Sufoniti Itan We
Iwe, ren ach nonnom me fiti non pwon mi pin, sia kokkor ren iten Jises Kraist.
Atun sam me in ra meseik me witiwit won uputiwan nour monukon, mi wor wiser pwe repwe fini iten nour we monukon. Meni nupwen ka uputiw, ka iteni ew it minne a fefeitiw non om newo. Ika meni ewe it minne ka iteni a itefounou non ena ier are neni minne ka uputiw non.
Ewe soufos Ilaman me punuwan we ra iteni nour kewe wuko Nifai me Liai ren it mi auchea seni ar newo. Ilaman a pwan ereni noun kewe at:
“Nengeni, ua fen ngenikemi iten aewin semach me inach kewe … iwe nupwen oupwe chechemeni itemi kewe oupwe chechemeni ir; iwe nupwen oupwe chechemeni ir oupwe chechemeni ar kewe angang; … pwe a fen affateno, me pwan makkeno, pwe ir mi och.
“Iei minne, nei anuon, ua mochen pwe oupwe fori met minne mi och.”1
Itan Nifai me Liai a anisir ne chechemeni ekkewe angangochun ar newo kewe me pesepes ngenir ne fori mi och pwan.
Pwi kewe, ese nefinifin ia sia nom ia, met sokkun fos sia fos non, are kich 8 ierich ika 108 ierich, mi wor ew it sia iteni fengeni minne a wor a popunun chok pwan.
“[Kich] chufengen me Kraist ren [ach} paptaiseno, iwe [sia] pwinitanong ewe manauen Kraist … pwe [kich] meinisin ew chok non Kraist Jises.”2
Kich chon Ewe Mwichifenin Jises Kraist ren Aramas mi Pin non Fansoun Soponon, “sia [fen] akaewin pwonun ach tipengeni angei woch iten Kraist … me ren ewe angangen paptais.”3 Me ren ei pwon mi pin, sia pwon ne chechemeni I fansoun meinisin, annesochisi An kewe annuk, me anisi ekkoch. Ach mochenin apwonueta ei annuk a sofosefani iteitan Raninifel atun sia angei ewe sakrament me pwapwaiti sefani ewe feiochun “fetan non manau mi fo.”4
Ewe it sia iteni nupwen sa uputiw a awewe usuch pwisin me ngenikich nonnomuch non ach kewe famini won fonufan. Nge, nupwen sia “upsefan” atun sia paptais, ach weweiti usun kich io a watteno. “Pokiten ewe pwon mi pin ka fen fori oupwe iteni ekkewe noun Kraist, … pun nengeni, … i a nouni kemi non pekin ngun; pun oua apasa pwe netipemi ra siwin ren ami nuku non itan we; iei minne, oua uputiw seni i.“5
Iwe, ren ach nonnom me fiti non pwon mi pin, sia kokkor ren iten Jises Kraist. Me “esap wor pwan ew it epwe kawor are pwan ew aan are napanap ren minne amanau epwe tongeni feito ngeni ekkewe noun aramas, me nukun chok non me seni iten Kraist, ewe Samon mi Uren Manaman.”6
Ewe iten Jises a fen esin chommong fansoun mwen An uputiw. Ngeni King Benjamin, emon chon ngang a pwarata, “Iwe epwe iteni Jises Kraist, ewe Noun Kot, … iwe inan we epwe iteni Mary.”7 An angangen “tongen ngaseno”8 a pwan esinna ngeni noun Kot kewe semerit fansoun meinisin minne ewe kapas allim a nom won ewe fonufan, seni ekkewe ranin Adam me Eve tori ei ran ikenai, pwe ra tongeni sinei “ngeni ian repwe apinukunuk won ren omusomusen ar kewe tipis.”9
Non ewe ier a keran no, Presetin Russell M. Nelson a afanafana “ew tingoren soufos” ngeni ekkewe fefin “ne siwini ewe fansoun mwach ren ami ochusefani ekkewe aramasen Israel.” A tingoreikich ne anneani ewe Puken Mormon me “esinna ekkewe wokisin mi kapas usun ewe Chon Amanau.” A eisini kich pwe sipwe “ennetin achocho oupwe kapas usun Kraist, pwapwaiti Kraist, me afanafan usun Kraist ren [ach famini] me chienach kewe.” Meni oua fen poputa ne kuna foun uwan an pwon pwe “en me ir oupwe kaneto ngeni ewe Chon Amanua. … Me siwin, pwan tori manaman epwe poputa ne fiis.”10
Ach pwon pwe sipwe chechemeni ewe Chon Amanau a apechekuna kich pwe sia tongeni uta fan iten met mi ennet me tupwon—ina mwo sia nom nein ew watten mwichen aramas are non pwisin neniach, ia esor emon epwe sinei fofforuch tiwenon chok Kot. Nupwen sia chechemeni I me Itan sia mwarei, esor tufichich ne awewengawa kick ngeni pwan emon ika kapwung ekkoch ren pechekun. Ren mesach kewe won ewe Chon Amanau, sia tongeni kuna ion ennetin kich—emon noun Kot semerit mi achengicheng.
