Mwarei Ach Irapenges
Ach mwarei ach kewe irapenges me tapweno mwirin ewe Chon Amanau wewen pwe sipwe nikitu non nuku non ewe aanen ewe Samon me sisap fori mettochun fonufan.
Pwii me fefinei mi achengecheng, sia fen ausening ngeni afanafan mi murrino seni nouch kewe souemwen non ekkei ru ran. Ua pwarata ngeni kemi pwe ika sia achocho ach sipwe manaueni ekkei afanafan minne mi feito seni pwarata me non fansoun mi fich, ewe Samon, ren An chen, epwe anisikich ach sipwe mwarei ach irapenges me apwasa ousach kewe.1
Nupwen ewe Chon Amanau a karap ngeni Caesarea Philippi, A pwarata ngeni Noun kewe chon kuno pwe Epwe kuna riaffou seni ekkewe sou-emwenin namanam, ekkewe sou-asor, me ekkewe sou-annuk non Jerusalem. A aitir usun An mano me Manausefan mi ning.2 Non na fansoun, Noun kewe chon kuno rese ennetin weweiti An misin won fonufan mi pin. Nupwen Peter a rong met ewe Chon Amanau a apasa, a ewinano Jises me a apungu I, a apasa, “Samol, amo God esap mutata an epwe fis ngonuk.”3
Ren An epwe anisi Noun kewe chon kuno ar repwe weweiti pwe epwe pwan wor anneasochis me riaffou ren An angang, ewe Chon Amanau a pwarata:
“Ika emon a mochen fiti ei, epwe fakkun ponuku ekiekin pwisin inisin, epwe mwarei an irapenges, iwe epwe tapweto muri.”
“Pun are emon a aucheani pwisin manauan, epwe epwe pout seni, nge are emon a ponuku manauan fan itei, iwe epwe kuna sefani.
“Epwe met chok namwotan ika emon epwe fonueni unusen fonufan nge a pout seni manauan? Ewer, ese fakkun wor namwotan! Ese mwo wor och mettoch emon epwe tongeni fangeno pwe siwinin manauan.”4
Ren an pwarata ei, ewe Chon Amanau a afata pwe meinisin mi mochen tapweno mwirin I mi namwot repwe ponuku ekiekin pwisin inisir me auku ar kewe mochen, me fangeno mettoch meinisin, pwan manauer ika mi namwot, repwe ennetin anneasochisi netipan ewe Sam—usun chok A fori.5 Ennet, iei met mi namwot ach sipwe angei manauen ngunuch. Jises a mochen aea ewe irapenges pwe eu esinisin An epwe anisi Noun kewe chon kuno ar repwe ennetin weweiti met mi namwot ar repwe fangeno me fori fan iten an ewe Samon angang. Noun kewe chon kuno me ekkewe aramasen Rome mi weweiti ewe esinesinin ewe irapengas pokiten chon Rome ra echimwa ekkewe aramas repwe irapenges ar repwe pwisin mwarei ar irapenges ngeni ewe neni ian repwe irapengesano.6
Mwirin chok An ewe Chon Amanau Manausefan ekkewe chon kuno mi tongeni weweiti mettoch meinisin mi fen mak usun I7 me met mi namwot ar repwe fori seni ena fansoun feino.8
Non ei chok napanap, kich meinisin, pwii me fefinei, sipwe suki ach ekieki me netipach pwe sipwe tongeni ennetin weweiti ewe popunun wata woch ach irapenges me tapweno mwirin I. Sia keao seni ekkewe puk fel pwe ekkewe ra mochen mwarei ar irapenges ra tongei Jises Kraist non och napanap pwe ra nikitano mettoch ese fich ren Kot me mettochun fonufan me ra apwonueta An kewe Annuk.9
Ach mochen nikitano mettoch ese fich ren netipen Kot me fangeno met mi namwot sipwe fangeno me achoch ach sipwe anneasochisi An kewe afanafan epwe anisikich ach sipwe nikitu won ewe anen an Jises Kraist kapas allim—pwan mwo non fansoun osukosuk, apwangapwangen ngunuch, are erenien aramas are ekiekin fonufan mi ungeni An kewe afanafan.
Ren awewe, ekkewe rese mo kuta punuwer ese much me naman ra mefi anemon me ese wor ar apinukunuk, are ekkewe ra kaimufesen seni punuwer me mefi anemon me pwe ese wor chon afanir, ua pwarata ngeni kemi pwe ika oupwe etiwa an ewe Chon Amanau tingor pwe oupwe mwarei ami irapenges me tapweno mwrin I wewen pwe oua nikitu ren nuku non anen ewe Samon, oupwe tipepochokun, me ousap fori mettochun fonufan minne epwe asueno ach apinukunuk non an Kot tong me chen.
