Nepoputan
me mwan mwirin

Nepoputan

Ewe Puken Mormon ew puken pukefel mi a nonnofengen me ewe Paipen. A ew uruon an Kot angang ngeni aramasen nom non Merika me a masoweni unusen ewe kapas allim esemuch.

Ewe puk a mak seni chommong soufosun nom seni ewe ngunun osini me pwarata. Ar kewe kapas, ra makketiw won ekkewe chön seleich gold, ra apasa sefanir me ammwoch fengen seni emon soufos me sou uruo itan Mormon. Ewe uruo a awora ew uruon ru muu mi napanap. Ew a feito seni Jerusalem non 600 Ier Mwen Kraist iwe mwirin ra imufesen non ru muu, ra iteni chon Nifai me chon Leiman. Ewe ew mwich a feito akkom nupwen ewe Samon a aruka kapasan ekkewe aramas non ewe Tower Papel. Ei mwich a iteni chon Jared. Mwirin ekkoch ngorowun ier, meinisin ra mano chinon chok ekkewe chon Leiman, me ir ra nom nein ekkewe neuon chon American Indian.

Ewe mettoch a fis mi fokkun auchea a makketiw non ewe Puken Mormon ina ewe porausen an ewe Samon Jises Kraist angangen afanafan nein ekkewe chon Nifai mwirin chok An we manausefan. A wau ekkewe nongonong mi ennet an ewe kapas allim, awewei ewe kokkotun amanau, pwan pwar ngeni aramas met repwe fori ar repwe weri kinamwe non ei manau me ewe amanau esemuch non ewe manau epwe feito.

Mwirin an Mormon a awesano an mak, a wano ekkewe uruo ngeni noun we at Moronai, ewe a sopweta ekkoch pwisin an porous me opano ekkewe seleich non Chukuchukuta Kumwora. Non September 21, 1823, pwan ewe chok Moronai, nge a chok watte ningan seni nom, emon mi manausefan, a pwato ren ewe Soufos Joseph Smith me aiti usun ewe uruon nom me an epwene siwin kapasan ngeni Kapasen Merika.

Non pungun kokkotun fansoun ekkewe seleich ra katou ngeni Joseph Smith, ewe a wisen siwini kapaser seni ewe niffang me manamanen Kot. Ewe uruo iei ra mak non chommong kapasen fonu usun pwan ew pisekin pwarata mi fo a pwarata pwe Jises Kraist I Noun ewe Kot mi manau me meinisin ir repwe feito Ren me aneasochisi ekkewe annuk me ekkewe angangepin An ewe kapas allim repwe weri manau.

Ewe Soufos Joseph Smith a apasa usun ei uruo: “Ua ereni pwi kewe pwe ewe Puken Mormon a unusen pung me nein puk meinisin me won fonufan, me ewe efou foun nongonongen ach namanam, me emon aramas a tongeni arap ngeni Kot seni an manaueni annukun ei puk, me nein puk meinisin.”

Me nukun Joseph Smith, ewe Samon a pwan awora engon me emon ar repwe pwisin kuna ekkewe chön seleich gold pwe repwe chon pwarata mi auchea usun ewe ennet me manamanen ewe Puken Mormon. Ar kewe kapasen pwarata mi mak ra kapachenong ren ei ra iteni “Ewe Kapasen Pwarata an ekkewe Unumon Chon Pwarata” me “Ewe Kapasen Pwarata an ekkewe Wanimon Chon Pwarata.”

Sia tingor ngeni aramas meinisin ekis meinisin ar repwe anneani ewe Puken Mormon, pwe repwe ekipwichi non netiper ewe porous a nom non, me pwan eis ren Kot, ewe Sam EseMuch, non iten Kraist ika ei puk mi ennet. Ekkewe ra mochen sinei usun ei mettoch me tingor non nuku repwe angei ew kapasen pwaratan ennetin me manamanen seni ewe pochokunen ewe Ngun mi Fel. (Nengeni Moronai 10:3–5.)

Ekkewe ra angei ei manamanen pwarata me ren ewe Ngun mi Fel repwe pwan sinei me ren chok ewe manaman pwe Jises Kraist I ewe Chon Amanauen ei fonufan, pwe Joseph Smith I Noun chon pwarata me soufosun non ekkei fansoun soponon, me pwe Ewe Mwichefenin Jises Kraist ren Aramas mi Pin non Fansoun Soponon an ewe Samon muu a pwan for sefan won ei fonufan, amonnetan ngeni ewe Aruwen Wareto an ewe Messiah.