Ameseikin Om Sasai
Ewe Chon Amanau a etiwakich, iteiten ran, ach sipwe nikitano ach pwapwa me kinamwe me fiti Ii non ewe saiin non manauen chon kaeo.
Ekkewe Hobbits
Ew an kewe achengicheng semirit book a mak me nom me nom a poputa ren ewe mwaken kapas “Non ewe pun a wor ew pwang a nonom emon hobbit non.”1
Ewe tutunapwen Bilbo Baggins emon hobbit mi chok ukoukouch me ese pwan itefouno a or an tufichin amwararan finata—ewe tufichin sasai fetan mi ameseik me ewe pwon ren angei eu watten niffang.
Ewe osukosuk pwe napengeni ekkewe hobbit mi echeni inisir rese mochen repwe mo ngo feina fiti ew mettochun apwapwa. Ra chok mochen repwe nom non kinamwein nenier. Ra sani ar repwe mongo fan onu non eu ran otun a tufich ar repwe chok nonomw non ekkewe manaman, mot ngeni nour wasona, kon, etik ekkewe pisekin niketikitik, me fokkun siamu ne apwapwa non manauer.
Iwe ngo, nupwen Bilbo a angei an epwe na ngeni ew apwapwan sasai fetan, mi wor mettoch a fokkun kuu ngawei netipan. A weweiti ren met a kuna seni nepoputan pwe an ewe sai epwe fokkun weires. Me pwan efeiengaw. Epwe pwan fen wor eu nikinikin pwe i esapw fen niwinsefan.
Me inamo, ewe kokon sai a kuu anononun non netipan. Iwe iei, ei hobbit ese or ningan a nikitano kinamwein nenian nge a feino won ewe annen feino fito ammeseikin ew sasai an epwe uwei ngeni “ikkewe ia pwan niwinsefan.”2
Om Kukunou
Meni ew ekkewe popun chamong ra weweiti ei tutunap pwe ren ach pwan ei tutunap.
Me, nomw, nomw me mwen sisa mwo fen awen uputiw, non ena fansoun me sise chechemeni, pwe kich sia fen etiwa ngeni feina non ew annen fefetanin sai. A akot seni Kot, Samach we non Nang. Ach etiwa ei annen fefetanin sai a wewe ngeni ach sia nikitano ewe kinamwe me tumun me non nenian We. A wewen pwe sia feito won fonufan eu manauen siamu ren sokkun feiengaw me osukosuk.
Sia sinei pwe ese mecheres.
Nge sia fen sinei pwe sipwe angei ekkoch niffang mi murino, pachenong aionach me mefi ekewe sokkun pwapwa me riafoun inis. Sia kaeo ach sipwe pochokun, ne kutta, me achocho ngeni weires. Sipwe sinei ewe ennet usun Kot me usuch.
Ewer, sia pwan sinei pwe sipwe fori chommong tipis non manauach. Nge sia pwan pwon: pwe pokiten ewe watten fangono manau an Jises Kraist, sia tongeni nimoch seni ach kewe nipwakingaw, ekesiwin me nimenimoch non ngunuch, me eu ran manausefan me chufengen sefan ren ekkewe sia tonger.
Sia kaeo usun an Kot tongei kich. A ngeni kich manau, me A mochen sipwe fefeita. Iwe, A pwan amonata emon Chon Angasano fan itach. “Nengeni,” Samach won Nang a apasa, “Sipwe pusin fini ren ach pusin finata, pun ii afen ngeni kich.”3
Ina epwe wor mettoch mine a awora nuokus me tipengaw ngeni noun Kot kewe semirit me non ewe fansoun siamuu, iei popun a chommong me nein pwich kewe me fefinach ra ungeni.4
Seni ewe niffang me manaman ren ewe pungun finata, sia ekeieki pwe ewe tufich ren met sia tongeni kaeo me manaueni epwe emurinono met mi ngaw.5
Me pwan, epinukunuku ewe pwon me manaman an Kot me Noun we mi Achengicheng At, sia etiwa ewe sosot.
