngang ewe Alpha me Omega, Kraist ewe Samon; ewer, ngang ewe, ewe nepoputan me nesoponon ewe Chon Angasano ewe fonufan.”28
Sia nomw ren me nepoputan, A nonom rech, non meinisin masowen ach kewe pwon mi pin, tori nesoponon. Iei ua pwarata non ewe it mi pin me manaman iten Jises Kraist, amen.