Ekkei nongnong mi pwan fich ngeni ami ekkewe aat oua sani aat are neingen oua sani neingen me oua mefi netipingau me apwangapwang. Me naman iei popun ekkoch me neimi oua mefi pwe ouse chiwen mochen ewe kapas allimin Jises Kraist. Ika a iei usun, ua mochen pwarata ngeni kemi pwe mi wor apinukunuk non Kot ewe Sam me An kokotun pwapwa, non Jises Kraist me An angangen achesefan, me non ach manaueni Ar kewe annuk mi fiti tong fansoun meinisin Ren unusuchun An mirit, manaman, pung, me chen, ewe Samon a ririkich pwe Noun, pwe sia tongeni feino fan mesan me angei manau ese much, ika sia pochokun me nikitu ren ach aneasochisi ekkewe annuk10 me sia fori angang mi murrino fansoun meinisin.11
Ami ekkewe oua fori tipis mi watte, ren ami oupwe etiwa ei tingor mi namwot oupwe atipetekisonata kemi me mwen Kot, chufengen ren souemwenin Mwichefen, me aier me nikitano ami tipis. Ekkei mettoch epwe pwan efeiochu ekkewe ra achocho ar repwe awesano ar mon mettoch, ussun safei mingau, sakau, me sasing mi seneno. Oupwe karap ngeni ewe Chon Amanau ren ami fori ekkei mettoch, me ren I oupwe pichino seni ami amam, netipengau, me fotek non pekin ngun me inis. Pwan, naman oua mochen kuta aninis seni ami famini, chienemi, me chon safei me chon aninis.
Ouse mochen osap fangeta ika oua tour me ekieki pwe ouse tufichin nikitano tipis are poracho ngeni ami mon mettoch. Oupwe riaffou ika oupwe fangeta me sopweno non ami apwangapwang me tipis! Achocho ne fori met oua tufichin fori iteiten, ami angang epwe pwarata ami mochen nimeti ngunumi, usun ewe Chon Amanau a aitikich.12 Fan ekkoch ponuen ach kewe osukosuk a feito mwirin sia achocho ren chommong maram. Ewe pwon non ewe Puken Mormon pwe “a seni chen kich sia manau, mwirinon meinisin met sia tongeni fori,”13 mi pwan fich ngeni ekkei fansoun. Ouse mochen oupwe chechemeni pwe an ewe Chon Amanau niffangen chen “ese chok fich ngeni ekkewe fansoun ‘mwirin’ mettoch meinisin sia tongeni fori. Sia tongeni angei An chen me mwen, non, me mwirin ewe fansoun sia fori met sia tongeni fori.”14
Ua pwarata pwe nupwen sia achocho ach sipwe poracho ngeni ach kewe osukosuk, Kot epwe efeiochukich ren niffangen nuku pwe sipwe tongeni chikar me kuna manaman.15 Ii epwe fori fanitach met sise tongeni pwisin fori.
Pwan, ngeni ekkewe oua mefi song, netipengau, are osukosuk ren mettoch oua mefi pwe ese pung, ren ach sipwe mwarei ach irapenges me tapweno mwirin ewe Chon Amanau mi namwot sipwe achocho ach sipwe nikitano ekkei memmef me kun ngeni ewe Samon pwe Epwe tongeni epichikicheno seni ei sokkun ekiek me anisikich ach sipwe kuna kinamwe. Nge sonapan, ika sia anomu ekkei sokkun memmef, naman sipwe kuna pwe Ngunun ewe Samon esap nonnom rech non manauach. Sise tongeni aier fan iten pwan emon aramas, nge sia tongeni omusereno—ren ach finata ach sisap fotek ren ekkewe ra tipis ngenikich.16
Ekkewe pukfel ra aitikich pwe mi wor eu an ach sipwe poracho ngeni ekkei mettoch—ren ach tingor ngnei ewe Chon Amanau an epwe anisikich ach sipwe siwini netipach mi achou ren eu netip mi fo.17 Ika mi tongeni fis, mi namwot sipwe feito ngeni ewe Samon ren ach apwangapwang, sipwe atipetekisonata kich me mwen Mesan,18 me tingor An epwe anisikich me omuseno kich,19 napengeni non ewe fansoun nupwen sia angei ewe sakramen iteiten Raninfel. Amo ita sipwe finata ach sipwe kuta An aninis me poputa ren ach omusano ekkewe sia feingau ren pwe ach feingau epwe tongeni chikar. Ua pwon ngenikemi pwe ren ami fori ei, ami oupwe uren kinamwe nepwin pokiten ewe kinamwe a feito ren ewe Samon.