Uwa fori.
Me pwan en emon.
Sia tipeeu ngeni pwe sipwe nikitano ewe tumun sia akom nonom non me sipwe fiti ei manau sia finata sipwe manaueni “feino pwan niwinsefan.”
Ewe Koko mi Emeseik
Me iei, manauach won ei fonufan mi chommong anen ach tumunungaw, ika met? Sia ekieki ach sipwe nikitano ach ewe waten sai, sia mochen ach pwapwa me kinamwe nge sia nikita ach sipwe mamarita me fefeita.
Usun chok, mi pwan wor och mettoch sise fangetani, mi nomw non netipach, ena echikin ren met mi tekia me ennetin ach popun. Ei echik iei eu och mettoch aramas ra mochen feitto ren ewe kapas allim me ewe Mwichefenin Jises Kraist. Ewe kapas allim mi niwinsefanito a, murino, eu asofon koko ngeni manauach sia etiwa me nomw. Ewe Chon Amanau a etiwakich, iteiten ran, om kopwe nikitano ach pwapwa me kinamwe me fiti Ii non ewe manauen chon kaeo.
Amen chommong mettoch won ei aan. Mi wor pan, chuk, me aan mi rikino. Epwe pwan wor sokkun spaiter, troll, me pwan emon ika ruemon dragon. Nge ika pwe ka nikitu won ei aan me nuku non Kot, kopwe chok fokkun kuna ewe anen kinamwe me niwin sefan ngeni imwom non nang.
Iwe ifa sokkun om kopwe poputa?
Mi chok mecheres.
Akunneno Netipom ngeni Kot.
Aewin, a auchea om kopwe finata om kopwe ngeni Kot netipwom. Nikitu ne kuta Ii iteiten ran. Kaeo om kopwe tongei Ii. Iwe, mut ngeni ena tong epwe aituk, ne weweiti, me tapweno mwirin an ekkewe afanafan me kao om kopwe aneasochis ngeni an Kot kewe annuk. Ewe kapas allimen Jises Kraist a ngeni kich non fatochun me mecheresin pwe emon semirit epwe tongeni weweiti. Ngo ewe kapas allimen Jises Kraist a tongeni ponueni ekkewe sokkun kapas eis non manauach me aora anononun me sokosokopwaten ponu pwe ikamo en non manaom mi aneaniochu me ekiekiochu ekkei, a weires ach sipwe tongeni weweiti ika awesi mwo nge och chok kinikinin.
Ika pwe ke nuokusiti ei sai pokiten om ekieki nge kose tongeni fori, chechemeni pwe angangen chon kaeo esapw ren fori mettoch non unusochun; a wewen pwe fori mettoch non mochenin tipoum. Om finata ina met epwe pwarata ika wesen en io, nap seni met om tongeni.6
Ikamo ka turutiw, ka tongeni pusin fini ika kosap fangeta, nge kopwe fen kuta kopwe poracho ngeni, feina mom, me kopwe feina uta. Ina ewe ennetin tes non ei manau.
Kot mi sinei pwe kose unusoch, kopwe turutiw fan ekkoch. Kot mi tongeok ese kukun seni nupwen ka weires me nupwen ka pochokun.
Usun chok emon sam me iin, A mochen kopwe achocho ne satuni. Ach angangen chon kaeo a usun ach kao etiiken oroken. Meni met ka tongeni chok tufichin kopwe etiki me nepoputan ewe aro ngingi ren “Chopstick.” Nge ika pwe ka soposopono ne kaeo, iwe non chok eu ran ina kopwe chemeni uwouwen ewe ngingi, tikitikin, me namaan kon mi kan weires.
Iei, ena ran enipw esapw fis non ei manau, nge epwe fis. Meinisin mine Kot a tingor pwe kopwe achocho ne nikitu.
Kopwe Anisi Ekkoch non Tong
Mi wor och mettoch amen emeseik, chipu sipwe monuki, usun ei aan sipwe fini: eu chok anen om kopwe fefeita non om manauen souneng kopwe anisi ekkoch ar repwe pwan fefeita.
