Mut Ngeni Ngunuch repwe Nemeni Inisich
Eu me nein ekkewe watten auchean mettoch sia tongeni kaeo non ei manau pwe sipwe anapano ach nikinikin won pekin ngun fochofoch me nemeni ach mochen mi ngaw.
Pwii me fefinei mi achengicheng, non ewe October a no atun ewe mwichenapen mwichefen a kaneto non ewe ier, ngang uwa amoneta ai we afanafana usun ewe chechemenien 100 ier seni ewe fansoun ewe nemasepwin ewe ngenien ngun a ngeni Preseten Joseph F. Smith non October 3, 1918.
Fitu chok ran mwirin uwa tinano ai afanafan epwe chiaku ngeni sokkofesin foos, punuwei fenfeinno mi achengicheng, Barbara, a awesino an fansoun manau won fonufan me tonong non ewe nenien ngun.
Ren a ekkewe ran ra winiti wiik, me pwan maram, me iei eu ier seni ewe atun Barbara a maa, uwa kuna pwe a napeno ai weweiti me kinisou ren ei wokisin: “Iwe oupwe manau fengen non tong, pwe iwe oupwe kechiw fan iten ekkewe ir mi mano.”1 Am me Barbara aua feioch ne “manau fengen non tong” fan 67 ier. Nge uwa pwisin kaeo met wewen pwe sipwe “kechiw fan iten” ekkewe sia tongei. O, ifa watten ai tongei me pwositi i!
Ngang mi nuku pwe napengeni sise weweiti me sinei ennetin met ekkoch ra fori fan itach tori rese chiwen nom. Ngang mi sinei pwe Barbara a men taweingaw, nge use unusen weweiti ewe sosoponon angang ngeni famini, Mwichefen, me neniach minne a fori fansoun meinisin. Mi wor an foffor mi ennet iteitan ran a forsefan fan fitu ngerou fansoun me non ekkewe ier non tumunun am we famini. Me non ekkana meinisin, esor emon non am famini a kuna an epwe mineta mongungun ika apasa eu kapas mi kirengaw.
Chommong chechem a nom non ai ekiek non ei ier a no. Uwa ekieki usun watte angang won pekin inis minne a fini ren an nouni fumon semerit. Wisen tumunu famini me non ewe imw ina chok ewe wiis a kan mochen, me a ennetin sineifichi iteitan kinikinin wisan na.
Fan chommong uwa ekieki ifa usun a tongeni tumunu am me nouem kewe semerit. Fofforun mongo chok a men watte angangan, kapachenong ewe angangen soapini chommong chukuchukun uf me ekkana an ewe famini iteitan wiik, me awora sews me uf mi ukukoch ngeni meinisin nouem kewe. Aua pwan feinno ngeni ren sokkopaten am kewe osukosuk minne a auchea ngenikem. Me pokiten a auchea ngenikem, a pwan auchea ngeni i. I, non eu chok kapas, a amwarar—non wisan punuwei, inenap, chiachi, chon oru, me emon noun Kot nengin.
Iei ren an mano, uwa pwapwa pwe uwa fini ne mommot ren nupwen uwa niwin ngeni imwem non ekkewe saigon maramen manauan, me kamach poun me katon fengen nesoponun an kewe kachiton kon a men sani—fan chommong pun an semwin Alzheimer’s a epeti an epwe chechemeni pwe a karen katon ekkana kachito non ewe neanowas mwen. Achechemenien ekkana fansoun aua chok kamach fengen pouem a men, auchea ngeniei iei.
Pwi me fefinei, ouse kan mochen ousap nusmwaneno eu fansoun mi tufich ne nenneno non sangunun chon omw famini ren tong. Semerit me sam me in, chiachi nefinemi me pwarata omw tong me kinisou. Usun chok ngang, ekkoch me neimi oupwe pwata eu ran me kuna pwe ewe fansoun mi tufich ngeni ena sokkun nefinemi mi auchea a fen no. Manaueni iteitan ran fengen ren netip mi ur ren kinisou, achechem mi och, angang ngeni, me watte tong.
Non ei ier ano, uwa fen ekipwichi nap seni met uwe fen fori usun an Semach won Nang kokkot. Non an aiti noun we at Korianton, Alma a iteni “ewe kokkotun pwapwa mi auchea.”2
Ewe kapas minne uwa ekieki usun fan chommong nupwen uwa ekieki usun ewe kokkot epwe “chusefan.” A eu kokkot, mi for me ren Semach non Nang a ur ren tong, me nukunapen a wor ewe watte me echipwerin tufichin chusefanin famini—me chusefan esemuuch nefinen mwan me fefin mi pupunu, sam me in me semerit, tappin aramas ngeni tappin aramas non ewe imwen Kot.