Nupwen ewe Soufos Joseph Smith a nom non kanapus non Liberty non 1839, a mak och tarpowe ngeni chon ewe Mwichefen ren och pwarata mi pwan fich ngeni ekkei sokkun fansoun. A mak, “Mun meinisin won fonufan, epwe suk me ekkewe mi fen nikitu non ewe kapas allimin Jises Kraist repwe angei.”20 Iwe, ekkewe ra fen mwarei wor iten ewe Chon Amanau, ren ar nuku non An pwon me ar nikitu tori nesoponon, repwe kuna manau21 me repwe nonnom ren Kot non eu napanapen pwapwa ese much.22
Kich meinisin mi kuna osukosuk non manauach minne a esenipato ach memefin netipengau, anemon, apinukunukungau, me pwan apwangapwang. Fan ekkoch pokiten ekkei memmef sia kapas eis ngeni ewe Samon: “Pwata ua kuna ekkei osukosuk?” are “Pwata met ua mochen epwe fis ese fis? Ennet, ua fen fori mettoch meinisin ua tufichin fori ai upwe mwarei ai irapenges me tapweno mwirin ewe Chon Amanau!”
Chienei kewe, sipwe chechemeni pwe ach mwarei ach irapenges a pwan wewen pwe sipwe tipetekison me nuku non Kot me An mirit ese much. Sipwe esina pwe A sinei kich meinisin me ach kewe mochen. Mi pwan namwot sipwe etiwa pwe an ewe Samon kokkot mi sokono seni ach kokkot. Fan ekkoch sia mochen och feioch me sia finata inet sia mochen ewe Samon epwe ngeni kich ewe feioch. Ach nuku non ii ese tongeni anongonong won inet sia mochen I epwe ngeni kich met sia mochen. Nupwen sia fori ei, sia usun ekkewe chon Nifai me nom mi nukunukumang, ekkewe ra esita pwir kewe ren ar apasa pwe ewe fansoun a wesino pwe ekkewe osini seni Samuel ewe chon Leiman epwe ponueta, iwe ra osukosuka ekkewe mi nuku.23 Mi namwot sipwe nuku non ewe Samon pwe sipwe nonnom me sinei pwe Ii Kot, pwe A sinei mettoch meinisin, me A sinei emon me emon kich.24
Ekiseno ua tufichin iamwir ngeni emon fefin mi manau punuwan itan Franca Calamassi, a riaffou ren och semwen mi watte. Sister Calamassi a akkom non an famini an epwe fiti ewe Mwichefenin Jises Kraist mi niwinsefan. Inamwo pwe punuwan ese papatais, a tipeiu an epwe chufengen ren ekkewe misineri me fan chommong a fiti fan. Ina mwo nonnomun, Sister Calamassi a nukuchar me a amamaritai noun kewe fumon non ewe kapas allimin Jises Kraist. Eu ier mwirin punuwan a mano, Sister Calamassi a uwei noun kewe ngeni ewe tempel, me ra fori ewe angang mi pin me ra ririfengen non ar famini. Ekkewe pwonen ekkei angang mi pin a awora epinukunuk me pwapwa,minne a anisi ii an epwe nikitu non manauan.
Nupwen ewe ewin emwen a poputa pwata, noun we pisop a efeiochu ii. Non ewe fansoun a ereni ewe pisop pwe a moneta an epwe etiwa netipan ewe Samon, me pwe mi wor an nuku pwe epwe tongeni chikar me mi pwan wor an nuku an epwe nikitu non an semwen tori nesoponon.
Non am chufengen, Nuowen uwa komoch poun Sister Calamassi me nengeni non sangunun, ua kuna an saram usun saramen chon nang—mi pwarata an nuku non an Kot kokkot me an apinukunuk non an ewe Sam tong me kokkot fan itan.25 Ua mefi an mochen nikitu non an nuku tori nesoponon ren an mwarei an irapenges, inamwo ekkewe osukosuk a kuna. Manauan ei fefin mi eu pisekin pwarata usun Kraist, me usun an nuku non me tong fan iten I.
Pwi me fefinei, ua mochen pwarata ngenikemi pwe ach sipwe mwarei ach irapenges me tapweno mwirin ewe Chon Amanau mi namwot sipwe opuru ii me achocho ach sipwe usun ii,26 sipwe engino non osukosukan manauach, ach nikitano me oput ekkewe mochenin inis, me apinukunuku ewe Samon. Ewe Chon Kon a mak:
“Kopwe epinukunuku ewe Samol. Kopwe nuku i, kosap epinukunukungaw. Kopwe chok epinukunuku ewe Samol.”27
“I chon anisi kich o tumunu kich.”28
Ua pwarata pwe ika sipwe tapweno mwirin ewe Masta me apinukunuku ii ewe chon safei non manauach epwe asoso ngunuch me apwasa osach kewe.29 Usun ekkei nongonong ua pwarata non iten Jises Kraist mi pin, amen.