Ren anisi ekkoch ina anen chon kaeo. Nuku, epinukunuk, tong, umoumoch, me angang a aninsi kich winiti usun chon kaeo.
Ren om aninis ne anisi ekkewe mi osupwang me woungaw, om anisi ekkewe mi noninen, om angang epwe enimochukono me eningiok, ngunum epwe pochokun, me kopwe fetan non kinamwe.
Nge ei tong esapw ekieki pwe epwe angei niwinin. Esapw sokkun ekkewe angangen angang faniten repwe pwano, sineno, are sani.
Ennetin chon kaeo non Jises Kraist repwe tongei Kot me Noun Aramas nge resapw ekiekin ar repwe angei niwinir. Sipwe tongei ekkewe ra asonga kich, me oputa kich. Usun chok ekkewe ra eitengawa kich, me eriafou kich me kuta anen ar repwe ameteki kich.
Nupwen ka ourano netipwom ren ewe tongen Kraist, esapw wor nenien om kopwe ekingaw, apungu, me Sau. Ka aponueta an Kot kewe annuk pokiten om tongei Ii. Non ewe napanap, kopwe fokkun manaueni usun manauen Kraist non manauom me ekiekum ekis me ekis.7 Iwe met sokkun manau epwe nap seni ei?
Aporousa Porousom
Ewe aunungatin mettoch sia akachocho ngeni sipwe manaueni non ei manau sipwe wata woch ewe it Jises Kraist me sisapw sauasini ach choni ewe Mwichefenin Jises Kraist.
Sisapw opano ach nuku.
Sisapw ireano.
Ren met sia kan fori, sia porous usun manauach ngeni ekkoch non napanap me anen met sia mochen aporousa. Ina met chiechi rakan fori—rakan porous won mettoch mi auchea ngenir. Mettoch mi auchea me non netiper me a sokono ngenir.
Ina met ka fori. Kopwe aporousa porousm me met mi fisi ngonuk usun en souneng non ewe Mwichefenin Jises Kraist ren Aramas mi Pin non Fansoun Soponon.
Fan ekkoch porousom aramas ra takir ren. Fan ekkoch ra kechiw ren. Fan ekkoch a tongeni anisi aramas ar repwe achocho ne nikitu, engino, me pochokun ngeni pwan eu awa, pwan eu ran me ar repwe pwan kanengeni Kot.
Aporousa porousom non fofoun aramas, won computer, non emwicheich, ekis meinisin.
Eu saingonon mettoch Jises A ereni noun kewe chon kaeo era repwe feino non unusen fonufan me aporousa porousen ewe manausefan an Kraist.8 Ikenai sia pwan pwapwa ne etiwa ena wachemuken aurour.
Met ren ei amwararen porous a wor rech sipwe aea fengen: pokiten Jises Kraist, meinisin mwan, fefin, me semirit ra tongeni niwinsefan ngeni imwer non nukunukoch ren imwer non nang me ikewe, repwe nomw non ning me pung!
Mi pwan wor chommong porous murino sipwe aporousa.
Kot a pwa ngeni aramas ikenai! Mi or nouch Soufos mi manau.
Upwe achema ngonuk pwe Kot ese mochen kopwe “amomo” ewe Kapas allim mi unusoch are ewe Mwichefenin Jises Kraist.
A chok mochen pwe kosapw opano fan eu sepi.
Me ika pwe aramas ra finata pwe ewe Mwichefen esapw fan iter, iwe a pusin nonom rer.
Esapw wewen pwe ka nus. Kopwe sopweno ne aramasoch ngenir. Nge kosapw ukutiw ne etiwer sefan.
Ewe sokofesenin nefinen chiechi non tumunungaw me chiechi non tong, mi umoumoch ewe—etiwetiw!
Sia tongei me sufoniti meinisin noun Kot kewe semirit, ese nefinifin won nonomun manauer, ese nefinifin ian re feito me ia are ar mwichefen, ese nifinifin met ran finata non manauaer.
