Pechekun non Ach kewe Pwon me Pwon mi Pin
Uwa tingoreikemi oupwe ekieki usun ekkewe pwon me pwon mi pin oua fori ren ewe Samon, me ekkoch aramas, ren nikinikin tupwon, me oupwe ennetin sinei pwe omw kapas ina omw pwon.
Pwii me fefinei, ren ach asopwano ewe kinikinin ei mwich, amo kich meinisin sipwe anommu non netipach ewe pwarata minne a fen apwarate ikenai usun ekkewe ennetin ewe kapas allimen Jises Kraist. Sia feioch ren ei fansoun mi pin sia tongeni nom fengen me apechekuna ach pwon ngeni ewe Samon Jises Kraist pwe kich Noun chon angang me I ach Samon.
Auchean ach sipwe fori me aponueta pwon me pwon mi pin a kan achouono ai ekiek. Ifa auchean ngonuk ne aponueta omw kewe kapas? ne angei apinukunuk? ne fori met ka era kepwe fori? ne achocho ne sufoniti omw kewe pwon mi pin ennetin piin? ne nikinikin emon mi tupwon? Ren ach manaueni ennet ngeni ach kewe pwon ngeni ewe Samon me pwan ekkoch, sia fetan won ewe aanen pwon mi pin ngeni Semach won Nang me sia mefi An tong non manuach.
Ach Chon Amanau Jises Kraist i ach nenien appiru mi napanap ren ifa usun sipwe fori me aponueta ach kewe pwon me pwon mi pin. A feitto fonufan ren An pwon pwe epwe fori netipen ewe Sam. A aiti ekkewe kinikinin ewe kapas allim ren kapas me foffor. A mano fan iten ach kewe tipis pwe sipwe tongeni manausefan. A aponueta An kewe pwon meinisin.
Epwe pwan nonno chok ren emon me emon kich? Met sokkon feingaw epwe tufich ika sia mwanino ekkis, mitatiw ekkis, ika sise aponueta met sia pwan ngeni non unus? Met ika sia feinno seni ach kewe pwon mi pin? Epwe wor ekkoch repwe feitto ngeni Kraist pokiten ach nenien appiru? Omw kapas mi pwan omw fofo? Apwonuetan pwon esap eu om eruni, nge a eu nikinikin manauen emon chon kunon Jises Kraist.
Ren an sineiochun ach kewe apwapwangen fotuk ewe Samon a pwon, “Oupwe pwapwa, me ousap niokus, pwe iwe Ngang ewe Samon me uwa nonnom remi, me upwe uta remi.”1 Uwa fen mefi An a nom rei nupwen ngang mi mochen an apechekun, kinamwe, me watten wewei me pechekun won pekin ngun, me uwa pwan ennetin atipetekison me kinisou fan iten An ennetin fitiei.
Ewe Samon a apasa, “Meinisin aramas minne repwe nikitano an kewe tipis me feitto ngeniei, me kokkori won itei, me anneasochisi mongungi, me apwonueta ai kewe annuk, repwe kuna won sangunun me sinei Ngang mi ennet.”2 Iwe ina An pwon mi napanapano.
Uwa kaeo auchean ai upwe aponueta ai kapas non ai ierin sarafo. Eu fansoun awewe atun uwa uta ne apasa ewe Pwonen Scout. Ach chiechi ngeni ewe Boy Scoutun America, non ei fansoun a sopwano, epwe ew auchean pisekin emwirimwir ngeniei me ewe Mwichefen. Ngeni ewe mwichen Scouts, ngeni pwan chommongun ekkewe mwan me fefin minne ra angangoch ren chon emweni Scout, ngeni pwan ekkewe inenap—ir ekkewe sipwe ennetin kinisou ngeni—me ekkewe anuon minne ra fiti Scouts, sia apasa, “Kinisou ngonuk.”
Non ei chok kinikinin ei mwich, nouch auchean soufos, Preseten Russell M. Nelson, me Elter Quentin L. Cook ra fen aporousa ekkewe ekesiwin minne epwe anisikich ne apechekuna ekewe sarafo me awenewena ach kewe mwich ren ennet minne a pwarata. Pwan fiti, non ewe Ranifen a karen no, Preseten Nelson me Preseten M. Russell Ballard ra poraus usun ewe minafon mwichen Semerit me Sarafon Ewe Mwichefenin Jises Kraist ren Aramas mi Pin non Fansoun Soponon ngeni unusen ewe Mwichefen. A eu sokkun mwich fan iten unusen fonufan minne a anongonong won ach Samon me Chon Amanau, Jises Kraist. Ewe Aewin Presetensi me Mwichen ekkewe Engon me Ruemon sia tipeu non ei minafon napanap, me uwa pwisin pwarata pwe ewe Samon a emwenikich non iteitan kinikinin ei aan. Uwa men meseik fan iten ekkewe semerit me sarafon ewe Mwichefen pwe repwe fiti ei sokkun mwich minne a anongonong rer non imwer me pwan non fan—me ren kaeon ewe kapas allim, angang ngeni ekkoch me mwich, me pwisin feffeita.