Ena ekieki a ngeniei kinamwe me uwa esinei ngeniei pwe upwe nom ren Barbara sefan. Nge inisin me an ekiek a riaffou nesoponon manauan, ngungun a pechekun, och, me ennet. A fen amonneta pwisin manaun non mettoch meinisin pwe nupwen ewe ran a feitto a tongeni uta me mwen “ewe nenien kapung an Kot,”3 ren pechekun me weweiti mi kinamwe. Nge iwe iei ngang, non ruu ran, upwe 91 ieri, me uwa chiwen mochen sinei, “Ngang mi monneta? Ngang mi fori mettoch meinisin mi namwot pwe upwe tongeni kamoch i sefan?”
Ewe mecheresin, ennetin mettoch sia sinei usun manau pwe: Kich meinisin sipwe mano. Amwo sia mano chinnap ika kukkun, mecheres ika weires, moumong ika osupwang, ren chon tongeikich ika anaemon, esor emon epwe opano seni mano.
Fitu ier ano, Preseten Gordon B. Hinckley a apasa eu mettoch mi wor watte wewen non usun ei: “Ifa watten ningochun ewe tufich sinei, ifa watten echipa seni ewe kinamwe a ngenikich pun sia sinei ika sia pupunu mi och me manauoch, nefinem epwe soposopono, ina mwo ewe ennet non mano me fefetanin fansoun.”4
Ennetin uwa pupunu mi och. Usun ena ese tufich epwe wor tipemwaramwar. Nge ena ese naf, non kapasen Preseten Hinckley. A pwan namwot upwe manauoch.5
Ikenai, wewen “manauoch” a tongeni osukosuk, napengeni ika ka katon mettoch won ewe internet, ia ese nefinifin minne mongungu a tongeni apasata ennetin mettoch ika ekieki mi mwanino usun Kot me An kokkot fan iten noun kewe. Kinisou, pwe chon ewe Mwichefen a wor ngenir ennetin kinikin ese muuch non ewe kapas allim pwe repwe sinei ifa usun repwe manau pwe re ochun moneta nupwen ra mano.
Fitu chok maram mwen uwa uputiw, semen semei emon Aposen, Elter Melvin J. Ballard, a afanafana eu afanafan minne, ngeni chommong aramas, a aweweoch usun met wewen manauoch. Iten we “Ewe Osukosuk ngeni ewe Ngun,” an afanafan a foos usun ewe soposopono ewe fiu nefinen futukun inisich me ngunuch rese muuch.
A apasa, “Ewe osukosuk a kan napanap minne mwan me fefin meinisin repwe kuna ... epwe ewe fiu minne a fiis ren pwisin i,” a awewe pwe Setan “ewe chon koum ngeni ngunuch,” a efeingawa kich me ren “ewe mochenin mesach, mochenin inisich, me mochenin fonufan.”6 Iwe iei ewe aewin fiu a nom nefinin ach nikinikin ngun mi pin me ewe nikinikin inisin aramas a mochenin fonufan. Pwii me fefinei, chechemeni, sia tongeni angei aninis won pekin ngun seni memmefin ewe Ngun mi Fen minna a tongeni “aituk mettoch meinisin.”7 Aninis a pwan tongeni feitto me ren ewe manamanen me feiochun ewe pristut.
Iei, uwa eis, ifa usun ewe fiu me reomw?
Preseten David O. McKay a apasa: “Manauen aramas won fonufan a chok eu fansoun sotuni ika repwe anongononga an achocho, an ekiek, ngunun won mettoch minne epwe awatteno an kinamwe me pwisin pwapwa won pekin inis, are repwe anongononga popunen manauer won ar repwe angei ekkewe nikinikoch won pekin ngun.”8
Ewe fiu nefinen ach mochenin fonufan me ach nikinikoch won pekin ngun ese minafo. Non an saingon afanafan ngeni aramasan, King Benjamin a aiti pwe “ewe inisin aramas i ewe chon koum ngeni Kot, ma a poputa seni atun an Adam turutiw, me epwe chok fis, feinfeino me esemuch, tiwenon chok ika a fang ngeni ekkewe pesepesen ewe Ngun mi Fel, me poutano ewe inisin aramas me winiti emon souneng seni ewe achasefanin Kraist ewe Samon.”9
Ewe Aposen Paul a aiti pwe “ir ekkewe ra manau non pekin fituk ra nom fan nemenien fituk; ir ekkewe ra manau non ewe Ngun ra nom fan nemenien ewe Ngunupin.