Wisach, sipwe chok apasa, “Feito katon! Kopwe pusin sinei ifa usun om kopwe fetan won ewe aanen chon kaeo an epwe anisuk me emwenu.”
Sia etiwa aramas repwe feito “feito me anisi, usun ach sia sotuni ne anisi ewe fonufan an epwe eu neni mi murino.”
Me sipwe apasa, “Feito nomono! Kich Pwim me fefinom Sise unusoch. Sia epinukunuk non Kot me achocho ne aponueta An kewe annuk.
“Fiti kem, pwe kopwe anisi kem aupwe murino. Me, non ei napanap, kopwe pwan murino. Eto sipwe sotun fengeni ei manau.”
Upwe poputa inet?
Nupwen chienach we Bilbo Baggins a mefi ewe koko ngeni ei manau a nomw non netipan, a finata pwe epwe asoso non eu pwinin, epwe pwapwaiti anan mongon nesosor me poputani och mettoch nesosor.
Nupwen Bilbo a neno, a kuna pwe imwan we a fokkun nimengaw, me a nokun monukano met ewe a fen kokot.
Nge chienan we Gandalf a feito me a eisini, “Inet chok kopwe feito?”9 A ekieki usun met ewe chienan we a ereni, Bilbo a finata met epwe fori.
Iwe, ewe hobbit mi mosonoson me ese mochen epwe pwano a mwitir ne tou me non asaman we mwan ngeni an epwe feino ngeni an ia we epwe feino ia a fokkun mwitir a mwo nge monukano imwan akau, wokun we, me an ankisif. Amwo nge nikitano anan kewe ese anano.
Iwe mi pwan wor eu nesen ngeni kich me ikei.
Ika en me ngang sia mefi ewe memef ach sipwe feino ngeni ewe manau ach sipwe manaueni me chiechi won met Samach won Nang a amonata ngeni kich me nomw, upwe pesengonuk, pwe ikenai iei ewe ranin ach sipwe tapweno mwirin noun Kot we At me ach we Chon Amanau won An we Anen angang me anganen chon kaeo.
Sia tongeni awora ach fansoun ach sipwe uti ena fansoun nupwen mettoch meinisin epwe unusoch. Nge iei ewe fansoun sipwe fokkun kutta Kot, iamwiri ekkoch, me aporousa ngeni ekkoch met mi fis ngeni kich.
Nikitano imwom akau, wokum, ankisif, me imwom mi nimengaw.10
Ngeni kich ekkewe sia fen fetan won ei aan, sipwe poracho ngeni, fori umoumochun, aora nukuchar, me saposapono!
Ngeni ekkewe ra rikiseni ei aan, ose mochen niwinto sefan, fiti kem sefan, anisi kich sipwe pochokun.
Me ngeni ekkewe rese mwo awen poputa, met oua utiwiti? Ika pwe ka mochen kopwe sinei met ka mochen sinei usun ei murinon manauen ngun, ipwenong won pusin wom. Kapas ngeni ekkewe misineri. Kapas ngeni chiechiom kewe Aramas mi Pin non Fansoun Soponon. Kapas ngenir usun ei amwararen angang me met ka mochen.11
Iei chok fansoun poputa!
Feito, Fitikem!
Ika pwe ke mefi pwe manauom epwe kon or popun, popun mi tekia, pochokun nefinen famini, me kopwe arapakan ngeni Kot, kose mochen, feito fiti kem.
Ika pwe ka kutta eu mwichen aramas ra anganga ar repwe winiti aramas murino, anisi ekkewe mi osupwang, me anisi ei fonufan an epwe eu neni murino, feito fiti kem!
Feito me katon met ei amwarar, ameseik, me mokutun ei manau.
Ika pwe ka fori iwe kopwe pusin kuna me sinei.
Kopwe kuna wewen.
Kopwe kuna Kot.
Kopwe kuna ewe amwarar me ameseiken fetanin manauom.
Ekkei meinisin Ua pwarata pwe mi ennet fan iten ach Chon Angasano me Chon Amanau, Jises Kraist, amen.