Ewe itenapen ekkewe sarafo non ier epwe eto, 2020, a foos usun an Nifai we pwon mi itefouno pwe epwe “feinno me fori.” A makkei, “Iwe non ewe fansoun ngang, Nifai, ua apasa ngeni semei we: Ngang upwe feino me fori ekkewe mettoch minne ewe Samon a annuku, pwe ngang mi sinei pwe ewe Samon esap awora ekkewe annuk ngeni kewe noun aramas, tiwenon chok ika a amonnata ew an ngenir ar repwe apwonueta ewe mettoch minne i a annuku ngenir.”3 Ina mwo a apasa me nom me nom, kich non ewe Mwichefen sia chiwen fiti ena pwon ikenai.
Iwe “feinno me fori” a wewen sipwe feffeita seni fofforun ewe fonufan, angei me fori met sia mefi non pwisin pwarata, manaueni aramasoch fen apinukunuk me nuku non fansoun mwach, fori me apwonueta ekkewe pwon mi pin ne tapweno mwirin Jises Kraist, me iwe awattenon ach tongei I, ewe Chon Amanaun unusen ewe fonufan.
Eu pwon mi pin a eu pwon mi ruu kinikinin a for nefinach me ewe Samon. Kich chon ewe Mwichifen sia pwon, atun sia papatais ne watai woch iten Jises Kraist, me manau usun I a manau. Usun chok ekkewe ra papatais non ewe konikin Mormon, sia pwon mi pin pwe sipwe iteni Noun aramas, “oua mochen mwarei fengeni an emon me emon chou, pwe repwe tongeni pan; … netipeta ren ekkewe ra netipeta; … aururu ekkewe ra mochen aurur, me oupwe chon pwarata usun Kot fansoun meinisin me non mettoch meinisin, me non neni meinisin.”4 Ach iamwir fengenikich non ewe Mwichefen a pwari ach achocho ne apwonueta ekkana tichikin pwon.
Nupwen sia ani ewe sakrament, sia asefesafani ach pwon mi pin ne angei woch Itan we me fori pwan ekkoch pwon pwe sipwe feffeita. Ach ekiek me foffor iteitan ran, ekkewe mi watte pwan kukkun me ruu, ra pwarano ukukun ach mochen ngeni Ii. An pwon mi epin ngeni kich pwe, “Iwe ika oupwe chechemeniei fansoun meinisin oupwe annomu Nguni remi.”5
Iwe ai kapas eis ikenai, ika kich mi pechekun non ach pwon me pwon mi pin, are fan ekkoch sia forir ren esapwun netipach chok, me tumunugaw ne forir iwe mecheresin ne atai? Nupwen sia era ngeni emon, “Upwe iotek fanitom,” sia fori? Nupwen sia apasa, “Upwe feitto upwe aninis,” sipwe? Nupwen sia pwon ngeni emon sipwe aniwinini ngenir ach niwinimang, sia fori? Nupwen sia eitieta pouch ne etiwa pwan emon chon ewe mwichefen non wisan minafo, wewen sipwe anisi, sia fori?
Non eu nukunion atun ngang emon anuon, inei we a mommot rei nesopun an we pet me foos ren ennetin popun usun ewe auchean manaueni ewe Kapasen Emirit. “Ngang mi sinei seni porausen ekkoch, seni ekkewe ier ano,” a apasa, “pwe aninis me tufichin mefi mettoch won pekin ngun a kukkuneno nupwen sise apwonueta ewe annukun Kapasen Emirit.” A nengeni non foun mesei kewe me uwa mefi an kewe kapas kuu netipei: “Pwon ngeniei, Ronnie, ikenai [a kokkoriei Ronnie], pwe kepwe manaueni ewe annukun Kapasen Emirit fansoun meinisin.” Uwa ennetin pwon ena ngeni i, me uwa men apwonueta non meinisin ekkei ier seni.
Ena pwon a men anisiei atun uwa emon sarafo me pwan non ewe fansoun uwa angang non neni minne a ur ren mettoch mi ngaw. Uwa fen fini met upwe fori me mwen ne anneasochisi an Kot kewe annuk, me use pwan niwinsefan ngeni. Ewe Samon a apasa, “Ngang, ewe Samon, a wor ai pwon nupwen ka fori met Uwa apasa; nge nupwen kese for met Uwa apasa, esor omw pwon.”6 Met A apasa ngeni ekkewe ra manaueni ewe annukun Kapasen Emirit? Pwe a wor ach pwonun epetin semwen, pechekun, mirit, sineioch, me chon nang ne tumuni kich.7
Fitu ier ano, am me Sister Rasband aua nom non ewe Salt Lake Temple ren ewe ririfengen me emon nouem nengin. Atun sia nom nukun ewe temple ren emon nouem nengin mi kukkun, ese tori ierin an epwe tongeni fiti ewe riri fengen, sia foos usun auchean riri fengen non an Kot temple mi pin. Usun chok inei a aitiei non ekkewe ier me mwen, aua apasa ngeni nouem we nengin, “Aua mochen omw kepwe riri non ewe temple, me aua mochen pwe kepwe pwon ngenikem pwa atun ka kuna punuomw fenfeinno, kepwe fini eu ran ren i minne oupwe riri fengeni non ewe temple.” A era ngenikem pwe epwe fori.