“Ika sia nom fan nemenien inisich, nesoponon mano; nge ika sia nom fan nemenien ewe Ngunupin, nesoponon manau me kinamwe”10
A fatafatoch ngeniei pwe eu me nein ekkewe watten auchean mettoch sia kaeo non ei manau pwe sipwe anapano ach nikinikin won pekin ngun fochofoch me nemeni ach mochen mi ngaw. Ita ururun esap fokkun weires. Pwe iwe, ngunuch, minne a fen nom fan chommong fansoun me mwen inisich, me a fen finioch fan iten mettoch mi och nap seni rochopwak me non ewe nenien ngun. Me mwen a fonufan a for, sia nom non ewe nenien ngun kich at me nengin noun Sam me In non Nang, ir ekkewe ra tongeikich me sopweno ne tongeikich iei.
Me ewer, a pwan namwot sipwe fini och mettoch mi tongeni ekkesiwini manauch me pwan ekkoch finata non ena nenien me mwen manauach won fonufan. Aramas meinisin minne ra fen are repwe nom won ei fonufan ra fen finata eu mettoch mi namwot repwe fini ne etiwa an Semach won Nang kokkotun manauach ese muuch. Iwe kich meinisin sia feitto ikei ren ach sia fen fini och me angangoch won pekin ngun pwan popunuch non fenfeinno.
Ekieki usun ena fan ekkis eno chok. Iei ennetin en ion, me ennetin en ion fansoun meinisin seni nepoputan: emon at ika nengin noun Kot, ren poputan won pekin ngun non fenfeinno me fansoun mwach mi ur ren met mi tufich ese keuk. En mi—akaewin, akkom, me fansoun meinisin—emon ngun. Me iwe nupwen sia finata sipwe fori mettoch anongonong won mochenin inisich me mwen nikinikochun ngunuch, sia fini mettoch minne a ungeni ennetin me wenewenen kich ion non ngun.
Nge, esor kapas eis pwe inisich me mochenin fonufan a osukosuka ach tufichin finata. Ren ewe minen epet mi napanapen nemenano nefinach me ewe nenien ngun me mwen me iei won fonufan, mi tufich emon epwe rikieno seni nefinach me Kot me ach nikinikoch non ngun, me ach mochenin inis a tongeni nemenem ngeni met sia mochen iei chok. Ach kaeo pwe sipwe fini ekkewe mettochun Ngun me mwen ekkewe mettochun inis a eu watten popunun manauch won ei fonufan non an Semach won Nang kokkot. A pwan ewe popun pwe ewe kokkot a anongonong won ewe pechekunen me ennetin Achasefanin ach Samon, Jises Kraist, pwe ach kewe tipis, pwan ekkewe mwanino sia fori nupwen sia kuf ngeni inisich, ra tongeni pworacho me ren aier ese kouno me sia tongeni manauoch won pekin ngun. Iei ewe fansoun sipwe nemeni mochenin inisich me anneasochisi ekkewe annukun ngun an Kraist. Iwe ina pwata sisap amangano ach ranin aier.11
Aier, iwe, a winiti eu pisekin fiu a namwot non ach fiu fan iten pwisin nemeniach. Non ewe chok mwichenapen mwichefen, Preseten Russell M. Nelson a foos usun ei fiu me achema ngenikich pwe “nupwen sia fini ne aier, sia fini ne siwin! Sia mut ngeni ewe Chon Amanau ne ekkesiwinikich ngeni napanapoch. Sia finata ne mamarita non pekin ngun me weri pwapwa—ewe pwapwan ngaseno non I. Nupwen sia finata ne aier, sia finata ne winiti pwan usun chok Jises Kraist!”12
Iteitan pwin, nupwen uwa eniwinisefan angangen ai ran non iotek ren Semei won Nang, uwa tingor ren omusomus ika uwa fori mettoch mi mwan me pwon pwe upwe achocho ne aochuno nesor. Uwa nuku pwe ei sokkun aier iteitan ran a anisi nguni ne achema ngeni inisi ion a wisen nemeniei.
Pwan eu fansoun iteitan wiik sia tongeni fori ne apechekunasefanikich won pekin ngun a fis nupwen sia angei ewe sakrament non achechemenien ewe Achasefanin me tongen ach Samon, Jises Kraist, fan itach.
Pwii me fefinei, Uwa etiwakemi pwe oupwe amangano manauemi ekkis me ekieki usun ia ka nom ia non omw achocho ne pworacho ngeni mochenin inisum me ren manaman seni nang ngeni nikinikin ngunun pwe nupwen ewe fansoun a feitto, ka tongeni feinno ngeni ewe nenien ngun non eu chufengen pwapwa ren chon tongeom kewe—minne uwa pwarata me etipetekisona ne iotek fan iten non iten Jises Kraist, amen.