Ach pwon mi pin ne chechemeni a ekkisetiw osukosukun fonufan, me ekesiwini memmefin pwisin apinukunukungaw ngeni pechekun, me ngeni kich apinukunuk non fansoun weires.
Me nupwen sia mit me turutiw won ach fetani won ewe aanen pwon mi pin, sipwe chok chechemeni Itan we me An kirekireoch me tong ngenikich. “Pun a wor an unusen manaman, unusen mirit, me unusen tipachem; a weweiti mettoch meinisin, me i a emon Kot mi umoumoch … ngeni ekkewe repwe aier me nuku non itan we.”11 Ennetin, esor ungungun mi ngarangar nap seni ewe iten Jises ngeni meinisin ir ekkewe, ren netipechou me netip niemam, achocho ne “fofforochuno me aochuno.”12
Presetin Nelson a aiti: “Ewe ran a wes minne kopwe emon chon nuku non Kraist mi fonofoneno me kukunou chok. Omw namanam esap usun omw fiti Fan won Raninifel chok. A usun omw emon ennetin chon kuno seni nesessoren Raninifel tori nepwinin Ammon. … Ese wor emon mi tongeni emon chon kunon ewe Samon Jises Kraist ‘fan ekkoch chok.’”13
Ach mochen ne angei woch ewe iten Kraist a nap seni och kapas nefinach chok. Esap ew chok pwonin foffor mi mecheres ika ew fofforun ureni. Esap ew fofforun ach watteino ika ew minen itach sia kapacheta ngeni ufach. Esap ew chok muttun kapas sia makkei me watta won ewe kapet ika apacheta won ewe etip. Itan we a ew it minne a “pwinetanong,”14 makkei non netipach, me “fanafan won nikinikin mes[ach].”15
An ewe Chon Amanau achasefan ururun epwe achemenien, fansoun meinisin, me ren ach ekieki, foffor, me nefinach me ekkoch. I Ese chok chechemeni itach kewe, nge A chechemeni kich fansoun meinisin. Ewe Chon Amanau a apasa:
“Pun emon fefin mi tongeni monnuki noun semirit mi oup, pwe esap wor an kirekiroch won noun ewe at masowen non upwan? Ewer, ra tongeni monnuki, nge mwo iei Ngang usap monnukuk, O imwen Israel.
“Nengeni, ua fen fanok me non kumuchun pei.”16
Presetin George Albert Smith a aiti, “Sufoniti ekkewe it ka iteni, pun non ew ran mwach epwe wor om tufich me wiis ne aporaus … ngeni Semom non nang … usun met ka fen fori ren [ekkana it].”17
Usun ekkewe iten Nifai me Liai mi kefin, mi tufich pwe a tongeni apasa me makkei usuch pwe kich ennetin chon kunon ewe Samon Jises Kraist? Kich mi sufoniti ewe iten Jises Kraist minne sia pwisin fini ne angei woch? Kich sia “emon chon iamwir me chon pwarata”18 usun An tong me kirekiroch me An manamanen amanaua?
Ekkis eno chok, ngang mi ausening ngeni ewe Puken Mormon. Non ewe saigon sopun 2 Nifai, ua rongorong an Nifai apasa ew mettoch use mwo fan ew anneani non ena napanap me mwen. Non unusen an uruo, a aiti me pwarata usun ewe “Chon Angasanon,” ewe “Koten Israel,” ewe “Naamen Kot,” me ewe “Messaia”. Nge usun a osupwano an uruo, ua rongorong an apasa ekkei kapas: “Ua pwapwa non fatafatoch; ua pwapwa non ennet; ua pwapwa non ai Jises, pun i a fen angasano ngunui.”19 Nupwen ua rongorong ekkei kapas, netipei a pwapwa me ua chok ausening sefan me sefan. Ua esinna me ausening ngeni ena wokisin usun chok ua esinna me ausening ngeni pwisin itei.
Ewe Samon a fen apasa, “Ewer, feioch ekkei aramas ekkewe ra mochen uwei itei we; pun non itei we repwene iteni; iwe ir nei.”20
Kich chon Ewe Mwichefenin Jises Kraist ren Aramas mi Pin non Fansoun Soponon, meni sipwe “pwapwa ne [angei woch] ewe iten Kraist”21 ren ach sufoniti Itan ren tong, tipepos, me fofforoch. Ua pwarata pwe I “ewe Namen Kot, ewer, iwe ewe Noun ewe Sam Ese muuch At.”22 Non iten Noun we semerit mi pin, Jises Kraist, amen.