Non fansoun mwirin a apasa pwe am foos fengen me an pwon a anisii me achema ngenii usun “met a ennetin auchea.” Mwirinon a fori ekkoch pwon mi pin atun a riri ngeni punuwan non ewe tempel.
Preseten Nelson a aiti: “Sia ... anapano manamanen ewe Samon non manauch nupwen sia fori pwon mi pin me apwonueta ekkana pwon mi pin ren tichik. Ach pwon mi pin a foti kich ngeni I me awora ngeni kich pechekunen Kot.”8
Nupwen sia apwonueta ach pwon fengen nefinach mi fen mecheres sipwe apwonueta ach kewe pwon ngeni ewe Samon. Chechemeni an ewe Samon kapas: “Upwe apasa ngeni kemi pwe fansoun meinisin oua fori ei napanp ngeni emon pwii kei mi kisifochofoch, oua pwan for ngeni ei!”19
Ekieki me rei usun och awewen pwon non ekkewe pukefel. Ammon me ekkewe anuon noun Mosaia non ewe Puken Mormon ra pwon “pwe repwe afanafana ewe kapasen Kot.”10 Nupwen Ammon a kanapus ren ekkewe sounfiun Leiman, a feinno me mwen King Leimonai kingen ekkewe chon Leiman. A pwon ngeni ewe king, “Upwe noum chon angang.”11 Nupwen ekkewe chon sona ra feitto ar repwe sonani noun ewe king ekkewe siip, Ammon a pokueno pour kewe. Iwe a watte ukukun an ewe king mairu, me a ausening ngeni an Ammon afanafan usun ewe kapas allim me a ekesiwin.
Ruth non ewe Testamen Noom, a pwon ngeni inen punuan, “Ia kopwe feinno ie, ngang upwe pwan fituk.”12 A ennetin apwonueta an kewe kapas. Ewe Re Samaria non kapasen monomon non ewe Testamen Sofo, a pwon ngeni ewe chon tumunun ewe imwen wasona pwe ika epwe tumunu ewe chon ekkis mi feingaw pwe, “Nupwen uwa niwinsefanito, upwe niwini ngonuk met ukukun ka anusano ren atei.”13 Soram non ewe Puken Mormon, a pwon epwe feinno non ewe fonu pen ren Nifai me pwiin kewe. Nifai a makkei usun, “Nupwen Soram a fori eu pwon a akkaponu ngenikem, am kewe noninen usun i a wesino.”14
Met usun ewe pwonen noom “ngeni ekkewe semanap” minne a mak non ekkewe pukefel pwe “pwe netipen ekkewe semerit epwe kunnu ngeni semer kewe”?15 Non ewe manau me mwen ei fonufan sia fini an Kot we kokkot, sia pwon pwe sipwe anisi ne ionfengeni Israel won ir ruu pekin ewe minen epet. “Sia tonong non eu angang fengen ren ewe Samon,” Elter John A. Widtsoe a aiti non ekkewe ier ano. “Ewe efiisin ewe kokkot a siwin pwe esap chok an ewe Sam angang, me an ewe Samon angang, nge a pwan ach angang.”16
“[Ewe] ionfengen a ewe watten auchean mettoch minne a fiis won ei fonufan ikenai,” Preseten Nelson a apasa non an kewe pwenieno ewe fonufan. “Nupwen sia foos usun ewe ionfengen sia chok foos usun ekkei nongonongon ennet: pwe meinisin noun Semach won Nang semerit, won ir me ruu epekin ewe minen epet, a namwot repwe rongorong ewe porausen ewe kapas allimen Jises Kraist mi aniwinsefanito.”17
Ngang emon Aposenin ewe Samon Jises Kraist, uwa osupwano ren eu tingor me pwon. Aewin, ewe tingor: uwa tingoreikemi oupwe ekieki usun ekkewe pwon me pwon mi pin oua fori ren ewe Samon, me ekkoch aramas, ren nikinikin tupwon, me oupwe ennetin sinei pwe omw kapas ina omw pwon. Aruwen, uwa pwon ngenikemi, ika oupwe foriei, ewe Samon epwe apechekuna omw kapas me efeiochu om foffor me ren omw achocho ese muuch ne apechekuna manauemi, ami kewe famini, me ewe Mwichefenin Jises Kraist ren Aramas mi Pin non Fansoun Soponon. I epwe nonnom remi, pwii me fefinei mi achengicheng, me oupwe tongeni, ren nukunuk, nenengeni ewe ran oupwe “mummuta ne tonong non nang, ren ewe popun [oupwe] tongeni nonnom ren Kot non eu nikinikin pwapwa ese tongeni muuch … pun ewe Samon Kot a fen apasa.”18
Usun ei uwa pwarata me pwon, non iten Jises Kraist, amen.